Jɛ́nɛ́sì 49 - Ɓǎsɔ́ɔ̀ Báɓòɔ̀

Jékɔ̀ po ɔ dyú ɓěɔ̀ mana kɔ̃

¹ Hwɛ̀ ké Jékɔ̀ ɖá ma ɔ dyú ɓěɔ̀, ké ɔ ɖá, “Ɓě poìn dà ḿ gbo dyí, ɓɛ́ ḿ ké ɖɛ mu ɓě gbo kpáùn ɖé dyúa kɛɛ ɓě gbo cɛ̃.

² “Ní dyú ɓě, ɓě poìn dyí, ɓɛ́ ɓě ké mɔ̄ mɔ̀à Jékɔ̀ kɛɛ gbo ɖùǔ tòo. Ɓě tò mɔ̄ mɔ̀à ɓě ɓǎ Éézùɖùɛ̀ kɛɛ gbo ɖùǔo.

³ “Wuɖuɓíín, mɔ̀ mɔ̀ ní nyíɔ́-dyùɔ̀. Mɔ̀ mɔ̀ ní kpéɔ̀. Mɔ̀ kɔ̃̀ jè tɛ̀mɛ̀ìn nyɔǔn dyí kà ḿ ɖǎ gàa hwɛ̀ kɛ. M̀ ɖǎ dya-dè-dè ɓáún-ɓáún kè kpé ɓáún-ɓáún ɓéɖé.

⁴ Kɛɛ m̀ se nyɔ kpa ɖɛɔ̀ jǔɛ mu kánáá pū, sepóɛɖé mɔ̄ mɔ̀à m̀ ɓǎ gàná kɛɛ, m̀ dyá ma ní gmààɔ̀ gbo gbǒǔn. M̀ dyá ma ɖé ní gbɛɔ̀ kɔ̃, ké m̀ poɛ ma zɛ̀nɛ̌. M̀ mɔ̀ ɖɛ-mú-mùìn-nyɔ̀ kà dyíí-nì nìà kɛ.

⁵ “Símìɔ̀ kè Ɖíìváà, ɓě mɔ̀ wóɖó-wóɖó ɓě. Ɓěɛ̀ zàìn nyɔǔn ɖɛ gana xwa dyììn ɖé ɓěɛ̀ gàsíà ɓěɔ̀ mú.

⁶ Ḿ se ɓěɛ̀ dɔ́ɔ́ ɖò hwìɛ̀ kpáa mu ɖe. Ḿ se dɛ̀ ɓě poìn dyíɛɛ dyi síɛ mu fɔɔ cá. Sepóɛɖé ɓě ɖǎ gàa ɓě ɖáɓá ɖé ɓěɛ̀ dyoɖo-hwòɖòɔ̀ mú, ké ɓě ɖǎ ɓìɖǐ ɓíɔ́ jĩ̀ kà ɓěɛ̀ hwòɖǒ mɔ́ mú gbɔɔ̀ dyiɛɛ ɓo-ɖeín-tɛ̃̀ìn ɓěɔ̀ cɛ̃.

⁷ Gboò-wùɖù nì ɓě kɔ̃ ɓó ɓěɛ̀ dyoɖo-hwòɖò ku wɔ̃ ɓɛ́ ɔ nyìnìàìn dyíin mìɔ kɛɛ jè. Ɓě mu mú geìn ɖé mɔ̄ mɔ̀à Jékɔ̀ kɛɛ, ní xwíníín-dyù ɓěɔ̀ hwìɛ̀, ɓɛ́ ɓě ké dyi gbɛ̀ìn ɖé Éézùɖùɛ̀-ɓòɖòɔ̀ múin dà séín.

⁸ “Júɖà, nì ɖíí-gàà ɓěɔ̀ mu m̀ ɓàìn. Nì sɔ̃ mu nì mú-nyɛ́-nyɔ̀ ɓěɔ̀ wɔ̃ ziìn. Nì ɖíí-gàà ɓěɔ̀ mu m̀ dyúa dú hwuɖu taɓaùn.

⁹ Júɖà, ní dyú, nì mu kpé ɓéɖéìn kà ganìǎ ɓɛ́ ɔ kpɔ̃ ɖɛ, ké ɔ tàà, hwɛ̀ ké ɔ mu ɖé ɔ ɓíɔ̀ mú ɖe, ké ɔ pɛ̃́à dyiɛɛ nìà kɛ. Nyɛ́ mu ɔ dyoɖoún poùn wɛ̃́?

¹⁰ Júɖà, nyɔ-wuɖuí-kɔ̃̀-kpèɔ̀ se ɖé nì gbǒɔ̀ xwíníín sɔ̀ɔ̌ mu. Nì xwíníín-dyù ɓěɔ̀ mu nyɔ wuɖuí kɔ̃̀ùn tee, ɓɛ́ kpéɔ̀ ké nyɔ kɔ̃̀ ɓɛ́ ɔ kéɛ dyéɛɛ dyɛ̀ìn hwɛ̀. Ké ɓóɖó-dù ɓě mu nyɔɔ̀ wuɖu xwíɖíi nììn.

¹¹ Ɓó tia ɓaɖaa, wa mu waà jǎkasì vɛ̀nɛ̀ kèɛ̀ dyú ɓěɔ̀ géɖéè-ɖúú-gbǒ kpa ɖɛ ɓě dyi wã̀ìn ɓɛ́ìn, sepóɛɖé géɖéè mu bãùn mìɔ. Ké wa mu waà ɖɔ ɓěɔ̀ wã́ìn gbo wɔɔ̀ìn ɓɛ́ìn, sepóɛɖé wã́ìn mu dyí vòùn mìɔ.

¹² Waà dyéɖé ɓěɔ̀ mu boùn, sepóɛɖé wa mu wã́ìn ɓáún-ɓáún náùn jè. Ké waà nyɛ́nɛ́ mu púɖúùn, sepóɛɖé wa mu ɓìɖǐ-nɛɛ̀-nì ɓáún-ɓáún náùn jè.

¹³ “Zɛ́ɓíúɖɔ̀ùn, nì mu ɖé dyóóɔ̀ wĩín cĩ́ìn, ɓɛ́ nì páɔ̀ ké méè ɓěɛ̀ ɖua-pòìn-naín jǔ. Ké nì páɔ̀ mu ɖé Zíɖɔ̀ùn-hwɔ̀ɖɔ̀ɔ̀ gbo nyiniìn.

¹⁴ “Ɛ́sàkà, nì mu fóùn kà jǎkasì ɓéɖé kpé ɓɛ́ ɔ pɛ̃́ ɓó ɔ gbɛ̌ ɓě ɓɛ́ wa ɖǎ ɔ kɔ̃ún dyi sã̀ìn nyɛɛ hwìɛ̀ dyi, kɛɛ ɔ se ɖɛ ɖò nyuɛń nì, ké wa po ɔ pɛ́í hwɛ̀ kɛɛ nìà kɛ.

¹⁵ Ti ɓɛ́ nì muɛ dyéìn kà nì cĩ́-naínɔ̀ nɔ̀mɔ̀ dyíin, ké nì ɓóɖóɔ̀ nɔ̀mɔ̀ dyíin nyɛɛ ní, nìí, nì mu kũ̀à nyuùn kà gǐì nìà kɛ.

¹⁶ “Dɛ̃́ìn, nì mu Éézùɖùɛ̀-nyɔ̀ ɓěɔ̀ zaa wɔ̃ poùn. Nì mu Éézùɖùɛ̀-xwèɖè-dù ɓěɔ̀ ɖò jǔùn.

¹⁷ Nì mu kpé ɓéɖéìn kà cɛ̃́-sɛ̀ nìà ɓó hwìè gbìǐ, ɓɛ́ ɔ dyi sǒ ɖò ɓo ɖeín numu ní, nìí, ɔ nyuɛ ké nyɔ nìɛ̀ kɔ̃ún wɛ̃ɛ ɓuɖuɛ kɔ̃ún, ké ɔ kpá dyiɛɛ nìà kɛ.”

¹⁸ Hwɛ̀ ké Jékɔ̀ cɛ̃ɛ ma Bounɓoɔ̀ gbo, ké ɔ ɖá, “Óó, Bounɓo, ḿ nì m̀ fòɛ̌n, ɓɛ́ m̀ ké ní nyɔ ɓěɔ̀ póìn.”

¹⁹ Hwɛ̀ ké ɔ kpa ma ɔ mana-kɔ̃-po-poɔ̀ dyúa, ké ɔ ɖá, “Gáà, sṹún-gɔ̀-nyɔ̀ mu m̀ kɔ̃ kpáùn, kɛɛ nì mu wa kíɖíí kpáùn, ɓɛ́ m̀ ké wa toún ɖu.

²⁰ “Ásè, nì mu ɖii-ɖɛ̀ nɔ̀mɔ̀ dyíin bã̀ìn. Mɔ̀ mɔ̀ nyɔ mu kã́á nììn ɖii-ɖɛ̀ ɓéɖéìn.

²¹ “Náfátàɖì, nì mu xwa fɛ̃̀ìn kà déɖé nyɔ́nɔ́ ɓɛ́ xwáɖá se ɔ kpɔ̃ɔ ɓɛ́ìn nyɛɛ nìà kɛ. Ké nì mu dyú nɔ̀mɔ̀ kɔ̃in ɓě wóɖóìn.

²² “Jòsé, nì mu dúún zaìn kà tòɖòò-cù ɓɛ́ ɔ mɛ ɓó ní ɖò gbìǐ, ké ɔ zà ɖɔ́ nɔ̀mɔ̀ dyíin nyɛɛ nìà kɛ.

²³ Ké to-vɔ̃-nyɔ̀ ɓě mu m̀ to dyàùn ɖé dyoɖo mú. Wa mu m̀ pòìn ɓó nì mú nyɛ́ jè.

²⁴ Kɛɛ nì vɔ̃̀ìn-ɖɛ̀ɔ̀ mu m̀ xwaún nììn kóɖó-kóɖó. Nì sɔ̃ ɓěɔ̀ mu kpéí kpáùn mìɔ dyììn ɖé à kpé-séín-ɓéɖé-Gèɖèpɔ́ɔ̀ mú. Ɔ mɔ̀ à dyí-gmɔ̀-nyɔ̀ kà ɓáɖáá-dyí-gmɔ̀-nyɔ̀ gmɔ̀à ɓáɖáá dyíɛ. Ɔ mɔ̀à Éézùɖùɛ̀-nyɔ̀ ɓěɔ̀ sɔ́ɔ́-kpòɔ̀ kɛ̀.

²⁵ Ɔ mɔ̀ ní Gèɖèpɔ́ɔ̀, ké ɔ mu m̀ gbo kpáùn. Ɔ mɔ̀ kpé-séín-ɓéɖé-Gèɖèpɔ́ɔ̀, ké ɔ mu m̀ mana kɔ̃ poùn. Ɔ mu m̀ mana kɔ̃ poùn dyììn ɖé dyóɖó kè ní kè nyúà-ɖɛ̀ kúɖúú ɔ kè dyú ɓáún-ɓáún mú.

²⁶ Ní mana ɓěɔ̀ ɓúá kpéín ké ɔ zi kɔ́mɔ́-ɖɛ̀ ɓě nìà ɖé hwèɖèìn-hwèɖèìn-tòɖò ɓěɔ̀ múɛɛ dyí. Mana séín ɓěɛ̀ mɛ nì mɔ̀ mɔ̀ nyɔ nìà nì ɖíí-gàà ɓěɔ̀ kɔ̃in nyɛɛ kɔ̃ ɖekè.

²⁷ “Bɛ̃́címà, nì mu wɔ̃ kuùn kà ji nìà kɛ. Nì mu nì mú-nyɛ́-nyɔ̀ ɓě toún ɖuùn ti séín, ɓɛ́ m̀ ké waà kɔ̃̀ɔ̀-ɖɛ̀ ɓě ɓɛ́ m̀ zà wa xwaa geìn.”

²⁸ Kǎà Éézùɖùɛ̀ nyu ma ɔ dyú ɓěɔ̀ mana kɔ̃ poɛ. Ɔ po ma wa mana ɓɛ́ ɔ kè wa ɖò-ɖò wɛ̃ìn ma dyíɛɛ kɔ̃. Wa mɔ̀ nyɔ nyuà Éézùɖùɛ̀-xwèɖè-dù ɓaɖa-bùè sè sɔ̃́ ɓěɔ̀ kɛ̀.

Jékɔ̀ɛ̀ mɛ́ jè

²⁹ Hwɛ̀ ké Jékɔ̀ sèìn ma ɔ dyú-gàà ɓěɔ̀ wuɖu nìà kɛ dyi, ké ɔ ɖá, “Ḿ nìǎ ní nyɔ ɓěɔ̀ gbo muɛń. Ɓě mɛ zàìn ḿ ɓó ḿ ɓǎ ɓěɔ̀ gbo dyóɖóún ɖé ɓí nìà ɖé Ɛ́fɔ̀nɔ̀ mɔ̀à Hítì-nyɔ̀ɔ̀ kɛɛ páɔ̀ múɛɛ mú.

³⁰ Ɔ mɔ̀ ɓí nìà ɖé Màpéɖà-pàɔ̀ múɛ. Ɔ nì ɖé Máwèɖè ɓíɖí-hwɔ̀ɖɔ̀ nìà ɖé Kénà-ɓòɖòɔ̀ kɔ̃ɛɛ wáún. Ééɓòɖòhɛ̃́ɛ̀ dɔ̃ ma páɔ̀ kè ɓíɔ̀ Ɛ́fɔ̀nɔ̀ mɔ̀à Hítì-nyɔ̀ɔ̀ kɛɛ gbo, ɓɛ́ ɔ ké kú-toɖoún jǔ.

³¹ Ɖéɛ̀ wa zàìn ma Ééɓòɖòhɛ̃́ɛ̀ kè ɔ gmàà Seɖɔ́ dyóɖóún. Ké ɖéɛ̀ Áázè kè ɔ gmàà Wìɖìbɛ́kɔ̀ sɔ̀ìn ma dyóɖóún. Ké ɖéɛ̀ ḿ zàìn ma Ɖéà dyóɖóún.

³² Ééɓòɖòhɛ̃́ɛ̀ dɔ̃ ma páɔ̀ kè ɓí nìà ɖéɛ múɛɛ Hítì-nyɔ̀ ɓěɔ̀ gbo.”

³³ Ti ɓɛ́ Jékɔ̀ ɖǎ ma ɔ dyú-gàà ɓěɔ̀ wuɖuɔ̀ dyi sèɛ̀n hwɔɛɛ, púɛɛ, ɔ pɛ̃́ ma dyi ɖe, ké ɔ zà ma ɖé fɛ̀ɛ̀, ké ɔ mu ma ɔ nyɔ ɓěɔ̀ gbo.