Jɛ̀ɖèmádyà 7 - Ɓǎsɔ́ɔ̀ Báɓòɔ̀

Jɛ̀ɖèmádyà wáɖá Gèɖèpɔ́ɔ̀ wuɖuɔ̀ ɖé Gèɖèpɔ́ɔ̀ gbǒɔ̀ mú

¹ Hwɛ̀ ké Bounɓoɔ̀ cɛ̃ɛ ma Jɛ̀ɖèmádyà gbo ɖe, ké ɔ ɖá,

² “Mu, ɓɛ́ m̀ ké ɖé ní gbǒɔ̀ gmɔ-wɔ̃̀ɔ̀ gbo dyi nyànà, ɓɛ́ m̀ ké zio po ɖé Júɖà-nyɔ̀ ɓěɔ̀ gbo kà ḿ ɖá wa nyɔ séín ɓě ɓɛ́ wa dyáìn gmɔ-wɔ̃̀ ɓěɛ̀ mú, ɓɛ́ wa ké ḿ ɓièɛɛ mɛ tò ní wuɖuɔ̀ ɖùǔ gboɛ.

³ Mɔ̄ Bounɓo mɔ̀à Éézùɖùɛ̀ Gèɖèpɔ́ɔ̀ nìà ɖɛ séín kɔ̃in nyɛɛ cɛ̃ɛ ní nyɔ ɓěɔ̀ gbo ɖe, ké ḿ ɖá, ‘Ɓě mɛ táà kpeɖe gbà ɓě ɓɛ́ ɓě nì nyuɛń nyɛɛ dyi. Nìí, ní mu wɔ̃́ùn, ɓɛ́ ɓě ké ɓóɖó nìà kɛ kɔ̃ cĩ́ ke kánáá pū.

⁴ Ɓě ɓɔ́ nyɔ-cá-wùɖù ɓě ɓɛ́ wa cɛ̃à, ɓɛ́ wa dyià níiń, “Gbǒ nìà kɛ mɔ̀ Bounɓoɔ̀ cĩ́-naín, gbǒ nìà kɛ mɔ̀ Bounɓoɔ̀ cĩ́-naín, gbǒ nìà kɛ mɔ̀ Bounɓoɔ̀ cĩ́-naín” nyɛɛ hwìɖǐǐ taɓaa.

⁵ “ ‘Ɔ jǔ ké ɓě dyi ɓěɛ̀ kpeɖe gbà ɓěɔ̀ dyi táà jɛ́ɛ́ cá, ké ɓě dyi dyí-sɛ́ɖɛ́ìn-ɖɛ̀ ɓě mǔè ɖò bũ̌ nyu,

⁶ ké ɓě se ɖíà ɓě mɔɔ xwíè-dyù ɓě mɔɔ jɔ̌ɔ̀-nyɔ̀nɔ̀ ɓě dyi pĩ́à ní, ké ɓě se nyɔ se ɖɛ gbà ɖò nyuɛɛ nyɔmɔɔ dyi wáɖáìn dà pá nìà kɛ mú ní, ké ɓě se gèɖèpɔ́ɔ̀ kà kò ɖò ɓě kíɖíí sí, ɓɛ́ ɓě ké ɓě mìɔùn mú-gbɔɔ̀-gbɔɔ̀ kɔ̃ dya ní,

⁷ nìí, ní mu wɔ̃́ùn ɓɛ́ ɓě ké ɓóɖó nìà kɛ kɔ̃ cĩ́ kánáá pū. Ɔ mɔ̀ ɓóɖó ɓɛ́ ḿ nyíó zɔ̃̌ɔ̀ ɓě ɓǎ nììn ɓǎ ɓěɔ̀ ɓɛ́ ɔ kéà waà kɔ̃̀ɔ̀-ɖɛ̀ jǔɛ.

⁸ “ ‘Kɛɛ dyéɛ, ɓě taɓa nyɔ-cá-wùɖù ɓě ɓɛ́ wa mɔ̀ wuɖu fóɖóún wɛ̃ɛ hwìɖǐǐ.

⁹ Ɓě nì dyíɖíɛń, ké ɓě nì kú ɖáɓáuń, ké ɓě nì gbàɖàùn poɛń, ké ɓě nì gboòɛ̌n ɓá ɖɛ se jǎà kɛɛ jè dyí, ké ɓě nì Béò gbo sáa zàǔn, ké ɓě nì gèɖèpɔ́ɔ̀ kà kò ɖò ɓě kɔ̃̀ jè ɓɛ́ ɓě se dyuòɛɛ ɓièɛ̌n.

¹⁰ Ɓě nì ɖɛ séín ɓěɛ̀ nyuɛń, hwɛ̀ ké ɓě dyi, ké ɓě nyànà ɓó ḿ dyúa dyi nɔ̄ ní gbǒ ɓɛ́ ɔ mùìn kà ḿ nyɛ́nɛ́ín nyɛɛ mú, ké ɓě ɖá, “À ɖǎ pó.” Kɛɛ nìí, ɓě kpa ní dyi-nyàìn-ɖɛ̀ ɓěa nyu-nyu dyúa ke kánáá pū.

¹¹ Gbǒ ɓɛ́ ɔ mùìn kà ḿ nyɛ́nɛ́ín nyɛɛ mɔ̀ǎ sṹún-gɔ̀-nyɔ̀ ɓěɛ̀ cĩ́-naín ɖé ɓě dyéɖéín cáe? Ḿ mìɔùn ɖǎ ɖɛ nìà kɛ dyéo. Mɔ̄ Bounɓoɔ̀ mɔ̀ nyɔ cɛ̃à kɛ̀.

¹² Ɓě mu ɖé Síɖò-hwɔ̀ɖɔ̀ɔ̀ mú ɓó kàǔn, dɛ̀ ɓɛ́ ḿ gã ma kà ɓɛ́ ɓě ɓǎ nììn ɓǎ ɓěɔ̀ dyió zɔ̃̌ɔ̀ kà ɖé ḿ ɓièìn kĩ́ín nyɛ, ɓɛ́ ɓě ké ɖɛ ḿ nyuɛ bũ̌ ɓó waà hwòɖǒ kɔ̃in nyìnììn jèɛɛ dyé.

¹³ Ti ɓɛ́ ɓě nì ma ɖɛ ɓěa nyuɛń nyɛɛ, ḿ gã̀ ma ɓě gbo wùɖùɛ̌n dyi tee, kɛɛ ɓě se ní wuɖuɔ̀ ɖùǔ gbo tò. Ḿ ɖá ma ɓě, kɛɛ ɓě se ní ɖá-wùɖùɔ̀ wɔ̃́ fɔɔ cá.

¹⁴ Ɔ ná nì jèɛɛ, ní mu ɖɛ dyúáɖò ɓɛ́ ḿ nyu zɔ̃̌ɔ̀ kà Síɖò-hwɔ̀ɖɔ̀ɔ̀ bũ̌ɛɛ gbǒ ɓɛ́ ɔ mùìn kà ḿ nyɛ́nɛ́ín nyɛɛ bũ̌ nyuùn. Ɔ mɔ̀ gbǒ ɓɛ́ ɓě taɓaà hwìɖǐǐɛ. Ɔ mɔ̀ pá ɓɛ́ ḿ nyí zɔ̃̌ɔ̀ kà ɓě kè ɓě ɓǎ ɓěɛ.

¹⁵ Ké ní mu ɓě kúmúùn, ɓɛ́ ɓě ké ɓó ḿ dyúa sɔ̀ kà ḿ nyu ma kà ɓě ɖíí ɓě mɔ̀ Éézùɖùɛ̀-dyù ɓěɔ̀ kúmúɛ kɛ.’ ”

Nyɔ ɓěɔ̀ jaɖa Gèɖèpɔ́ɔ̀ wuɖuún

¹⁶ Ké Bounɓoɔ̀ cɛ̃ɛ ḿ gbo, ké ɔ ɖá, “Jɛ̀ɖèmádyà, mɔ̀ǔn ɖá ɓɛ́ m̀ ké nyɔ ɓěɛ̀ bìì ɓaà fɔɔ cá. Mɔ̀ǔn ɖá ɓɛ́ m̀ ké wa bìì vĩ̌ dyɛ mɔ̀ùn, mɔɔ ɓɛ́ m̀ ké ḿ ɖɛ ɖò zɔ̀ìn ɓó wa bìì dyɛ mɔ̀ùn, sepóɛɖé ḿ se nì ɓaà-wùɖùɔ̀ wɔ̃́ɔ mu.

¹⁷ Mɔ̀ǔn dyé ɖɛ ɓě ɓɛ́ wa nìà nyuɛń ɖé Júɖà-hwɔ̀ɖɔ̀ ɓěɔ̀ mú kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gboi hwìè ɓěɔ̀ kɔ̃ dyiɛɛ̀?

¹⁸ Dyú ɓěɔ̀ mɔ́ nyɛ, ké wa ɓǎ ɓě poɛ dyí, ké màa ɓě nyu bɛɖɛɛ̀-kpò ɓě ɓó gèɖèpɔ́ɔ̀-màà ɓɛ́ wa ɖáìn Kã́á-Màà Nìà Ɖé Dyiíɛɛ bìì. Ké wa púè náá-ɖɛ̀-sàǎ-zàìn-ɖɛ̀ ɓě ɓó gèɖèpɔ́ɔ̀ kà kò ɖò ɓě bìì. Wa nyu ɖɛ ɓěa, ɓɛ́ wa ké ḿ bũ̌in puà.

¹⁹ Kɛɛ waà hwòɖǒ ɖá mɔ̄ Bounɓoɔ̀ mɔ̀ nyɔ wa puàà bũ̌in nyɛ̀e? Má, wa nì dɛ̃-ɖɛ̀ ɓɛ́ ɔ puà wa mìɔùn bũ̌in nyɛɛ nyuɛńe?

²⁰ Gmɔ̀ nɔ̄, ní mu ní dyoɖo ku wɔ̃ɔ̀ pá nìà kɛ kɔ̃ púèìn. Ní muɛ nyɔǔn-dyù kè nimii kɔ̃ púèìn. Ní muɛ cu ɓě kè ɓáá-ɖɛ̀ ɓě kɔ̃ púèìn. Ní dyoɖoɔ̀ mu wɔ̃ kuùn kà nyɛ-ɓɔ́ɔ́ nìà kɛ, ké nyɔ ɖò seɛ ɓɔ́í poɛ ɓɛ́ǐn mu. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.

²¹ “Ɖɛ mɔ̄ Bounɓo mɔ̀à Éézùɖùɛ̀ Gèɖèpɔ́ɔ̀ nìà ɖɛ séín kɔ̃in nyɛɛ cɛ̃ ní nyɔ ɓěɔ̀ gboɛɛ kɛà kɛ̀. Ḿ ɖá, ‘Ɔ muɔ́ má dyíin nɔ̀mɔ̀ùn ɓɛ́ ɓě kéɔ́ má ɓěɛ̀ fɔ̃ɔ-sàǎ-zàìn-ɖɛ̀ɔ̀ kè ɓěɛ̀ sáa-zàìn-ɖɛ̀ tɔ̀ɔ̀ ɓěɔ̀ dyí poìn pū, ɓɛ́ ɓě kéɔ́ wa séín ɖi.

²² Sepóɛɖé ti ɓɛ́ ḿ ké zɔ̃̌ɔ̀ kà ɓě ɓǎ nììn ɓǎ ɓěɔ̀ ɖé Íjè-ɓòɖòɔ̀ kɔ̃ zàa, ḿ se ma wa fɔ̃ɔ-sàǎ-zàìn-ɖɛ̀ mɔɔ sáa-zàìn-ɖɛ̀ tɔ̀ɔ̀ ɓě ɖò jè gbo cɛ̃.

²³ Kɛɛ ḿ cɛ̃ɛ ma wa gbo, ké ḿ ɖá, “Ɓě nyu ní wuɖu. Nìí, ní mu ɓěɛ̀ Gèɖèpɔ́ɔ̀ jǔùn, ké ɓě mu ní nyɔ ɓě jǔùn. Ɓě dyi ní kpeɖeɔ̀ kíɖíí sí ní, nìí, mana mu ɓě kɔ̃ nììn.”

²⁴ Kɛɛ wa se ní wuɖuɔ̀ dyi kpɔ̃, mɔɔ ké wa seɛ ɖùǔ gbo tò dyɛ mɔ̀ùn. Ké wa nyu ɖɛ ɓě ɓɛ́ waà hwòɖǒ-kɔ̃in-nyìnììn-hwòɖò mɔ̀ kɛ́ɛ́-hwòɖò-dyùàɔ̀ mɔ́ nyuɛ dyiɛ. Wa nì ma kɔ̃ ɖei naǐn kánáá pū.

²⁵ Sɔ̀ìn ɓó ti ɓɛ́ ɓě ɓǎ nììn ɓǎ ɓěɔ̀ ɖǎǒ ɖé Íjè-ɓòɖòɔ̀ kɔ̃ sɔ̀ dyɛ̀ìn ɓó kàǔn wɛ̃ɛ, ḿ ɖúó ní gbo-nì-nyɔ̀ ɓě mɔ̀à kpáá-ɖɛ̀-cɛ̃-nyɔ̀ ɓěɔ̀ kɛɛ ɖoɓoɛń dyíɛ. Ḿ ɖoɓo wa ɓó wé kè wé xwíníín.

²⁶ Kɛɛ wɛ̃́ɛ́ kɛɛ, ɓě se ma ní wuɖuɔ̀ nyu, mɔɔ ké ɓě se ḿ ɖùǔ gbo tò dyɛ mɔ̀ùn. Ɓě kùmùìn ma ɓěɛ̀ dú. Ké ɖɛ ɓě ɓɛ́ ɓě nyu ma kɛɛ nyìnììn kɔ̃in ɖe mìɔ ké ɔ zi nyɔ ɓě nììn ɓǎ ɓě nyuó zɔ̃̌ɔ̀ kɛɛ dyí.’

²⁷ “Jɛ̀ɖèmádyà, nì mu wa wuɖu séín ɓěɛ̀ gbo cɛ̃ìn, kɛɛ wa se m̀ ɖùǔ gbo tòɛ̌ mu. Ké nì mu wa ɖáùn, kɛɛ wa se nì ɖá-wùɖùɔ̀ wɔ̃́ɔ mu.

²⁸ Nì muɛ wa gbo cɛ̃ìn, ɓɛ́ m̀ ké níiń, ‘Nyɔ ɓě nìà kɛ mɔ̀ ɓóɖó-dù ɓɛ́ wa se Bounɓo mɔ̀à waà Gèɖèpɔ́ɔ̀ kɛɛ wuɖu nyu, ké wa se wɔ̃́ ɓɛ́ ɔ ké wa kpeɖe zà kɛ. Jǎà ɖò se wa mú nì ɖe fɔɔ. Jǎàɔ̀ ɖǎ wa wĩín dyi pa.’

Ɖɛ gbà ɓě ɓɛ́ wa nyu ɖé Hĩ́nɔ̀ Bɔɔ-kpàɔ̀ kɔ̃ɛ

²⁹ “Júɖà-nyɔ̀ ɓě, ɓě kpana ɓěɛ̀ míɔ̀ dúi, ɓɛ́ ɓě kéɛ xwáɖáún wáɖá. Ɓě ɓeɖe wìì-wɛ̀ɖɛ̀ ɖé pá púú ɓě nìà ɖé toɖo ɓěɔ̀ dyaa kɔ̃, sepóɛɖé mɔ̄ Bounɓoɔ̀ ɖǎ ɓě mɔ̀ nyɔ ɓě ɓɛ́ ní dyoɖoɔ̀ nìà kɔ̃ɛɛ ɓɔ́, ké ḿ ɖǎ ɓě jè dyi táà.

³⁰ “Ní muɛ náa nyuùn, sepóɛɖé ɓě ɖǎ ḿ nàmàǔn bũ̌ nyu. Ɓě ɖǎ ɓěɛ̀ kũùn-kpò ɓě ɓɛ́ wa nyàìn ḿ dyiɛɛ dyí ɖú, ké ɓě ɖǎ wa ɖé gbǒ ɓɛ́ ɔ mùìn kà ḿ nyɛ́nɛ́ín nyɛɛ mú dyi nyànàìn, ké ɓě ɖǎa nyu ké gbǒɔ̀ se mú hwɛ̀ ɖe.

³¹ Ké ɓě ɖǎ kũùn-kpò ɓièìn-naín mɔ̀ Tófɛ̀ kɛɛ ɖé Hĩ́nɔ̀ Bɔɔ-kpàɔ̀ kɔ̃ nyu, nìí ɓɛ́ ɓě ké ɖé ɓěɛ̀ dyú-gàà kè ɓěɛ̀ dyú-màà ɓě sáa zàìn ɖé nyɛ-ɓɔ́ɔ́ mú. Ḿ se ma ɓě ɖɛ nì náa gbo cɛ̃, ɓɛ́ ɓě kéɛ náa nyu, mɔɔ ké ní hwòɖǒ seɛ náa gbɔ po dyɛ mɔ̀ùn.

³² Ɔ ná nì jèɛɛ, ɓě dèɛ̀ hwìɖǐǐ, ti ɖò nì dyiɛń, ké wa se bɔɔ-kpà kɔ̃̀ kɔ̃ ɓɛ́ kũùn-kpò ɓièìn-naín mɔ̀à Tófɛ̀ kɛɛ nìà kɛɛ Hĩ́nɔ̀ Bɔɔ-kpà ɖáǐn mu ɖe. Kɛɛ wa muáa Nyɔ-Ɖáɓáìn-Naín Bɔɔ-kpà ɖáìn, sepóɛɖé wa mu ɖé xwɛ́ dyóɖóún zàìn, ké xwɛ́-dyóɖóún-zàìn-naín ɖò se ɖé nìɛ̌ mu ɖe. Mɔ̄ Bounɓoɔ̀ mɔ̀ nyɔ cɛ̃à kɛ̀.

³³ Nyɔ ɓěɛ̀ xwɛ́ ɓěɔ̀ mu naà ɓěɔ̀ kè nimii ɓěɔ̀ ɖii-ɖɛ̀ jǔùn, ké nyɔ ɖò se wa kúmúɛ mu.

³⁴ Ké ní muɛ nyuùn ɓɛ́ múà-wùɖù mɔɔ wɛ́ɖɛ́-wùɖù ɖò ké se Júɖà-hwɔ̀ɖɔ̀ ɓěɔ̀ ɖò mú mɔɔ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gboi hwìè ɓěɔ̀ kɔ̃ dyi nì ɖe, ké nyɔ ɖò se ɖé nyɔ́nɔ́-ɓǎ mɔɔ nyɔ́nɔ́ ɖìèɛ̀ wuɖu wɔ̃́ɔ mu ɖe, sepóɛɖé ɓóɖó gànáà mu fóɖóún kpáùn.”