Jɔ̃́ɔ́ 21 - Ɓǎsɔ́ɔ̀ Báɓòɔ̀

Jízɛ̀ wóɖóìn ɖeín-nà-nyɔ̀ mɛ̀nɛ̌ìn-sɔ̃́ ɓě dyí

¹ Ti ɖɛa ɖǎ ma dyi ziɛɛ, Jízɛ̀ tɛ̀mɛ̀ìn ma ɔ mìɔùn ɔ ɖeín-nà-nyɔ̀ ɓěɔ̀ dyí ɖé Tàbíwìɖìà Dòùnɓìǎɔ̀ wĩín. Kǎà ɔ nyu ma kà ɔ mìɔùn wa dyí tɛ̀mɛ̀ìn.

² Sã́ɓò Píɖɛ̀ kè Tɔ̀mɔ́sì ɓɛ́ wa ɖáìn Ní-zèɖěɛ kè Nàtánìò sɔ̀à ɖé Kéénà-hwɔ̀ɖɔ̀ nìà ɖé Gáɖàɖíì-ɓòɖòɔ̀ kɔ̃ɛɛ múɛ kè Zɛ́ɓìɖíìɛ̀ dyú-gàà ɓěɔ̀ ɔ kè Jízɛ̀ɛ̀ ɖeín-nà-nyɔ̀ tɔ̀ɔ̀ ɓěɔ̀ sɔ̃́ nì ma dà ɖò.

³ Ké Sã́ɓò Píɖɛ̀ cɛ̃ɛ ma nyɔ tɔ̀ɔ̀ ɓěɔ̀ gbo, ké ɔ ɖá, “Ḿ nì kpéɖé wáɖáa muɛń.” Ké wa cɛ̃ɛ ma ɔ gbo, ké wa ɖá, “À kè mɔ̀ mu muùn.” Ɔ jèɛɛ, wa mu, ké wa dyá ma ɓáɖáàɔ̀ mú. Kɛɛ wa se ma zimii ɖò kpɔ̃ ɓó máaún-hwùɖù gànáɔ̀ mú.

⁴ Ti ɓɛ́ zɔ̃ nìǎ ma zɔ̃uń wɛ̃ɛ, Jízɛ̀ nyànà ma ɓó níɔ̀ kpóóɔ̀ kɔ̃in, kɛɛ ɖeín-nà-nyɔ̀ ɓěɔ̀ seɛ ma dyuò kà ɓɛ́ ɔ mɔ̀ ma Jízɛ̀ kɛ.

⁵ Ké Jízɛ̀ diè ma wa dyi, ké ɔ ɖá, “Gàa-dyù ɓě, ɓě ɖǎ zimii ɖò kpɔ̃ɔ̀?” Ké wa zà ma ɖé wuɖu, ké wa ɖá, “Gbào.”

⁶ Hwɛ̀ ké ɔ cɛ̃ɛ ma wa gbo, ké ɔ ɖá, “Ɓě wáɖá ɓěɛ̀ kpéɖéɔ̀ ɖé ɓáɖáàɔ̀ ɖiaún, ké ɓě mu ɖɛ ɖò dyéìn.” Ɔ jèɛɛ, wa wáɖá ma kpéɖéɔ̀, ké wa seɛ ma níɔ zàà ɓɛ́ìn ɖe, sepóɛɖé wa kpɔ̃ ma zimii pàɖǎ.

⁷ Ké ɖeín-nà-nyɔ̀ ɓɛ́ Jízɛ̀ ɖɛ̀ɓɛ̀ ma kà múɛɛ cɛ̃ɛ ma Píɖɛ̀ gbo, ké ɔ ɖá, “Ɔ mɔ̀ Bounɓoɔ̀o.” Ti ɓɛ́ Sã́ɓò Píɖɛ̀ wɔ̃́ɔ ma kà ɓɛ́ ɔ mɔ̀ ma Bounɓoɔ̀ kɛɛ, ɔ po ma ɔ ɖɔɔ̀ mú, sepóɛɖé ɔ fɔ̀nɔ̀ ma múin, ké ɔ sí ma níɔ̀ gbo.

⁸ Ké ɖeín-nà-nyɔ̀ tɔ̀ɔ̀ ɓěɔ̀ mùìn ma ɓáɖáàɔ̀ mú, ké wa mu ma kpóó kɔ̃. Wa kpa ma kpéɖé kɔ̃̀ mú ɓɛ́ zimii ɓěɔ̀ dyí ma kà kɛɛ jiɖiɛ. Sɔ̀ dɛ̀ ɓɛ́ wa nì ma kà níɔ̀ kɔ̃ ké ma kpóó kɔ̃ muɛɛ se ma ɓoún tɔ̀mɔ̀. Ɔ ɓɛ́ìn ma ɓáɖáa hɔ̃dɛ̀ɖɛ̀ ɖò nyuɛ.

⁹ Ti ɓɛ́ wa nyini ma kpóó kɔ̃ɛɛ, wa dyé ma ɓó nyɛ-kɛ̀nɛ̀ ɓě, ké zimii kè bɛɖɛɛ̀ nì ma ɓó.

¹⁰ Ké Jízɛ̀ cɛ̃ɛ ma wa gbo, ké ɔ ɖá, “Ɓě dyà zimii ɓě ɓɛ́ ɓě kpɔ̃à kàǔn wɛ̃ɛ ɖò.”

¹¹ Ké Sã́ɓò Píɖɛ̀ dyá ma ɓáɖáàɔ̀ mú, ké ɔ kpa ma kpéɖéɔ̀ dyi káɖáa ɖé toɖoí. Zimii vɛ̀nɛ̀-vɛ̀nɛ̀ ɓě dyí ma ɖé ɔ mú. Zimii hɔ̃dɛ̀ɖɛ̀ ɖò kè kpáɖá-nyɔ sɔ̃́ ɓaɖa-bùè sè tã nì ma ɖé. Wa vò ma ná dyí jǎà dyɛo, kɛɛ kpéɖéɔ̀ se ma cɛ̃̀.

¹² Jízɛ̀ cɛ̃ɛ ma wa gbo, ké ɔ ɖá, “Ɓě dyi, ɓɛ́ ɓě ké ɖɛ ɖi.” Ɖeín-nà-nyɔ̀ ɓěɔ̀ ɖò se ma ɔ dyi dièɛ̀ ɓɛ́ìn, ɓɛ́ ɔ ké níiń, “M̀ mɔ̀ nyɛ́ɛ̀?” Wa dyuò kà ɓɛ́ ɔ mɔ̀ ma Bounɓoɔ̀ kɛ.

¹³ Jízɛ̀ mu ma ɖe, ké ɔ ɖú ma bɛɖɛɛ̀ɔ̀ dyí, ké ɔ nyíɛ ma wa. Kǎà ɔ nyu ma zimiiɔ̀ ɖekè.

¹⁴ Ɔ mɔ̀ ma ti ɓɛ́ Jízɛ̀ wóɖó ma gĩɔ kɛɛ ɔ mìɔùn ɔ ɖeín-nà-nyɔ̀ ɓěɔ̀ dyí-tɛ̀mɛ̀ìn-tɛ̀mɛ̀ìnɔ̀ kpa tã nììn.

Jízɛ̀ kè Píɖɛ̀ jè

¹⁵ Ti ɓɛ́ wa ɖǎ ma ɖɛ ɖiɛ hwɔɛɛ, Jízɛ̀ diè ma Sã́ɓò Píɖɛ̀ dyi, ké ɔ ɖá, “Sã́ɓò, mɔ̀ mɔ̀à Jɔ̃́ɔ́ɛ̀ dyú-gààɔ̀ kɛɛ, m̀ ɖɛ̀ɓɛ̀ ḿ mú mìɔ, ké ɔ zi nyɔ ɓě nìà kɛ dyíì?” Ké Píɖɛ̀ cɛ̃ɛ ma ɔ gbo, ké ɔ ɖá, “Ǹdye, Bounɓo. M̀ dyuò kà ḿ ɖɛ̀ɓɛ̀ m̀ múɛ.” Hwɛ̀ ké Jízɛ̀ ɖá, “Nyí ní ɓáɖáá-dyù ɓěɔ̀ ɖii-ɖɛ̀.”

¹⁶ Ké Jízɛ̀ diè ma ɔ dyi ɖe, ké ɔ ɖá, “Sã́ɓò, mɔ̀ mɔ̀à Jɔ̃́ɔ́ɛ̀ dyú-gààɔ̀ kɛɛ, m̀ ɖɛ̀ɓɛ̀ ḿ múù?” Ké Píɖɛ̀ cɛ̃ɛ ma ɔ gbo, ké ɔ ɖá, “Ǹdye, Bounɓo. M̀ dyuò kà ḿ ɖɛ̀ɓɛ̀ m̀ múɛ.” Hwɛ̀ ké Jízɛ̀ ɖá, “Gmɔ̀ ní ɓáɖáá ɓěɔ̀ dyí.”

¹⁷ Ké Jízɛ̀ diè ma ɔ dyi kpa tã nììn, ké ɔ ɖá, “Sã́ɓò, mɔ̀ mɔ̀à Jɔ̃́ɔ́ɛ̀ dyú-gààɔ̀ kɛɛ, m̀ ɖɛ̀ɓɛ̀ ḿ múù?” Púɛɛ, Píɖɛ̀ hwòɖǒ kpá ma ɖé ɖei, sepóɛɖé ɔ diè ma ɔ dyi kpa tã nììn, ké ɔ ɖá, “M̀ ɖɛ̀ɓɛ̀ ḿ múù?” Ké ɔ cɛ̃ɛ ma ɔ gbo, ké ɔ ɖá, “Bounɓo, m̀ dyuò ɖɛ séín dyí. M̀ dyuò kà ɓɛ́ ḿ ɖɛ̀ɓɛ̀ m̀ múɛ.” Hwɛ̀ ké Jízɛ̀ cɛ̃ɛ ma ɔ gbo, ké ɔ ɖá, “Nyí ní ɓáɖáá ɓěɔ̀ ɖii-ɖɛ̀.

¹⁸ Ḿ cɛ̃ m̀ jǎà gbo, ti ɓɛ́ m̀ mɔ̀ ma nyɔ gmɔ̀ keɛɛ, m̀ jìnììn ma nì gbo-jìnììn-ɖɛ̀ɔ̀ gbo, ké m̀ mu dɛ̀ m̀ mɔ́ ma muɛ dyiɛ. Kɛɛ m̀ ɖǎ súá kpáín, nì mu sɔ̃ dyí pɛ́ɛ̀ìn, ké nyɔ kà kò ɖò mu m̀ jìnììn, ké ɔ mu dɛ̀ m̀ se mɔ́ ɓɛ́ m̀ kéɔ́ muɛɛ kpàìn.”

¹⁹ Ɖé ɖɛ nìà kɛ múɛɛ, Jízɛ̀ nì kà ɓɛ́ Píɖɛ̀ mu ma mɛ́ìn, ɓɛ́ ɔ kéɛ nyu ɓɛ́ Gèɖèpɔ́ɔ̀ ké ma ɓàìn-ɓàìn ɓéɖéɛɛ jè cɛ̃iń. Púɛɛ, Jízɛ̀ cɛ̃ɛ ma ɔ gbo, ké ɔ ɖá, “Sí ḿ kíɖíí.”

Jízɛ̀ kè ɖeín-nà-nyɔ̀ tɔ̀ɔ̀ ɓěɔ̀ jè

²⁰ Ɓó tia ɓaɖaa, Píɖɛ̀ gmɔ̀ ma ɖe, ké ɔ dyé ma ɖeín-nà-nyɔ̀ ɓɛ́ Jízɛ̀ ɖɛ̀ɓɛ̀ ma kà múɛɛ ɔ ɖeín. Ɔ mɔ̀ nyɔ ɓɛ́ ɔ tè ma kà Jízɛ̀ mú ɖé téɓèɖèɔ̀ gbɔ, ké ɔ diè ma kà ɔ dyi, ké ɔ ɖá, “Bounɓo, nyɛ́ muà m̀ nì mú-nyɛ́-nyɔ̀ ɓěɔ̀ xwáɖáún zàìn nyɛ́?” kɛ.

²¹ Ti Píɖɛ̀ dyé ma ɔ kɛɛ, ɔ diè ma Jízɛ̀ dyi, ké ɔ ɖá, “Bounɓo, xwɛ̌ gàa nìà kɛ nììn jè nìɛ́?”

²² Ké Jízɛ̀ cɛ̃ɛ ma ɔ gbo, ké ɔ ɖá, “Ɔ jǔ ké ḿ dyi mɔ́ ɓɛ́ ɔ ké cĩ́ɛń dyi gã̀, ɓɛ́ ḿ ké dyiín, nìí, ɔ dɛ̌ mɔ̀ nì kpéɛ́? Sí ḿ kíɖíí.”

²³ Ɖɛa kɔ̃̀ jè kà ɓɛ́ ɖeín-nà-nyɔ̀ nìà kɛ se ma mɛ́ɛ muɛɛ wuɖuɔ̀ ɓeìn ma Jízɛ̀ɛ̀ nyɔ ɓěɔ̀ hwìɛ̀ dyi. Kɛɛ Jízɛ̀ seɛ ma cɛ̃, ɓɛ́ ɔ ké níiń, ɔ se ma mɛ́ɛ mu. Ɔ ɖá, “Ɔ jǔ ké ḿ dyi mɔ́ ɓɛ́ ɔ ké cĩ́ɛń dyi gã̀, ɓɛ́ ḿ ké dyiín, nìí, ɔ dɛ̌ mɔ̀ nì kpéɛ́?”

²⁴ Ɔ mɔ̀ ɖeín-nà-nyɔ̀ ɓɛ́ ɔ cɛ̃ ma kà ɖɛ ɓě nìà kɛ jèɛ. Ɔ céè ma wa ɓíɖíi ɖekè, ké à dyuò kà ɖɛ ɔ cɛ̃ ma kɛɛ mɔ̀ ma jǎà kɛ.

Wuɖu hwɛ̀ìn-gbɔɔ̀

²⁵ Jízɛ̀ nyu ma ɖɛ pàɖǎ ɓě ɖe. Wa séín dyiɔ́ má ná céè ɖò-ɖò ní, nìí, ní hwòɖǒ ɖá céè-ɖɛ̀ ɓěɔ̀ seɔ́ má po-naín ɓéɖéɛ mu nɔ̄ ɓóɖó-kpà gànáà kɔ̃.