Jóɓò 13 - Ɓǎsɔ́ɔ̀ Báɓòɔ̀

Jóɓò kpa wuɖu dyúa

¹ “Ḿ ɖǎ ma ɖɛ séín ɓěa dyé kĩ́ín. Ḿ ɖǎ ma ɖɛ séín ɓěa wɔ̃́ kĩ́ín, ké ḿ wɔ̃́ɔ múin.

² Ɓě se hwòɖǒ fɔ̀nɔ̀ ɓɛ́ ɓě ké ḿ dyí zi. Ḿ fɔ̀nɔ̀ hwòɖǒ kà ɓě mɔ̀ùn nìà kɛ.

³ Kɛɛ ɖɛ kpɔ̃ ḿ hwòɖǒɛɛ mɔ̀ ɓɛ́ ḿ ké kpé-séín-ɓéɖé-Gèɖèpɔ́ɔ̀ gbo wùɖù, ɓɛ́ ḿ kè ɔ ké ní zaaɔ̀ zi.

⁴ Ɓě mɔ̀ùn ɓáìn jǎàɔ̀ ɖɛ kɔ̃in dyììn ɖé se-tɔ́mɔ́-tɔ́mɔ́ mú. Ɓě hwɔìn nyɔ-hwǒò-nyɔ̀ ɓɛ́ ɔ se nyɔ ɖò dyi kánáìn ɓɛ́ìn nyɛ.

⁵ Ɓě dyiɔ́ má gìɖìǐ nìǐn, ɔ muɔ́ fɔ̀nɔ̀-hwòɖǒ-ɖɛ̀ jǔùn ɓó ɓě bìì.

⁶ “Ɓě tò ḿ ɖùǔ gbo. Ɓě nyí ḿ ti, ɓɛ́ ḿ ké ɖɛ kɔ̃in zaìn.

⁷ Ɓěɛ̀ hwòɖǒ ɖá ɓě mu se tɔ́mɔ́ùn ɓó Gèɖèpɔ́ɔ̀ bììe? Ɓěɛ̀ hwòɖǒ ɖá ɓě mu ɖɛ se dyí sɛ́ɖɛ́ìn nyɛɛ cɛ̃ìn ɓó ɔ bììe?

⁸ Ɓě mɔ́ Gèɖèpɔ́ɔ̀ hwòɖǒǔn gbo zĩ̀ɛ̀n dyie? Ɓě mɔ́ ɔ bìì zaa ziɛ dyi ɖé zaa-wɔ̃-pòìn-naínɔ̀e?

⁹ Gèɖèpɔ́ɔ̀ dyi ɓě jè múin ɖe ní, ɓěɛ̀ hwòɖǒ ɖá ɔ mu dyíin nɔ̀mɔ̀ùn ɓó ɓě bììe? Ɓěɛ̀ hwòɖǒ ɖá ɓě ɓɛ́ìn Gèɖèpɔ́ɔ̀ cáa kà ɓě cáà nyɔǔn-dyùɛe?

¹⁰ Ɔ jǔ ké ɓě dyi Gèɖèpɔ́ɔ̀ hwòɖǒǔn gbo zĩ̀ìn vǐè-kà ní, ɔ mu ɓě gǎ kɔ̃ tòùn.

¹¹ Ɔ dĩ́ín-dĩ̀ìnɔ̀ se ɓě fã̀àǔn poɛ́ muù? Ɔ díɖíɔ̀ se ɓě taɓaá muù?

¹² Nɔ́ɔ́ vɛ̀nɛ̀-vɛ̀nɛ̀ ɓě ɓɛ́ ɓě poà kɛɛ se kpáná ɖò mú nì. Wa nì kà tĩ́ɔ-pɛ̀ɛ̀ nìà kɛ. Ɓěɛ̀ zaa-zi-wùɖù ɓěɔ̀ nì pū kà mɛ-dyàà wɛ̀ìn dyi nìà kɛ.

¹³ “Ɓě nì gìɖìǐ. Ɓě táà ḿ dyi, ɓɛ́ ḿ ké wùɖù. Ɖɛ mu ḿ gbo kpáùn ɓóɛ jèɛɛ mɛ kpá ḿ gbo.

¹⁴ Nàdǐɔ̀ mɛ dyi ḿ kɔ̃. Ḿ wɔ̃́ ɓɛ́ ḿ ké ní fɛ̀ɛ̀ɔ̀ hwòɖǒ gbo zà.

¹⁵ Kɛbì ɔ mɛ ɖáɓá ḿ wɛ̃ɛ, ní mu ɔ hwòɖǒ kɔ̃ dèìn. Ké ní mu ní zaaɔ̀ ziìn ɓó ɔ dyúa wɛ̃́ɛ́.

¹⁶ Ti ɖíɛ́ ɓěǐn, ní hwòɖǒ-ku-kuɔ̀ mu dyɛ̀ɛ̀ ḿ póìn, sepóɛɖé nyɔ ɓě nyɛ́à Gèɖèpɔ́ɔ̀ múɛɛ ɖò se ɓó ɔ dyúa dyiɛ ɓɛ́ìn.

¹⁷ Ɓě tò ní wuɖuɔ̀ ɖùǔ gbo. Ɓě mɛ wɔ̃́ ní ɖɛ-kɔ̃in-zaìn-wùɖùɔ̀ múin.

¹⁸ Gmɔ̀ nɔ̄, ḿ ɖǎ ti dyé, ɓɛ́ ḿ ké ní zaaɔ̀ zi, sepóɛɖé ḿ dyuòɛ̀ kà ḿ ɓíɖí ɓɛ̀ɖɛ̀ìn dyíɛ.

¹⁹ “Gèɖèpɔ́ɔ̀, m̀ ɓɛ́ìn ḿ zaa kpɔ̃̀ìne? Ɔ dyi ná nìǐn, ḿ wɔ̃́ ɓɛ́ ḿ ké ní wɔ̃ɔ̀ kã, ɓɛ́ ḿ ké mɛ́.

²⁰ Ɓɔ̌ɔ̀, ḿ mɛ zɔ̀ìn m̀ ɖɛ sɔ̃́. Ní ɓaà m̀ ní, wɔ̃́ìn wa jè gbo. Ɔ dyi ná nìǐn, ḿ se ḿ mìɔùn m̀ dyí vǐèɛ̌ mu.

²¹ Ɖɛ ɓěɔ̀ mɔ̀, ɓɔ́ ḿ gǎ kɔ̃ tòɛ̀ ɖe, ké nì díɖí mɛ ɓɔ́ ḿ taɓaa ɖe.

²² Ɔ dyi ná nìǐn, nìí, ɖá ḿ, ké ní mu m̀ wɔ̃́ùn, mɔɔ ḿ mɛ wùɖù, ɓɛ́ m̀ ké ḿ gɔ̃̌ jǔ.

²³ Nàmàǔn kè ɖɛ-xwa-bĩ-bĩ jĩ̀ xwɛ̌ ḿ nyuɛ́? Nyuɛ ɓɛ́ ḿ ké wa dyí dyuò.

²⁴ “Ɖɛ́ kɔ̃̀ jè m̀ pòìn ḿ dyúa xwáɖáún, ɓɛ́ m̀ dyià ḿ kpɔ̃ kà nyɔ kpɔ̃à nyɔ-mú-nyɛ́-nyɔ̀ kɛ́?

²⁵ Ɖɛ́ kɔ̃̀ jè m̀ nìà mɔ̄ hwɔìn fĩìn-mì sùà nìà kɛɛ fã̀àǔn poɛń nyɛ́? Ɖɛ́ kɔ̃̀ jè m̀ nìà mɔ̄ hwɔìn mɔɔ́-fèɖè nìà kɛɛ kíɖíí kpáuń wɛ̃́?

²⁶ Dyéɛ, m̀ ɖǎ ḿ zaa kàmà wɔ̃ kɛɛ kpɔ̃̀ìn, ké m̀ kpɔ̃̀ìn nàmàǔn ɓě ɓɛ́ ḿ nyuó zɔ̃̌ɔ̀ ní nyɔ-gmɔ̀-tìǐn nyɛɛ ḿ ɓoi ke.

²⁷ M̀ po ḿ gbòò ɓo, Ké mɔ̀ǔn zà ḿ dyéɖé bũ̌. Ké m̀ gmɔìn ní ɓo-bɛ̃̀ séín múin.

²⁸ Ní kpóɖó-dyùàɔ̀ nì zɔ̃̌uń, ké ní fɔ́ɔ̀ nì ɖeɛń kà ɖɛ ɖò dyià zɔ̃̌ ní ɔ ɖeà ɓó dyiɛ, mɔɔ kà mú-po-ɖɔ̀ ɓɛ́ nyaa-ɓéɖé ɓɛ kɛɛ nìà kɛ.