Jɛ́nɛ́sì 47 - Ɓǎsɔ́ɔ̀ Báɓòɔ̀

¹ Hwɛ̀ ké Jòsé sɔ̀ ma dyí, ké ɔ mu, ké ɔ cɛ̃ɛ ma Féwòɖò gbo, ké ɔ ɖá, “Ḿ ɓǎ kè ní ɖíí-gàà ɓěɔ̀ kè waà nyúà-ɖɛ̀ ɓě kè waà kɔ̃̀ɔ̀-ɖɛ̀ séín ɖǎ ɖé Kénà-ɓòɖòɔ̀ kɔ̃ sɔ̀, ké wa ɖǎ dyi, ké wa nì ɖé Gósɛ̃̀ìn-pàɔ̀ mú ɓó kàǔn.”

² Ké ɔ ɖú ma ɔ ɖíí-gàà ɓěɔ̀ hm̀m̌ dyí, ké ɔ kpa ma wa, ɓɛ́ Féwòɖò ké ma wa dyé.

³ Ké Féwòɖò diè ma wa dyi, ké ɔ ɖá, “Ɖɛ́ mɔ̀ ɓěɛ̀ nyuu-kũ̀à kɛ́?” Ké wa ɖá, “À mɔ̀à nì gbo-nì-nyɔ̀ ɓěɛ̀ kɛɛ mɔ̀ nyúà-ɖɛ̀-po-nyɔ̀ ɓě. Kǎà à ɓǎ ɓě nì ma.

⁴ À dyi, ɓɛ́ à ké nɔ̄ cĩ́ ɓó ti wè mú, sepóɛɖé mɔ́ɔ̀ ku wɔ̃ mìɔ ɖé Kénà-ɓòɖòɔ̀ kɔ̃, ké à nyúà-ɖɛ̀ ɓěɔ̀ ní dyé ɖii-pìǐ ɖò ɖe. Ɔ jèɛɛ, à ɓaà m̀ ní, ɓɔ̌ɔ̀, à mɛ cĩ́ ɖé Gósɛ̃̀ìn-pàɔ̀ mú.”

⁵ Ké Féwòɖò cɛ̃ɛ ma Jòsé gbo, ké ɔ ɖá, “M̀ ɓǎ kè nì ɖíí-gàà ɓěɔ̀ ɖǎ m̀ gbo dyi.

⁶ Íjè-ɓòɖòɔ̀ nìàǒ wɛ̀. Nyí m̀ ɓǎ kè nì ɖíí-gàà ɓěɔ̀ ɓóɖóɔ̀ dɛ̀ nɔ̀mɔ̀ dyíin nyɛ. Wa mɛ cĩ́ ɖé Gósɛ̃̀ìn-pàɔ̀ mú. Ɔ jǔ ké nyɔ ɖò dyi ɖé wa hwìɛ̀ nì, ké ɔ dyi nyúà-ɖɛ̀ dyí gmɔ̀ɔ̀ dyuò nɔ̀mɔ̀ dyíin ní, nìí, m̀ mɛ zàìn ḿ mìɔùn nììn nyúà-ɖɛ̀ ɓěɔ̀ ɔ xwáɖáún.”

⁷ Hwɛ̀ ké Jòsé dyà ma ɔ ɓǎ Jékɔ̀ ɓó Féwòɖò dyúa. Ké Jékɔ̀ zà ma Féwòɖò nyíɔún.

⁸ Ti ɓɛ́ Féwòɖò dyéɛ ma kà Jékɔ̀ ɖǎ ma nyɛ mìɔ kɛɛ, púɛɛ, ɔ diè ma ɔ dyi, ké ɔ ɖá, “Zɔ̃ jĩ̀ xwɛ̌ m̀ nyuà kɛ́?”

⁹ Ké Jékɔ̀ ɖá, “Zɔ̃ jĩ̀ kà ḿ nyuá nɔ̄ ɓóɖó-kpàà kɔ̃ɛɛ mɔ̀ǎ zɔ̃ hɔ̃dɛ̀ɖɛ̀ ɖò kè kpáɖá-nyɔ ɓaɖa-bùè. Ní zɔ̃ ɓěɔ̀ se dyí vò, ké fũ̀à-fṹá ɓáún-ɓáún dyí ɖéɛ mú. Wa kè ḿ ɓǎ ɓě nììn zɔ̃ jĩ̀ kà wa nyu nɔ̄ ɓóɖó-kpàà kɔ̃ɛɛ se mú jĩìn.”

¹⁰ Ké Jékɔ̀ po ma Féwòɖò hwuɖu ɖǎ hwɔ, ké ɔ sí ma píé.

¹¹ Hwɛ̀ ké Jòsé nyí ma ɔ ɓǎ kè ɔ ɖíí-gàà ɓěɔ̀ cĩ́-naín ɖé Íjè-ɓòɖòɔ̀ kɔ̃. Ɔ nyí ma wa ɓóɖóɔ̀ dɛ̀ nɔ̀mɔ̀ dyíin kà Féwòɖò nyuɛ ma kà ɔ gbo cɛ̃ɛ kɛ. Ɔ nyí ma wa Wàɖàmísì-gbɛ̌ɛ̀ gànáɔ̀.

¹² Ké Jòsé nyí ma ɔ ɓǎ kè ɔ ɖíí-gàà ɓěɔ̀ kè ɔ ɓǎà gbǒ-xwíníín gànáɔ̀ ɖii-ɖɛ̀ kà wa nyu ma jĩ̀ɛ̀ kɛ.

Mɔ́ vɛ̀nɛ̀ɔ̀

¹³ Ɓó tia ɓaɖaa, mɔ́ɔ̀ ku ma wɔ̃ mìɔ jèɛɛ, ɖii-ɖɛ̀ ɖò se ma ɓóɖóɔ̀ dà ɖò nì. Íjè-ɓòɖòɔ̀ kè Kénà-ɓòɖòɔ̀ nì ma dyíin nyìnìɛ̌n ɓó mɔ́ɔ̀ jè.

¹⁴ Ké Jòsé poìn ma wíɖí séín ɓě ɓɛ́ Íjè-nyɔ̀ ɓěɔ̀ kè Kénà-nyɔ̀ ɓěɔ̀ ɖǎ ma ɖii-ɖɛ̀ mú dɔ̃ɛɛ dyí, ké ɔ dyàà ma Féwòɖò gbo.

¹⁵ Ti ɓɛ́ wíɖí séínɔ̀ ɖǎ ma Íjè-nyɔ̀ ɓěɔ̀ kè Kénà-nyɔ̀ ɓěɔ̀ xwai hwɛ̀ɛ, púɛɛ, Íjè-nyɔ̀ ɓěɔ̀ dyi ma Jòsé gbo, ké wa ɖá, “À wíɖíɔ̀ ɖǎ à xwai hwɛ̀. Nyí à ɖii-ɖɛ̀, à ní kɔ̃̀ ɖà m̀ dyéɖé waí mɛ́ìn.”

¹⁶ Hwɛ̀ ké Jòsé cɛ̃ɛ ma wa gbo, ké ɔ ɖá, “Kà ɓěɛ̀ wíɖíɔ̀ ɖǎà ɓě xwai hwɛ̀ɛ, nìí, ɓě tò ɓěɛ̀ nyúà-ɖɛ̀ ɓěɔ̀, ɓɛ́ ḿ ké ɓě ɖii-ɖɛ̀ nyí ɓóɛ bɛ̃̌ǐn.”

¹⁷ Ɔ jèɛɛ, wa pèɖèìn ma waà nyúà-ɖɛ̀ ɓěɔ̀ Jòsé gbo ɓó ɖii-ɖɛ̀ jè. Ké Jòsé dɔ̃ ma waà sǒ ɓěɔ̀ kè ɓáɖáá ɓěɔ̀ kè wiɖi ɓěɔ̀ kè ɓìɖǐ ɓěɔ̀ ɔ kè jǎkasì ɓěɔ̀ ɖii-ɖɛ̀ mú. Kǎà Jòsé nyu ma wa zɔ̃ gànáɔ̀ ɖii-ɖɛ̀ nyíɛ ɓó waà nyúà-ɖɛ̀ séín ɓěɔ̀ bɛ̃̌ǐn.

¹⁸ Ti ɓɛ́ zɔ̃ɔ̀ dyɛ mɔ̀ɔ̀ ɖǎ ma ziɛɛ, zɔ̃ɔ̀ nyɔ kɔ ma ɓó dyíɛɛ, nyɔ ɓěɔ̀ dyi ma Jòsé gbo ɖe, ké wa ɖá, “À ɓéɖé ɓɛ́ à ké m̀ jǎà gbo cɛ̃, ɓɔ̌ɔ̀. Kà ɓɛ́ à wíɖíɔ̀ ɖǎ à xwai hwɛ̀, ké à nyúà-ɖɛ̀ ɓěɔ̀ mɔ̀ǎ kà nì kɔ̃̀ɔ̀-ɖɛ̀ kɛɛ, ɖɛ ɖò se à xwa sè ɖe, ɓɛ́ à kéɛ m̀ nyío, ɓɔ̌ɔ̀, ɔ sèìn à mìɔùn kè à pá ɓě.

¹⁹ Ɖɛ́ kɔ̃̀ jè à kè à pá ɓěɔ̀ kéà mú gbɔɔ̀ ɓó m̀ dyéɖé waí kɛ́? Dɔ̃ à kè à pá ɓěɔ̀ ɖii-ɖɛ̀ mú, ɓɛ́ à ké Féwòɖòɛ̀ gǐì jǔ, ɓɛ́ à pá ɓěɔ̀ ké ɔ kɔ̃̀ɔ̀-ɖɛ̀ jǔ. Nyí à ɖii-ɖɛ̀, ɓɛ́ à kéɛ ɖi, à ní kɔ̃̀ ɖà mɛ́, ɔ kè ɓáá-ɖɛ̀-dyùà, ɓɛ́ à kéɛ ɓá, ɓɛ́ à ɓóɖóɔ̀ ní kɔ̃̀ ɖà fóɖóún kpá.”

²⁰ Ɔ jèɛɛ, Jòsé dɔ̃ ma pá séín nì ma Íjè-ɓòɖòɔ̀ kɔ̃ɛɛ ɓó Féwòɖò bìì. Íjè-nyɔ̀ séín ɓěɔ̀ peɖe ma waà pá ɓěɔ̀ ní, sepóɛɖé mɔ́ɔ̀ ku ma wɔ̃ mìɔ ɓó wa bìì. Kǎà pá ɓěɔ̀ nyu ma Féwòɖòɛ̀ kɔ̃̀ɔ̀-ɖɛ̀ jǔɛ.

²¹ Ké Jòsé nyu ma Íjè-nyɔ̀ séín nì ma ɓóɖóɔ̀ dà séín nyɛɛ gǐì mú.

²² Kɛɛ ɔ se ma sáa-zà-nyɔ̀ ɓěɔ̀ nììn páɔ̀ dɔ̃, sepóɛɖé Féwòɖò nyí ma wa ɖɛ ɓě ɓɛ́ wa ké ma kɔ̃ún cĩ́ɛ, ké ɔ nyuɛ ké wa ɓéɖé ma ɖii-ɖɛ̀ ti séín. Ɔ jèɛɛ, wa se ma wa nììn páɔ̀ peɖe.

²³ Jòsé cɛ̃ɛ ma nyɔ ɓěɔ̀ gbo, ké ɔ ɖá, “Kà ɓɛ́ ḿ ɖǎà ɓě kè ɓěɛ̀ pá ɓěɔ̀ dɔ̃ ɓó Féwòɖò bììɛɛ, ɓě mɛ kpɔ̃ ɓáá-ɖɛ̀-dyùà ɓěɛ̀ dyi, ɓɛ́ ɓě kéɛ ɓá.

²⁴ Kɛɛ ti ɓɛ́ ɓěɛ̀ geɖe ɓěɔ̀ mu kɔ́ùn wɛ̃ɛ, ɓě mɛ geɛ dú hm̀m̌ mú, ɓɛ́ ɓě ké dú dyúáɖò Féwòɖò nyí. Ɔ dú hĩinyɛ sèà ɓóɛɛ, ɓě mɛ dèɛ̀ dyi, ɓɛ́ ɔ ké ɖii-ɖɛ̀ jǔ ɓó ɓě kè ɓěɛ̀ gbǒ-xwíníín-nyɔ̀ ɓěɔ̀ bìì, ɔ kè ɓɛ́ ɖò ké ɓáá-ɖɛ̀ jǔ ɓó zɔ̃ mu ɓó dyí kɔùn wɛ̃ɛ jè.”

²⁵ Ké nyɔ ɓěɔ̀ cɛ̃ɛ ma Jòsé gbo, ké wa ɖá, “Ɓɔ̌ɔ̀, à wɔ̃́ ní ɓɛ́ à ké Féwòɖòɛ̀ gǐì jǔ, sepóɛɖé nì hwòɖǒ ɖǎ à múin dèìn, ké m̀ ɖǎ à fɛ̀ɛ̀ɔ̀ póìn.”

²⁶ Ɔ jèɛɛ, Jòsé nyu ma ɖɛ nìà kɛ gma mú ɓá pá ɓě nì Íjè-ɓòɖòɔ̀ kɔ̃ɛɛ jè dyí. Gmaɔ̀ mɔ̀ kà ɖɛ séín mu ɖé geɖe ɓě nì ɖé Íjè-ɓòɖòɔ̀ kɔ̃ɛɛ gbo sɔ̀ùn wɛ̃ɛ, wa mɛ geɛ mú dú hm̀m̌, ɓɛ́ Féwòɖò ké dú dyúáɖò kɔ̃̀ɛ. Ké gmaɔ̀ nì ma ɖé Íjè-ɓòɖòɔ̀ kɔ̃ kánáá pū. Kɛɛ sáa-zà-nyɔ̀ ɓěɔ̀ ɖòùn nyɛ̀nɛ̀ɛ̀ kɔ̃̀ pá se ma Féwòɖòɛ̀ kɔ̃̀ɔ̀-ɖɛ̀.

Jékɔ̀ɛ̀ zɔ̀ɔ̀-ɖɛ̀ hwɛ̀ìn-gbɔɔ̀

²⁷ Ɓó tia ɓaɖaa, Éézùɖùɛ̀-nyɔ̀ ɓěɔ̀ cĩ́ ma ɖé Gósɛ̃̀ìn-pà nìà ɖé Íjè-ɓòɖòɔ̀ kɔ̃ɛɛ mú. Wa kɔ̃̀ ma ɖé ɖɛ, ké wa zaìn ma ɖé dúún, ké wa vò ma dyí mìɔ.

²⁸ Ké Jékɔ̀ cĩ́ ma ɖé Íjè-ɓòɖòɔ̀ kɔ̃ ɓó zɔ̃ ɓaɖa-bùè sè mɛ̀nɛ̌ìn-sɔ̃́ xwíníín. Ɔ jèɛɛ, zɔ̃ jĩ̀ kà ɓɛ́ Jékɔ̀ nyu ma kɛɛ mɔ̀ ma zɔ̃ hɔ̃dɛ̀ɖɛ̀ ɖò kè kpáɖá-nyɔ sɔ̃́ sè mɛ̀nɛ̌ìn-sɔ̃́.

²⁹ Ti ɓɛ́ tiɔ̀ ɖǎ ma dyi xwɛ̃́ìn, ɓɛ́ Éézùɖùɛ̀ kéá ma mɛ́ɛ, ɔ ɖá ma ɔ dyú-gàà Jòsé, ké ɔ cɛ̃ɛ ma ɔ gbo, ké ɔ ɖá, “Ní ɓaà m̀ ní, po nì sɔ̃ɔ̀ ɓó ní ɓoɔ̀ pṹa, ɓɛ́ m̀ ké wuɖu ɖi kà nì mu ḿ nɔ̀mɔ̀ dyíin kè jǎà nìà kɛ bìì nyuùn wɛ̃. Ɖɛɔ̀ mɔ̀ kà m̀ se nɔ̄ ḿ Íjè-ɓòɖòɛ̀ kɔ̃ dyóɖóún zàǐn mu kɛ.

³⁰ Kɛɛ ti ní mu ḿ ɓǎ ɓě gbo muùn wɛ̃ɛ, m̀ mɛ zà ḿ Íjè-ɓòɖòɛ̀ kɔ̃, ɓɛ́ m̀ ké ḿ kpa, ɓɛ́ m̀ ké ḿ ɓó ḿ ɓǎ ɓěɔ̀ gbo dyóɖóún zàìn.” Ké Jòsé ɖá, “Ḿ wɔ̃́ ní. Ní mu ɖɛ m̀ cɛ̃à kɛɛ nyuùn.”

³¹ Ké Éézùɖùɛ̀ ɖá, “Ɖi wuɖu ɓó ḿ dyúa.” Ké Jòsé ɖi ma wuɖu ɓó Éézùɖùɛ̀ dyúa. Púɛɛ, Éézùɖùɛ̀ taɓa ma dú hwuɖu ɓó ɔ gbɛɔ̀ kɔ̃, ké ɔ po ma Bounɓoɔ̀ zùo.