Jóɓò 11 - Ɓǎsɔ́ɔ̀ Báɓòɔ̀

Ɖɛ Zófà cɛ̃ ma kɛɛ kɛà kɛ̀

¹ Ti ɓɛ́ Jóɓò dè ma wuɖu dyiɛɛ, Zófà ɓɛ́ ɔ mɔ̀à Náámà-nyɔ̀ɔ̀ kɛɛ zà ma ɖé wuɖu, ké ɔ ɖá,

² “Nì hwòɖǒ ɖá wuɖu kúɖúú ɓě ɓɛ́ m̀ wùɖùà kɛɛ mu ná sèìn pū, ɓɛ́ nyɔ ɖò ké seɛ gɔ̃̌ jǔe? Nì hwòɖǒ ɖá ɖɛ kúɖúú cɛ̃-cɛ̃ nyu nyɔ dyí-sɛ́ɖɛ́ìn-nyɔ̀ múe?

³ Nì hwòɖǒ ɖá nì wuɖu fóɖóún kúɖúú cɛ̃-cɛ̃ɔ̀ ɓɛ́ìn nyɔǔn-dyùɛ̀ wɔ̃ kãae? M̀ dyi nyɔǔn dyɔ́ ɓaɖa ní, nyɔ ɖò mɛ ɓɔ́ mɔ̀ùn dɛ̃ín poɛe?

⁴ M̀ ɖá ɖɛ m̀ cɛ̃à kɛɛ mɔ̀ jǎà, ké m̀ sɛ́ɖɛ́ìn dyí ɖé Gèɖèpɔ́ɔ̀ dyéɖéín.

⁵ Nyɛ́ ɖá Gèɖèpɔ́ɔ̀ ɓáàɔ̌ má wɔ̃, ɓɛ́ ɔ kéɔ́ má m̀ gbo wùɖùɛ́?

⁶ Ɔ dyiɔ́ ná nìǐn, ɔ muɔ́ má m̀ vǐè-ɖɛ̀ ɓě nì ɖé ɔ fɔ̀nɔ̀-hwòɖǒɔ̀ múɛɛ m̀ gbo cɛ̃ìn, sepóɛɖé ɔ nììn fɔ̀nɔ̀-hwòɖǒɔ̀ ɓéɖé hwìè kò-kò. M̀ mɛ dyuòɛ̀ dyí kà gǎ ɓɛ́ Gèɖèpɔ́ɔ̀ tòà m̀ kɔ̃ɛɛ ɓíè dyí mìɔ kɛ. Ɔ se gǎ jĩ̀ kà m̀ ɓéɖé ɓɛ́ m̀ kéɔ́ má dyé ɓó nì nàmàǔn ɓěɔ̀ jè kɛ.

⁷ “M̀ ɓɛ́ìn kà kpé-séín-ɓéɖé-Gèɖèpɔ́ɔ̀ nyu ɓɛ́ɛ kɛ kè dɛ̀ ɔ fɔ̀nɔ̀-hwòɖǒɔ̀ sèìn nyɛɛ da dyéɛɛ̀?

⁸ Ɔ nyini ɖéé ɖé dyɔɔ̀ kɔ̃in. Ɖɛ́ m̀ ɓɛ́ìn nyuɛ kɛ́? Ɔ mu hwuɖu, ké ɔ zi ɖé dɛ̀ nyɔ ɓě ɖǎà mɛ́ɛ muà kɛ. Ɖɛ́ m̀ ɓɛ́ìn dyuòɛ̀ kɛ́?

⁹ M̀ dyiɛ ɖàɓàìn ní, ɔ tɔ̀mɔ̀ ké ɔ zi ɓóɖó-kpàà dyí. Ɔ ɓúá dyí ké ɔ zi dyóóɔ̀ dyí.

¹⁰ Gèɖèpɔ́ɔ̀ dyi nyɔ ɖò kpɔ̃, ké ɔ dyi ɔ kpɔɖɔ ɖeín po, ké ɔ dyi ɔ zaa-wɔ̃-po-nyɔ̀ dyúa kpa ní, nyɛ́ ɓɛ́ìn ɔ ɓɔ́í poɛ kɛ́?

¹¹ Gèɖèpɔ́ɔ̀ dyuò nyɔ-wuɖu-fóɖóún-mú-cáìn-nyɔ̀ ɓěɔ̀ dyí. Nì hwòɖǒ ɖá ɔ dyi ɖɛ-gbà-nyu-nyu dyé ní, ɔ seɛ dyéɖé gbo dèɛ̌ mue?

¹² Jǎkasì wóɖóìn dyɛ nyɔǔn-dyù, hwɛ̀ ké zuɖuu-nyɔ̀ mɔ̀ùn fɔ̀nɔ̀ dyɛ hwòɖǒ.

¹³ “Jóɓò, sɛ́ɖɛ́ìn nì hwòɖǒ-dyùàɔ̀ dyí ɓó Gèɖèpɔ́ɔ̀ gbo. Tò Gèɖèpɔ́ɔ̀ gbo sɔ̃ ɖé ɓaà-ɓaà mú.

¹⁴ Ɖɛ gbà ɖò dyi m̀ xwaún nìǐn, táà dyi, ké mɔ̀ǔn ɖá ɓɛ́ ɖɛ gbà ɖò ké ɖé nì taàɔ̀ mú nì.

¹⁵ Ɔ dyi ná nìǐn, nì mu dyúa dyií ɖúùn, ké dɛ̃ se m̀ nyuɛ́ mu. Nì mu dyi nyànàùn kóɖó-kóɖó, ké m̀ se fɛ̃̀ǐn mu.

¹⁶ Ké nì fũ̀à-fṹá-ɖɛ̀ séín ɓěɔ̀ jè mu m̀ hwìɖǐi sɔ̀ùn. Ɔ mu nììn pū kà dyíí-nì zià dyi ní nyɔ ní dyéà ɖeɛɛ jè nyuà nìɛ̀ kɛ.

¹⁷ Nì cĩ́-cĩ́ɔ̀ mu fãùn ɓɛ́ ɔ ké dyóɖóaún sá-sá dyí zi, ké tíe-kpò séín nì ɖéɛ múɛɛ mu fãùn kà zɔ̃-zɔ̃-ɓàɖà nìà kɛ.

¹⁸ Ɔ dyi ná nìǐn, nì mu hwòɖǒ-po-naín ɓéɖéìn, ké nì mu dyi nyànàùn kóɖó-kóɖó. Gèɖèpɔ́ɔ̀ mu m̀ dyí gmɔ̀ùn, ɓɛ́ ɔ ké m̀ fɔ̀-fɔ̀ nyí.

¹⁹ Ké nì mu dyi pɛ̃́ìn, ké nyɔ ɖò se m̀ fã̀àǔn poɛ́ mu. Nyɔ ɓáún-ɓáún mu dyiìn, ɓɛ́ wa ké m̀ gbo-kpá-kpá zɔ̀ìn.

²⁰ Kɛɛ hwòɖǒ-kɔ̃in-nyìnììn-nyɔ̀ ɓěɔ̀ se kà wa ké póɛ nyuɛɛ dyéɛ ɓɛ́ìn. Ɖɛ dyúáɖò nì ɓó wa dyúa nyɛ̀nɛ̀ɛ̀ kɛɛ mɔ̀, wa ké waà fɛ̀ɛ̀-ɖé-hwɛ̀-wèɔ̀ jè dya gmɔ̀.”