Jóɓò 12 - Ɓǎsɔ́ɔ̀ Báɓòɔ̀

Jóɓò zà ɖé wuɖu ɖe

¹ Ti ɓɛ́ Zófà dè ma wuɖu dyiɛɛ, Jóɓò zà ma ɖé wuɖu, ké ɔ ɖá,

² “Ḿ dyuòɛ̀ dyí wáɖáá kà ɓě mɔ̀ hwòɖǒ-fɔ̀nɔ̀-nyɔ̀ ɓěɔ̀ kɛ, ké ɓě dyi mɛ́ín, ɓě kè fɔ̀nɔ̀-hwòɖǒ mu mɛ́ìn nyɛ.

³ Ɓě se ɖɛ-múin-wɔ̃́-wɔ̃́ ɓéɖé ɓɛ́ ɓě ké mɔ́ún dyí zi. Ḿ fɔ̀nɔ̀ hwòɖǒ ɖekè kà ɓě mɔ̀ùn nìà kɛ. Nyɛ́ se ɖɛ ɓě kɔ̃̀ jè ɓě cɛ̃à kɛɛ dyuò kɛ́?

⁴ Mɔ̄ mɔ̀ǎ dyɔ́-cù ɖé ní ɓǎto ɓěɔ̀ gbo. Mɔ̄ mɔ̀ nyɔ dyi ma Gèɖèpɔ́ɔ̀ ɖá ní ɔ wɔ̃́ ma ḿ wɛ̃ɛ, mɔ̄ mɔ̀ dyí-sɛ́ɖɛ́ìn-nyɔ̀ ɓɛ́ ḿ se kɛɛ ɖò ɓéɖéɛɛ, mɔ̄ mɔ̀ǎ dyɔ́-cù ɓó kàǔn.

⁵ Nyɔ ɓě ɓɛ́ wa nì nɔ̀mɔ̀ dyíin múɛɛ, wa ɓaɖa gǎ-dyé-nyɔ̀ ɓěɔ̀ dyɔ́. Dɛ̀ ɓɛ́ gǎ dyé gǎa, ɓóɛ̀ ɔ pa.

⁶ Gìɖìǐ nì ɖé sṹún-gɔ̀-nyɔ̀ ɓěɔ̀ ɓíɖí-taún, ké nyɔ ɓě ɓɛ́ wa nyu Gèɖèpɔ́ɔ̀ dyoɖoún-po-ɖɛ̀ bũ̌ teeɛɛ, wa nyànà dyi kóɖó-kóɖó. Waà kpéɔ̀ mɔ̀ waà gèɖèpɔ́ɔ̀.

⁷ “Mu, ɓɛ́ m̀ ké xwáɖá-xwíɖíi-nìmìì ɓěɔ̀ kè naà ɓěɔ̀ dyi diè. Wa mu m̀ Gèɖèpɔ́ɔ̀ jè tɛ̀mɛ̀ìn.

⁸ Diè nimii tɔ̀ɔ̀ ɓěɔ̀ kè zimii ɓěɔ̀ dyi, ké wa mu m̀ Gèɖèpɔ́ɔ̀ jè tɛ̀mɛ̀ìn ɖekè.

⁹ Ɖɛ ɓěɛ̀ séín dyuòɛ̀ dyí, kà Bounɓoɔ̀ mɔ̀ nyɔ kɔ̃̀ ɖɛ séín kpáa wuɖuíɛ.

¹⁰ Gèɖèpɔ́ɔ̀ mɔ̀ nyɔ ɓéɖé ɖɛ séín ɔ mɛà kɛ kè nyɔ séínɛ̀ fɛ̀ɛ̀ xwa.

¹¹ Má, ɖùǔɔ̀ wɔ̃́ wuɖu ɓě, ké ɔ dyuò wa zaìn gboi dyí, kà dyúáɖò kà wɔ̃ɔ̀ dɔ̃̌à ɖɛ wɔ̃, ké ɔ dyuò ɖɛ ɖéèɛ kè ɖɛ se ɖéèɛɛ zaìn gboi dyíɛe?

¹² “Nyɔ sùà ɓě mɔ̀ hwòɖǒ-fɔ̀nɔ̀-nyɔ̀ mìɔ. Kà nyɔ nyu hwèɖèɛ̀n nyɛɛ, kǎà ɔ nyu ɖɛ múin wɔ̃́ɔ ɖe mìɔ.

¹³ Kɛɛ Gèɖèpɔ́ɔ̀ mɔ̀ nyɔ ɓéɖé fɔ̀nɔ̀-hwòɖǒ kè kpé. Ɔ mɔ̀ nyɔ ɓéɖé nyɔ-náún-po-wùɖù sɛ́ɖɛ́ìn dyí kè ɖɛ-múin-wɔ̃́-wɔ̃́.

¹⁴ Ɖɛ ɓɛ́ Gèɖèpɔ́ɔ̀ wáɖáa, nyɔ ɖò seɛ poɛ ɓɛ́ìn ɖe. Ké nyɔ ɓɛ́ Gèɖèpɔ́ɔ̀ po kpɔɖɔ ɖeín nyɛɛ, nyɔ ɖò se ɖé ɔ zàà ɓɛ́ìn.

¹⁵ Ɔ dyi níɔ̀ dyí kpɔ̃ ké ɔ se ɖaɓa ní, ɖɛ séín dyɛ ɓóɖó-kpàà kɔ̃in. Ɔ dyi níɔ̀ sɔ̃ kɔ̃ zà ní, níɔ̀ dyíìn ɓóɖó-kpàà kɔ̃in.

¹⁶ Gèɖèpɔ́ɔ̀ ɓéɖé kpé, ké ɔ mɔ̀ to-ɖu-nyɔ̀. Nyɔ-cá-nyɔ̀ɔ̀ kè nyɔ ɓɛ́ ɔ cáà kɛɛ, wa séín nì ɖé ɔ xwaún.

¹⁷ Ɔ zà gɔ̌mànà-nyɔ̀ ɓěɔ̀ fɔ̀nɔ̀-hwòɖǒ xwai, ké ɔ nyuɛ ké zaa-wɔ̃-po-nyɔ̀ ɓěɔ̀ zɛ̃̀ìn zuɖuu-nyɔ̀ mú.

¹⁸ Ɔ zà kã́á ɓě waà kã́á-kpèɔ̀ xwai, ké ɔ nyu wa kà gǐì nìà kɛ.

¹⁹ Ɔ zà sáa-zà-nyɔ̀ ɓěɔ̀ kpé xwai, ké ɔ zà nyɔ-wuɖuí-kɔ̃̀-nyɔ̀ ɓěɔ̀ kpé xwai.

²⁰ Ɔ kã nyɔ ɓě ɓɛ́ nyɔǔn ɓě dè hwòɖǒ kɔ̃ɛɛ wɔ̃, ké ɔ zà nyɔ sùà ɓěɔ̀ waà ɖɛ-múin-wɔ̃́-wɔ̃́ɔ̀ xwa.

²¹ Ɔ ɓaɖa nyɔ-wuɖuí-kɔ̃̀-nyɔ̀ ɓěɔ̀ dyɔ́, ké ɔ zà gana-nyɔ̀ ɓěɔ̀ kpé xwa.

²² Ɔ zɛ̃̀ìn tíe-kpò kpɛ̃̀ ce mú.

²³ Ɔ mɔ̀ ɓóɖó ɓě ɓóɖó-dù vɛ̀nɛ̀ kè ɓóɖó-dù ɓéɖé kpé ɓě mú-nyu-nyɔ̀. Sɔ̀ìn ɓóɛ gboɛɛ ní, nìí, ɔ ɖu wa toún, ké ɔ gbɔɔ̀ wa mú ɖe.

²⁴ Ɔ nyu ɓóɖó-nàìn-nyɔ̀ ɓěɔ̀ zuɖuu-nyɔ̀ mú, ké ɔ nyuɛ ké wa té gbǎùn-fúɖúá kɔ̃̀ kɔ̃ wa se hwìè dyéɛ ɓɛ́ìn nyɛɛ kɔ̃ dyi.

²⁵ Wa nì dyi ɓɛɛ̀ǐn ɖé tíe-kpòɔ̀ mú, dɛ̀ ɓɛ́ wa se ce ɖò dyéɛ ɓɛ́ìn nyɛ. Ɔ nyuɛ ké wa ɓéɖé dyi ɓuɖuɛ̌n kà nɔmɔɔ-nyu-nyɔ̀ nyuà kɛ.