Jĩ́ìn 5 - Ɓǎsɔ́ɔ̀ Báɓòɔ̀

Bã-nyɔ̀ ɓěɔ̀ náún-po-po

¹ Ɓě mɔ̀ bã-nyɔ̀ ɓě kɛɛ, ɓě tò ḿ gbo ɖùǔ. Ɓě mɛ vĩ̌, ɓɛ́ ɓě ké kpé po, sepóɛɖé ɓó nyɔǔn-gǎ-dyéìn-ɖɛ̀ ɓě ɓɛ́ wa nìà ɓě kɔ̃ dyiɛń nyɛɛ jè.

² Ɓěɛ̀ bã-ɖɛ̀ ɓěɔ̀ ɖǎ zɔ̃̀, ké ɓéɖé ɖǎ ɓěɛ̀ ɖɔ ɓěɔ̀ ɓɛ.

³ Ɓěɛ̀ góò kè ɓěɛ̀ séɓàɖà ɓěɔ̀ ɖǎ kɛɛ kpɔ̃ɔ hwɔ, ké kɛɛ ɓě ɓɛ́ wa kpɔ̃à kɛɛ muɛ zàse ɓě jǔùn, ɓɛ́ wa ké ɓě zaa kpɔ̃̀ìn, ké wa mu ɓěɛ̀ fɔ́ ɓěɔ̀ ɓɛìn kà nyɛ ɓɛà ɖɛɛ. Ɓě ɖǎ bã-ɖɛ̀ ɓě dyi dè ɓó wé hwɛ̀ìn-gbɔ ɓěa xwíníín.

⁴ Ḿ ɖáo, ɓě séè nyɔ ɓě cɛ̃à ɓěɛ̀ mɔɔ́ ɓěɔ̀ kɛɛ pɛ́ɛ̀, ké ɔ nì kà ɖɛ ɓě kéɔ́ kà wa pɛ́ɛ̀ìn nyɛɛ nìà mú pánáuń wɛ̃. Ké mɔɔ́-cɛ̃-nyɔ̀ ɓěɔ̀ kpé-po-wùɖù ɓěɔ̀ ɖǎ Bounɓo mɔ̀ nyɔ nìà ɖɛ séín kɔ̃in nyɛɛ ɖùǔn kpá.

⁵ Ɓě ɓéɖé bã-ɖɛ̀ pàɖǎ, ké ɓě nyu ɓě mìɔùn nììn hwòɖǒɛ̀-dyi-dè-ɖɛ̀, ké ɓě cĩ́ dà ɓóɖó-kpàà kɔ̃. Ɓě ɖǎa nyu ɓɛ́ ɓě ké kɔ̃in ɓúá ɓó nyɔmɔɔ-dyi-wáɖáìn-wèɔ̀ xwíníín.

⁶ Ɓě kpɔ̃̀ìn nyɔ ɓě se ma kà ɖɛɔ̀ nyuɛɛ zaa, ké ɓě ɖáɓá ma wa. Wa se ma ɓě gbo vɔ̃.

Náún-po-wùɖù kò-kò ɓě

⁷ Ɔ jèɛɛ, ḿ ɖíí ɓě, ɓě mɛ ku hwòɖǒ tee, ɓɛ́ Bounɓoɔ̀ ké dyi. Ɓě dyé kà geɖe-nyu-nyɔ̀ɔ̀ kuà hwòɖǒ tee, ɓɛ́ ɖɛ ɔ ɓá ma kà kɛɛ ké ɓo kpa ɖɛ tòɖò kɛ. Ɔ ku hwòɖǒ tee, ɓɛ́ ní-tì kĩ́ín-kĩ́ínɔ̀ kè ɔ sè ɖeɔ̀ ké dyi.

⁸ Ɓě mɔ̀ùn mɛ ku hwòɖǒ ɖekè. Ɓěɛ̀ hwòɖǒ-dyùà mɛ nì kpéí, sepóɛɖé Bounɓoɔ̀ dyi-wèɔ̀ ɖǎ dyi xwɛ̃́ìn.

⁹ Ḿ ɖíí ɓě, ɓě ní ɖá ɓɛ́ ɓě ké dúi jɛìn jɛ̀ìn, ɓɛ́ Gèɖèpɔ́ɔ̀ ní kɔ̃̀ ɖà ɓěɛ̀ zaa wɔ̃ po. Ɓě dyéɛo, zaa-wɔ̃-po-nyɔ̀ɔ̀ nyànà gbǒ-wɔ̃̀ɔ̀ gboi.

¹⁰ Ḿ ɖíí ɓě, kpáá-ɖɛ̀-cɛ̃-nyɔ̀ ɓě wùɖù ma kà nyɔǔn gbo ɖé Bounɓoɔ̀ nyɛ́nɛ́ múɛɛ jè mɛ nì ɓě hwìɖǐi. Wa mɛ mɔ̀ dyí-tɛ̀mɛ̀ìn-ɖɛ̀ ɓó ɓě gbo, ɓó kà ɓɛ́ ɓě dyi gǎ dyéɛń nìǐn, ɓě ké hwòɖǒ kuɛ nyuɛ.

¹¹ Wa kùìn gǎ-dyé-dyé hwìɖǐi jèɛɛ, à ɖá mana nì ma wa kɔ̃. Ɓě ɖǎa wɔ̃́ kà Jóɓò ku ma hwòɖǒɛ, ké ɓě ɖǎ ɖɛ ɓě ɓɛ́ Bounɓoɔ̀ nyu ma ɔ bìì ɖé mánáín nyɛɛ jè dyuò. Sepóɛɖé Bounɓoɔ̀ ɓéɖé wìì kè jĩ́á-jè pàɖǎ.

¹² Ḿ ɖíí ɓě, ɖɛ kpa ɖɛ mìɔ kɛɛ, ɔ kɛ̀. Ɓěǐn ɖá ɓě ké gboò. Ɓěǐn ɖá ɓɛ́ ɓě ké dyɔɔ̀ mɔɔ ɓóɖó-kpàà mɔɔ ɖɛ kà kò ɖò ɓě dyí gboò. Ɓěɛ̀ ǹdye mɛ jǔ ǹdye pū, ké ɓěɛ̀ gbào mɛ jǔ gbào, ɓɛ́ Gèɖèpɔ́ɔ̀ ní kɔ̃̀ ɖà ɓě zaa kpɔ̃̀ìn.

¹³ Nyɔ ɖò nì ɓě hwìɛ̀, ké ɔ nì gǎ dyéɛńǹ? Ɔ mɛ ɓaà. Nyɔ ɖò kpá múàǔnǹ? Ɔ mɛ ɓeɖe ɓàìn-wɛ̀ɖɛ̀.

¹⁴ Nyɔ ɖò nì ɓě hwìɛ̀, ké ɔ wɛ́ɛ̀? Ɔ mɛ ɖá cɔ́cì-nyɔ̀ vɛ̀nɛ̀ ɓěɔ̀, ké wa mɛ ɓaàìn ɔ kɔ̃in, ɓɛ́ wa ké ɔ cáná bũ̌ po ɖé Bounɓoɔ̀ nyɛ́nɛ́ mú.

¹⁵ Ɓaà-ɓaà ɖé hwìɖǐǐ-taɓa-taɓa mú nìà kɛ mu wɛ́-nyɔ̀ɔ̀ dyi kánáìn. Bounɓoɔ̀ mu ɔ dyí sɔ̀ìn. Ɔ jǔ ké ɔ ɖǎ nàmàǔn ɖò nyuín, Gèɖèpɔ́ɔ̀ mu ɔ kɔ̃in zĩ̀ìn.

¹⁶ Ɔ jèɛɛ, ɓě mɛ wɔ̃́ìn wɔ̃̀ìn ɓěɛ̀ nàmàǔn ɓěɔ̀ mú, ɓɛ́ ɓě ké bìì ɓaàìn ɓààìn, ɓɛ́ ɓě ké dyi káná. Dyí-sɛ́ɖɛ́ìn-nyɔ̀ɔ̀ dyi ɓaà ní, ɖɛ ɓɛ́ ɔ ɓaà-wùɖùɔ̀ nyuɛɛ ɓéɖé kpé.

¹⁷ Kà à mɔ̀ùn nyuà nìɛ̀ kɛɛ, kǎà Ìɖáájɔ̀ mɔ̀ùn nì ma. Ɔ ɓaà ma hwòɖǒɛ̀-ɖé-hwɛ̀-kà, ɓɛ́ ní ké se ma ɖaɓa. Ké ní ɖò se ma ɓóɖó-kpàà kɔ̃ ɖaɓa ɓó zɔ̃ tã kè dɛ̀nɛ̀ mɛ̀nɛ̌ìn-ɖò xwíníín.

¹⁸ Ké ɔ ɓaà ma ɖe, ké ní ɖaɓa ma, ké ɓáá-ɖɛ̀ ɓě nì ma ɓóɖó-kpàà kɔ̃ɔ tòɖò ma ɓo.

¹⁹ Ḿ ɖíí ɓě, ɔ jǔ ké ɓě ɖò dyi hwìǐ sɔ̀ìn, ké ɔ dyi jǎà-hwìèɔ̀ dyi táà, ké nyɔ ɖò mɔ̀ùn dyi ɔ ɖe dyà ɖe ní,

²⁰ nìí, ɓě mɛ dyuò ɖɛ nìà kɛ dyí. Ɔ mɔ̀, nyɔ muà nàmàǔn-nyɔ̀ ɖò ɔ hwìè se jǎàɔ̀ gbo zàìn nyɛɛ, ɔ mu nàmàǔn-nyɔ̀a póìn, ɓɛ́ ɔ zùùɔ̀ ké se mɛ́, ké ɔ muɛ nyuùn ɓɛ́ nàmàǔn pàɖǎ jè ké Gèɖèpɔ́ɔ̀ hwìɖǐi hwɛ̀.