Jĩ́ìn 2 - Ɓǎsɔ́ɔ̀ Báɓòɔ̀

Náún-po-po ɓá nyɔ-kpéín-dyé-dyé jè dyíɛ

¹ Ḿ ɖíí ɓě, ɓě ɖǎ à Bounɓo Jízɛ̀ Kɛ́ɖɛ́ì mɔ̀à dĩ́ín-dĩ̀ìn Bounɓoɔ̀ kɛɛ hwìɖǐǐ taɓa. Kà ɔ ɖǎà ná nìɛɛ, ɓěǐn ɖá ɓɛ́ ɓě ké nyɔ ɖò kpéín dyé, ɓɛ́ ɔ ké nyɔ ɖò mɔ̀ùn dyí zi.

² Ti ɖòɛ̀ ɓaɖaín, gàa ɓɛ́ ɔ po góò-jìǐn-po-ɖɛ̀ jìǐn, ké ɔ po ɖɔ nɔ̀mɔ̀ dyíin múɛɛ mu ɖé ɓě dyí-poìn-naínɔ̀ dyiìn, ké gǎ-dyé-gàà ɓɛ́ ɔ poà ɖɔ-zɔ̃̀ múɛɛ mu ɖé dyiìn ɖekè.

³ Ɔ jǔ ké ɓě dyi nyɔ poà ɖɔ nɔ̀mɔ̀ dyíinɔ̀ múɛɛ kpéín dyé, ké ɓě dyiɛ ɔ gbo cɛ̃, ké ɓě dyi níiń, “Nì dya-dèɖě-naín kɛ̀o,” ké ɓě dyiɛ gǎ-dyé-nyɔ̀ɔ̀ gbo cɛ̃, ké ɓě dyi níiń, “Nyànà ɓóa dyi mɔɔ kò dà ḿ ɓo zɔ̃̌ dyio” ní,

⁴ nìí, ɓě ɖǎ mú-ge-ge ɖé ɓě mìɔùn hwìɛ̀ dyà, ké ɓě hwìɖǐi-poìn-ɖɛ̀ se dyí sɛ́ɖɛ́ìn, ké ɓěɛ̀ po ɖɛ wɔ̃. Ɔ se ná nìì?

⁵ Ní ɖɛ̀ɓɛ̀-ɖìǐ ɓě, ɓě tò ɖùǔ. Gèɖèpɔ́ɔ̀ gã nyɔ ɓě dyé gǎ nɔ̄ ɓóɖó-kpàà kɔ̃ɛ, ɓɛ́ wa ké bã ɖé hwìɖǐǐ-taɓa-taɓa mú, ɓɛ́ wa ké kã́á-ɓòɖò ɖò kɔ̃̀. Ɔ mɔ̀ ɖɛ ɓɛ́ ɔ ɖáìn nyɔ ɓě ɖɛ̀ɓɛ̀à ɔ múɛɛ nyɛ́nɛ́ín nyɛ.

⁶ Kɛɛ ɓě ɖǎ gǎ-dyé-nyɔ̀ɔ̀ zùǔn zàìn. Nyɛ́ ɓě kpɔ̃à ɓě kànàǎ-kà kɛ́? Ɔ se bã-nyɔ̀ ɓěɔ̀ɔ̀? Má, wa mɔ̀à nyɔ ɓě kpaà ɓě jiɖiɛ ɖé gɔ̌mànà ɓěɔ̀ gboɛe?

⁷ Wa mɔ̀ nyɔ cɛ̃à ɖɛ gbà ɓá nyɛ́nɛ́ nɔ̀mɔ̀ dyíin ɓɛ́ Gèɖèpɔ́ɔ̀ ɖǎà ɓě nyíɛɛ dyíɛ̀. Ɔ se ná nìì?

⁸ Ɔ jǔ ké ɓě dyi gma nìà gma séín kɔ̃in nyɛɛ nyu jɛ́ɛ́ ní, nìí, ɓě nyu ɖɛ nɔ̀mɔ̀ dyíin. Gmaɔ̀ nì ɖé Gèɖèpɔ́ɔ̀-cèè-ɖɛ̀ɔ̀ mú. Gmaɔ̀ ɖá, “M̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ.”

⁹ Kɛɛ ɓě dyi nyɔ ɖò kpéín dyé mìɔ ké ɔ dyi nyɔ tɔ̀ɔ̀ ɓě mɔ̀ùn dyí ziín, ɓě ɖǎ nàmàǔn nyu. Ké ɖɛ céè ɖé gmaɔ̀ múɛɛ kpɔ̃ ɓě ɓó gmaɔ̀ wáɖá jè.

¹⁰ Sepóɛɖé nyɔ ɖò dyi ɖɛ céè gma-cèè-ɖɛ̀ ɓěɔ̀ múɛɛ dyi kpɔ̃, ké ɔ se dyúáɖò dyi kpɔ̃ín, zaa kpɔ̃ ɔ ɓó gmaɔ̀ séín wáɖá jè.

¹¹ Sepóɛɖé nyɔ mɔ̀ nyɔ ɖáà nyɔ ní poà gmaɖe kɛɛ mɔ̀ nyɔ ɖá nyɔ ní ɖáɓáà kú ɖekèɛ̀. M̀ se gmaɖe po dyɛo, kɛɛ m̀ dyi kú ɖáɓáín, nìí, m̀ ɖǎ gma-wáɖá-nyɔ̀ jǔ.

¹² Ɓě dyi wùɖù, ké ɓě dyi ɖɛ ɓě nyuín, ɓě mɛ nyuɛ kà nyɔ ɓě ɓɛ́ wa dyià wa zaa cɛ̃ín, wa muà gma ɓɛ́ ɔ buɛ̀à nyɔǔn wɛ̃ɛ mú gmɔ̀ùn, ɓɛ́ wa kéà wa zaa wɔ̃ poɛ.

¹³ Gèɖèpɔ́ɔ̀ dyi nyɔ ɓɛ́ ɔ ní dyéà nyɔ ɖò mɔ̀ùn wìǐn nyɛɛ zaa wɔ̃ poɛń nìǐn, nìí, ɔ se ɔ wìǐn dyéɛ mu. Kɛɛ nyɔǔn-wìǐn-dyé-dyé ɖu nyɔǔn-zaa-dúún-wáɖá-wáɖá toún.

Hwìɖǐǐ-taɓa-taɓa kè kũ̀à-nyu-nyu

¹⁴ Ḿ ɖíí ɓě, ɔ jǔ ké nyɔ ɖò dyiɛ cɛ̃ kà ɔ ɓéɖé hwìɖǐǐ-taɓa-taɓa kɛ, ké ɔ nyuu-ɖɛ̀ seɛ mú zàǐn, ɖɛ́ mɔ̀ nɔ̀mɔ̀ dyíin ɖò ɔ ɓɛ́ìn nyuɛ kɛ́? Ɔ hwìɖǐǐ-taɓa-taɓaɔ̀ ɓɛ́ìn ɔ póɛ̀nǹ?

¹⁵ Ti ɖòɛ̀ ɓaɖaín, à ɖíí ɖò se ɖɔ nɔ̀mɔ̀ dyíin mú po, ké ɔ se wé dyúáɖòɛ̀ ɖii-ɖɛ̀ ɓéɖéɛ mu dyɛ mɔ̀ùn.

¹⁶ Ɔ jǔ ké ɓě dyúáɖò dyiɛ ɔ gbo cɛ̃, ké ɔ dyi níiń, “Mana mɛ nì m̀ kɔ̃. Sɔ̃̀ɔ̀ mɛ ɓɔ́ m̀ nyuɛ, ké m̀ mɛ ɖi ɖɛ, ɓɛ́ m̀ ké ɖoɓoo” ní, ké ɓě se ɔ ɓóɖó-kpàà ɖɛ ɓě ɔ kɔ̃̀ ɔ kéɔ́ dyéɛɛ nyíín, ɖɛ́ mɔ̀ nɔ̀mɔ̀ dyíin ɖò ɔ ɓɛ́ìn ɔ bìì nyuɛ kɛ́?

¹⁷ Kà hwìɖǐǐ taɓa jè nì. Ɔ dyi hwìɖǐǐ-taɓa-taɓaɔ̀ ɖòùn jǔ, ké ɔ se kũ̀à ɖò ɓéɖéín, nìí, fɛ̀ɛ̀ ɖò seɛ mú nì.

¹⁸ Kɛɛ nyɔ ɖò muɛ cɛ̃ìn, ɓɛ́ ɔ ké níiń, “Mɔ̀ùn ɓéɖé hwìɖǐǐ-taɓa-taɓa, ké mɔ́ún ɓéɖé nyuu-ɖɛ̀.” Ɔ dyi ná nìǐn, nìí, ɖɛ ní mu cɛ̃ìn nyɛɛ kɛà kɛ̀. Tɛ̀mɛ̀ìn kà m̀ nyu hwìɖǐǐ-taɓa-taɓa ɓɛ́ ɔ se kũ̀à kɔ̃̀ kɛɛ ɓéɖéɛ nyuɛ kɛɛ ḿ dyí. Ní mu ḿ nìǐn hwìɖǐǐ-taɓa-taɓaɔ̀ m̀ dyí tɛ̀mɛ̀ìn ɖé ní nyuu-ɖɛ̀ mú.

¹⁹ M̀ poɛ jǎà kà Gèɖèpɔ́ɔ̀ nì dyúáɖò kɛɛ̀? Ɔ nɔ̀mɔ̀ dyíin. Zùù gbà ɓěɔ̀ mɔ̀ùn poɛ jǎà ké fã̀à nyu wa, ké wa tɛɖɛ.

²⁰ Gàa wè, m̀ zuɖuín. M̀ mɔ́ ɓɛ́ nyɔ ɖò kéɛ m̀ dyí tɛ̀mɛ̀ìn kà ɔ jǔ ké hwìɖǐǐ-taɓa-taɓa se kũ̀à ɖò ɓéɖéín, nìí, ɔ se ɖɛ ɖò kpaà?

²¹ Xwɛ̌ à ɓǎ nììn ɓǎ Ééɓòɖòhɛ̃́ɛ̀ nyu ma dyí sɛ́ɖɛ́ìn ɖé Gèɖèpɔ́ɔ̀ gboɛ́? Ɔ nyuu-ɖɛ̀ ɓěɔ̀ mɔ̀ nyɔ nyuɛ ma náa, ti ɓɛ́ ɔ zàìn ma kà ɔ dyú-gàà Áázè sáa ɖé Gèɖèpɔ́ɔ̀ gbo ɓó sáa-kɔ̃-zàìn-gbààɔ̀ kɔ̃ɛ.

²² M̀ dyéɛ kà ɔ hwìɖǐǐ-taɓa-taɓaɔ̀ kè ɔ nyuu-ɖɛ̀ ɓěɔ̀ nyu ma kũ̀à, ké ɔ hwìɖǐǐ-taɓa-taɓaɔ̀ hwɛ̀ ma gbɔ dyììn ɖé ɔ nyuu-ɖɛ̀ ɓěɔ̀ múɛ.

²³ Ké ɖɛ ɓɛ́ Gèɖèpɔ́ɔ̀-cèè-ɖɛ̀ɔ̀ cɛ̃ ma kà kɛɛ kpá ma jǎà. Ɖɛ ɔ cɛ̃ ma kà kɛɛ, ɔ kɛ̀. Ɔ ɖá, “Ééɓòɖòhɛ̃́ɛ̀ taɓa ma Bounɓoɔ̀ hwìɖǐǐ, ké Bounɓoɔ̀ ɖáìn ma ɔ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.” Ké Bounɓoɔ̀ ɖáìn ma Ééɓòɖòhɛ̃́ɛ̀ ɔ ɓǎto.

²⁴ Ɔ jèɛɛ, ɓě mɛ dyéɛ kà ɖɛ nyɔ ɖò nyuɛɛ nyuɛ ké ɔ sɛ́ɖɛ́ìn dyí ɓó Gèɖèpɔ́ɔ̀ gboɛ. Ɔ hwìɖǐǐ-taɓa-taɓaɔ̀ ɖòùn seɛ nyu.

²⁵ Kà dyúáɖòɔ̀ kǎà ɖɛ ɓɛ́ Wéɖéháà mɔ̀à gbàɖàùn-mààɔ̀ kɛɛ nyu ma kɛɛ nyuɛ ké ɔ sɛ́ɖɛ́ìn ma dyí ɓó Gèɖèpɔ́ɔ̀ gbo. Ɔ se ná nìì? Ɔ mɔ̀ ti ɓɛ́ ɔ kpɔ̃ ma dyéɖé-dyi-kpaìn-nyɔ̀ ɓěɔ̀ jè dyi, ké ɔ nyuɛ ké wa kpa ma hwìè kà kò ɖò, ké wa dyi ma kà muɛ.

²⁶ Kà ɓɛ́ nyɔǔn-dyùɛ̀ zùù ɖǎà ɔ mú sɔ̀ǐn, nìí, fɛ̀ɛ̀ ɖò seà ɔ kpóɖó-dyùàɔ̀ mú nì ɖeɛɛ, kǎà hwìɖǐǐ-taɓa-taɓa ɓɛ́ ɔ se kũ̀à ɖò ɓéɖéɛɛ se fɛ̀ɛ̀ ɖò ɓéɖé ɖekè.