Jĩ́ìn 4 - Ɓǎsɔ́ɔ̀ Báɓòɔ̀

Nyɔ kè ɓóɖó-kpàà péé-nyu-nyu

¹ Ɖɛ́ mɔ̀ ɖɛín-zà-zà kè vɔ̃-vɔ̃ nìà ɓě hwìɛ̀ kɛɛ dyà-nyɔ̀ kɛ́? Wa sɔ̀ ɖɛ ɖò-ɖò ɓěɛ̀ tó ɓě nyuà ké wa vɔ̃àìn vɔ̃̀àìn gbo ɖé ɓěɛ̀ kpóɖó-dyùà mú teeɛɛ gbo.

² Ɖɛ ɓěɛ̀ tó nyu ɓě, ké ɓě se wa dyéɛ ɓɛ́ìn. Ɔ jèɛɛ, ɓě ɖáɓá kú. Ɓě ɓéɖé hwɛ̀nɛ̌, ké ɓě se ɖɛ ɓě mɔ́ɔ dyéɛ ɓɛ́ìn. Ɔ jèɛɛ, ɓě zà ɖɛín, ké ɓě vɔ̃. Ɖɛ ɓě mɔ́ɔ, ɓě seɛ dyéɛ ɓɛ́ìn, sepóɛɖé ɓě ní zɔ̀ìn wa Gèɖèpɔ́ɔ̀.

³ Ɔ jǔ ké ɓě dyiɛ zɔ̀ǐn, nìí, ɓě seɛ dyéɛ ɓɛ́ìn, sepóɛɖé ɖɛ kɔ̃̀ jè ɓě zɔ̀à ɖɛɔ̀ kɛɛ se dyí sɛ́ɖɛ́ìn. Ɓě zɔ̀ ɖɛ ɓě, ɓɛ́ ɓě kéɛ ɓě mìɔùn nììn hwòɖǒɛ̀-dyi-dè-ɖɛ̀ mú nyùìn.

⁴ Ɓě mɔ̀ nyɔ wãà Gèɖèpɔ́ɔ̀ kɔ̃ɛɛ, ɓě seɛ dyí dyuò kà ɓɛ́ nyɔ ɖò kè ɓóɖó-kpàà nyɔ ɓě dyi péé nyuín, ɔ mɔ̀ Gèɖèpɔ́ɔ̀ mú-nyɛ́-nyɔ̀ kɛɛ̀? Nyɔ mɔ̀ nyɔ mɔ́ ɓɛ́ ɔ kè ɓóɖó-kpàà nyɔ ɓě ké péé-nyu-nyɔ̀ jǔɛɛ, ɔ nyu ɔ mìɔùn Gèɖèpɔ́ɔ̀ mú-nyɛ́-nyɔ̀ mú.

⁵ Ɓěǐn poìn hwìɖǐi kà ɓɛ́ ɖɛ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ mɔ̀ ɖɛ fóɖóún wɛ̃. Ɖɛ ɔ cɛ̃à kɛɛ, ɔ kɛ̀. Ɔ ɖá, “Ɖɛ ɓěɛ̀ tó nyu zùù ɓɛ́ Gèɖèpɔ́ɔ̀ nyíà nyɔǔn wɛ̃ɛ mìɔ.”

⁶ Kɛɛ kpeɖeɛ̀-dyíin-nɔ̀mɔ̀-ɖɛ̀ ɓɛ́ Gèɖèpɔ́ɔ̀ nyuà nyɔǔn bììɛɛ ɓúá dyí, ké ɔ zi ɖɛ ɖòɛ̀ tóɛ̀ nyɔ nyu-nyu dyí. Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Gèɖèpɔ́ɔ̀ vɔ̃ nyɔ ɓě ɓɛ́ wa ɓúáìn wa mìɔùn dyíɛɛ gbo, kɛɛ ɔ hwòɖǒ dèìn nyɔ ɓě ɓɛ́ wa dyà wa mìɔùn ɓíɖíiɛɛ múin.”

⁷ Ɔ jèɛɛ, ɓě mɛ nì Gèɖèpɔ́ɔ̀ xwíɖíi. Ɓě mɛ vɔ̃ Nɔɔ́-nàmàǔn gbo, nìí, ɔ mu ɓě dyúa gbǔùn.

⁸ Ɓě xwɛ̃́ìn Gèɖèpɔ́ɔ̀ bũ̌in, nìí, ɔ mu ɓě mɔ̀ùn bũ̌in xwɛ̃́ìn. Nàmàǔn-nyɔ̀ ɓě, ɓě mɛ dèɖè xwai. Ké ɓě mɔ̀ hwòɖǒ-sɔ̃́-ɓéɖé-nyɔ̀ ɓěɛɛ, ɓě hwɔ ɓěɛ̀ hwòɖǒ-dyùàɔ̀ mú.

⁹ Ɓě mɛ kpá wìǐn. Ɓě vĩ̌, ɓɛ́ ɓě ké kpé po. Ɓěɛ̀ kéɛ̀-kéɛ̀ɔ̀ mɛ zɛ̃̀ìn vĩ̌-vĩ̌ mú. Ɓěɛ̀ múà mɛ zɛ̃̀ìn hwòɖǒɛ̀-ɖé-ɖei-kpá-kpá mú.

¹⁰ Ɓě dyà ɓě mìɔùn ɓíɖíi ɓó Bounɓoɔ̀ gbo, ké ɔ mu ɓě dyií ɖúùn.

Nì mǔè ɖòɛ̀ ɖɛ-wɔ̃-po-po

¹¹ Ḿ ɖíí ɓě, ɓě ní ɖá ɓɛ́ ɓě ké ɖɛ gbà kɔ̃ún cɛ̃ìn cɛ̃̀ìn. Nyɔ mɔ̀ nyɔ ɓɛ́ ɔ cɛ̃ ɔ ɖíí ɖò ɖɛ gbà kɔ̃ún, mɔɔ ɓɛ́ ɔ po ɔ ɖɛ wɔ̃ɔ, nìí, ɔ cɛ̃ ɖɛ gbà gmaɔ̀ kɔ̃ún, ké ɔ poɛ wɔ̃. Ɔ jǔ ké m̀ dyi ɖɛ céèà ɖé gmaɔ̀ múɛɛ wɔ̃ po ní, nìí, m̀ se gmaɔ̀ nyu-nyɔ̀ ɖe. M̀ ɖǎ ɔ wɔ̃-po-nyɔ̀ jǔ.

¹² Nyɔ dyúáɖò nyɛ̀nɛ̀ɛ̀ mɔ̀ gmaɔ̀ tò-nyɔ̀ kè ɖɛ-wɔ̃-po-nyɔ̀. Ɔ mɔ̀ nyɔ ɓéɖé kpé ɓɛ́ ɔ ké nyɔǔn póìn, ɓɛ́ ɔ ké wa mú gbɔɔ̀ ɖekèɛ. Nyɛ́ m̀ jǔ, ɓɛ́ m̀ kéà m̀ mǔè ɖòɛ̀ ɖɛ wɔ̃ poɛ́?

Mɔ̀ǔn ɖá ɓɛ́ m̀ ké ɓɔ́ɖɔ́ ɓó gàɖàà jè

¹³ Ɓě mɔ̀ nyɔ cɛ̃à, ké ɓě dyià níiń, “À mu hwɔɖɔ nìà kɛ mú muùn ɓó zɛ̃̌ɛ̀ mɔɔ gàɖàà. À mu ɖé zɔ̃ dyúáɖò nyuùn, ɓɛ́ à ké ɖé ɖɛ peɖe, ɓɛ́ à ké wíɖí dyé” kɛɛ, ɓě tò ḿ gbo ɖùǔ.

¹⁴ Sepóɛɖé ɓě se kà ɓě ké nìɛ̀ nyuɛ́ mu ɓó gàɖàà kɛɛ dyí dyuò. Ɓě nì kà dunu ɓɛ́ ɔ kpɔ̃à dyií dyi, ké ɔ nìà ɓó kpã́ún, pūín, ɔ cɛ̃à dyií dyiɛɛ nìà kɛ.

¹⁵ Ɖɛ ɓě mɛ cɛ̃ɛ, ɔ kɛà kɛ̀. Ɓě mɛ ɖá, “Bounɓoɔ̀ dyi wɔ̃́ín, à mu cĩ́ìn, ɓɛ́ à ké ɖɛ ɓě kɔ̃̀ nyɛ́nɛ́ jǔà kɛɛ nyu.”

¹⁶ Kɛɛ ɓě ɓúáìn ɓě mìɔùn dyí, ké ɓě ɓɔ́ɖɔ́. Ɓɔ́ɖɔ́-ɓɔ́ɖɔ́ nì kà ɓěà séín mɔ̀ ɖɛ gbà.

¹⁷ Ḿ ɖáo, nyɔ mɔ̀ nyɔ dyuòà ɖɛ mɔ̀ ɖɛ nɔ̀mɔ̀ dyíin, ɓɛ́ ɔ kéɔ́ nyuɛɛ dyí, ké ɔ ní nyuàà kɛɛ, ɔ nyu nàmàǔn.