Jɛ́nɛ́sì 5 - Ɓǎsɔ́ɔ̀ Báɓòɔ̀

Áɖɔ̀ùn nyúà-dyú deìn dúún ɓěɔ̀

¹ Ɖɛ ɓě wa céè ma kĩ́ín ɓá Áɖɔ̀ùn nyúà-dyú deìn dúún ɓěɔ̀ dyíɛɛ, wa kɛà kɛ̀. Ti ɓɛ́ Gèɖèpɔ́ɔ̀ mɛ ma nyɔǔn wɛ̃ɛ, ɔ mɛ ma wa kà ɔ mìɔùn nyuà nìɛ̀ kɛ.

² Ɔ mɛ ma wa gàa kè màa. Ké ɔ po ma wa mana kɔ̃. Ké ɔ ɖáìn wa “Nyɔǔn-Dyù.”

³ Ti ɓɛ́ Áɖɔ̀ùn ɖǎ ma zɔ̃ hɔ̃dɛ̀ɖɛ̀ ɖò kè kpáɖá-nyɔ ɓaɖa-bùè nyuɛɛ, ɔ wóɖóìn ma gàa-dyù ɖò ɓɛ́ ɔ kèɔ̀ hwɔìn ma kɛ. Ké ɔ jǔìn ma ɔ Sɛ́ɛ̀-nyɛ̀nɛ̀.

⁴ Sɔ̀ìn ɓó ti ɔ ɖǎ ma Sɛ́ɛ̀ wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ mɛ̀nɛ̌ìn-tã ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

⁵ Zɔ̃ jĩ̀ kà ɓɛ́ Áɖɔ̀ùn nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-hĩinyɛ kè kpáɖá-nyɔ ɓaɖa-bùè, hwɛ̀ ké ɔ mɛ́ ma.

⁶ Ti ɓɛ́ Sɛ́ɛ̀ ɖǎ ma zɔ̃ hɔ̃dɛ̀ɖɛ̀ ɖò kè hm̀m̌ nyuɛɛ, ɔ wóɖóìn ma Ínɔ́sì.

⁷ Sɔ̀ìn ɓó ti ɔ ɖǎ ma Ínɔ́sì wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ mɛ̀nɛ̌ìn-tã sè mɛ̀nɛ̌ìn-sɔ̃́ ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

⁸ Zɔ̃ jĩ̀ kà ɓɛ́ Sɛ́ɛ̀ nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-hĩinyɛ kè ɓaɖa-bùè sè sɔ̃́, hwɛ̀ ké ɔ mɛ́ ma.

⁹ Ti ɓɛ́ Ínɔ́sì ɖǎ ma zɔ̃ kpáɖá-nyɔ hĩinyɛ ɓaɖa-bùè nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Kénàùn kɛ.

¹⁰ Sɔ̀ìn ɓó ti ɔ ɖǎ ma Kénàùn wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ mɛ̀nɛ̌ìn-tã kè ɓaɖa-bùè sè hm̀m̌ ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

¹¹ Zɔ̃ jĩ̀ kà ɓɛ́ Ínɔ́sì nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-hĩinyɛ sè hm̀m̌, hwɛ̀ ké ɔ mɛ́ ma.

¹² Ti ɓɛ́ Kénàùn ɖǎ ma zɔ̃ kpáɖá-nyɔ tã ɓaɖa-bùè nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Máhàɖáɖèò kɛ.

¹³ Sɔ̀ìn ɓó ti ɔ ɖǎ ma Máhàɖáɖèò wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ mɛ̀nɛ̌ìn-tã kè kpáɖá-nyɔ sɔ̃́ ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

¹⁴ Zɔ̃ jĩ̀ kà ɓɛ́ Kénàùn nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-hĩinyɛ kè ɓaɖa-bùè, hwɛ̀ ké ɔ mɛ́ ma.

¹⁵ Ti ɓɛ́ Máhàɖáɖèò ɖǎ ma zɔ̃ kpáɖá-nyɔ tã sè hm̀m̌ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Jáwɛ̀ɖɛ̀ kɛ.

¹⁶ Sɔ̀ìn ɓó ti ɔ ɖǎ ma Jáwɛ̀ɖɛ̀ wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ mɛ̀nɛ̌ìn-tã kè kpáɖá-nyɔ ɓaɖa-bùè ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

¹⁷ Zɔ̃ jĩ̀ kà ɓɛ́ Máhàɖáɖèò nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-tã kè kpáɖá-nyɔ hĩinyɛ ɓaɖa-bùè sè hm̀m̌, hwɛ̀ ké ɔ mɛ́ ma.

¹⁸ Ti ɓɛ́ Jáwɛ̀ɖɛ̀ ɖǎ ma zɔ̃ hɔ̃dɛ̀ɖɛ̀ ɖò kè kpáɖá-nyɔ tã sè sɔ̃́ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Ínɔ̀ kɛ.

¹⁹ Sɔ̀ìn ɓó ti ɔ ɖǎ ma Ínɔ̀ wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ mɛ̀nɛ̌ìn-tã ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

²⁰ Zɔ̃ jĩ̀ kà ɓɛ́ Jáwɛ̀ɖɛ̀ nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-hĩinyɛ kè kpáɖá-nyɔ tã sè sɔ̃́, hwɛ̀ ké ɔ mɛ́ ma.

²¹ Ti ɓɛ́ Ínɔ̀ ɖǎ ma zɔ̃ kpáɖá-nyɔ tã sè hm̀m̌ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Màtúzìɖà kɛ.

²² Sɔ̀ìn ɓó ti ɔ ɖǎ ma Màtúzìɖà wóɖóìn nyɛ gboɛɛ, ɔ xwɛ̃́ìn ma Gèɖèpɔ́ɔ̀ bũ̌in ɖe mìɔ ɓó zɔ̃ hɔ̃dɛ̀ɖɛ̀ tã xwíníín, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

²³ Zɔ̃ jĩ̀ kà ɓɛ́ Ínɔ̀ nyu ma kɛɛ mɔ̀ ma zɔ̃ hɔ̃dɛ̀ɖɛ̀ tã kè kpáɖá-nyɔ tã sè hm̀m̌.

²⁴ Ínɔ̀ xwɛ̃́ìn ma Gèɖèpɔ́ɔ̀ bũ̌in ɖe mìɔ, ké ɔ se ma nì ɖe, sepóɛɖé Gèɖèpɔ́ɔ̀ kpa ma ɔ dyɔún.

²⁵ Ti ɓɛ́ Màtúzìɖà ɖǎ ma zɔ̃ hɔ̃dɛ̀ɖɛ̀ ɖò kè kpáɖá-nyɔ hĩinyɛ sè mɛ̀nɛ̌ìn-sɔ̃́ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Ɖémɛ̀ kɛ.

²⁶ Sɔ̀ìn ɓó ti ɔ ɖǎ ma Ɖémɛ̀ wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ hĩinyɛ sè sɔ̃́ ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

²⁷ Zɔ̃ jĩ̀ kà ɓɛ́ Màtúzìɖà nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-hĩinyɛ kè kpáɖá-nyɔ tã sè mɛ̀nɛ̌ìn-hĩinyɛ, hwɛ̀ ké ɔ mɛ́ ma.

²⁸ Ti ɓɛ́ Ɖémɛ̀ ɖǎ ma zɔ̃ hɔ̃dɛ̀ɖɛ̀ ɖò kè kpáɖá-nyɔ hĩinyɛ sè sɔ̃́ nyuɛɛ, ɔ wóɖóìn ma gàa-dyù ɖò.

²⁹ Ké ɔ jǔìn ma ɔ Nóà-nyɛ̀nɛ̀ kɔ̃̀ xwíníín mɔ̀à hwòɖǒ-dyi-dè-dèɛ, sepóɛɖé ɔ ɖá, “Dyú nìà kɛ mu à hwòɖǒ dyi dèìn ɖé à sɔ̃-kũ̀à ku wɔ̃ ɓě ɓɛ́ à ɖǎ nyu ɓó ɓóɖó ɓɛ́ Bounɓoɔ̀ ɖǎ ma hwòɛ̌-wùɖù kɔ̃ poɛɛ jè.”

³⁰ Sɔ̀ìn ɓó ti Ɖémɛ̀ ɖǎ ma Nóà wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ hm̀m̌ kè kpáɖá-nyɔ hĩinyɛ ɓaɖa-bùè sè hm̀m̌ ɖe, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

³¹ Zɔ̃ jĩ̀ kà ɓɛ́ Ɖémɛ̀ nyu ma kɛɛ mɔ̀ ma zɔ̃ hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ tã ɓaɖa-bùè sè mɛ̀nɛ̌ìn-sɔ̃́, hwɛ̀ ké ɔ mɛ́ ma.

³² Ti ɓɛ́ Nóà ɖǎ ma zɔ̃ hɔ̃dɛ̀ɖɛ̀ hm̀m̌ nyuɛɛ, ɔ wóɖóìn ma gàa-dyù tã. Wa nyɛ́nɛ́ mɔ̀ ma Cɛ̃́ìn kè Hɛ̃́ìn kè Jéfɛ̀.