Jɛ́nɛ́sì 40 - Ɓǎsɔ́ɔ̀ Báɓòɔ̀

Jòsé zà kpɔɖɔ-ɖeín-nì-nyɔ̀ sɔ̃́ɔ̀ dya-wùɖù mú

¹ Wé ɖòɛ̀ ɓaɖaa, Íjè-ɓòɖòɔ̀ kã́áɔ̀ cówè vɛ̀nɛ̀ɔ̀ kè ɔ ɖɛ-pĩ-nyɔ̀ vɛ̀nɛ̀ɔ̀ po ma kã́áɔ̀ hwòɖǒ ɖé ɖei ɓó ɖɛ ɖò jè.

² Ɔ jèɛɛ, Féwòɖò mɔ̀à kã́áɔ̀ kɛɛ kpáìn ma ɔ gbo-nì-nyɔ̀ sɔ̃́ ɓěɔ̀ dyoɖoún,

³ ké ɔ po ma wa kpɔɖɔ ɖeín ɖé gbǒ kɔ̃̀ mú ɓɛ́ sójà ɓě mɔ̀ ma kà kã́áɔ̀ dyí-gmɔ̀-nyɔ̀ɛɛ nyɔ vɛ̀nɛ̀ɔ̀ cĩ́ ma kà kɛɛ wáká ɖò mú. Ɔ mɔ̀ kpɔɖɔ dyúáɖò kɔ̃̀ ɖeín wa poà Jòsé kɛ.

⁴ Púɛɛ, sójà ɓě mɔ̀ ma kà kã́áɔ̀ dyí-gmɔ̀-nyɔ̀ɛɛ nyɔ vɛ̀nɛ̀ɔ̀ po ma wa Jòsé xwaún dyi, ké ɔ mɔ̀ ma wa gbo-gmɔ̀-nyɔ̀. Ti ɓɛ́ cówè vɛ̀nɛ̀ɔ̀ kè ɖɛ-pĩ-nyɔ̀ vɛ̀nɛ̀ɔ̀ nì ma kà ɖé kpɔɖɔɔ̀ ɖeín nyɛɛ ɖǎ ma ɖé ti goun nyuɛɛ,

⁵ wa sɔ̃́ɔ̀ ɓéɖé ma dya-dya kò-kò ɓó máaún-hwùɖù dyúáɖò mú. Waà dya-dya ɓěɔ̀ xwíníín ɓéɖé ma kòɛ̌n.

⁶ Ti ɓɛ́ Jòsé dyi ma wa gbo ɓó gànà-kṹún wɛ̃ɛ, púɛɛ, ɔ dyéɛ kà múà ɖò se ma wa dyúa nìɛ.

⁷ Hwɛ̀ ké ɔ diè ma wa sɔ̃́ɔ̀ dyi, ké ɔ ɖá, “Ɖɛ́ kɔ̃̀ jè wìì nìà ɓě dyúa ɓó zɛ̃̌ɛ̀ kɛ́?”

⁸ Ké wa ɖá, “À sɔ̃́ɔ̀ ɓéɖé dya-dya. Kɛɛ nyɔ ké à dya-wùɖù ɓěɔ̀ xwíníín mú zà kɛɛ ɖò se nì.” Hwɛ̀ ké Jòsé cɛ̃ɛ ma wa gbo, ké ɔ ɖá, “Má, Gèɖèpɔ́ɔ̀ mɔ̀ dya-wùɖù-xwíníín-mú-zà-nyɔ̀e? Ní ɓaà ɓě ní, ɓě po ɓěɛ̀ dya-wùɖù ɓěɔ̀ ḿ gbo. Gèɖèpɔ́ɔ̀ mu ḿ gbo kpáùn, ɓɛ́ ḿ ké wa xwíníín mú zà.”

⁹ Hwɛ̀ ké cówè vɛ̀nɛ̀ɔ̀ po ma ɔ dya-wùɖùɔ̀ Jòsé gbo. Ɔ cɛ̃ɛ ma ɔ gbo, ké ɔ ɖá, “Ɖé ní dya-dyaɔ̀ múɛɛ, ḿ dyé géɖéè-ɖúú-gbǒ ɖò ɓó ḿ dyúa,

¹⁰ ké ɖúú-gbǒɔ̀ ɓéɖé ma ɖɔ́ tã. Ti ɓɛ́ ɔ po ma mí nyɛ̀nɛ̀ɛ̀ kɛɛ, púɛɛ, ɔ bùè ma, ké ɔ tòɖò ma ɓo, ké ɔ ɓo ɓěɔ̀ bo ma.

¹¹ Ɓó tia ɓaɖaa, Féwòɖòɛ̀ mú-náìn-kòpòɔ̀ nì ma ḿ xwaún. Ké ḿ ɖú géɖéèɔ̀ dyí, ké ḿ píníɛ̀n ɖéɛ Féwòɖòɛ̀ mú-náìn-kòpòɔ̀ mú, ké ḿ nyí ma Féwòɖò kópòɔ̀ xwa.”

¹² Hwɛ̀ ké Jòsé zà ma ɖé wuɖu, ké ɔ ɖá, “Nì dya-wùɖùɔ̀ xwíníín kɛà kɛ̀. Ɖɔ́ tã nìà géɖéè-ɖúú-gbǒɔ̀ dyíɛɛ xwíníín mɔ̀ wé tã.

¹³ Hwɛ̀ wé tã ké ziɛɛ, Féwòɖò mu m̀ dyí ɖúùn, ɓɛ́ ɔ ké nì kũ̀àɔ̀ m̀ gbo po ɖe. Ké nì mu Féwòɖòɛ̀ kópòɔ̀ ɔ xwa-nyí-nyɔ̀ jǔùn ɖe kà nì nyuɛ ma kà kĩ́ín, ti ɓɛ́ m̀ mɔ̀ ma kà ɔ cówèɔ̀ kɛ.

¹⁴ Kɛɛ ti ɖɛ séín mu dyí sɛ́ɖɛ́ìn ɖe ɓó m̀ gboɛɛ, ní ɓaà m̀ ní, ní jè mɛ nì m̀ hwìɖǐi, ɓɛ́ m̀ ké kpeɖe nɔ̀mɔ̀ dyíin ḿ dyí nyu. M̀ mɛ cɛ̃ ní jè Féwòɖò gbo, ɓɛ́ ḿ ké kpɔɖɔ nìà kɛ ɖeín sɔ̀.

¹⁵ Sepóɛɖé wa kpɔ̃̀ìn ma ḿ ganaún, ké wa zà ma ḿ ɖé ḿ mìɔùn nììn ɓíɖí-ɓòɖò mɔ̀à Híìbúɖúù-ɓòɖòɔ̀ kɛɛ kɔ̃. Ké ti ḿ ɖǎ ma nɔ̄ dyiɛɛ, ḿ se ɖɛ gbà ɖò kɔ̃̀ jè ḿ ɓéɖé ḿ ké dà nyìnììn dyíin nìà kɛ kpá kɛɛ nyu, ké wa poà nɔ̄ ḿ wɛ̃̀.”

¹⁶ Ti ɓɛ́ ɖɛ-pĩ-nyɔ̀ vɛ̀nɛ̀ɔ̀ dyéɛ ma kà cówè vɛ̀nɛ̀ɔ̀ dya-wùɖùɔ̀ xwíníín-zà-wùɖùɔ̀ nɔ̀mɔ̀ ma dyíin nyɛɛ, púɛɛ, ɔ cɛ̃ɛ ma Jòsé gbo, ké ɔ ɖá, “Níǐn dya-wùɖùɔ̀ kɛɛ mɔ̀, ḿ dyaa, ké bɛɖɛɛ̀-tìě tã nì ma ḿ dú.

¹⁷ Ké Féwòɖòɛ̀ ɖii-ɖɛ̀-dù kò-kò ɓě ɓɛ́ ḿ pĩɛɛ nì ma ɖé tìěɔ̀ nyɔ nìà ɖé kɔ̃in nyɛɛ mú. Kɛɛ naà ɓě dyi, ké wa nìɛ̀ ma manauń ɖé tìě nìà ɖé kɔ̃in nyɛɛ mú.”

¹⁸ Ké Jòsé ɖá, “Nì dya-wùɖùɔ̀ xwíníín kɛà kɛ̀. Tìě tãɔ̀ xwíníín mɔ̀ wé tã.

¹⁹ Hwɛ̀ wé tã ké ziɛɛ, Féwòɖò mu m̀ dúí zàùn, ɓɛ́ ɔ ké m̀ cu ɖò dya dyi ɓá. Ké naà ɓěɔ̀ mu m̀ múin manaùn.”

²⁰ Wéɔ̀ tã nììnɔ̀ mɔ̀ ma Féwòɖòɛ̀ wóɖó-wè, ké ɔ pa ma hwɔ vɛ̀nɛ̀ ɖò ɓó gɔ̌mànà-nyɔ̀ vɛ̀nɛ̀ séín ɓěɔ̀ bìì. Ɓó wéa ɓaɖaa, ɔ zà ma cówè vɛ̀nɛ̀ɔ̀ kè ɖɛ-pĩ-nyɔ̀ vɛ̀nɛ̀ɔ̀ kpɔɖɔ ɖeín, ké ɔ dyà wa ɓó ɔ gɔ̌mànà-nyɔ̀ vɛ̀nɛ̀ ɓěɔ̀ dyúa.

²¹ Púɛɛ, ɔ po ma cówè vɛ̀nɛ̀ɔ̀ ɔ kũ̀àɔ̀ kɔ̃ún ɖe, ɓɛ́ ɔ ké Féwòɖòɛ̀ kópòɔ̀ ɔ xwa-nyí-nyɔ̀ jǔ ɖe,

²² kɛɛ ɔ beè ma ɖɛ-pĩ-nyɔ̀ vɛ̀nɛ̀ɔ̀ ní. Ɔ kpá ma kà Jòsé nyuɛ ma kà cɛ̃ɛ, ti ɓɛ́ ɔ zà ma waà dya-wùɖù ɓěɔ̀ múɛ.

²³ Kɛɛ Jòsé jè sɔ̀ ma cówè vɛ̀nɛ̀ɔ̀ hwìɖǐi fɔɔ cá.