Jɛ̀ɖèmádyà 5 - Ɓǎsɔ́ɔ̀ Báɓòɔ̀

Nàmàǔn ɓɛ́ Jùɖúsɛ̀ɖɛ̀ìn-nyɔ̀ ɓěɔ̀ nyuɛ

¹ Bounɓoɔ̀ cɛ̃ɛ ɖe, ké ɔ ɖá, “Ɓě mɔ̀à Jùɖúsɛ̀ɖɛ̀ìn-nyɔ̀ ɓěɛɛ, ɓě dyáìn hwɔɖɔɔ̀ gboi hwìè ɓěɔ̀ dyi, ɓɛ́ ɓě kéɛ dyi dèɖěìn, ɓɛ́ ɓě ké hwɔɖɔɔ̀ gboi dà séín kèɛ̀ ɖɛ-pèɖèìn-naín ɓěɔ̀ dà séín dyi gmɔìn. Ɔ jǔ ké ɓě dyi nyɔ dyúáɖò kpeé-kpeé dyɛ mɔ̀ùn ɓɛ́ ɔ mɔ̀ jǎà-nyɔ̀ ké ɔ ɖɛ̀ɓɛ̀ dyí-sɛ́ɖɛ́ìn-ɖɛ̀ nyu-nyu múɛɛ dyéɛ ɓɛ́ìn ní, ní mu hwɔɖɔ gànáà kɔ̃in zĩ̀ìn.

² Kɛbì ɓě mɛ gboò ḿ dyíɛɛ, ɖɛ ɓě cɛ̃à kɛ se jǎà.”

³ Ké ḿ ɖá, “Óó Bounɓo, m̀ nì jǎà-nyɔ̀ dyi mɔ́uń. M̀ tò nì nyɔ ɓěɔ̀ gǎ kɔ̃, kɛɛ gǎɔ̀ se wa dà ɖò tó. Gǎɔ̀ sè ɖɛ tííwè ɓɛ́ ɔ ké wa dyi wàìn gàná cá, kɛɛ wa nɔ́ɔ̀ nì nyɔ-kpeɖe-zà-zàɔ̀ gbo. Wa kùmùìn waà hwòɖǒ-dyùàɔ̀, ké wa se waà nàmàǔn ɓěɔ̀ dyi táà mɔ́.”

⁴ Hwɛ̀ ké ḿ cɛ̃ɛ ɖé ḿ hwòɖǒ bũ̌, ké ḿ ɖá, “Nyɔ ɓě nìà kɛ mɔ̀ gǎ-dyé-nyɔ̀ ɓě pū. Wa nyu zuɖuu-ɖɛ̀ ɓě xwai. Wa se kà Bounɓo mɔ̀à waà Gèɖèpɔ́ɔ̀ kɛɛ mɔ́ wa ké cĩ́ɛ nyuɛ, mɔɔ ɖɛ ɔ mɔ́ wa ké nyuɛɛ dyí dyuò.

⁵ Ní mu ɖé nyɔ vɛ̀nɛ̀ ɓěɔ̀ gbo muùn, ɓɛ́ ḿ ké wa gbo wùɖù. Jǎà jɛ́ɛ́, wa dyuò kà Bounɓoɔ̀ mɔ́ wa ké cĩ́ɛ nyuɛɛ dyí. Wa dyuò ɖɛ waà Gèɖèpɔ́ɔ̀ mɔ́ wa ké nyuɛɛ dyí.” Kɛɛ wa séín nɔ́ɔ̀ ɓɛ́ Bounɓoɔ̀ ké wa wuɖuí kɔ̃̀. Wa se mɔ́ ɓɛ́ wa ké ɔ wuɖu nyu.

⁶ Ɔ ná nì jèɛɛ, ganìǎ mu ɖé xwáɖá xwíɖíi sɔ̀ùn, ɓɛ́ ɔ ké wa kpɔ̃. Hwɔ-ji mu ɖé gbǎùn-fúɖúáɔ̀ mú sɔ̀ùn, ɓɛ́ ɔ ké wa mú gbɔɔ̀. Ji mu wa hwìè fòùn ɖé waà hwɔɖɔ ɓěɔ̀ gbɔ, ké nyɔ séín mu píé síìn nyɛɛ, ɔ mu wa dyi fáìn, sepóɛɖé Bounɓoɔ̀ wuɖuún-jaɖa-jaɖa ɓɛ́ wa ɖǎ nyuɛɛ ɓúá kpéín mìɔ. Wa ɖǎ ɔ kɔ̃ín pòɛ̌n hwèɖèìn mìɔ.

⁷ Ké Bounɓoɔ̀ ɖá, “Kà ɔ nìà náa, nìí, xwɛ̌ ḿ ɓɛ́ìn ɓě kɔ̃in zĩ̀ɛ̀n nyɛ́? Dyéɛ, ɓěɛ̀ dyú ɓěɔ̀ mɔ̀ùn ɖǎ ḿ dyi táà ɖekè, ké wa ɖǎ gèɖèpɔ́ɔ̀ kà kò ɖò ɓě dyí gboò. Ti ɓɛ́ ḿ nyí ma ɓě ɖii-ɖɛ̀ ké ɓě ɖiɛ, ké ɓě ɖoɓo ma kɛɛ, púɛɛ, ɓě ɖú ma gbàɖàùn po kpàǐ. Ɓě kpá dɔ̃̀ǐn mú ɓó gbàɖàùn-màà ɓěɔ̀ gbǒ ɓěɔ̀ wĩín.

⁸ Ɓě nì kà sǒ ɓíɔ́ wóɖó mú nɔ̀mɔ̀ dyíin ɓɛ́ sǒ nyɔ́nɔ́ ɖòɛ̀ tó nì nyuɛń mìɔ kɛɛ nìà kɛ. Ɓěɛ̀ hwòɖǒ nì pá-pá nyuɛń ɓó ɓě mǔè ɖòɛ̀ gmàà jè.

⁹ Kà ɔ nìà náa, nìí, ḿ mɛ ɓɔ́ ɓě gǎ kɔ̃ tòɛ̀ ɓó ɖɛ ɓěɛ̀ jèe? Ḿ mɛ ɓɔ́ ɓóɖó kɔ̃̀ kpeɖe nìà kà kɛɛ kpa kɔ̃in zàìne? Mɔ̄ Bounɓoɔ̀ mɔ̀ nyɔ cɛ̃à kɛ̀.

¹⁰ “Ní nyɔ ɓěɔ̀ hwɔìn géɖéè-gbǎ. Ɓě mɔ̀à waà mú-nyɛ́-nyɔ̀ ɓěɛɛ, ɓě mɛ mu, ɓɛ́ ɓě ké wa ɖɔ́ dyai cɛ̃. Kɛɛ ɓě mɛ ɓɔ́ɔ séín dyíin nyìnìɛ̀n hwɔɔ gàná cá. Ɓě mɛ zà wa ɖɔ́ séín ɓěɔ̀ dyai, sepóɛɖé mɔ̄ Bounɓoɔ̀ se waà ɖɔ́ ɓěɔ̀ kɔ̃̀.

¹¹ Ɔ mɛ nì ná, sepóɛɖé Éézùɖùɛ̀-dyù ɓěɔ̀ kè Júɖà-nyɔ̀ ɓěɔ̀ séín ɖǎ ḿ kɔ̃ín pòìn gàná cá. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Bounɓoɔ̀ ɓɔ́ Éézùɖùɛ̀-nyɔ̀ ɓěɔ̀ ní

¹² Bounɓoɔ̀ nyɔ ɓěɔ̀ ɖǎ ɔ jè se tɔ́mɔ́. Wa cɛ̃ɛ, ké wa ɖá, “Bounɓoɔ̀ se à kà ɖò nyuɛ́ mu. Ɖɛ gbà ɖò se à gbo kpáa mu. To mɔɔ mɔ́ ɖò se à kɔ̃ kpáa mu.

¹³ Kpáá-ɖɛ̀-cɛ̃-nyɔ̀ ɓěɔ̀ cɛ̃ wuɖu fóɖóún kà pìɔ̌ dyià kɛ. Ké ɖɛ ɓě ɓɛ́ wa cɛ̃à kɛɛ mu wa mìɔùn gbo kpáùn.”

¹⁴ Ɔ jèɛɛ, Bounɓo Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛɛ cɛ̃ɛ ḿ gbo, ké ɔ ɖá, “Kà nyɔ ɓěɔ̀ nyuà wùɖùɛ̀ kɛ jèɛɛ, ní mu ní wuɖu ɓěɔ̀ nyɛ mú nyuùn ɖé m̀ wĩín, ké nyɔ ɓěɔ̀ mu nyɛ dyɛ-dyɛ jǔùn, ɓɛ́ nyɛɔ̀ ké wa ɓó dyi fɔ̃.”

¹⁵ Bounɓoɔ̀ cɛ̃ɛ ɖe, ké ɔ ɖá, “Éézùɖùɛ̀-dyù ɓě, ní mu ɓóɖó-dù ɖò ɓɛ́ ɔ sɔ̀ ɖé nya vɛ̃in nyɛɛ dyàùn, ɓɛ́ ɔ ké ɓě to kɔ̃ po. Ɔ mɔ̀ ɓóɖó sùà ɖò ɓɛ́ ɔ ku dúiɛ. Ɔ mɔ̀ ɓóɖó kɔ̃̀ wuɖu ɓɛ́ ɓě se dyuòɛ.

¹⁶ Waà to-vɔ̃̀ìn-ɖɛ̀ ɓěɔ̀ nì cɛ̃́ín mìɔ, ké wa séín mɔ̀ gàa-zà-nyɔ̀ nyɛ̀nɛ̀ɛ̀.

¹⁷ Wa mu ɓěɛ̀ ɓáá-ɖɛ̀-ɓò ɓě sɔ̀ ɖé ɓěɛ̀ geɖe ɓěɔ̀ gboɛ kè ɓěɛ̀ ɖii-ɖɛ̀ tɔ̀ɔ̀ ɓěɔ̀ ɖiìn. Wa mu ɓěɛ̀ dyú-gàà kè ɓěɛ̀ dyú-màà ɓěɔ̀ ɖáɓáùn. Wa mu ɓěɛ̀ nyúà-ɖɛ̀ ɓěɔ̀ tàùn. Wa mu ɓěɛ̀ géɖéè-gbǎ ɓěɔ̀ kè ɓěɛ̀ féè-cù ɓěɔ̀ ɓo ɖiìn. Ké wa mu ɓěɛ̀ toún-pèɖèìn-hwɔ̀ɖɔ̀ ɓě ɓɛ́ ɓě taɓaà hwìɖǐǐɛɛ wáɖáùn.”

¹⁸ Ké Bounɓoɔ̀ cɛ̃ɛ ḿ gbo, ké ɔ ɖá, “Ɓó tia ɓaɖaa, ḿ se nì nyɔ ɓěɔ̀ jè dyi zĩ̀ɛ̌n mu gàná cá.

¹⁹ Ti ɓɛ́ wa muɛ cɛ̃ìn, ɓɛ́ wa ké níiń, ‘Ɖɛ́ kɔ̃̀ jè Bounɓo mɔ̀à à Gèɖèpɔ́ɔ̀ kɛɛ nyuà kà à ɖɛ jĩ̀ kà ɓěɛ̀ bũ̌ cá kɛ́?’ kɛɛ ní, nìí, m̀ mɛ cɛ̃ɛ wa gbo, ɓɛ́ m̀ ké níiń, ‘Kà ɓɛ́ ɓě nyuà Bounɓoɔ̀ dyi táà, ɓɛ́ ɓě dyià ɓóɖó-dù kà kò ɖò nììn gèɖèpɔ́ɔ̀ ɓě ɓièɛɛ, kǎà ɓě mu ɓóɖó-dù kà kò ɖòɛ̀ nyɔ ɓěɛ̀ gǐì jǔùn ɖé ɓóɖó ɓɛ́ ɔ se ɓě ɓíɖí-ɓòɖòɛɛ kɔ̃.’ ”

Gèɖèpɔ́ɔ̀ po ɔ nyɔ ɓěɔ̀ náún

²⁰ Bounɓoɔ̀ cɛ̃ɛ ḿ gbo ɖe, ké ɔ ɖá, “Cɛ̃ɛ Éézùɖùɛ̀-dyù ɓěɔ̀ kè Júɖà-nyɔ̀ ɓěɔ̀ gbo, ɓɛ́ m̀ ké níiń, ‘Bounɓoɔ̀ ɖá,

²¹ “Ɓě tò ɖùǔo, Éézùɖùɛ̀-dyù zuɖu-zuɖu ɓě. Ɓě mɔ̀ nyɔ se hwòɖǒ kɔ̃in cɛ̃̀ ɓě. Ɓě nì dyéɖé dú, kɛɛ ɓě ní dyé dyi. Ɓě nì ɖùǔ dú, kɛɛ ɓě ní wɔ̃́ dyi.

²² Má, ɓě ɓéɖé ɓě kéɔ́ má ḿ dyi fɛ̃̀ìne? Má, ɓě ɓéɖé ɓě kéɔ́ má kɔ̃in tɛɖɛ ɓó ḿ dyúae? Mɔ̄ mɔ̀ nyɔ gbǒìn kà pĩ́ɔ dyí, ké ɔ mɔ̀à dyóóɔ̀ sèìn-naín, ké ɔ ní zià ɓó ɖeɛ̀. Ɔ mɔ̀ bã̀à kánáá pū, ké ɔ ní péɖéɛ. Kɛbì dyóó-kpɛ̀ ɓěɔ̀ mɛ ku wɔ̃ɛɛ, wa seɛ toún ɖuɛ ɓɛ́ìn. Kɛbì wa mɛ kuɖu mìɔɛɛ, wa seɛ kɔ̃in ziɛ ɓɛ́ìn.

²³ Kɛɛ dyéɛ, ɓě ɓéɖé dú kùmù-kùmù. Ɓě ɓéɖé kɛ́ɛ́-hwòɖò-dyùà. Ɓě ɖǎ hwìè sɛ́ɖɛ́ìn dyíɔ̀ dyí sɔ̀, ké ɓě ɖǎ mu.

²⁴ Ɓě ní cɛ̃ɛ, ké ɓě ní nyu níiń, ‘Ɓěà fɛ̃̀ìn Bounɓo mɔ̀à ɓěà Gèɖèpɔ́ɔ̀ kɛɛ dyi, nyɔ mɔ̀ nyɔ nyuɛ ɓɛ́ ní dyià ɖaɓa ɓó ti ɓɛ̀ɖɛ̀ìn dyíɔ̀ múɛ. Ɔ mɔ̀ nyɔ tò sɔ̃̀ɔ̀-tì ɔ kè zùzù-tìɔ̀ nììn ní ɓɛ́ ɔ ɖaɓa kɛ. Ké ɔ nyuɛ ké à geɖe ɓěɔ̀ kɔ́ ɓó ti ɓɛ̀ɖɛ̀ìn dyíɔ̀ múɛ.’

²⁵ Ɓěɛ̀ ɖɛ gbà ɓěɔ̀ ɖǎ ɖɛ ɓěɛ̀ hwìǐ zàìn ɓó ɓě bìì. Ɓěɛ̀ nàmàǔn ɓěɔ̀ ɖǎ ɖɛín-ɖɛ̀ ɓěɔ̀ ɓó ɓě dyúa zà.” ’

²⁶ “Hwòɖǒ-kɔ̃in-nyìnììn-nyɔ̀ ɓě nì ní nyɔ ɓěɔ̀ hwìɛ̀. Wa kò pìǐn kà nyɔ kéɔ́ kà naà-xwàɖà gbǎ kɛ. Wa gbǎ xwáɖá ɓó nyɔǔn-dyù kpɔ̃ jè.

²⁷ Kà naà dyíà túúɛɛ, kǎà wa ɖǎ ɖɛ ɓě ɓɛ́ wa zàìn nyɔǔn ɓě gana xwaa waà gbǒ ɓěɔ̀ dyíìn, ké ɔ nyuɛ ké wa mɔ̀ǎ bã-nyɔ̀ kè kpé-ɓéɖé-nyɔ̀.

²⁸ Ɔ jèɛɛ, wa ɖǎ ɓúá, ké wa ɖǎ búún-bùùn nì. Waà hwòɖǒ-kɔ̃in-nyìnììn-ɖɛ̀ nyu-nyuɔ̀ se sèìn-naín ɖò kɔ̃̀. Wa ní po ɖɛ wɔ̃ dyí-sɛ́ɖɛ́ìn-kà. Wa ní nyí xwíè-dyù ɓěɔ̀ gɔ̃̌, ké wa ní nyí gǎ-dyé-nyɔ̀ ɓě kɔ̃̀ ɓíɖí ɓɛ̀ɖɛ̀ìn dyíɛɛ gɔ̃̌.

²⁹ “Kà ɔ nìà náa, nìí, ḿ mɛ ɓɔ́ wa gǎ kɔ̃ tòɛ̀ ɓó ɖɛ ɓěɛ̀ jèe? Ḿ mɛ ɓɔ́ ɓóɖó kɔ̃̀ kpeɖe nìà kà kɛɛ kpa kɔ̃in zàìne? Mɔ̄ Bounɓoɔ̀ mɔ̀ nyɔ cɛ̃à kɛ̀.”

³⁰ Nyɔ-díɖí-tàɓàìn-ɖɛ̀ mɔ̀ ɖɛ nyìnììn dyíin nyɛɛ ɖǎ ɓóɖóɔ̀ kɔ̃ kpá.

³¹ Kpáá-ɖɛ̀-cɛ̃-nyɔ̀ ɓěɔ̀ cɛ̃ ɖɛ ɓě se jǎà kɛ, ké sáa-zà-nyɔ̀ ɓěɔ̀ kɔ̃̀ ní nyɔ ɓěɔ̀ wuɖuí kà waà hwòɖǒ mɔ́ɔ nyuɛ dyiɛ. Ké ní nyɔ ɓěɔ̀ mɔ́ ɔ ké ná nì. Kɛɛ ti ɖɛ séín mu mánáín hwɛ̀ìn nyɛɛ, nìí, xwɛ̌ wa muɛ nyuùn wɛ̃́?