Jɛ́nɛ́sì 12 - Ɓǎsɔ́ɔ̀ Báɓòɔ̀

Gèɖèpɔ́ɔ̀ wùɖù Éébànà gbo

¹ Hwɛ̀ ké Bounɓoɔ̀ cɛ̃ɛ ma Éébànà gbo, ké ɔ ɖá, “Sɔ̀ nì ɓíɖí-ɓòɖòɔ̀ kɔ̃, ɔ kè nì ɓǎà gbǒ-xwíníín-nyɔ̀ ɓěɔ̀ hwìɛ̀, ɓɛ́ m̀ ké ɓóɖó ní mu m̀ da zàìn nyɛɛ kɔ̃ mu.

² Ní mu ɓóɖó-dù vɛ̀nɛ̀ ɖò nyuùn sɔ̀ìn ɖé m̀ mú, ké ní mu m̀ mana kɔ̃ poùn. Ké ní muɛ nyuùn ɓɛ́ nì nyɛ́nɛ́ɔ̀ ké dyí ɓúá, ké mana mu m̀ mú dyììn, ɓɛ́ ɔ ké nyɔ ɖò mɔ̀ùn dyɛ̀ìn ɖekè.

³ Ní mu nyɔ ɓě ɓɛ́ wa mu m̀ mana kɔ̃ poùn wɛ̃ɛ mɔ̀ùn mana kɔ̃ poùn, ké ní mu nyɔ ɓě ɓɛ́ wa mu m̀ gboòùn wɛ̃ɛ mɔ̀ùn gboòùn ɖekè. Ké xwéɖé-dù séín nì ɓóɖó-kpàɔ̀ kɔ̃ɛɛ mu jĩ́á-jè dyéìn dyììn ɖé m̀ mú.”

Éébànà té Kénà-ɓòɖòɔ̀ múin

⁴ Hwɛ̀ ké Éébànà sɔ̀ ma dyí kà Bounɓoɔ̀ nyuɛ ma kà ɔ gbo cɛ̃ɛ kɛ, ké ɔ kè Ɖáà mu ma. Ti ɓɛ́ Éébànà sɔ̀ ma ɖé Háwàɖàùn-hwɔ̀ɖɔ̀ɔ̀ múɛɛ, púɛɛ, ɔ mɔ̀ǎ ma zɔ̃ kpáɖá-nyɔ tã ɓaɖa-bùè sè hm̀m̌.

⁵ Ɔ ɖú ma ɔ gmàà Séwàɖà kè Ɖáà mɔ̀à ɔ ɖíí-gàà dyúɔ̀ kɛ kè waà kɔ̃̀ɔ̀-ɖɛ̀ séín ɓě ɓɛ́ wa ɓéɖé ma kɛ ɔ kè gǐì ɓě ɓɛ́ wa dɔ̃ ma ɖé Háwàɖàùn-hwɔ̀ɖɔ̀ɔ̀ múɛɛ dyí. Ké wa mu ma ɖé Kénà-ɓòɖòɔ̀ kɔ̃, ké wa nyini ma ɖé.

⁶ Ké Éébànà kè ɔ nyɔ ɓěɔ̀ mu ma ɖé pá ɖò kɔ̃̀ nyɛ́nɛ́ mɔ̀ ma Sɛ́kɛ̃̀ìn kɛɛ mú. Ké wa dyɛ̀ìn ma Mɔ́wɛ̀ɖɛ̀ɛ̀ cu vɛ̀nɛ̀ ɖò. Kénà-nyɔ̀ ɓěɔ̀ nì ma ɖé ɓóɖóɔ̀ mú ɓó tia ɓaɖa.

⁷ Púɛɛ, Bounɓoɔ̀ wóɖóìn ma Éébànà dyí, ké ɔ cɛ̃ɛ ma ɔ gbo, ké ɔ ɖá, “Nì xwíníín-dyù ɓě, ɖéɛ̀ ní mu ɓóɖó nìà kɛ nyíìn.” Ké ɔ po ma ɓó sáa-kɔ̃-zàìn-gbàà ɖò ɓó Bounɓo ɓɛ́ ɔ wóɖóìn ma kà ɔ dyíɛɛ bìì.

⁸ Ké Éébànà sɔ̀ ma dyí, ké ɔ mu ma ɖé toɖo-ɓòɖò ɖò kɔ̃. Ɓóɖóɔ̀ nì ma ɖé Bɛ́fèò-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀. Ké ɔ nyànàìn ma ɖé ɔ jàɖàìn-gbò ɓěɔ̀ dyi. Ɔ mɔ̀ ma ɓó Bɛ́fèò-hwɔ̀ɖɔ̀ɔ̀ kè Éà-hwɔ̀ɖɔ̀ɔ̀ pṹa. Ké ɓóɛ̀ ɔ po ma sáa-kɔ̃-zàìn-gbàà ɖò ɓó Bounɓoɔ̀ bìì, ké ɔ ɓièìn ma ɓó Bounɓoɔ̀.

⁹ Ké Éébànà mùìn ma ɖé Kénà-ɓòɖòɔ̀ zɔ̃̌in, ɖé ɓóɖó ɖò kɔ̃̀ nyɛ́nɛ́ mɔ̀ Nɛ́gà kɛɛ kɔ̃.

Éébànà mu ma ɖé Íjè-ɓòɖòɔ̀ kɔ̃

¹⁰ Púɛɛ, mɔ́ vɛ̀nɛ̀ ɖò kpá ma ɖé ɓóɖóɔ̀ kɔ̃. Ké Éébànà mu ma ɖé Íjè-ɓòɖòɔ̀ kɔ̃, ɓɛ́ ɔ ké ma ɖé ti wè nyu, sepóɛɖé mɔ́ɔ̀ ku ma wɔ̃ mìɔ.

¹¹ Ti ɓɛ́ ɔ nìǎ ma Íjè-ɓòɖòɔ̀ kɔ̃ nyiniɛń nyɛɛ, ɔ cɛ̃ɛ ma ɔ gmàà Séwàɖà gbo, ké ɔ ɖá, “Dyéɛ, kà m̀ mɔ̀ dyíin-nɔ̀mɔ̀-màà kɛ.

¹² Ti ɓɛ́ Íjè-gàà ɓěɔ̀ mu m̀ dyéìn nyɛɛ, wa muɛ cɛ̃ìn, ɓɛ́ wa ké níiń, ‘Màa nìà kɛ mɔ̀ ɔ gmàà.’ Ɔ dyi ná nìǐn, nìí, wa mu ḿ ɖáɓáùn ɓó nì jè.

¹³ Ɔ jèɛɛ, ní gmàà wè, ní ɓaà m̀ ní, m̀ mɛ cɛ̃ɛ, ɓɛ́ m̀ ké níiń m̀ mɔ̀ ní ɖíí-màà, ɓɛ́ ɖɛ séín ké dyí ɓɛɖɛɛ̀ ɓó ḿ bìì, ɓɛ́ ḿ ké se mɛ́.”

¹⁴ Ti ɓɛ́ Éébànà nyini ma ɖé Íjè-ɓòɖòɔ̀ kɔ̃ɛɛ, Íjè-gàà ɓěɔ̀ dyéɛ ma kà Séwàɖà mɔ̀ ma dyíin-nɔ̀mɔ̀-màà kɛ.

¹⁵ Ké ti ɓɛ́ Íjè-ɓòɖòɔ̀ nyɔ vɛ̀nɛ̀ ɓěɔ̀ dyé ma ɔ kɛɛ, wa cɛ̃ ma ɔ jè Kã́á Féwòɖò gbo. Ké wa kpa ma ɔ ɖé Féwòɖò gbǒɔ̀ mú.

¹⁶ Ké Féwòɖò nyu ma Éébànà jĩ́á-jè ɓáún-ɓáún dyí ɓó màaɔ̀ jè. Ɔ nyí ma Éébànà gǐì-gàà kè gǐì-màà ɓě ɔ kè jǎkasì nyɔ́nɔ́ kèɛ̀ ɓíɔ́ kè ɓáɖáá kè wiɖi kè ɓìɖǐ kè sǒ-nì-gbu-kɔ̃ún ɓě.

¹⁷ Hwɛ̀ ké Bounɓoɔ̀ dyà ma nyɔ-gǎ-dyéìn-ɖɛ̀ nyìnììn dyíin ɓě Féwòɖò kè ɔ gbǒ-xwíníín-nyɔ̀ ɓěɔ̀ kɔ̃ ɓó Séwàɖà mɔ̀à Éébànàà gmààɔ̀ kɛɛ jè.

¹⁸ Ɔ jèɛɛ, Féwòɖò ɖoɓo ma nyɔ, ké wa dyà ma Éébànà ɔ gbo. Ké ɔ diè ma Éébànà dyi, ké ɔ ɖá, “Ɖɛ́ mɔ̀ ɖɛ nì kà ɓɛ́ m̀ nyuà ḿ bũ̌ɛɛ xwíníín nyɛ́? Ɖɛ́ kɔ̃̀ jè m̀ seɛ ma ḿ gbo cɛ̃ kà màaɔ̀ mɔ̀ nì gmàà kɛ́?

¹⁹ Ɖɛ́ kɔ̃̀ jè m̀ ɖá ɔ mɔ̀ nì ɖíí-màà kɛ́, ɓɛ́ ḿ dyià ɔ dyí ɖú, ɓɛ́ ɔ kéà ní gmàà jǔ kɛ́? Ɓó kàǔn wɛ̃ɛ, gmɔ̀ nɔ̄, nì gmààɔ̀ kɛà kɛ̀. Ɖú ɔ dyí, ɓɛ́ m̀ ké mu wàɖà.”

²⁰ Ké Féwòɖò cɛ̃ɛ ma ɔ gbo-nì-nyɔ̀ ɓěɔ̀ gbo, ɓɛ́ wa ké ma ɔ kè ɔ gmààɔ̀ kè ɔ kɔ̃̀ɔ̀-ɖɛ̀ séín ɓěɔ̀ hwìǐ kpa, ké wa kpa ma wa hwìǐ, ké wa mu ma.