Jĩ́ìn 3 - Ɓǎsɔ́ɔ̀ Báɓòɔ̀

Nyɔǔn-dyùɛ̀ miɔɔ̀

¹ Ḿ ɖíí ɓě, ɓěɛ̀ nyɔ pàɖǎ ní ɖá ɓɛ́ wa ké nyɔǔn-ɖɛ-tɛ̀mɛ̀ìn-nyɔ̀ jǔ. Sepóɛɖé ɓě dyuò kà ɔ jǔ ké wa dyi à mɔ̀à nyɔǔn-ɖɛ-tɛ̀mɛ̀ìn-nyɔ̀ ɓěɛɛ nììn zaa wɔ̃ poɛń nìǐn, wa mu à dyi kpɔ̃ùn kóɖó-kóɖó, ɓɛ́ ɔ ké nyɔ tɔ̀ɔ̀ ɓěɔ̀ mɔ̀ùn dyí ziɛ.

² À séín-sèǐn bĩ ɖɛ ɓáún-ɓáún xwa. Nyɔ dyià wùɖùɛ̌n nìǐn, ɓɛ́ ɔ ní bĩà ɖɛ xwaa, ɔ mɔ̀ nyɔ zi dyí sɛ́ɖɛ́ǐn, ké ɔ ɓéɖé kpé ɓɛ́ ɔ ké ɔ kpóɖó-dyùà gànáɔ̀ wuɖuí kɔ̃̀ ɖekè.

³ À kpɔ̃̀ìn sǒ ɓěɔ̀ kpã́ wĩín, ɓɛ́ ɔ kéɛ nyu ɓɛ́ wa ké à wuɖu nyu, ké à ɓɛ́ìn nyuɛ ɓɛ́ wa ké dɛ̀ à mɔ́ kɛɛ mu.

⁴ Ɓě mɛ poìn ɓáɖáà ɓěɔ̀ jè hwìɖǐi ɖekè. Wa ɓúá dyí, ké pìɔ̌ kuún-kuúnɔ̀ kpa wa dyɛo, kɛɛ gbǎìn-ɖɛ̀ tííwè ɓɛ́ìn wa dyí táɖáìn, ɓɛ́ wa ké dɛ̀ ɓɛ́ wa nàìn-nyɔ̀ɔ̀ mɔ́ ɓɛ́ wa ké mùìn nyɛɛ mùìn.

⁵ Kǎà miɔɔ̀ jè nyu nìɛ̀. Ɔ mɔ̀ kpóɖó-dyùàɔ̀ wáká tííwè ɖò, kɛɛ ɔ cɛ̃ɛ-cù ɓúá kɔ̃in. Dyéɛ kà nyɛ-mìɔ̀ tííwè ɓɛ́ìn xwáɖá-kpòò vɛ̀nɛ̀ dyéɖé poɛ kɛ.

⁶ Ké miɔɔ̀ nì kà nyɛ nìà kɛ. Ɓóɖó-kpàà ɖɛ gbà ɓěɔ̀ séín nìɛ̀ mú. Ɔ mɔ̀ nyɔ nì à kpóɖó-dyùà wáká ɓěɔ̀ mú, ké ɔ nyuɛ ké à kpóɖó-dyùà gànáɔ̀ nyìnììn dyíin. À miɔɔ̀ po cĩ́-cĩ́ ɓɛ́ à nyuà wé séín nyɛɛ nyɛ kɔ̃, ké hɛ́ɛ̀ mɔ̀ nyɔ po à miɔɔ̀ nyɛ kɔ̃.

⁷ Nyɔǔn-dyù ɓɛ́ìn xwáɖá-xwíɖíi-nìmìì kè naà kè ɓíɖíi-dyi-nà-ɖɛ̀ ɔ kè ɖɛ ɓě cĩ́à ní gboɛɛ séín zùɖùɛ̀n, ké wa ɖǎa nyu.

⁸ Kɛɛ nyɔǔn-dyù ɖò se miɔɔ̀ zùɖùɛ̀n ɓɛ́ìn. Miɔɔ̀ nyìnììn dyíin, ké nyɔ ɖò seɛ wuɖuí kɔ̃̀ɔ̀ ɓɛ́ìn, ké ɔ nì kà nyɔǔn-ɖáɓá-ɖɛ̀ nì cɛ̃́ín dyíìn kà ɔ múin nyɛ.

⁹ À ɖú ɔ dyí, ɓɛ́ à ké Bounɓo mɔ̀à à Ɓǎ kɛɛ zùo po. Ké à ɖú ɔ dyí, ɓɛ́ à ké nyɔǔn-dyù ɓɛ́ Gèɖèpɔ́ɔ̀ nyuɛ ké wa kèɔ̀ kè hwɔìn nyɛɛ gboò.

¹⁰ Ɖé wɔ̃ dyúáɖòɔ̀ mú, ɖéɛ̀ zùo-po-po kè nyɔǔn-gboò-gboò sɔ̀ìn. Ḿ ɖíí ɓě, ɖɛ nìà kɛ se ɓéɖé ɓɛ́ ɔ ké ná nì.

¹¹ Ní ɖò dyi dà dyúáɖò sɔ̀ǐn nìǐn, nìí, ɔ tò ní nɔ̀mɔ̀ dyíin kè ní nyìnììn dyíinǹ?

¹² Ḿ ɖíí ɓě, féè-cù ɓɛ́ìn ɔ́ɖè-ɓò tòɖòɛ̀ɛ̀? Géɖéè-ɖúú-gbǒ ɓɛ́ìn féè-ɓò tòɖòɛ̀ɛ̀? Kà dyúáɖòɔ̀ kà tɔ̃́-nì se níín-nì ɓéɖéɛ ɓɛ́ìn.

Hwòɖǒ-fɔ̀nɔ̀-fɔ̀nɔ̀ sɔ̀à ɖé dyɔún wɛ̃

¹³ Nyɛ́ nì ɓě hwìɛ̀, ké ɔ fɔ̀nɔ̀ hwòɖǒ, ké ɔ wɔ̃́ ɖɛ múin nyɛ́? Nyɔ ɖò dyi ɖò ɓéɖéín, ɔ mɛ tɛ̀mɛ̀ìn ɔ nyɔǔn dyí ɖé ɔ kpeɖe nɔ̀mɔ̀ dyíin mú, ɔ kè ɖé ɔ nyuu-ɖɛ̀ ɓě ɓɛ́ ɔ mu nyuùn ɖé ɔ mìɔùn ɓíɖíi-dyà-dyà kè ɔ hwòɖǒ-fɔ̀nɔ̀-fɔ̀nɔ̀ múɛɛ mú.

¹⁴ Kɛɛ ɔ jǔ ké ɓěɛ̀ hwòɖǒ-dyùà dyi nɛɛ̀, ké ɔ dyi hwɛ̀nɛ̌ ɓéɖé, ké ɓě dyi ɓě mìɔùn bìì vɔ̃ ɖé ɓěɛ̀ hwòɖǒ-dyùà mú ní, ɓěǐn ɖá ɓɛ́ ɓě ké ɓɔ́ɖɔ́, ɓɛ́ ɓě ké ɖɛ mɔ̀ jǎà kɛɛ jè se tɔ́mɔ́.

¹⁵ Hwòɖǒ-fɔ̀nɔ̀-fɔ̀nɔ̀ nì kà kɛɛ se nyɔ ɓɛ́ ɔ sɔ̀à ɖé dyɔún wɛ̃. Ɔ mɔ̀ ɓóɖó-kpàà ɖɛ. Ɔ se Gèɖèpɔ́ɔ̀ Zùùɔ̀ gbo sɔ̀ìn. Ɔ sɔ̀ìn ɖé Nɔɔ́-nàmàǔn gbo.

¹⁶ Sepóɛɖé dɛ̀ ɓɛ́ hwɛ̀nɛ̌ kè nyɔ-mìɔùn-bìì-vɔ̃-vɔ̃ nìà kɛɛ, ɖéɛ̀ fũ̀à-fṹá kè ɖɛ gbà kò-kò séín ɓě mu nììn.

¹⁷ Kɛɛ ɖɛ mɔ̀ ɖɛ kpa ɖɛ ɓá hwòɖǒ-fɔ̀nɔ̀-fɔ̀nɔ̀ sɔ̀à ɖé dyɔún wɛ̃ɛ jè dyíɛɛ, ɔ mɔ̀, ɔ se kɛɛ ɖò ɓéɖé. Nyɔ ɖò dyiɛ ɓéɖéín, nìí, ɔ ɓéɖé gìɖìǐ, ké ɔ nɔ̀mɔ̀ kpeɖeín, ké ɔ mɔ̀ ɖɛ-hwìɖǐi-poìn-nyɔ̀. Ɔ dyé nyɔǔn wìǐn mìɔ, ké ɔ hwòɖǒ-fɔ̀nɔ̀-fɔ̀nɔ̀ɔ̀ nyuɛ ké ɔ nyu ɖɛ nɔ̀mɔ̀ dyíin pàɖǎ. Ɔ ní ɓéɖé hwòɖǒ sɔ̃́, ké ɔ ní nyu dyéɖéi.

¹⁸ Ɖɛ ɓɛ́ ɓáá-ɖɛ̀ ɓɛ́ nyɔ ɓě nyu gìɖìǐɛɛ ɓá ma ɖé gìɖìǐ múɛɛ tòɖò kɛɛ mɔ̀ dyí-sɛ́ɖɛ́ìn-sɛ́ɖɛ́ìn.