Jɛ̀ɖèmádyà 9 - Ɓǎsɔ́ɔ̀ Báɓòɔ̀

¹ Éé, nyɛ́ ɖá ní dyíɔ́ má ɖé ní dúɔ̀ mú kɛ́? Nyɛ́ ɖá mícɛ̃̀ mɔ̀ɔ̌ má ní-dyù, ké ɔ dyíɔ́ má ɖé ní dyéɖéɔ̀ mú kɛ́? Ɔ dyiɔ́ ná nìǐn, ní muɔ́ má vĩ̌ìn ɓó máaún kè dyóɖóaún ɓó ní nyɔ ɓěɔ̀ jĩ̀ kà ɓɛ́ wa ɖǎà ɖáɓá kɛɛ jè.

² Nyɛ́ ɖá pá ɖò nìɔ̌ má ɖé gbǎùn-fúɖúáɔ̀ mú ɓó zii-nyɔ̀ ɓěɛ̀ pɛ̃́-naín jè kɛ́? Ɔ dyiɔ́ ná nìǐn, ní muɔ́ má ní nyɔ ɓěɛ̀ hwìɛ̀ sɔ̀ùn, ɓɛ́ ḿ kéɔ́ má ɖéɛ kɔ̃ mu, sepóɛɖé wa séín se hwòɖǒ-kɔ̃-dè-nyɔ̀. Wa mɔ̀ nyɔ ɓě ɓɛ́ wa pòìn Gèɖèpɔ́ɔ̀ kɔ̃ín nyɛ.

³ Bounɓoɔ̀ cɛ̃ɛ, ké ɔ ɖá, “Ní nyɔ ɓěɔ̀ ɖǎ waà miɔ ɓěɔ̀ ti dyéìn kà nyɔ kíɖíà pɔnɔ kɛ, ɓɛ́ wa ké se tɔ́mɔ́. Jǎà ɖò se ɖé ɓóɖóɔ̀ kɔ̃ nì ɖe, ké se-tɔ́mɔ́-tɔ́mɔ́ ɖǎ kɔ̃ kpá ɖe mìɔ, sepóɛɖé waà sɔ̀ ɖɛ-gbà-nyu-nyu ɖò gbo, ké wa mu ɖò gbo, ké wa se ní wuɖuɔ̀ nyu.

⁴ “Nyɔ ɖò-ɖò séín mɛ màìn ɔ mǔè ɖò mú. Nyɔ ɖò ní ɖá ɔ ké ɔ ɖíí-gàà ɖò hwìɖǐǐ taɓa, sepóɛɖé ɖíí-gàà ɖò-ɖò séín mɔ̀ nyɔ-cá-nyɔ̀, ké mǔè ɖò-ɖò séín mɔ̀ nyɔ-ɖɛ-gbà-kɔ̃ún-cɛ̃-nyɔ̀.

⁵ Nyɔ ɖò-ɖò séín nì ɔ mǔè ɖò cáuń, ké nyɔ ɖò ní cɛ̃ jǎà. Wa ɖǎ se-tɔ́mɔ́-tɔ́mɔ́ cɛ̃́, ké ɔ nì waà miɔ kɔ̃ kánáá pū. Wa hwɔ wa mìɔùn wɔ̃ ɖé nàmàǔn-nyu-nyu mú.

⁶ Jɛ̀ɖèmádyà, m̀ cĩ́ ɖé nyɔ-cá-cá deìn kɔ̃in hwìɛ̀, ké ní nyɔ ɓěɔ̀ nɔ́ɔ̀ ɓɛ́ wa ké ní wuɖuɔ̀ nyu. Mɔ̄ Bounɓoɔ̀ mɔ̀ nyɔ cɛ̃à kɛ̀.

⁷ “Ɔ ná nì jèɛɛ, mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mu ní nyɔ ɓěɔ̀ ɖèìn kà nyɔ ɖèàìn séɓàɖà kɛ, ɓɛ́ ḿ ké wa zɛ̀nɛ̌ mú zà. Wa ɖǎ nàmàǔn nyu, ké ɖɛ́ ḿ ɓɛ́ìn nyuɛ ɖe ɓá wa jè dyí kɛ́?

⁸ Waà miɔ nì kà sé-kpìì nì cɛ̃́ mánáín nìà kɛ. Waà miɔɔ̀ cɛ̃ nyɔ-cá-wùɖù. Wa cɛ̃ wuɖu ɓɔ̀ɖɔ̀ɔ̀-ɓɔ̀ɖɔ̀ɔ̀ wa mǔè ɖò gbo, kɛɛ wa gbǎ xwáɖá ɓó wa mǔèɔ̀ bìì ɖé wa hwòɖǒ bũ̌.

⁹ Kà ɔ nìà náa, nìí, ḿ mɛ ɓɔ́ wa gǎ kɔ̃ tòɛ̀ ɓó ɖɛ ɓěɛ̀ jèe? Ḿ mɛ ɓɔ́ ɓóɖó kɔ̃̀ kpeɖe nìà kà kɛɛ kpa kɔ̃in zàìne? Mɔ̄ Bounɓoɔ̀ mɔ̀ nyɔ cɛ̃à kɛ̀.”

¹⁰ Ké mɔ̄ Jɛ̀ɖèmádyà ɖá, “Ní mu vĩ̌ìn ɓó toɖo ɓěɔ̀ jè, ké ní mu kpé poùn ɓó nyúà-ɖɛ̀ dyi-ɖi-naín ɓěɔ̀ jè, sepóɛɖé wa ɖǎ dyɛɛ hwɛ̀, ké nyɔ ɖò ní zĩ̀ìn ɖé ɖe. Nyɔ ɖò ní wɔ̃́ ɖé nyúà-ɖɛ̀ ɖòɛ̀ wuɖu ɖe, ké naà mɔɔ xwáɖá-xwíɖíi-nìmìì ɖò se ɖé nì ɖe.”

¹¹ Ké Bounɓoɔ̀ cɛ̃ɛ ɖe, ké ɔ ɖá, “Ní mu Jùɖúsɛ̀ɖɛ̀ìn-hwɔ̀ɖɔ̀ɔ̀ wáɖáùn, ɓɛ́ ɔ ké hwùɖùǎ jǔ. Ké ɖé mu xwáɖá-xwíɖíi-nìmìì ɓěɔ̀ cĩ́-naín jǔùn. Ké ní mu Júɖà-hwɔ̀ɖɔ̀ tɔ̀ɔ̀ ɓěɔ̀ wáɖáùn, ɓɛ́ wa ké hwùɖùǎ jǔ nyɛ̀nɛ̀ɛ̀.”

¹² Hwɛ̀ ké ḿ diè ɖɛi, ké ḿ ɖá, “Bounɓo, ɖɛ́ kɔ̃̀ jè ɓóɖóɛ̀ ɖǎà wáɖá, ɓɛ́ ɔ dyiá kà gbǎùn-fúɖúá hwɔìn, ké nyɔ ɖò ní zĩ̀àìn ɖé ɖeɛ́? Nyɛ́ fɔ̀nɔ̀ hwòɖǒ ké ɔ ɓɛ́ìn ɖɛ ɓěa múin wɔ̃́ɔ kɛ́? Nyɛ́ mɔ̀ nyɔ m̀ ɖǎ ɖɛ ɓěa gbo kɔ̃in zaìn, nìí ɓɛ́ ɔ mɔ̀ùn kéɛ nyɔ tɔ̀ɔ̀ ɓě gbo cɛ̃ kɛ́?”

¹³ Ké Bounɓoɔ̀ jǔ ma ḿ gɔ̃̌, ké ɔ ɖá, “Ɖɛ kɔ̃̀ jè ɔ nìà náa mɔ̀, sepóɛɖé wa se ní gma ɓɛ́ ḿ dè ma kà wa dyíɛɛ dyi kpɔ̃, ké wa se ní wuɖuɔ̀ nyu, ké wa seɛ kíɖíí sí.

¹⁴ Kɛɛ wa ɓéɖé kɛ́ɛ́-hwòɖò-dyùà, ké wa ɖǎ Béò kɔ̃̀ jè ɓɛ́ wa ɓǎ ɓě tɛ̀mɛ̀ìn ma wa kɛɛ kíɖíí sí.

¹⁵ Ɔ jèɛɛ, ɖɛ mɔ̄ Bounɓo mɔ̀à Éézùɖùɛ̀ Gèɖèpɔ́ɔ̀ nìà ɖɛ séín kɔ̃in nyɛɛ mu nyuùn wɛ̃ɛ kɛà kɛ̀. Ní mu ní nyɔ ɓěɛ̀ ɖɛ nɛɛ̀-nɛɛ̀ nyíìn, ɓɛ́ wa kéɛ ɖi. Ké ní mu wa cɛ̃́-nì nyíìn, ɓɛ́ wa kéɛ ná.

¹⁶ Ké ní mu wa dyi gbɛ̀ìn ɖé ɓóɖó-dù ɓě ɓɛ́ wa mɔ̀ùn mɔɔ wa ɓǎ ɓě se dyí dyuòɛɛ hwìɛ̀. Ké ní mu wa to kɔ̃ tòùn, ɓɛ́ ḿ ké wa séín ɖáɓáa hwɔ hwɛ̀.”

Jùɖúsɛ̀ɖɛ̀ìn-nyɔ̀ ɓěɔ̀ páná mú ɓó gbo-kpá-kpá jè

¹⁷ Ké Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ma ɖe, ké ɔ ɖá, “Ɓě poìn ɖɛ ɓě nìà kpáuń wɛ̃ɛ jè hwìɖǐi, ɓɛ́ ɓě ké màa ɓě dyuò xwɛ́ vĩ̌ɛ kɛɛ ɖá, ɓɛ́ wa ké dyi. Ɓě ɖá màa ɓě ɓɛ́ wa nɔ̀mɔ̀ kpé-po-wùɖù múɛ, ɓɛ́ wa ké dyi.

¹⁸ Ɓě cɛ̃ɛ wa gbo, ɓɛ́ wa ké dyi wàɖà, ɓɛ́ wa ké waà kpé-po-wùɖùɔ̀ dyí ɖú ɓó ɓě bìì, ɓɛ́ mícɛ̃̀ ké ɓě dyéɖéín sɔ̀, ɓɛ́ ɔ ké dyi sí kà ní púè kà dyiɛ.

¹⁹ Ɓě tò ɖùǔ, vĩ̌-wùɖù ɖò sɔ̀ dyí ɖé Zádyɔún-hwɔ̀ɖɔ̀ɔ̀ mú. Vĩ̌-wùɖùɔ̀ ɖá, ‘À ɖǎ mú gbɔɔ̀ wà! À ɖǎ zùǔn sɔ̀ìn gàná cá wà! Sepóɛɖé wa ɖǎ à cĩ́-naín ɓěɔ̀ wáɖá, ké à ɓéɖé à kéá ɓóɖóɛ̀ kɔ̃ sɔ̀.’ ”

²⁰ Màa ɓě, ɓě tò Bounɓoɔ̀ wuɖuɔ̀ ɖùǔ gbo. Ɓě kpɔ̃ wuɖu sɔ̀ ɔ wĩín nyɛɛ dyi. Ɓě tɛ̀mɛ̀ìn ɓě nììn dyú-màà ɓě kà nyɔ nyu vĩ̌ɛ kɛ, ké màa ɖò-ɖò séín mɛ tɛ̀mɛ̀ìn ɔ mǔè ɖò kà nyɔ ké kpé-po-wùɖù mú nɔ̀mɔ̀ɔ̀ nyuɛ.

²¹ Sepóɛɖé gĩɔ ɖǎ à wúɖɛ̀-wɔ̃̀ ɓěɔ̀ gbo dyáìn, ké ɔ ɖǎ à to-pèɖèìn-naín ɓěɔ̀ dyá. Ké à dyú mɛ́nɛ́ɛ́ ɓě nì ɖé hwɔɖɔɔ̀ gboi hwìè ɓěɔ̀ kɔ̃ɛ kè à nyɔ gmɔ̀ ɓě nì ɖé ɖɛ-pèɖèìn-naín ɓěɔ̀ kɛɛ ɖǎ mɛ́ɛ hwɛ̀.

²² Ké Bounɓoɔ̀ cɛ̃ɛ ḿ gbo, ké ɔ ɖá, “Cɛ̃ɛ kà ḿ ɖá nyɔǔn-dyùɛ̀ xwɛ́ mu dyi wáɖáìn, kà sĩ̀ɔ̌ wáɖáìn dyiɛ. Ɔ mu nììn pū kà mɔɔ́-cɛ̃-nyɔ̀ cɛ̃à mɔɔ́ ké ɔ sèà ɖéɛ geɖe gboɛ. Nyɔ kéɛ dyí poìn nyɛɛ ɖò se nì.”

²³ Bounɓoɔ̀ cɛ̃ɛ ɖe, ké ɔ ɖá, “Hwòɖǒ-fɔ̀nɔ̀-nyɔ̀ ní ɖá ɓɛ́ ɔ ké ɓɔ́ɖɔ́ ɓó ɔ hwòɖǒ fɔ̀nɔ̀ jè. Ké gàa-zà-nyɔ̀ ní ɖá ɓɛ́ ɔ ké ɓɔ́ɖɔ́ ɓó gana nì ɔ múɛɛ jè. Ké bã-nyɔ̀ ní ɖá ɓɛ́ ɔ ké ɓɔ́ɖɔ́ ɓó ɔ kɔ́mɔ́ɔ̀ jè.

²⁴ Kɛɛ nyɔ ɖò dyi ɓɔ́ɖɔ́ɔ mɔ́ ní, ɖɛ kɔ̃̀ jè ɔ mɛ ɓɔ́ɖɔ́ɛɛ mɔ̀ kà ɔ dyuò ḿ dyí, ké ɔ wɔ̃́ɔ múin kà mɔ̄ mɔ̀ Bounɓo kɔ̃̀ ɖɛ̀ɓɛ̀ǐn-ɖɛ̀ɓɛ̀ǐn se sèìn-naín kɔ̃̀ɛ, ɔ kè kà mɔ̄ mɔ̀ jǎà-ɖɛ̀ kè dyí-sɛ́ɖɛ́ìn-ɖɛ̀-nyu-nyɔ̀ ɖé toɖo-kpàɔ̀ kɔ̃ɛ. Sepóɛɖé ɖɛ ɓě nìà kɛ mɔ̀ ɖɛ ní hwòɖǒ dèìn múin nyɛ. Mɔ̄ Bounɓoɔ̀ mɔ̀ nyɔ cɛ̃à kɛ̀.

²⁵ “Ti ɖò nì dyiɛń, ké ní mu nyɔ séín ɓě mɛ́à sàà ɖé fɔ́ mú ɖòùn pūɛɛ gǎ kɔ̃ tòùn.

²⁶ Nyɔ ɓěɔ̀ mɔ̀ Íjè-nyɔ̀ ɓěɔ̀ kè Júɖà-nyɔ̀ ɓěɔ̀ kè Íɖɔ̀ùn-nyɔ̀ ɓěɔ̀ kè Ámànà-nyɔ̀ ɓěɔ̀ kè Móà-nyɔ̀ ɓěɔ̀ ɔ kè nyɔ séín ɓě ɓɛ́ wa cĩ́ ɖé gbǎùn-fúɖúáɔ̀ kɔ̃, ɓɛ́ wa cɛ̃ waà mí ké ɔ xwã́ kɛ. Éézùɖùɛ̀-dyù séín ɓěɔ̀ mɛ́ sàà dyɛo, kɛɛ waà hwòɖǒ-dyùà ɓěɔ̀ se sàà mɛ́.”