Jɛ́nɛ́sì 11 - Ɓǎsɔ́ɔ̀ Báɓòɔ̀

Béɓò-gbò tɔ̀mɔ̀ dyaɔ̀

¹ Nyɔ séín nì ma ɓóɖó-kpàɔ̀ kɔ̃ɛɛ po ma wuɖu dyúáɖò kĩ́ín.

² Ti ɓɛ́ wa mùìn ma ɖé dyóɖó-xwáɖáún-wóɖóìn-naínɔ̀ kɛɛ, wa dyé ma bɔɔ-kpà ɖò ɖé Sínà-ɓòɖòɔ̀ kɔ̃, ké wa cĩ́ ma ɖé.

³ Wé ɖòɛ̀ ɓaɖaa, wa cɛ̃ìn cɛ̃̀ìn ma gbo, ké wa ɖá, “Ɓěà sɔ̀ dyí, ɓɛ́ ɓěà ké bèɖěkè mɛ, ɓɛ́ ɓěà kéɛ fɔ̃ nɔ̀mɔ̀ dyíin.” Ɔ jèɛɛ, wa mɛ ma bèɖěkèɔ̀, ɓɛ́ ɔ ké ma sɔ́ɔ́-kpò nììn pá dyí ɖú, ké wa ɖú ma mɛ dyí, ɓɛ́ ɔ ké ma sìmétè nììn pá dyí ɖú.

⁴ Hwɛ̀ ké wa ɖá, “Ɓěà dè hwɔɖɔ vɛ̀nɛ̀ ɖò, ɓɛ́ ɓěà ké ɖé gbǒ vɛ̀nɛ̀ tɔ̀mɔ̀ dya ɖò po, ɓɛ́ ɔ ké ɖé dyɔún nyini, nìí ɓɛ́ dyììn ɖéɛ múɛɛ, ɓěà ké nyɛ́nɛ́ nyu ɓó ɓěà mìɔùn bìì. Ɓěà mɛ nyuɛ náa, ɓɛ́ ɓěà ní kɔ̃̀ ɖà ɓóɖó-kpà gànáɔ̀ kɔ̃in gbɛ̀ìn.”

⁵ Hwɛ̀ ké Bounɓoɔ̀ dyi ma ɓíɖíi, ɓɛ́ ɔ ké hwɔɖɔ vɛ̀nɛ̀ ɓɛ́ wa ɖǎ ma kà dèɛ kè gbǒ vɛ̀nɛ̀ tɔ̀mɔ̀ dya ɓɛ́ wa ɖǎ ma kà poɛɛ dyé.

⁶ Ké ɔ ɖá, “Dyéɛ, kà ɓɛ́ wa mɔ̀à nyɔ dyúáɖò, ké wa poà wuɖu dyúáɖòɛ, ké wa ɖǎà ɖɛ nìà kɛ nyuɛ gbɔ dèɛɛ, nìí, ɖɛ ɓɛ́ wa sɔ́ dyíɛɛ ɖò se mú kàmàǎ mu ɓɛ́ wa ké seɛ nyuɛ ɓɛ́ìn.

⁷ Ɔ jèɛɛ, ɓěà mɛ ge waà wuɖuɔ̀ mú, ɓɛ́ wa ní kɔ̃̀ ɖà wuɖuún dyi wɔ̃́ìn ɖe.”

⁸ Púɛɛ, Bounɓoɔ̀ ge ma waà wuɖuɔ̀ mú, ké wa ɓɔ́ ma hwɔɖɔɔ̀ poɛ. Ké wa gbɛ̀ìn ma ɓóɖó-kpàɔ̀ dà séín dyi.

⁹ Ɔ kɔ̃̀ jè wa jǔìn ma hwɔɖɔɔ̀ Béɓò-nyɛ̀nɛ̀ kɔ̃̀ xwíníín mɔ̀à mú-ge-ge kɛ, sepóɛɖé ɓóɛ̀ Bounɓoɔ̀ ge ma nyɔ séín nìà ɓóɖó-kpà gànáɔ̀ kɔ̃ɛɛ wuɖuɔ̀ mú, ké wa gbɛ̀ìn ma ɓóɖó-kpàɔ̀ dà séín dyi.

Cɛ̃́ìn nyúà-dyú deìn dúún ɓěɔ̀

¹⁰ Cɛ̃́ìn nyúà-dyú deìn dúún ɓěɔ̀ kɛà kɛ̀. Ti ɓɛ́ ní-tòɔ̀ ɖǎ ma dyi zi, ké zɔ̃ sɔ̃́ ɖǎ ma zi, ké Cɛ̃́ìn ɖǎ ma zɔ̃ hɔ̃dɛ̀ɖɛ̀ ɖò nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Àfázà kɛ.

¹¹ Sɔ̀ìn ɓó ti ɔ ɖǎ ma Àfázà wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ hm̀m̌, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

¹² Ti ɓɛ́ Àfázà ɖǎ ma zɔ̃ kpáɖá-nyɔ ɓaɖa-bùè sè hm̀m̌ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Séɖà kɛ.

¹³ Sɔ̀ìn ɓó ti ɔ ɖǎ ma Séɖà wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ hĩinyɛ kè tã, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

¹⁴ Ti ɓɛ́ Séɖà ɖǎ ma zɔ̃ kpáɖá-nyɔ ɓaɖa-bùè nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Éɓɛ̀ kɛ.

¹⁵ Sɔ̀ìn ɓó ti ɔ ɖǎ ma Éɓɛ̀ wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ hĩinyɛ kè tã, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

¹⁶ Ti ɓɛ́ Éɓɛ̀ ɖǎ ma zɔ̃ kpáɖá-nyɔ ɓaɖa-bùè sè hĩinyɛ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Pɛ́ɖɛ̀ kɛ.

¹⁷ Sɔ̀ìn ɓó ti ɔ ɖǎ ma Pɛ́ɖɛ̀ wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ ɓaɖa-bùè, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

¹⁸ Ti ɓɛ́ Pɛ́ɖɛ̀ ɖǎ ma zɔ̃ kpáɖá-nyɔ ɓaɖa-bùè nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Wɛ́ɖɛ́dyù kɛ.

¹⁹ Sɔ̀ìn ɓó ti ɔ ɖǎ ma Wɛ́ɖɛ́dyù wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ sɔ̃́ kè mɛ̀nɛ̌ìn-hĩinyɛ, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

²⁰ Ti ɓɛ́ Wɛ́ɖɛ́dyù ɖǎ ma zɔ̃ kpáɖá-nyɔ ɓaɖa-bùè sè sɔ̃́ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Sɛ́wùɖù kɛ.

²¹ Sɔ̀ìn ɓó ti ɔ ɖǎ ma Sɛ́wùɖù wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ sɔ̃́ kè mɛ̀nɛ̌ìn-sɔ̃́, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

²² Ti ɓɛ́ Sɛ́wùɖù ɖǎ ma zɔ̃ kpáɖá-nyɔ ɓaɖa-bùè nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Néhɔ̀ kɛ.

²³ Sɔ̀ìn ɓó ti ɔ ɖǎ ma Néhɔ̀ wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ sɔ̃́, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

²⁴ Ti ɓɛ́ Néhɔ̀ ɖǎ ma zɔ̃ kpáɖá-nyɔ sè mɛ̀nɛ̌ìn-hĩinyɛ nyuɛɛ, ɔ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Tíwàɖà kɛ.

²⁵ Sɔ̀ìn ɓó ti ɔ ɖǎ ma Tíwàɖà wóɖóìn nyɛ gboɛɛ, ɔ nyu ma zɔ̃ hɔ̃dɛ̀ɖɛ̀ ɖò kè ɓaɖa-bùè sè mɛ̀nɛ̌ìn-hĩinyɛ, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

²⁶ Ti ɓɛ́ Tíwàɖà ɖǎ ma zɔ̃ kpáɖá-nyɔ tã ɓaɖa-bùè nyuɛɛ, ɔ wóɖóìn ma gàa-dyù tã ɓě kɔ̃̀ nyɛ́nɛ́ mɔ̀ ma Éébànà kè Néhɔ̀ kè Háwàɖàùn kɛ.

Tíwàɖà nyúà-dyú deìn dúún ɓěɔ̀

²⁷ Tíwàɖà nyúà-dyú deìn dúún ɓěɔ̀ kɛà kɛ̀. Tíwàɖà wóɖóìn ma Éébànà kè Néhɔ̀ kè Háwàɖàùn. Ké Háwàɖàùn wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Ɖáà kɛ.

²⁸ Ti ɓɛ́ Háwàɖàùn ɓǎ mɔ̀à Tíwàɖà kɛɛ nì ma cĩ́ɛń keɛɛ, Háwàɖàùn mɛ́ìn ma ɖé Ɔ́ɔ̀-hwɔ̀ɖɔ̀ mɔ̀à Kàdíà-nyɔ̀ ɓěɔ̀ ɓíɖí-hwɔ̀ɖɔ̀, ɓɛ́ ɔ nìà Háwàɖàùn wóɖóìn-ɓòɖòɔ̀ kɔ̃ɛɛ mú.

²⁹ Ké Éébànà kè Néhɔ̀ kpɔ̃ ma nyɔ́nɔ́ dyi. Éébànà nììn gmààɔ̀ nyɛ́nɛ́ mɔ̀ ma Séwàɖà, ké Néhɔ̀ nììn gmààɔ̀ nyɛ́nɛ́ mɔ̀ ma Míókà. Míókà mɔ̀ ma Háwàɖàùn dyú-màà. Ɔ ɓéɖé ma ɖíí-màà ɖò kɔ̃̀ nyɛ́nɛ́ mɔ̀ ma Ɛ́kà kɛ.

³⁰ Séwàɖà mɔ̀à Éébànàà gmààɔ̀ kɛɛ mɔ̀ ma ɖàà-màà. Ɔ se ma dyú ɖò wóɖóìn.

³¹ Hwɛ̀ ké Tíwàɖà ɖú ma ɔ dyú-gàà Éébànà kè ɔ nyúà-dyú Ɖáà mɔ̀à Háwàɖàùn nììn dyúɔ̀ kɛ kè ɔ dyúɛ̀ gmàà Séwàɖà dyí, ké wa sɔ̀ ma ɖé wa ɓíɖí-hwɔ̀ɖɔ̀ mɔ̀à Ɔ́ɔ̀ ɓɛ́ ɔ mɔ̀à Kàdíà-nyɔ̀ ɓěɔ̀ ɓíɖí-hwɔ̀ɖɔ̀ɔ̀ kɛɛ mú dyí, ɓɛ́ wa ké ma ɖé Kénà-ɓòɖòɔ̀ kɔ̃ mu. Kɛɛ ti wa nyini ma ɓó Háwàɖàùn-hwɔ̀ɖɔ̀ɔ̀ múɛɛ, wa cĩ́ ma ɓó.

³² Ti ɓɛ́ Tíwàɖà ɖǎ ma zɔ̃ hɔ̃dɛ̀ɖɛ̀ sɔ̃́ kè hm̀m̌ nyuɛɛ, ɔ mɛ́ìn ma ɖé Háwàɖàùn-hwɔ̀ɖɔ̀ɔ̀ mú.