Jɛ́nɛ́sì 9 - Ɓǎsɔ́ɔ̀ Báɓòɔ̀

Gèɖèpɔ́ɔ̀ kè Nóà dè wuɖu

¹ Hwɛ̀ ké Gèɖèpɔ́ɔ̀ po ma Nóà kè ɔ dyú-gàà ɓěɔ̀ mana kɔ̃, ké ɔ ɖá, “Ɓě mu dúún zaìn, ɓɛ́ ɓě ké dyí vò, ɓɛ́ ɓě ké ɓóɖó-kpàɔ̀ kɔ̃ dyi dyíìn.

² Ɓěɛ̀ dyi-fɛ̃̀ìn-fɛ̃̀ìn kè ɓěɛ̀ díɖí mu nimii séín kè naà séín kè ɓíɖíi-dyi-nà-ɖɛ̀ séín kè zimii séín kɔ̃ nììn, ké ḿ ɖǎ wa ɓě nyí.

³ Ké ɖɛ séín nì cĩ́ɛń nyɛɛ mu ɓěɛ̀ ɖii-ɖɛ̀ jǔùn. Kà dyúáɖò kà ḿ nyí ma kà ɓě ɓáá-ɖɛ̀ ɓěɔ̀ kɛɛ, kǎà ḿ nyí ɓě ɖɛ séín.

⁴ Kɛɛ ɓěǐn ɖá ɓɛ́ ɓě ké suaɖɛ̀ sè nyɔmɔɔ múɛɛ ɖi, sepóɛɖé fɛ̀ɛ̀ nì ɖé nyɔmɔɔ̀ mú.

⁵ Ɔ jǔ ké nyɔ ɖò mɔɔ nimii ɖò dyi nyɔ ɖò fɛ̀ɛ̀ xwa zà ní, nìí, ní mu ɔ kpa zàùn wɛ̃́ɛ́.

⁶ Nyɔ kã̀ìn séín ɓɛ́ wa mu waà mǔè ɖò nììn nyɔmɔɔ dyi wáɖáìn nyɛɛ, wa ɓéɖé ɓɛ́ wa ké ɔ nììn nyɔmɔɔ dyi wáɖáìn ɖekè, sepóɛɖé ḿ mɛ ma nyɔǔn kà ḿ mìɔùn nyuà nìɛ̀ kɛ.

⁷ Ɖɛ ḿ cɛ̃ ma ɓě gboɛɛ mɛ nì ɓě hwìɖǐi. Ɓě ɓéɖé ɓɛ́ ɓě ké dúún zaìn, ɓɛ́ ɓě ké dyí vò, ɓɛ́ ɓě ké ɓóɖó-kpàɔ̀ kɔ̃ dyi dyíìn.”

⁸ Ké Gèɖèpɔ́ɔ̀ cɛ̃ɛ ma Nóà kè ɔ dyú-gàà ɓěɔ̀ gbo ɖe, ké ɔ ɖá,

⁹ “Gmɔ̀ nɔ̄, ɓó kàǔn wɛ̃ɛ, ḿ kè ɓě kè ɓěɛ̀ gbǒ-xwíníín gànáɔ̀

¹⁰ ɔ kè ɖɛ séín nì cĩ́ɛń ɖé ɓóɖó-kpàɔ̀ kɔ̃ mɔ̀à naà kè nyúà-ɖɛ̀ kè xwáɖá-xwíɖíi-nìmìì, ɓɛ́ ɓě kè wa sɔ̀à ɖé méèɔ̀ múɛɛ nì wuɖu dèɛ̌n.

¹¹ Ɓěà dèè-wùɖùɔ̀ kɛà kɛ̀. Ḿ se náá fɛ̀ɛ̀ ɖò mú gbɔɔ̌ mu ɖe dyììn ɖé ní-tò mú. Ní-tò ɖò se nìɛ̌ mu, ɓɛ́ ɔ ké ɓóɖó-kpàɔ̀ mú gbɔɔ̀ ɖe fɔɔ cá.

¹² Ké sè-ná-sèɛ̀ dèè-wùɖù ɓɛ́ ɓěà dèà kɛɛ dyí-tɛ̀mɛ̀ìn-ɖɛ̀ kɛà kɛ̀.

¹³ Ní mu ní ní-mɛ̀nɛ̀ɔ̀ ɖé dyɔɔ̀ dyí poùn, ɓɛ́ ɔ ké dèè-wùɖù nìà ɓó ḿ kè ɓóɖó-kpà gànáɔ̀ pṹa kɛɛ dyí-tɛ̀mɛ̀ìn-ɖɛ̀ jǔ.

¹⁴ Ti séín ní mu ní-kpò ɖé dyɔɔ̀ dyí dyàùn, ké ní-mɛ̀nɛ̀ɔ̀ mu xwáɖáún wóɖóùn ɖéɛ múɛɛ,

¹⁵ nìí, dèè-wùɖù nìà ɓó ḿ kè ɓě kè ɖɛ kã̀ìn séín ɓéɖé fɛ̀ɛ̀ kɛɛ pṹa kɛɛ jè mu ḿ hwìɖǐi dyiìn. Ké ní ɖò se ɖaɓaá mu, ɓɛ́ ɔ ké ní-tò ɖò nyu ɓɛ́ ɔ ké fɛ̀ɛ̀ séín mú gbɔɔ̀ ɖe fɔɔ cá.

¹⁶ Ti séín ní-mɛ̀nɛ̀ɔ̀ mu xwáɖáún wóɖóùn ɖé dyɔɔ̀ dyíɛɛ, ní muɛ dyéìn, ké sè-ná-sèɛ̀ dèè-wùɖù nìà ɓó ḿ kè ɖɛ séín ɓéɖé fɛ̀ɛ̀ ɖé ɓóɖó-kpàɔ̀ kɔ̃ɛɛ pṹa kɛɛ jè mu ḿ hwìɖǐi dyiìn.”

¹⁷ Ké Gèɖèpɔ́ɔ̀ cɛ̃ɛ ma Nóà gbo ɖe, ké ɔ ɖá, “Ní-mɛ̀nɛ̀ɔ̀ mɔ̀ dèè-wùɖù ɓɛ́ ḿ kè fɔ̀ɔ̀-ɖɛ̀ séín nì ɓóɖó-kpàɔ̀ kɔ̃ɛɛ ɖǎà dèɛɛ dyí-tɛ̀mɛ̀ìn-ɖɛ̀.”

Nóàà dyú-gàà ɓěɔ̀

¹⁸ Nóàà dyú-gàà ɓě ɓɛ́ wa sɔ̀ ma kà ɖé méèɔ̀ múɛɛ, wa kɛà kɛ̀: Cɛ̃́ìn kè Hɛ̃́ìn ɔ kè Jéfɛ̀. Hɛ̃́ìn mɔ̀ ma Kénà ɓǎ.

¹⁹ Nyɔ tã ɓěa mɔ̀ ma Nóàà dyú-gàà ɓě kɔ̃̀ mú ɓɛ́ toɖo-kɔ̃-nyɔ̀ séín sɔ̀ ma kɛ.

²⁰ Wé ɖòɛ̀ ɓaɖaa, Nóà ɓɛ́ ɔ mɔ̀ ma geɖe-nyu-nyɔ̀ kɛɛ ɓá ma géɖéè kɔ̃̀ ɓo ɓɛ́ wa nyu wã́ìn múɛ.

²¹ Ti ɓɛ́ ɔ ɖǎ ma wã́ìn sɔ̀ìn ma ɖé ɔ géɖéèɔ̀ múɛɛ ɓáún-ɓáún ná kɛɛ, wã́ìnɔ̀ nyu ma ɔ ní. Ké ɔ fɔ̀nɔ̀ ma gbɔ, ké ɔ pɛ̃́ ma ɖé ɔ jàɖàìn-gbòɔ̀ mú dyi.

²² Ké Hɛ̃́ìn mɔ̀à Kénà ɓǎɔ̀ kɛɛ gmɔ̀ ma ɔ ɓǎà gbɔ-fɔ̀nɔ̀-fɔ̀nɔ̀ɔ̀ dya gãa, ké ɔ cɛ̃ ma wa ɓǎà gbɔ fɔ̀nɔ̀ jè ɔ ɖíí-gàà sɔ̃́ ɓě nì ma kà ɖé píéɛɛ gbo.

²³ Púɛɛ, Cɛ̃́ìn kè Jéfɛ̀ ɖú ma kɔ̃in-wáɖá-ɖɔ̀ ɖò dyí, ké wa gbaa ma kɔ̃ún dyi. Ké wa naìn ma kɔ̃ ɖei, ké wa mu. Ké wa wáɖáa ma wa ɓǎ kɔ̃in, ké wa ɓáìn ma ɔ gbɔ-fɔ̀nɔ̀-fɔ̀nɔ̀ɔ̀ ɖɔ kɔ̃in. Wa pòìn ma ɖé kɔ̃, wa ní kɔ̃̀ ɖà wa ɓǎà gbɔ-fɔ̀nɔ̀-fɔ̀nɔ̀ɔ̀ dyé jè.

²⁴ Ti ɓɛ́ Nóà sɔ̀ ma ɔ nɔmɔɔ-kũ̀ùnɔ̀ mú, ké ɔ wɔ̃́ kpeɖe ɔ dyú-gàà dyùwè mɔ̀à Hɛ̃́ìn kɛɛ nyu ma kà ɔ bũ̌ɛ jèɛɛ,

²⁵ púɛɛ, ɔ cɛ̃ɛ ma, ké ɔ ɖá, “Hwòɛ̌-wùɖù nì Kénàà gbǒ-xwíníínɔ̀ kɔ̃! Wa mu gǐì séínɛ̀ gǐì jǔùn ɓó Cɛ̃́ìn kè Jéfɛ̀ɛ̀ gbǒ-xwíníínɔ̀ gbo.

²⁶ Ɓěà ɓàìn Bounɓoɔ̀, sepóɛɖé ɔ mu Cɛ̃́ìn Gèɖèpɔ́ɔ̀ jǔùn! Ké Kénàà gbǒ-xwíníínɔ̀ mu Cɛ̃́ìn nììn gbǒ-xwíníínɔ̀ gǐì jǔùn.

²⁷ Gèɖèpɔ́ɔ̀ mɛ po Jéfɛ̀ɛ̀ gbǒ-xwíníínɔ̀ páɔ̀ kɔ̃. Ké wa mɛ dyé mana ɓɛ́ Cɛ̃́ìn gbǒ-xwíníínɔ̀ mu ɓéɖéìn nyɛɛ ɖò ɖekè. Ké Kénàà gbǒ-xwíníínɔ̀ mu Jéfɛ̀ nììn gbǒ-xwíníínɔ̀ gǐì jǔùn ɖekè.”

²⁸ Sɔ̀ìn ɓó ní-tòɔ̀ gboɛɛ, Nóà nyu ma zɔ̃ hɔ̃dɛ̀ɖɛ̀ tã kè kpáɖá-nyɔ sɔ̃́ ɓaɖa-bùè ɖe.

²⁹ Zɔ̃ jĩ̀ kà ɓɛ́ Nóà nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-hĩinyɛ kè kpáɖá-nyɔ sɔ̃́ ɓaɖa-bùè, hwɛ̀ ké ɔ mɛ́ ma.