Jɛ̀ɖèmádyà 8 - Ɓǎsɔ́ɔ̀ Báɓòɔ̀

¹ Bounɓoɔ̀ cɛ̃ɛ ɖe, ké ɔ ɖá, “Ɓó tia ɓaɖaa, wa mu Júɖà-ɓòɖòɔ̀ kã́á ɓěɔ̀ kpá kèɛ̀ gɔ̌mànà-nyɔ̀ vɛ̀nɛ̀ ɓěɔ̀ kpá kèɛ̀ sáa-zà-nyɔ̀ ɓěɔ̀ kpá kèɛ̀ kpáá-ɖɛ̀-cɛ̃-nyɔ̀ ɓěɔ̀ kpá ɔ kè nyɔ tɔ̀ɔ̀ séín cĩ́ zɔ̃̌ɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ kpá ɖé waà xwɛ́-gmàà ɓěɔ̀ mú zàùn.

² Ké wa mu kpá ɓěɔ̀ dyóɖóún dyi wáɖáùn ɓó dyóɖóɔ̀ kè dɛ̀nɛ̀ɔ̀ ɔ kè dɛ̀nɛ̀ mɛ́nɛ́ɛ́ séín ɓě ɓɛ́ wa ɖɛ̀ɓɛ̀ ma kà mú, ɓɛ́ wa dyi ma kà wa bìì kũ̀à nyuɛɛ dyúa. Wa mɔ̀ ɖɛ ɓě ɓɛ́ wa sí ma kà kíɖíí, ɓɛ́ wa dyi ma kà ɓièɛ. Ké wa se kpá ɓěɔ̀ dyí poɛ̌n mu, ɓɛ́ wa ké wa dyóɖóún zà ɖe. Kɛɛ wa muá sĩ̀ɔ̌-kòò jǔùn, ɓɛ́ wa ké ɓó ɓíɖíi gbǒìn.

³ Ké hwòɖǒ-kɔ̃in-nyìnììn-nyɔ̀ ɓěɛ̀ nyɔ jĩ̀ kà mu ɓíɖíi sèìn ɖé dɛ̀ kã̀ìn séín wa mu mùìn ti ní muà wa kúmúùn wɛ̃ɛ, waà hwòɖǒ se cĩ́ɛ mɔ́ɔ mu ɖe, kɛɛ wa mu gĩɔ kpéɖéìn. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Nàmàǔn kè gǎ

⁴ Bounɓoɔ̀ cɛ̃ɛ ḿ gbo ɖe, ké ɔ ɖá, “Diè ní nyɔ ɓěɔ̀ dyi, ɓɛ́ m̀ ké níiń, ‘Nyɔ ɖò dyi ɓuɖu ní, ɔ ní sɔ̀ dyí ɖeè? Nyɔ ɖò dyi hwìè dyí sɔ̀ìn ní, ɔ ní sí hwìèɔ̀ dyí ɖeè?’

⁵ Kà ɔ nìà náa, nìí, ɖɛ́ kɔ̃̀ jè Jùɖúsɛ̀ɖɛ̀ìn-nyɔ̀ ɓěɛ̀ kɔ́ìn kà ɖe, ké wa seà ḿ gbo ɖe dyiɛ mɔ́ ɖe fɔɔ cá kɛ́? Wa kpɔ̃ ɓó nyɔ-cá-ɖɛ̀ ɓěɔ̀ gboi kóɖó-kóɖó, ké wa nɔ́ɔ̀ ɓó ḿ gbo ɖe dyi jè.

⁶ Ḿ ɖúó ɖùǔ tòɛ̌n dyíɛ, kɛɛ waà nyɔ ɖò ní cɛ̃ ɖɛín-ɖɛ̀ ɖò. Waà nyɔ ɖò ní kpá wìǐn ɓó ɔ ɖɛ gbà ɓěɔ̀ jè, ké ɔ ní nyu níiń, ‘Ḿ se kɔ̃̀ ɓɛ́ ḿ kéɔ́ ɖɛ nìà kɛ nyu.’ Nyɔ ɖò-ɖò séín nì ɔ mìɔùn nììn hwìèɔ̀ xwíníín kánáá pū. Wa nì kà sǒ ɖò ɓɛ́ ɔ nì peɖeɛ kpauń, ké ɔ nì to gbo muɛń, ké ɔ se wɔ̃́ ɓɛ́ nyɔ ɖò kéà ɔ dú hwìǐ zàìn nyɛɛ nìà kɛ.

⁷ Naà ɓě hwɔìn kà bá-bá ɓěɔ̀ kè gbúɛ́ ɓěɔ̀ kè tá-tá ɓěɔ̀ ɔ kè tɔ̀-pùɖù ɓěɔ̀ dyuò waà jaɖa-tì ɓěɔ̀ dyí, kɛɛ ní nyɔ ɓěɔ̀ se ní gmaɔ̀ dyí dyuò.

⁸ Xwɛ̌ wa ɓɛ́ìn cɛ̃ɛ kà wa fɔ̀nɔ̀ hwòɖǒ ké wa dyuò ní gmaɔ̀ kɛ́? Má, céè-ɖɛ̀ céè-nyɔ̀ ɓě ɓɛ́ wa mɔ̀à se-tɔ́mɔ́-nyɔ̀ ɓěɛɛ ɖǎ ní gmaɔ̀ céè ɖe ɖie, ké wa ɖǎa dyí zàìne?

⁹ Dɛ̃ mu hwòɖǒ-fɔ̀nɔ̀-nyɔ̀ ɓěɔ̀ nyuùn, ké waà hwòɖǒ mu kɔ̃in cáùn, ké kpàǎɔ̀ mu wa kpɔ̃ùn, sepóɛɖé wa ɖǎ mɔ̄ Bounɓoɔ̀ wuɖuɔ̀ gbo nɔ́ɔ̀. Fɔ̀nɔ̀-hwòɖǒɔ̀ nyɛ́ nì wa múɛ́?

¹⁰ Ɔ ná nì jèɛɛ, ní mu waà gmàà ɓěɔ̀ gàa kà kò ɖò ɓě nyíìn, ké ní mu waà geɖe ɓěɔ̀ nyɔ kà kò ɖò ɓě nyíìn. Sɔ̀ìn ɖé waà nyɔ dyùwè ɓěɔ̀ gbo ké waà nyɔ vɛ̀nɛ̀ ɓěɔ̀ dyɛ̀ìn nyɛɛ, wa séín hwòɖǒ nyu pá-pá ɓó kpáná se dyí sɛ́ɖɛ́ìn po jè. Sɔ̀ìn ɖé waà kpáá-ɖɛ̀-cɛ̃-nyɔ̀ ɓěɔ̀ gbo ké waà sáa-zà-nyɔ̀ ɓěɔ̀ dyɛ̀ìn nyɛɛ, wa séín mɔ̀ nyɔ ɓěɔ̀ gbá-gbá-mú-nyu-nyɔ̀ nyɛ̀nɛ̀ɛ̀.

¹¹ Wa hwǒò ní nyɔ ɓěɔ̀ jě ɓěɔ̀ ɓó kɔ̃in pū, kɛɛ ɖéɛ hwuɖu se ɓɔ́. Wa cɛ̃ɛ, ké wa ɖá, ‘Gìɖìǐ nì ní. Gìɖìǐ nì ní.’ Wa cɛ̃ɛ náa ti ɓɛ́ gìɖìǐ ɖò se nìɛ.

¹² Dɛ̃ nyu ma wa ní ɓó ní dyi-nyàìn-ɖɛ̀ ɓě ɓɛ́ wa nyuà kɛɛ jèe? Gbào, dɛ̃ ɖò se ma wa nyu fɔɔ cá. Wa se dɛ̃-dyùǎ ɖò ɓéɖé. Ɔ ná nì jèɛɛ, wa mu nyɔ ɓě muà dyi kpáùn wɛ̃ɛ hwìɛ̀ nììn. Ti ní muà wa gǎ kɔ̃ tòùn wɛ̃ɛ, ní mu wa jè dyi zĩ̀ìn. Mɔ̄ Bounɓoɔ̀ mɔ̀ nyɔ cɛ̃à kɛ̀.”

¹³ Bounɓoɔ̀ cɛ̃ɛ ɖe, ké ɔ ɖá, “Ti ɓɛ́ ḿ mɔ́ ma ní nyɔ ɓěɔ̀ ɓo dyai kà nyɔ mɔ́à ɓáá-ɖɛ̀ ɖò kpã́a dyiɛɛ, púɛɛ, wa nì kà géɖéè-gbǎ ɓɛ́ ɔ se ɓo ɖò tòɖòɛ mɔɔ féè-cù ɓɛ́ ɔ se ɓo ɖò dya nìɛ, hwɛ̀ ḿ po níiń, mí fóɖóún se wa dya nì. Ɔ jèɛɛ, ɖɛ ɓɛ́ ḿ nyí ma wa kɛɛ ɖǎ wa xwa sɔ̀.”

¹⁴ Ké Gèɖèpɔ́ɔ̀ nyɔ ɓěɔ̀ ɖú ma wuɖuí, ké wa ɖá, “Ɖɛ́ kɔ̃̀ jè ɓěà kò dà dyi, ɓɛ́ ɓěà dyi sɔ̃ pĩ́ín wáɖá kɛ́? Ɓěà sɔ̀ dyí, ɓɛ́ ɓěà ké toún-pèɖèìn-hwɔ̀ɖɔ̀ ɓěɔ̀ mú mu, ɓɛ́ ɓěà ké ɖé mɛ́ìn, sepóɛɖé Bounɓo mɔ̀à à Gèɖèpɔ́ɔ̀ kɛɛ ɖǎ à zaa dúún wáɖá, ɓɛ́ à ké mɛ́. Ɔ ɖǎ à cɛ̃́-nì nyí, ɓɛ́ à kéɛ ná, sepóɛɖé à ɖǎ ɔ nàmàǔn bũ̌ nyu.

¹⁵ À mɔ́ gìɖìǐ dyi, kɛɛ à seɛ dyéɛ ɓɛ́ìn. Ké à mɔ́ dyi-káná-káná dyi, kɛɛ ɖɛ à dyéɛɛ mɔ̀ nyɔ-fã̀àǔn-po-ɖɛ̀ saá-saá pū.

¹⁶ À ɓɛ́ìn à mú-nyɛ́-nyɔ̀ ɓěɔ̀ sǒ ɓěɔ̀ jĩ̌ wɔ̃́ɔ sɔ̀ìn ɖé Dɛ̃́ìn-hwɔ̀ɖɔ̀ɔ̀ mú. Sǒ ɓěɔ̀ dyi wùɖù ní, ɓóɖó gànáà tɛɖɛ kɔ̃in. Wa ɖǎ dyi, ɓɛ́ wa ké à ɓóɖó gànáà kè ɖɛ séín nìɛ̀ kɔ̃ɛɛ mú gbɔɔ̀. Wa dyi, ɓɛ́ wa ké Jùɖúsɛ̀ɖɛ̀ìn-hwɔ̀ɖɔ̀ɛ̀ kèɛ̀ nyɔ séín ɓěɔ̀ mú gbɔɔ̀.”

¹⁷ Bounɓoɔ̀ cɛ̃ɛ ɖe, ké ɔ ɖá, “Ɓě dèɛ̀ hwìɖǐio. Ní mu mú-nyɛ́-nyɔ̀ ɓě ɖé ɓě hwìɛ̀ tòùn kà cɛ̃́-sɛ̀ nìà kɛ, ké ɓě se wa dyúa gbǔɛ ɓɛ́ǐn mu. Wa mu ɓě numuùn wɛ̃́ɛ́.”

Wìì nì Jɛ̀ɖèmádyà nyuɛń ɓó ɔ nyɔ ɓěɔ̀ jè

¹⁸ Ní wììɔ̀ se sèìn-naín kɔ̃̀. Wìì nì ɖé ní hwòɖǒɔ̀ bũ̌ɛɛ ɓúá kpéín mìɔ.

¹⁹ Tò ɖùǔ, ḿ nì ní nyɔ ɓěɔ̀ mú-páná-wùɖù wɔ̃́uń nɔ̄ ɓóɖóɛ̀ dà séín. Wa ɖá, “Bounɓoɔ̀ se ɖé Zádyɔún-hwɔ̀ɖɔ̀ɔ̀ mú nì ɖeè? Ɔ se Zádyɔún-hwɔ̀ɖɔ̀ɔ̀ kã́á ɖeè?” Hwɛ̀ ké Bounɓoɔ̀ zà ma ɖé wuɖu, ké ɔ ɖá, “Ɖɛ́ kɔ̃̀ jè nyɔ ɓěɛ̀ poà ḿ dyoɖoún dyììn ɖé waà kũùn-kpò-gèɖèpɔ́ɔ̀ kà kò ɖò ɓě ɓɛ́ wa seà ɖɛ kpa kɛɛ mú kɛ́?”

²⁰ Ké nyɔ ɓěɔ̀ ɖá, “Dyéɛ, à ɓáá-ɖɛ̀ ɓě ɖǎ geɖeín hwɛ̀, ké dyóɖó-bà-tìɔ̀ ɖǎ ɖé hwɛ̀, ké à séè gǎɔ̀ xwaún pó ke.”

²¹ Ní hwòɖǒ ɖǎ dyi wɛ̀ìn ɓó ní nyɔ ɓě wɛ̀ìn kà dyiɛɛ jè. Ní hwòɖǒɔ̀ kpá ɖé ɖei mìɔ, ké wìì dyíìn ḿ múin.

²² Kũùn ɖò se ɖé Gíɖèà-ɓòɖòɔ̀ kɔ̃ nì fɔɔ cáe? Nyɔ-hwǒò-nyɔ̀ ɖò se ɖé nì fɔɔ cáe? Ɖɛ́ kɔ̃̀ jè ní nyɔ ɓěɔ̀ séè kà dyi káná kɛ́?