Jóɓò 10 - Ɓǎsɔ́ɔ̀ Báɓòɔ̀

¹ Jóɓò kpa ma wuɖu dyúa, ké ɔ ɖá, “Ḿ ɖǎ cĩ́-cĩ́ dyí sa. Gèɖèpɔ́ɔ̀, tò ní ka-wùɖùɔ̀ ɖùǔ gbo, sepóɛɖé ní hwòɖǒ kpá ɖé ɖei mìɔ.

² Ɓɔ́ ḿ zaa kpɔ̃̀ìn, kɛɛ zàìn ḿ ɖɛ gbà ɓɛ́ ḿ nyuà kɛɛ da.

³ Ɔ mɔ̀ ɖɛ sɛ́ɖɛ́ìn dyí ɖé m̀ dyéɖéín ɓɛ́ m̀ ké ḿ kànàǎ-kà kpɔ̃ɔ̀? Ɔ mɔ̀ ɖɛ sɛ́ɖɛ́ìn dyí ɓɛ́ m̀ ké se mɔ̄ mɔ̀à nì sɔ̃ɔ̀ mɛɛ-ɖɛ̀ɔ̀ kɛɛ ɖɛ ɖá, nìí ɓɛ́ nì hwòɖǒ ké hwòɖǒ-kɔ̃in-nyìnììn-nyɔ̀ ɓěɔ̀ dyí-sɔ́-ɖɛ̀ ɓěɔ̀ múin dèìne?

⁴ Kà à mɔ̀ toɖo-kɔ̃-nyɔ̀ nyuà ɖɛ dyéɛ kɛɛ, kǎà nì nyu ɖɛ dyéɛe?

⁵ Ɓɔ̌ɔ̀, nì fɛ̀ɛ̀ɔ̀ xwã́ ɓoún, kà toɖo-kɔ̃-nyɔ̀ fɛ̀ɛ̀ xwã́à ɓoún wɛ̃ɛ̀?

⁶ Kà ɔ seà ná nìɛɛ, nìí, ɖɛ́ kɔ̃̀ jè m̀ nìà ní ɖɛ gbà ɓěɔ̀ jè múin ɖeɛń, ké m̀ nìà ní nàmàǔn ɓěɔ̀ dyi mɔ́uń wɛ̃́?

⁷ M̀ dyuòɛ̀ kà ḿ se ɖɛ gbà ɖò nyuɛ, ké m̀ dyuòɛ̀ kà nyɔ ɖò se nì ɓɛ́ ɔ ké ḿ ɖé m̀ xwaún zà kɛ.

⁸ “Mɔ̀ mɔ̀ nyɔ kɔ̃̀ sɔ̃ mɛ ma ḿ. Kɛɛ dyéɛ, nì sɔ̃ dyúáɖò mɛ ma kà ḿ wɛ̃ɛ nìà ḿ mú gbɔɔ̀ǔn wɛ̃̀.

⁹ Ɔ mɛ nì m̀ hwìɖǐi kà m̀ mɛ ma ḿ sɔ̀ìn ɖé mɛ múɛ. Kɛɛ ɓó kàǔn wɛ̃ɛ, nì mɔ́á ḿ dyi wàìn dyi, ɓɛ́ ḿ kéá pù-ɓóɖó jǔ ɖeè?

¹⁰ Má, m̀ po ma ḿ ɖé ḿ ɖe xwíníín kà nyɔ poà ní ɖɛ ɖò múɛ, ké ḿ ɖú ma ɖé ɓúá kpàǐe?

¹¹ M̀ mɛ ma ní kpá kè tɛ̃̀ìn ɓěɔ̀, hwɛ̀ ké m̀ nyu fɔ́ kè ku, ké wa mɔ̀ ɖɔ ké m̀ poɛ ḿ mú.

¹² M̀ ɖǎ ḿ fɛ̀ɛ̀ kè nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ nyí, ké nì nyɔ-dyí-gmɔ̀-gmɔ̀ɔ̀ ɖǎ ní fɛ̀ɛ̀ɔ̀ dyi dè.

¹³ Kɛɛ ɓó kàǔn wɛ̃ɛ, ḿ ɖǎa dyuò kà ní bũ̌in puà jè nì ma ɖé m̀ hwòɖǒ bũ̌ kánáá pū kɛ.

¹⁴ M̀ nì ḿ dyéɖé gbo dèɛ̌n, ɓɛ́ m̀ kéɛ dyé kɛbì ní mu nàmàǔn nyuùn ní, nìí ɓɛ́ m̀ ké se ḿ kɔ̃in zĩ̀ìn.

¹⁵ Ḿ dyi kà nàmàǔn ɖò nyu nyɛ̀nɛ̀ɛ̀ ní, nìí, ḿ dyé m̀ zaa dyéɖéín. Ḿ dyi ɖɛ sɛ́ɖɛ́ìn dyíɛɛ nyu ní, mɔ́ún dyéɛ ɓàìn-ɓàìn ɖò dyí. Dɛ̃ ɓáìn ḿ kɔ̃in, ké fũ̀à-fṹá dyíìn ḿ múin.

¹⁶ Ḿ dyiá kà dú dyií ɖúɛ mu nyɛ̀nɛ̀ɛ̀ ní, m̀ kpá ḿ kɔ̃ ɖe kà ganìǎ kpɔ̃à ɖɛ ɖò kɛ. M̀ nyu ḿ zɛ̃̀ìn-ɖɛ̀ vɛ̀nɛ̀-vɛ̀nɛ̀ ɓěɔ̀ bũ̌, kɛɛ mɛ̀nɛ̌-kèǐn ɔ mɔ̀ ɓɛ́ wa ké ḿ bũ̌in puà jè.

¹⁷ M̀ nì zàse ɖìè ɓě dyàǔn ɓó ní jè kánáá pū. M̀ nì nì dyoɖo-hwòɖòɔ̀ wɔ̃ kùɛ̌n kánáá pū ɓó ḿ kɔ̃. Ní gbo-vɔ̃-nyɔ̀ ɓě ɓɛ́ m̀ dyà ḿ kɔ̃ɛɛ nì kɔ̃ kpáuń kánáá pū.

¹⁸ “Ɖɛ́ kɔ̃̀ jè m̀ zàà ḿ ɖé ḿ ɖe xwíníín nyɛ́? Ɔ muɔ́ má dyíin nɔ̀mɔ̀ùn ɓɛ́ ḿ kéɔ́ má ɖé mɛ́ìn ké ɔ zi ɓɛ́ nyɔ ɖò kéɔ́ ḿ dyéɖéí dèɛɛ dyí.

¹⁹ Ɔ muɔ́ má dyíin nɔ̀mɔ̀ùn ɓɛ́ ḿ kéɔ́ nì pū kà nyɔ seɔ́ kà nì fɔɔ cá kɛ, ɓɛ́ ḿ kéɔ́ ɖé ḿ ɖe xwíníín sɔ̀ìn nyɛ̀nɛ̀ɛ̀, ɓɛ́ wa kéɔ́ ḿ xwɛ́-ɓìɔ̀ mú po.

²⁰ Má, ti wè sè ɓó ɓɛ́ ḿ ké toɖo-kpàà kɔ̃ cĩ́ɛɛ se ɓoún tɔ̀mɔ̀ ɖee? Táà wɛ́ɛ ḿ dyi, ɓɛ́ ní hwòɖǒ ké dyi dè ɓó wé sɔ̃́ wè sèà ɓóɛɛ xwíníín,

²¹ hwɛ̀ ɓɛ́ ḿ ké dɛ̀ nyɔ muà ní nyɔ ní dyià ɖeɛɛ mu. Ɔ mɔ̀ dɛ̀ ɓɛ́ tíe-kpò kpɛ̃̀ nìà, ké gĩɔ nììn zùùɔ̀ nìà kɛ.

²² Ɔ mɔ̀ dɛ̀ ɓɛ́ tíe-kpò kpɛ̃̀ nìà, ɓɛ́ ɖɛ séín dyià ɖé kɔ̃in cá kɛ. Ɔ mɔ̀ dɛ̀ ɓɛ́ ce ɖò se nì fɔɔ, ɔ sèìn tíe-kpò saá-saá kɛ.”