Jɛ̀ɖèmádyà 6 - Ɓǎsɔ́ɔ̀ Báɓòɔ̀

Mú-nyɛ́-nyɔ̀ ɓěɔ̀ gbǎìn Jùɖúsɛ̀ɖɛ̀ìn-hwɔ̀ɖɔ̀ɔ̀ wɔ̃

¹ “Bɛ̃́címà-nyɔ̀ ɓě, ɓě gbǔ, ɓɛ́ ɓě ké Jùɖúsɛ̀ɖɛ̀ìn-hwɔ̀ɖɔ̀ɔ̀ mú sɔ̀, ɓɛ́ ɓě ké vǐè-naín dyi mɔ́. Ɓě ɓaɖa ɖɔ-kpaɔ̀ ɖé Tèkóà-hwɔ̀ɖɔ̀ɔ̀ mú, ɓɛ́ ɓě ké hwìè-da-zàìn-ɖɛ̀ dyií po ɖé Bɛ̀-Hàkáwɛ̀ɖɛ̀ìn-hwɔ̀ɖɔ̀ɔ̀ mú, sepóɛɖé ɖɛ gbà nì ɖé xwía sɔ̀ǔn. Ɔ mɔ̀ mú-gbɔɔ̀-gbɔɔ̀ vɛ̀nɛ̀.

² Zádyɔún-hwɔ̀ɖɔ̀ɔ̀ zi dyíin nɔ̀mɔ̀ǔn dyɛo, kɛɛ ní mu ɔ mú gbɔɔ̀ùn.

³ Ɓóɖó-dù kà kò ɖò ɓěɛ̀ kã́á ɓě mu ɔ to kɔ̃ dyàùn. Wa kè waà sójà ɓěɔ̀ mu dyiìn, ɓɛ́ wa ké waà jàɖàìn-gbò ɓěɔ̀ dyi nyànàìn, ɓɛ́ wa ké hwɔɖɔ gànáɔ̀ wɔ̃ gbǎìn. Wa mu dɛ̀ kã̀ìn séín wa mɔ́ waà jàɖàìn-gbò ɓěɔ̀ dyi nyànàìn dyiɛɛ dyi nyànàìn.

⁴ Wa muɛ cɛ̃ìn, ɓɛ́ wa ké níiń, ‘Ɓě sɔ̀ dyí, ɓɛ́ ɓěà ké ti dyé, ɓɛ́ ɓěà ké ɔ to kɔ̃ po ɓó dyóɖóaún. Kē! Ééɓàa, dyé kà dyóɖóɔ̀ ɖǎ ziɛ! Dyé kà nyɔǔn-dyùɛ̀ zùù ɖǎ tɔ̀mɔ̀ kɛ!

⁵ Ɔ ná nì jèɛɛ, ɓě sɔ̀ dyí, ɓɛ́ ɓěà ké Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃ po ɓó máaún, ɓɛ́ ɓěà ké ɔ to-pèɖèìn-naín ɓěɔ̀ dyi gbaà.’ ”

⁶ Bounɓo mɔ̀ nyɔ nìà ɖɛ séín kɔ̃in nyɛɛ ɖá, “Ɓě ɖaɓa cu, ɓɛ́ ɓě kéɛ Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔɔ̀ dyéɖéín gbǒìn, ɓɛ́ ɓě kéɛ dyi dyáìn. Ḿ ɓéɖé ɓɛ́ ḿ ké hwɔɖɔ nìà kɛ gǎ kɔ̃ tò, sepóɛɖé nyɔ mǔè ɖò dyi-pĩ́à-ɖɛ̀ nyu-nyu saá-saá dyí ɖéɛ mú.

⁷ Kà ɓɛ́ ní pɛ̀ɛ̀ nyuà ní-dyù ɖò dúún sɔ̀ɔ̀ kánáá pūɛɛ, kà dyúáɖòɔ̀ kǎà Jùɖúsɛ̀ɖɛ̀ìn-hwɔ̀ɖɔ̀ɔ̀ nyu ɔ ɖɛ gbàɔ̀ kɔ̃in poɛ̀n kánáá pū. Nyɔ-ɖɛ-gana-xwa-zàìn-zàìn kè mú-gbɔɔ̀-gbɔɔ̀ dyíìn ɖé hwɔɖɔɔ̀ múin. Ɖɛ ḿ dyé ɖéɛɛ mɔ̀ wɛ́ kè bũ̌in-puà-puà saá-saá.

⁸ Jùɖúsɛ̀ɖɛ̀ìn-nyɔ̀ ɓě, ɓě wɔ̃́ ná-wùɖù nìà kɛ múin nɔ̀ɔ̀. Ɔ se ná nìǐn, ní mu ɓě dyi táàùn, ké ní mu ɓěɛ̀ hwɔɖɔɔ̀ hwùɖùǎ mú nyuùn.”

Ɖɛ ɓá Éézùɖùɛ̀-nyɔ̀ mɔ̀ wuɖuún-jaɖa-nyɔ̀ ɓěɛɛ jè dyíɛ

⁹ Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Wa mu Éézùɖùɛ̀-dyù ɓě sè ɓóɛɛ bɛ̃̌ poùn kà géɖéè-kpã́-nyɔ̀ ɖò poà géɖéè bɛ̃̌ kɛ. Ɔ ɓɛɛ̀ géɖéè ɖɔ́ séín ɓěɔ̀ dyai nyɛ̀nɛ̀ɛ̀.”

¹⁰ Ké ḿ cɛ̃ɛ Bounɓoɔ̀ gbo, ké ḿ ɖá, “Nyɛ́ ḿ kéà gbo wùɖù kɛ́? Nyɛ́ ḿ kéà náún po, ɓɛ́ ɔ kéà ní ná-wùɖùɔ̀ dyi kpɔ̃ kɛ́? Dyéɛ, nyɔ ɓěɔ̀ kã waà ɖùǔ ɓěɔ̀ ní, ké wa se ɖùǔ tòɛ̀ mɔ́. Bounɓo, nì wuɖuɔ̀ mɔ̀ dyɔ́-ɖɛ̀ pū ɖé wa gbo. Waà hwòɖǒ seɛ múin dèìn fɔɔ cá.

¹¹ Bounɓo, m̀ nyuɛ ké dyoɖo dyíìn ḿ múin ɓá wa jè dyí, ké ḿ seɛ dyí kpɔ̃ɔ ɓɛ́ìn ɖe.” Hwɛ̀ ké Bounɓoɔ̀ ɖá, “Púè nì dyoɖoɔ̀ dyú mɛ́nɛ́ɛ́ ɓě nìà ɖé hwɔɖɔɔ̀ gboi hwìè ɓěɔ̀ kɔ̃ɛɛ kɔ̃. Púèɛ̀ nyɔ gmɔ̀ ɓěɔ̀ kɔ̃ ɖekè ɖé dɛ̀ wa poìn kà dyíɛ. Púèɛ̀ gàa ɓě kè waà gmàà ɓě kè nyɔ sùà séín kɔ̃ ɖekè.

¹² Nyɔ kà kò ɖò mu waà gbǒ ɓěɔ̀ kè waà geɖe ɓěɔ̀ ɔ kè waà gmàà ɓěɔ̀ dyí ɖúùn, sepóɛɖé ní mu ní sɔ̃ɔ̀ pɛ́ɛ̀ìn, ɓɛ́ ḿ ké nyɔ ɓě cĩ́à nɔ̄ ɓóɖóɛ̀ múɛɛ gǎ kɔ̃ tò. Mɔ̄ Bounɓoɔ̀ mɔ̀ nyɔ cɛ̃à kɛ̀.

¹³ Sɔ̀ìn ɖé waà nyɔ dyùwè ɓěɔ̀ gbo ké waà nyɔ vɛ̀nɛ̀ ɓěɔ̀ dyɛ̀ìn nyɛɛ, wa séín hwòɖǒ nyu pá-pá ɓó kpáná se dyí sɛ́ɖɛ́ìn po jè. Sɔ̀ìn ɖé waà kpáá-ɖɛ̀-cɛ̃-nyɔ̀ ɓěɔ̀ gbo ké waà sáa-zà-nyɔ̀ ɓěɔ̀ dyɛ̀ìn nyɛɛ, wa séín mɔ̀ nyɔ ɓěɔ̀ gbá-gbá-mú-nyu-nyɔ̀ nyɛ̀nɛ̀ɛ̀.

¹⁴ Wa hwǒò ní nyɔ ɓěɔ̀ jě ɓěɔ̀ ɓó kɔ̃in pū, kɛɛ ɖéɛ hwuɖu se ɓɔ́. Wa cɛ̃ɛ, ké wa ɖá, ‘Gìɖìǐ nì ní. Gìɖìǐ nì ní.’ Wa cɛ̃ɛ náa ti ɓɛ́ gìɖìǐ ɖò se nìɛ.

¹⁵ Dɛ̃ nyu ma wa ní ɓó ní dyi-nyàìn-ɖɛ̀ ɓě ɓɛ́ wa nyuà kɛɛ jèe? Gbào, dɛ̃ ɖò se wa nyu fɔɔ cá. Wa se dɛ̃-dyùǎ ɖò ɓéɖé. Ɔ ná nì jèɛɛ, wa mu nyɔ ɓě muà dyi kpáùn wɛ̃ɛ hwìɛ̀ nììn. Ti ní muà wa gǎ kɔ̃ tòùn wɛ̃ɛ, ní mu wa jè dyi zĩ̀ìn. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Éézùɖùɛ̀-nyɔ̀ ɓěɔ̀ nɔ́ɔ̀ wìǐn kpá jè gbo

¹⁶ Ké Bounɓoɔ̀ cɛ̃ɛ ɔ nyɔ ɓěɔ̀ gbo, ké ɔ ɖá, “Ɓě nyànà ɓó hwìè-gmǎà ɓěɔ̀ dyíin, ɓɛ́ ɓě ké dyi gmɔìn, ɓɛ́ ɓě ké hwìè ɓě ɓɛ́ ɓě ɓǎ nììn ɓǎ ɓě kpaó zɔ̃̌ɔ̀ kĩ́ín nyɛɛ jè dyi diè, ɓɛ́ ɓě ké níiń, ‘Dɛ̌ hwìè mu ɖé dyí-sɛ́ɖɛ́ìn-ɖɛ̀ gboɛɛ nì kɛ́?’ Ɔ ɖǎ ná nìǐn, ɓɛ́ ɓě ké hwìèɔ̀ xwíníín kpá, nìí ɓɛ́ gìɖìǐ ké nì ɓó ɓěɛ̀ cĩ́-cĩ́ɔ̀ jè.” Kɛɛ nyɔ ɓěɔ̀ ɖá, “À se hwìèɔ̀ kpaá mu.”

¹⁷ Ké Bounɓoɔ̀ gã ma waà dyí-gmɔ̀-nyɔ̀ ɓě, ké ɔ ɖá, “Ɓě tò ɖɔ-kpaɔ̀ wuɖu ɖùǔ gbo.” Kɛɛ wa ɖá, “À se ɖɔ-kpaɔ̀ wuɖu ɖùǔ gbo tòɛ̌ mu.”

¹⁸ Ké Bounɓoɔ̀ ɖá, “Ɔ ná nì jèɛɛ, ɓě mɔ̀à ɓóɖó-dù kà kò ɖò ɓěɛ̀ nyɔ ɓěɛɛ, ɓě tò ɖùǔ, ɓɛ́ ɓě ké fɔ̀nɔ̀-hwòɖǒ cɛ̃́ ɓá ɖɛ ní muà ní nyɔ ɓěɔ̀ bũ̌ nyuùn wɛ̃ɛ jè dyí.

¹⁹ Toɖo-kɔ̃-nyɔ̀ séín, ɓě tò ɖùǔ. Ḿ nì ní nyɔ ɓěɛ̀ gǎ kɔ̃ tòɛ̌n, ɓɛ́ ɔ ké ɖɛ gbà ɓě ɓɛ́ wa ɖǎà nyuɛɛ pɛ́ɛ̀-ɖɛ̀ jǔ, sepóɛɖé wa se ní wuɖu ɓěɔ̀ nyu, ké wa se ní gma ɓěɔ̀ dyi kpɔ̃.

²⁰ Xwíníínɔ̀ nyɛ́ kɔ̃̀ jè wa dyàà ḿ nyɔ́ún-nɔ̀mɔ̀-ɖɛ̀ ɓě sɔ̀à ɖé Síɓà-ɓòɖòɔ̀ kɔ̃ɛɛ kɛ́? Ɖɛ́ kɔ̃̀ jè wa dyàà ḿ nyɔ́ún-nɔ̀mɔ̀-ɖɛ̀ mɔ̀à kĩ́ìn sɔ̀ ɖé ɓóɖó vɛ̃in kɔ̃ɛɛ kɛ́? Ḿ se waà fɔ̃ɔ-sàǎ-zàìn-ɖɛ̀ ɓěɔ̀ dyi kpɔ̃, mɔɔ ké waà sáa-zàìn-ɖɛ̀ tɔ̀ɔ̀ ɓěɔ̀ se ní hwòɖǒ dyi dè.

²¹ Ɔ jèɛɛ, ní mu dyí-gbǒ-ɖɛ̀ ɓó nyɔ ɓěɛ̀ dyúa poùn, ɓɛ́ wa kéɛ dyí gbǒ. Ɓǎ kè ɔ dyú muɛ kɔ̃in ɓùɖùìn, ké ɓǎto ɓě kè nyɔ ɓě kɔ̃̀ taà deìn bũ̌ɛɛ muɛ kɔ̃in ɓùɖùìn, ɓɛ́ wa ké mú gbɔɔ̀. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Mú-nyɛ́-nyɔ̀ sɔ̀ìn ɖé xwía ké wa gbǎìn ɓóɖóɔ̀ wɔ̃

²² Bounɓoɔ̀ cɛ̃ɛ ɖe, ké ɔ ɖá, “Gmɔ̀ nɔ̄, nyɔǔn ɓě mu ɖé ɓóɖó ɖò nì ɖé ɓóɖóɛ̀ xwía kɛɛ kɔ̃ sɔ̀ùn. Wa mu ɖéé ɖé ɓóɖó vɛ̃in ɖò kɔ̃ sɔ̀ùn. Ɓóɖó kɔ̃̀ kɔ̃ wa muà sɔ̀ùn wɛ̃ɛ mɔ̀ ɓóɖó vɛ̀nɛ̀. Wa ɖǎ naɓaà ɓó to jè.

²³ Wa ɓéɖé pɔnɔ kè ɖí. Wa mɔ̀ hwòɖǒ-kɔ̃in-nyìnììn-nyɔ̀ ɓě. Wa ní dyé nyɔ ɖò wìǐn. Waà ɓo-jĩ̌ ɓěɔ̀ hwɔìn dyóó-kuɖu-wùɖù. Wa nì sǒ ɓě kɔ̃ún. Wa ɖǎ ti dyé, ɓɛ́ wa ké mɔ̀ mɔ̀à Zádyɔún-hwɔ̀ɖɔ̀ɔ̀ kɛɛ to kɔ̃ po.”

²⁴ Ké Zádyɔún-hwɔ̀ɖɔ̀ɔ̀ nyɔ ɓěɔ̀ ɖá, “À ɖǎ waà bɔ̃̌ wɔ̃́, ké hwòɖǒ ɓaɖa à xwíníín dyi. À hwòɖǒ-dyùà ɓěɔ̀ nì puàǔn pū kà màa ɖòɛ̀ póó-xwìɖì kéɔ́ kà ɔ puà kɛ.

²⁵ Nyɔ ɖò ní ɖá ɔ ké ɔ geɖe-hwìèɔ̀ xwíníín kpá, mɔɔ ɔ ké hwìè ɓěɔ̀ ɖò kɔ̃ nà, sepóɛɖé à mú-nyɛ́-nyɔ̀ ɓěɔ̀ gàsíà ɓěɔ̀ nyuɛ ké fã̀à nì dà séín.”

²⁶ Ké Bounɓoɔ̀ cɛ̃ɛ ɔ nyɔ ɓěɔ̀ gbo ɖe, ké ɔ ɖá, “Ɓě po ɖɔ-zɔ̃̀ mú, ɓɛ́ ɓě ké tĩ́ɔ-pɛ̀ɛ̀ kpá, ɓɛ́ ɓě ké vĩ̌ ɖé hwòɖǒ nɛɛ̀-nɛɛ̀ mú. Ɓě vĩ̌ kà nyɔ kéɔ́ kà nyɔ dyú-kpò dyúáɖò kpeé-kpeé ɓɛ́ ɔ mɛ́ kɛɛ jè vĩ̌ɛ. Sepóɛɖé ɖɛ-mú-gbɔɔ̀-nyɔ̀ ɓěɔ̀ nì ɓě kɔ̃ dyáuń dyiɛń kàà-ɖɛ̀ǐn.”

²⁷ Ké Bounɓoɔ̀ cɛ̃ɛ ḿ gbo, ké ɔ ɖá, “Jɛ̀ɖèmádyà, ḿ ɖǎ m̀ ní nyɔ ɓěɔ̀ mú-dɔ̃̌ìn-ɖɛ̀ mú nyu kà nyìnììn-nɛ̀ɛ̀ kè nɔ̀mɔ̀ɔ̀-nɛ̀ɛ̀ mú-dɔ̃̌ìn-ɖɛ̀ nìà kɛ. Ní mɔ́ ɓɛ́ m̀ ké kà waà kpeɖe nyu nìɛ̀ kɛɛ dyé.

²⁸ Wa séín mɔ̀ ní gbo-vɔ̃-nyɔ̀ ɓě, ké wa cɛ̃ ḿ ɖɛ gbà kɔ̃ún. Waà hwòɖǒ-dyùà kùmù kà bàɖàsǐ kè nɛɛ̀-kpà nìà kɛ. Wa séín nyìnììn hwòɖǒ kɔ̃in.

²⁹ Ní nyɔ ɓěɔ̀ hwɔìn séɓàɖà ɓɛ́ zɛ̀nɛ̌ nì gbo kɛ. Nyɛ-ɓɔ́ɔ̀ ku wɔ̃ pídyi, sepóɛɖé zɛ̀nɛ̌ɔ̀ ní sɔ̀ séɓàɖàɔ̀ mú. Ɔ se kpáná ɖò mú nì, ɓɛ́ ḿ ké ní nyɔ ɓě nì kà séɓàɖà nìà kɛɛ ɖèìn ɓó zɛ̀nɛ̌ mú zà jè pídyi. Nyɔ ɓě mɔ̀à ɖɛ-gbà-nyu-nyɔ̀ ɓěɛɛ nì ɖé wa hwìɛ̀ kánáá pū, ké wa ní zà ɖé wa dyi.

³⁰ Wa hwɔìn séɓàɖà ɓɛ́ nyɔ ɖò se mɔ́ ɖeɛ, sepóɛɖé mɔ̄ Bounɓoɔ̀ ɖǎ wa ɓɔ́.”