Jɛ́nɛ́sì 41 - Ɓǎsɔ́ɔ̀ Báɓòɔ̀

Jòsé zà Féwòɖòɛ̀ dya-wùɖù ɓěɔ̀ xwíníín

¹ Sɔ̀ìn ɓó ɖɛ ɓěa gboɛɛ, zɔ̃ sɔ̃́ zi ma. Púɛɛ, Féwòɖò ɓéɖé ma dya-dya. Ɖé ɔ dya-dyaɔ̀ múɛɛ, ɔ nyànà ma ɓó ní vɛ̀nɛ̀ ɖò kɔ̃̀ nyɛ́nɛ́ mɔ̀ Náà kɛɛ wĩín dyi.

² Ti ɔ nyànà ma ɓó dyiɛɛ, púɛɛ, ɓìɖǐ nyɔ́nɔ́ ɓúá-ɓúá mɛ̀nɛ̌ìn-sɔ̃́ sɔ̀ ma ɖé ní vɛ̀nɛ̀ɔ̀ gbo, ké wa nì ma dyi ɖiɛń ɓó níɔ̀ wĩín.

³ Púɛɛ, ɓìɖǐ nyɔ́nɔ́ mɛ̀nɛ̌ìn-sɔ̃́ ɖò kɔ ɓó wa ɖeín dyí, ké wa sɔ̀ ma ɖé níɔ̀ gbo ɖekè. Wa sɔɔ̀, ké wa nyìnììn ma kɔ̃in mìɔ. Wa dyi, ké wa nyànà ma ɓó ɓìɖǐɔ̀ nyɔ ɓě nì ma kà ɓó níɔ̀ kpóóɔ̀ kɔ̃ɛɛ wáún dyi.

⁴ Púɛɛ, ɓìɖǐ ɓě ɓɛ́ wa sɔɔ̀à, ké wa nyìnìàìn kɔ̃in nyɛɛ tà ma ɓìɖǐ ɓúá-ɓúá mɛ̀nɛ̌ìn-sɔ̃́ ɓěɔ̀. Púɛɛ, Féwòɖò wóɖó ma nyíɔún.

⁵ Ɔ nìǒ kpã́ún wɛ̃ɛ, ɔ kpá nyíɔún ɖe, ké ɔ ɓéɖé ma dya-dyaɔ̀ sɔ̃́ nììn. Ɔ dyé ma mɔɔ́-gbɔ̌ ɖò. Mɔɔ́-gbɔ̌ɔ̀ ɓéɖé ma woɖo mɛ̀nɛ̌ìn-sɔ̃́, ké ɔ woɖo ɓěɔ̀ nì ma dyɔ́ ɓáún-ɓáún mú, ké wa kɔ́ ma ní.

⁶ Púɛɛ, mɔɔ́-gbɔ̌ ɓéɖé woɖo mɛ̀nɛ̌ìn-sɔ̃́ ɓɛ́ káná-pìɔ̌ ɓaɖa, ké ɔ nyuɛ ké wa se dyɔ́ mú nìɛɛ kɔ ma ɓó mɔɔ́-gbɔ̌ɔ̀ dyɛ mɔ̀ɔ̀ ɖeín dyí.

⁷ Púɛɛ, mɔɔ́-wòɖò mɛ̀nɛ̌ìn-sɔ̃́ se dyɔ́ún nì ɓěɔ̀ mana ma mɔɔ́-wòɖò mɛ̀nɛ̌ìn-sɔ̃́ nì dyɔ́ún ɓěɔ̀ ní. Púɛɛ, Féwòɖò sɔ̀ ma nyíɔún, hwɛ̀ ké ɔ dyuòɛ̀ dyí kà ɔ nì ma dyauń wɛ̃.

⁸ Ti ɓɛ́ zɔ̃ zɔ̃ ma kɛɛ, púɛɛ, ɖɛ nìà kɛ nyùìn ma ɔ fũ̀à-fṹá mìɔ. Ɔ jèɛɛ, ɔ ɖá ma Íjè-ɓòɖòɔ̀ hwĩɔ̀ kè hwòɖǒ-fɔ̀nɔ̀-nyɔ̀ séín ɓěɔ̀. Ké ɔ po ma dya-wùɖù ɓěɔ̀ wa gbo, kɛɛ wa nyɔ ké wa xwíníín mú zàà ɓɛ́ìn ɓó ɔ bììɛɛ ɖò se nì.

⁹ Hwɛ̀ ké cówè vɛ̀nɛ̀ɔ̀ cɛ̃ɛ ma Féwòɖò gbo, ké ɔ ɖá, “Ní ɖɛ gbà ɓěɔ̀ dyi ḿ hwìɖǐi ɓó zɛ̃̌ɛ̀.

¹⁰ Wé ɖòɛ̀ ɓaɖaa, m̀ kpáìn ma nì gbo-nì-nyɔ̀ ɓě mɔ̀à ḿ kè ɖɛ-pĩ-nyɔ̀ vɛ̀nɛ̀ɔ̀ kɛɛ dyoɖoún, ké m̀ po ma à kpɔɖɔ ɖeín ɖé gbǒ kɔ̃̀ mú ɓɛ́ sójà ɓě mɔ̀à nì dyí-gmɔ̀-nyɔ̀ɛɛ nyɔ vɛ̀nɛ̀ɔ̀ cĩ́ ma kà kɛɛ wáká ɖò mú.

¹¹ Ɓó máaún-hwùɖù dyúáɖò múɛɛ, à sɔ̃́ɔ̀ ɓéɖé ma dya-dya, ké à dya-wùɖù ɓěɔ̀ xwíníín ɓéɖé ma kòɛ̌n.

¹² À kè gàa-dyù gmɔ̀ ɖò mɔ̀ Híìbúɖúù-nyɔ̀ kɛɛ nì ma ɖé. Ɔ mɔ̀ sójà ɓě mɔ̀à nì dyí-gmɔ̀-nyɔ̀ɛɛ nyɔ vɛ̀nɛ̀ɔ̀ gbo-nì-nyɔ̀. Ké à po ma à dya-wùɖù ɓěɔ̀ ɔ gbo, ké ɔ zà ma wa xwíníín mú ɖò-ɖò ɓó à bìì.

¹³ Kà ɔ nyu ma à dya-wùɖù ɓěɔ̀ xwíníín mú zàà kɛɛ, kǎà ɖɛ ɓěɔ̀ nyu ma kpáa nyɛ̀nɛ̀ɛ̀. M̀ po ma ḿ kũ̀à kɔ̃ún ɖe, kɛɛ m̀ beè ma ɖɛ-pĩ-nyɔ̀ɔ̀ ní.”

¹⁴ Ɔ jèɛɛ, Féwòɖò ɖoɓo ma kíá, ɓɛ́ wa ké ma Jòsé dyà. Púɛɛ, wa zà ma Jòsé kpɔɖɔɔ̀ ɖeín wàɖà. Ti ɓɛ́ ɔ ɖǎ ma vɛ̃̌ kpana, ké ɔ ɖǎ ma ɖɔ mú poɛɛ, púɛɛ, ɔ dyi ma ɓó Féwòɖò dyúa.

¹⁵ Hwɛ̀ ké Féwòɖò cɛ̃ɛ ma Jòsé gbo, ké ɔ ɖá, “Ḿ ɓéɖé dya-dya, ké nyɔ ɖò se nì ɓɛ́ ɔ kéɛ xwíníín mú zàà ɓɛ́ìn. Kɛɛ ḿ wɔ̃́ɔ kà wa dyi m̀ dya-wùɖù gbo po ní, nìí, nì zàà xwíníín múɛ.”

¹⁶ Ké Jòsé jǔ ma Féwòɖò gɔ̃̌, ké ɔ ɖá, “Ɓɔ̌ɔ̀, mɔ̄ seɛ nyuɛ ɓɛ́ìn, kɛɛ Gèɖèpɔ́ɔ̀ mɔ̀ nyɔ mu nì dya-wùɖùɔ̀ xwíníín mú zàùn nɔ̀mɔ̀ dyíin.”

¹⁷ Hwɛ̀ ké Féwòɖò cɛ̃ɛ ma Jòsé gbo, ké ɔ ɖá, “Ḿ dyaa pū, ké ḿ nì ɓó Náà-nìɔ̀ wĩín.

¹⁸ Púɛɛ, ɓìɖǐ nyɔ́nɔ́ ɓúá-ɓúá mɛ̀nɛ̌ìn-sɔ̃́ sɔ̀ ɖé níɔ̀ gbo, ké wa nì ma dyi ɖiɛń ɓó níɔ̀ wĩín.

¹⁹ Púɛɛ, ɓìɖǐ nyɔ́nɔ́ mɛ̀nɛ̌ìn-sɔ̃́ ɖò kɔ ɓó wa ɖeín dyí, ké wa sɔ̀ ma níɔ̀ gbo ɖekè. Wa sɔɔ̀ ma, ké wa nyìnììn ma kɔ̃in mìɔ. Ḿ séè ɓìɖǐ nyìnììn kɔ̃in nì náa Íjè-ɓòɖò gànáà mú dyé ɖò.

²⁰ Púɛɛ, ɓìɖǐ sɔɔ̀-sɔɔ̀ nyìnììn kɔ̃in ɓěɔ̀ tà ma ɓìɖǐ ɓúá-ɓúá mɛ̀nɛ̌ìn-sɔ̃́ ɓě sɔ̀ ma kà níɔ̀ gbo kĩ́ín nyɛ.

²¹ Kɛɛ ti ɓɛ́ wa hwɔ ma wa tàà kɛɛ, wa se ma dyí zàìn. Kà wa nyu ma kà kɔ̃in nyìnìɛ̀n nyɛɛ, kǎà wa nì ke. Púɛɛ, ḿ wóɖó ma nyíɔún.

²² Ti ɓɛ́ ḿ kpá ma nyíɔún ɖeɛɛ, ḿ ɓéɖé ma dya-dyaɔ̀ ɖò ɖe. Ḿ dyé ma mɔɔ́-gbɔ̌ ɖò. Mɔɔ́-gbɔ̌ɔ̀ ɓéɖé ma woɖo mɛ̀nɛ̌ìn-sɔ̃́, ké ɔ woɖo ɓěɔ̀ nì ma dyɔ́ ɓáún-ɓáún mú, ké wa kɔ́ ma ní.

²³ Púɛɛ, mɔɔ́-gbɔ̌ ɓéɖé woɖo mɛ̀nɛ̌ìn-sɔ̃́ ɓɛ́ káná-pìɔ̌ ɓaɖa, ké ɔ nyuɛ ké wa se dyɔ́ mú nìɛɛ kɔ ma ɓó mɔɔ́-gbɔ̌ɔ̀ dyɛ mɔ̀ɔ̀ ɖeín dyí.

²⁴ Púɛɛ, mɔɔ́-wòɖò mɛ̀nɛ̌ìn-sɔ̃́ se dyɔ́ún nì ɓěɔ̀ mana ma mɔɔ́-wòɖò mɛ̀nɛ̌ìn-sɔ̃́ nì dyɔ́ún ɓěɔ̀ ní. Ké ḿ po ma dya-wùɖù ɓěɛ̀ hwĩɔ̀ ɓěɔ̀ gbo, kɛɛ wa ɖò se wa xwíníín mú zàà ɓɛ́ìn ɓó ḿ bìì.”

²⁵ Hwɛ̀ ké Jòsé cɛ̃ɛ ma Féwòɖò gbo, ké ɔ ɖá, “Nì dya-wùɖù sɔ̃́ɔ̀ xwíníín nì dyúáɖò. Gèɖèpɔ́ɔ̀ nì m̀ ɖɛ ɔ nì nyuɛń dyiɛń nyɛɛ dyí tɛ̀mɛ̀ǐn.

^26-27 Ɓìɖǐ ɓúá-ɓúá mɛ̀nɛ̌ìn-sɔ̃́ɔ̀ kè mɔɔ́-wòɖò mɛ̀nɛ̌ìn-sɔ̃́ nì dyɔ́ún ɓěɔ̀ xwíníín mɔ̀ ɖɛ-bã̀ìn-zɔ̃̀ mɛ̀nɛ̌ìn-sɔ̃́. Ké ɓìɖǐ sɔɔ̀-sɔɔ̀ nyìnììn kɔ̃in mɛ̀nɛ̌ìn-sɔ̃́ ɓě ɓɛ́ wa kɔà ɓó ɓìɖǐ ɓúá-ɓúá ɓěɔ̀ ɖeín dyíɛ kè mɔɔ́-wòɖò mɛ̀nɛ̌ìn-sɔ̃́ ɓɛ́ káná-pìɔ̌ɔ̀ ɓaɖaà, ké ɔ nyuɛ ké wa seà dyɔ́ún nìɛɛ xwíníín mɔ̀ mɔ́-zɔ̃̀ mɛ̀nɛ̌ìn-sɔ̃́. Dya-wùɖù sɔ̃́ɔ̀ tò ɖɛ dyúáɖò jìì.

²⁸ Kà ḿ nyuàà m̀ gbo cɛ̃ɛ kɛɛ, ɓɔ̌ɔ̀, kǎà ɔ nì nyɛ̀nɛ̀ɛ̀. Gèɖèpɔ́ɔ̀ ɖǎ m̀ ɖɛ ɔ nì nyuɛń dyiɛń nyɛɛ dyí tɛ̀mɛ̀ìn.

²⁹ Ɖɛ-bã̀ìn-zɔ̃̀ mɛ̀nɛ̌ìn-sɔ̃́ nì Íjè-ɓòɖò gànáà kɔ̃ dyiɛń.

³⁰ Kɛɛ mɔ́-zɔ̃̀ mɛ̀nɛ̌ìn-sɔ̃́ mu ɓó wa ɖeín dyí kɔùn. Ɓó tia ɓaɖaa, ɖii-ɖɛ̀ mu nɔ̄ Íjè-ɓòɖòɛ̀ kɔ̃ bãùn kĩ́ín nyɛɛ jè mu nyɔǔn hwìɖǐi sɔ̀ùn, sepóɛɖé mɔ́ɔ̀ mu ɓóɖóɔ̀ wáɖáùn.

³¹ Ɖɛ kɔ̃̀ jè ɖii-ɖɛ̀ muà nɔ̄ ɓóɖóɛ̀ kɔ̃ bãùn wɛ̃ɛ jè muà nyɔǔn hwìɖǐi sɔ̀ùn wɛ̃ɛ mɔ̀, mɔ́ɔ̀ mu wɔ̃ kuùn mìɔ cá.

³² Ɖɛ kɔ̃̀ jè Gèɖèpɔ́ɔ̀ tɛ̀mɛ̀àìn m̀ ɖɛ dyúáɖò nìà kɛ dyí kpa sɔ̃́ɛɛ mɔ̀, ɔ ɖǎ ɖɛ nìà kɛ dyí sɔ́ kóɖó-kóɖó, ké ti sè ɓó ɓɛ́ ɔ kéɛ nyuɛɛ se ɓoún tɔ̀mɔ̀ ɖe.

³³ “Ɔ jèɛɛ, ɓó kàǔn wɛ̃ɛ, m̀ mɛ mɔ́ hwòɖǒ-fɔ̀nɔ̀-nyɔ̀ mɔ̀ ɖɛ-múin-ɖe-nyɔ̀ɛɛ dyi, ɓɛ́ m̀ ké ɔ Íjè-ɓòɖòɛ̀ xwáɖáún zàìn.

³⁴ Ké m̀ mɛ gã ɖɛ-kɔ̃in-gmɔìn-nyɔ̀ ɓě, ɓɛ́ wa ké ɔ xwíɖíi nì, ɓɛ́ m̀ ké wa ɓóɖóɛ̀ xwáɖáún zàìn, ɓɛ́ wa ké ɖɛ séín sɔ̀ geɖe ɓěɔ̀ gboɛɛ wáká hm̀m̌ nììnɔ̀ dyí poìn ɓó ɖɛ-bã̀ìn-zɔ̃̀ mɛ̀nɛ̌ìn-sɔ̃́ɔ̀ mú.

³⁵ M̀ mɛ tò wuɖu, ɓɛ́ wa ké ɖii-ɖɛ̀ ɓě muà nììn ɓó ɖɛ-bã̀ìn-zɔ̃̀ ɓě muà dyiìn nyɛ múɛɛ dyí poìn, ɓɛ́ wa kéɛ ɖɛ-dyi-dèìn-naín ɓě mú po ɖé hwɔɖɔ ɓěɔ̀ mú, ɓɛ́ wa kéɛ dyí gmɔ̀.

³⁶ Wa mɛ dè ɖii-ɖɛ̀ nìà kɛ sɔ̃ kɔ̃ ɓó ɓóɖóɛ̀ bìì, ɓɛ́ ɔ ké nì ɓó mɔ́-zɔ̃̀ mɛ̀nɛ̌ìn-sɔ̃́ muà Íjè-ɓòɖòɛ̀ kɔ̃ dyiìn nyɛɛ bìì, ɓɛ́ mɔ́ɔ̀ ní kɔ̃̀ ɖà ɓóɖóɛ̀ wáɖá.”

Féwòɖò zàìn Íjè-ɓòɖòɔ̀ Jòsé xwáɖáún

³⁷ Púɛɛ, ɖɛ Jòsé cɛ̃ ma kà kɛɛ dè ma Féwòɖò kè ɔ gɔ̌mànà-nyɔ̀ vɛ̀nɛ̀ ɓěɔ̀ hwìɖǐi.

³⁸ Ɔ jèɛɛ, Féwòɖò diè ma wa dyi, ké ɔ ɖá, “À ɓɛ́ìn nyɔ ɖò ɓɛ́ Gèɖèpɔ́ɔ̀ Zùùɔ̀ nì mú kà gàaɛ̀ nyuà nìɛ̀ kɛɛ dyéɛ ɖeè?”

³⁹ Hwɛ̀ ké Féwòɖò cɛ̃ɛ ma Jòsé gbo, ké ɔ ɖá, “Kà ɓɛ́ Gèɖèpɔ́ɔ̀ ɖǎà m̀ ɖɛ séín ɓěɛ̀ dyí tɛ̀mɛ̀ìn nyɛɛ, à dyé kà nyɔ ɖò se nì ɓɛ́ ɔ ké hwòɖǒ fɔ̀nɔ̀, ɓɛ́ ɔ ké ɖɛ múin ɖe kà m̀ nìà kɛ.

⁴⁰ Ɔ jèɛɛ, ní mu ní ɓóɖóɔ̀ m̀ xwáɖáún zàìn, ké ní nyɔ séín ɓěɔ̀ mu nì wuɖu xwíɖíi nììn, ɔ sèìn mɔ̄ ɖòùn mu m̀ kɔ̃in nììn.”

⁴¹ Ɔ jèɛɛ, Féwòɖò cɛ̃ɛ ma Jòsé gbo, ké ɔ ɖá, “Sɔ̀ìn ɓó kàǔn gboɛɛ, ḿ zàìn m̀ Íjè-ɓòɖò gànáà xwáɖáún.”

⁴² Hwɛ̀ ké ɔ zà ma ɔ dyí-dyuòìn-bɛ̃̀ mɔ̀à ɔ jìǐn-po-ɖɛ̀ɔ̀ kɛɛ jìǐn, ké ɔ poɛ ma Jòsé jìǐn. Ké ɔ po ma ɔ ɖénì-ɖɔ̀ɛ̀ gã́ùn nɔ̀mɔ̀ dyíin ɖò mú, ké ɔ po ɔ góò-cɛ̃̀ɛ̀ ɖò ɖɔ.

⁴³ Ké ɔ nyuɛ ké wa po ma ɔ hwíì-sǒ nyɔ ɓɛ́ nyɔ kɔ ɓó kã́áɔ̀ gbo dyíɛɛ kpá múɛɛ mú. Ké wa sí ma ɔ dyúa, ké wa nì ma zio poɛń, ké wa ɖá, “Ɓě taɓa dú hwuɖuo.” Kǎà Féwòɖò nyu ma Jòsé Íjè-ɓòɖò gànáɔ̀ xwáɖáún zàìn.

⁴⁴ Hwɛ̀ ké Féwòɖò cɛ̃ɛ ma Jòsé gbo, ké ɔ ɖá, “Mɔ̄ mɔ̀ kã́áɔ̀ dyɛo, kɛɛ nyɔ ɖò se sɔ̃ ɖò mɔɔ ɓo ɖò dyií ɖúɛ mu Íjè-ɓòɖòɛ̀ dà séín, ké m̀ zà ɓó wuɖu hwɛ̀.”

⁴⁵ Ké Féwòɖò jǔìn ma Jòsé Záfànà-Pàníà-nyɛ̀nɛ̀, ké ɔ nyí ma ɔ Àsénà mɔ̀ Pɔ̀tífɛ́wàɖàà dyú-màà kɛ, ɓɛ́ ɔ ké ɔ gmàà jǔ. Pɔ̀tífɛ́wàɖà mɔ̀ ma Ɔ́ùn-hwɔ̀ɖɔ̀ɔ̀ sáa-zà-nyɔ̀. Ké Jòsé té ma Íjè-ɓòɖòɔ̀ dà séín dyi.

⁴⁶ Jòsé nyuá ma zɔ̃ kpáɖá-nyɔ ɓaɖa-bùè ti ɓɛ́ ɔ dè ma Féwòɖò gbo kũ̀à nyuɛ gbɔɛ. Kǎà Jòsé sɔ̀ ma kà ɓó Féwòɖò dyúa, ké ɔ té ma kà Íjè-ɓòɖòɔ̀ gboi dà séín nyɛ̀.

⁴⁷ Ɓó ɖɛ-bã̀ìn-zɔ̃̀ mɛ̀nɛ̌ìn-sɔ̃́ɔ̀ múɛɛ, ɖii-ɖɛ̀ vò ma ɓóɖóɔ̀ kɔ̃ dyí mìɔ.

⁴⁸ Ɔ jèɛɛ, Jòsé poìn ma ɖii-ɖɛ̀ ɓáún-ɓáún nì ma Íjè-ɓòɖòɔ̀ kɔ̃ɛɛ dyí ɓó ɖɛ-bã̀ìn-zɔ̃̀ mɛ̀nɛ̌ìn-sɔ̃́ɔ̀ mú. Ké ɔ dèɛ̀n ma ɖéɛ hwɔɖɔ ɓěɔ̀ mú dyi. Ɖé hwɔɖɔɔ̀ ɖò mú ní, nìí, ɔ dèìn ɖé ɖii-ɖɛ̀ ɓě sɔ̀ ɖé geɖe ɓě nì ɓó gbɛ̌ɛ̀ɔ̀ múɛɛ dyi.

⁴⁹ Ɓó tia ɓaɖaa, ɖii-ɖɛ̀ ɓě ɓɛ́ Jòsé dè ma dyiɛɛ vò ma dyí mìɔ kà pĩ́ɔ nìà dyóóɔ̀ wĩin nyɛɛ vòà dyíɛ. Ɖii-ɖɛ̀ɔ̀ vò ma dyí mìɔ jèɛɛ, ɔ seɛ ma dyí gbɛ̌ìn ɓɛ́ìn ɖe.

⁵⁰ Hwɛ̀ ɓɛ́ mɔ́ vɛ̀nɛ̀ɔ̀ ké ma kpáa, Jòsé kè Àsénà wóɖóìn ma gàa-dyù sɔ̃́. Ɔ mɔ̀ Àsénà mɔ̀à Pɔ̀tífɛ́wàɖà mɔ̀à Ɔ́ùn-hwɔ̀ɖɔ̀ɔ̀ sáa-zà-nyɔ̀ɔ̀ kɛɛ dyú-mààɔ̀.

⁵¹ Ké Jòsé jǔìn ma ɔ nyíɔ́-dyùɔ̀ Mànásì-nyɛ̀nɛ̀ kɔ̃̀ xwíníín mɔ̀à sɔ̀ hwìɖǐiɛ, sepóɛɖé ɔ ɖá, “Gèɖèpɔ́ɔ̀ ɖǎa nyu ké ní fũ̀à-fṹá séín ɓěɔ̀ jè ɖǎ ḿ hwìɖǐi sɔ̀, ké ḿ se ḿ ɓǎà gbǒ-xwíníín-nyɔ̀ ɓěɔ̀ jè hwòɖǒ dyií gbǎìn ɖe.”

⁵² Ké ɔ jǔìn ma dyúɔ̀ sɔ̃́ nììnɔ̀ Ífèɖèìn-nyɛ̀nɛ̀ kɔ̃̀ xwíníín mɔ̀à dúún-zaìn-kpà sɔ̃́ kɛ, sepóɛɖé ɔ ɖá, “Gèɖèpɔ́ɔ̀ ɖǎa nyu ké ḿ ɖǎ dúún zaìn nɔ̄ ní gǎ-dyéìn-ɓòɖòɛ̀ kɔ̃.”

⁵³ Hwɛ̀ ké ɖɛ-bã̀ìn-zɔ̃̀ mɛ̀nɛ̌ìn-sɔ̃́ nì ma kà ɖé Íjè-ɓòɖòɔ̀ kɔ̃ɛɛ hwɛ̀ ma ɖé.

⁵⁴ Ké mɔ́-zɔ̃̀ mɛ̀nɛ̌ìn-sɔ̃́ɔ̀ dè ma gbɔ kà Jòsé nyuɛ ma kà cɛ̃ɛ kɛ. Mɔ́ɔ̀ kpá ma ɓóɖó séín kɔ̃, kɛɛ ɖii-ɖɛ̀ nì ma Íjè-ɓòɖòɔ̀ dà séín.

⁵⁵ Ti ɓɛ́ ɖii-ɖɛ̀ɔ̀ hwɛ̀ ma Íjè-ɓòɖòɔ̀ nyɔ séín xwa kɛɛ, nyɔ ɓěɔ̀ po ma kpé ɖé Féwòɖò gbo ɓó ɖii-ɖɛ̀ jè. Hwɛ̀ ké ɔ tò ma wa ɖé Jòsé gbo, ké ɔ ɖá, “Ɓě mɛ nyu ɖɛ ɔ cɛ̃ ɓě gboɛ.”

⁵⁶ Ti ɓɛ́ mɔ́ɔ̀ ɖǎ ma ɓóɖó-kpà gànáɔ̀ kɔ̃in gbɛ̀ìn nyɛɛ, púɛɛ, Jòsé kaà ma ɖii-ɖɛ̀-mú-dyi-dèìn-gbò séín ɓěɔ̀, ké ɔ pèɖèìn ma Íjè-nyɔ̀ ɓěɔ̀ ɖii-ɖɛ̀ gbo, sepóɛɖé mɔ́ɔ̀ ku ma wɔ̃ mìɔ ɖé Íjè-ɓòɖòɔ̀ kɔ̃ dà séín.

⁵⁷ Hwɛ̀ ké ɓóɖó-dù séínɛ̀ nyɔ ɓě dyi ma ɖé Íjè-ɓòɖòɔ̀ kɔ̃ ɖé Jòsé gbo, ɓɛ́ wa ké ma ɖii-ɖɛ̀ dɔ̃, sepóɛɖé mɔ́ɔ̀ ku ma wɔ̃ ɖé ɓóɖó séín kɔ̃.