Jɛ́nɛ́sì 6 - Ɓǎsɔ́ɔ̀ Báɓòɔ̀

Ní-tòɔ̀

¹ Ti ɓɛ́ nyɔǔn-dyù nìǎ ma dyí vòɛ̌n ɓóɖó-kpàɔ̀ kɔ̃, ké wa nìǎ ma màa-dyù ɓě wóɖóɛ̌n nyɛɛ,

² Gèɖèpɔ́ɔ̀ dyú-gàà ɖíɛ́ ɓě dyé ma nyɔǔn-dyùɛ̀ dyú-màà ɓěɔ̀ kà wa nɔ̀mɔ̀ ma kɔ̃in nyɛ, ké wa kpɔ̃ ma nyɔ́nɔ́ ɓě wa mɔ́ ma kɛɛ dyi.

³ Hwɛ̀ ké Bounɓoɔ̀ cɛ̃ɛ ma, ké ɔ ɖá, “Ḿ se nyɔǔn dyi táǎ mu, ɓɛ́ wa ké hwèɖèìn ɖe. Wa mɔ̀ fɔ́ jèɛɛ, wa mu cĩ́ìn ɓó zɔ̃ hɔ̃dɛ̀ɖɛ̀ ɖò kè kpáɖá-nyɔ nyɛ̀nɛ̀ɛ̀.”

⁴ Ɓó ti kɔ̃̀ ɓaɖa ɓɛ́ Gèɖèpɔ́ɔ̀ dyú-gàà ɓěɔ̀ kè nyɔǔn-dyùɛ̀ dyú-màà ɓěɔ̀ nì ma ɓó da, ké wa wóɖóìn ma dyú ɓěɛɛ, waà dyú ɓěɔ̀ kè waà nyúà-dyú ɓěɔ̀ mɔ̀ ma nyɔ ɓúá dyai ɓě ɓóɖó-kpàɔ̀ kɔ̃. Wa mɔ̀ ma kpé-ɓéɖé-nyɔ̀ ɓě nìǒ zɔ̃̌ɔ̀ ɓɛ́ wa kɔ̃̀ nyɛ́nɛ́ muó zɔ̃̌ɔ̀ kɛ.

⁵ Ti ɓɛ́ Bounɓoɔ̀ dyéɛ kà nyɔǔn-dyùɛ̀ hwòɖǒ-kɔ̃in-nyìnììn-nyìnììn nyu ma kpéín ɓúáa ɓóɖó-kpàɔ̀ kɔ̃, ké kà waà hwìɖǐi-poìn-ɖɛ̀ séín mɔ̀ ma ɖɛ gbà kánáá pūɛɛ,

⁶ ɔ kpá ma wìǐn. Ɔ hwòɖǒ kpá ma ɖé ɖei mìɔ ɓó nyɔǔn-dyù ɓě nìà ɓóɖó-kpàɔ̀ kɔ̃ɛɛ mɛ jè,

⁷ ké ɔ ɖá, “Ní mu nyɔǔn kè nimii kè ɓíɖíi-dyi-nà-ɖɛ̀ ɔ kè naà séín ɓě ḿ mɛ ma kɛɛ ɓóɖó-kpàɔ̀ kɔ̃ dyi sámáùn, sepóɛɖé ní hwòɖǒ kpá ɖé ɖei ɓó wa mɛ jè.”

⁸ Kɛɛ Bounɓoɔ̀ hwòɖǒ dèìn ma Nóà múin.

⁹ Ɖɛ ɓě ɓá Nóà jè dyíɛɛ, wa kɛà kɛ̀. Nóà mɔ̀ ma dyí-sɛ́ɖɛ́ìn-nyɔ̀. Ɔ se ma kɛɛ ɖò ɓéɖé ɖé nyɔ ɓě nì ma cĩ́ɛń ɓó tia ɓaɖaa hwìɛ̀. Ké ɔ xwɛ̃́ìn ma Gèɖèpɔ́ɔ̀ bũ̌in mìɔ.

¹⁰ Nóà wóɖóìn ma gàa-dyù tã. Waà nyɛ́nɛ́ mɔ̀ ma Cɛ̃́ìn kè Hɛ̃́ìn kè Jéfɛ̀.

¹¹ Ɓó tia ɓaɖaa, nyɔ séín ɓě nì ma ɓóɖó-kpàɔ̀ kɔ̃ɛɛ nyìnììn ma hwòɖǒ kɔ̃in ɖé Gèɖèpɔ́ɔ̀ dyéɖéín, ké wa zàìn ma waà mǔè ɓě ɖɛ gana xwa.

¹² Ké Gèɖèpɔ́ɔ̀ dyéɛ ma kà hwòɖǒ-kɔ̃in-nyìnììn-nyìnììn dyíìn ma ɓóɖó-kpàɔ̀ kɔ̃in nyɛ, sepóɛɖé nyɔ séín nì ɓóɖó-kpàɔ̀ kɔ̃ɛɛ nyìnììn ma hwòɖǒ kɔ̃in ɖé waà nyuu-ɖɛ̀ séín mú.

¹³ Hwɛ̀ ké Gèɖèpɔ́ɔ̀ cɛ̃ɛ ma Nóà gbo, ké ɔ ɖá, “Ní mu nyɔ séín ɓěɔ̀ jè dyi zĩ̀ìn, sepóɛɖé wa nì ɖɛ gana xwa zaìn zàǐn. Ní muá wa kè ɓóɖó-kpàɔ̀ mú gbɔɔ̀ùn.

¹⁴ Ɔ jèɛɛ, m̀ mɛ cɛ̃ cu ɓɛ́ ɔ nɔ̀mɔ̀ dyíin ɓó méè mú kɔ jèɛ, ɓɛ́ m̀ kéɛ méè vɛ̀nɛ̀ ɖò mú kɔ ɓó m̀ mìɔùn bìì. M̀ mɛ cɛ̃ɛ xwíníín, ɓɛ́ m̀ kéɛ kóò-táà bũ̌in kè xwíníín dyi sàmàìn.

¹⁵ Kǎà m̀ mɛ nyuɛ kà. Ɔ tɔ̀mɔ̀-tɔ̀mɔ̀ɔ̀ mɛ mɔ̀ ɓáɖáa kpáɖá-nyɔ tã ɓaɖa-bùè sè hm̀m̌, ké ɔ xwíɖí-kùɔ̀ mɛ mɔ̀ ɓáɖáa ɓaɖa-bùè sè sɔ̃́ kè ɓɛ́ìn-hwìɛ̀, ké ɔ dya-tɔ̀mɔ̀-tɔ̀mɔ̀ɔ̀ mɛ mɔ̀ ɓáɖáa mɛ̀nɛ̌ìn-sɔ̃́ kè ɓɛ́ìn-hwìɛ̀.

¹⁶ M̀ mɛ nyu gbǒ-pìɔ̌ ɓó méèɔ̀ bìì, ɓɛ́ m̀ ké pá ɓɛ́ìn ɓo-pìɔ̌ dyúáɖò kè ɓɛ́ìn-hwìɛ̀ kɛɛ ɓó gbǒ-pìɔ̌ɔ̀ kè ɔ dya-tɔ̀mɔ̀-tɔ̀mɔ̀ɔ̀ pṹa sè. Ɔ mɛ mɔ̀ gbǒ deìn kɔ̃in tã. Ké m̀ mɛ nyu gbǒ-wɔ̃̀ ɖò ɓóɛ bũ̌.

¹⁷ Mɔ̄ mɔ̀ nyɔ mu ní-tò ɖé ɓóɖó-kpàɔ̀ kɔ̃ tòùn, ɓɛ́ ɔ ké ɖɛ séín ɓéɖé fɛ̀ɛ̀ ɖé ɓóɖó-kpàɔ̀ kɔ̃ɛɛ mú gbɔɔ̀. Ní mu ɖɛ séín jè dyi zĩ̀ìn.

¹⁸ Kɛɛ ḿ kè mɔ̀ mu wuɖu dèìn. Ké nì mu méèɔ̀ mú dyáùn, m̀ kè nì gmàà kè nì dyú-gàà tã ɓěɔ̀ kè wa nììn gmàà tã ɓěɔ̀ ɖekè, ɓɛ́ ɓěɛ̀ fɛ̀ɛ̀ ké pó.

¹⁹ M̀ mɛ dyáìn ɖɛ séín ɓéɖé fɛ̀ɛ̀ kɛɛ sɔ̃́-sɔ̃́ ɖé méèɔ̀ mú, ɓɛ́ wa nììn fɛ̀ɛ̀ ké pó ɖekè. M̀ mɛ dyáìn wa nyɔ́nɔ́ kè ɓíɔ́.

²⁰ Naà-dù kò-kò ɓěɔ̀ sɔ̃́-sɔ̃́ kè nimii-dù kò-kò ɓěɔ̀ sɔ̃́-sɔ̃́ kè ɓíɖíi-dyi-nà-ɖɛ̀-dù kò-kò ɓěɔ̀ sɔ̃́-sɔ̃́ mu m̀ gbo dyiìn, ɓɛ́ m̀ ké wa ɖé méèɔ̀ mú kpa, ɓɛ́ wa fɛ̀ɛ̀ ké pó.

²¹ M̀ mɛ kpa ɖé ɖii-ɖɛ̀ kã̀ìn séín ɓó m̀ kè wa bìì.”

²² Ké Nóà nyu ma ɖɛ séín ɓěɔ̀ nyɛ̀nɛ̀ɛ̀, kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ.