Jɛ̀ɖèmádyà 4 - Ɓǎsɔ́ɔ̀ Báɓòɔ̀

Gèɖèpɔ́ɔ̀ ɖá Éézùɖùɛ̀-nyɔ̀ ɓěɔ̀ ɓɛ́ wa ké waà ɖɛ gbà ɓěɔ̀ dyi táà

¹ Ké Bounɓoɔ̀ cɛ̃ɛ ma, ké ɔ ɖá, “Éézùɖùɛ̀-dyù ɓě, ɓě dyi xwa cɛ́ɛ̀ mɔ́ ní, nìí, ɓě gmɔ̀ìn nɔ̄ ḿ gbo. Ɔ jǔ ké ɓě dyi kũùn-kpò ɓě ɓɛ́ wa nyàìn ḿ dyiɛɛ ɓó ḿ dyúa zà, ké ɓě dyi ɓó ḿ ɖòǔn jè gbo dyi kpɔ̃ kóɖó-kóɖó,

² ké ɓě dyi dyí-sɛ́ɖɛ́ìn-ɖɛ̀ nyu, ké ɓě dyi ḿ dyí gboò ní, nìí, ɓóɖó-dù ɓě mu jĩ́á-jè dyéìn dyììn ɖé ɓě mú, ké wa mu ḿ ɓàìn.”

³ Bounɓoɔ̀ cɛ̃ɛ ma nyɔ ɓě cĩ́à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖòɔ̀ wáká tɔ̀ɔ̀ kɔ̃ɛɛ gbo, ké ɔ ɖá, “Ɓě dyéìn ɓěɛ̀ hwòɖǒ-dyùà kùmù-kùmù ɓěɔ̀ ti kà nyɔ naɓaà ɓáá-ɖɛ̀-pà kɛ. Ɓěǐn ɖá ɓɛ́ ɓě ké ɓěɛ̀ ɓáá-ɖɛ̀ ɓěɔ̀ wí-gbǎ ɓěɔ̀ mú ɓá.

⁴ Ɓě mɔ̀ nyɔ ɓě cĩ́à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖòɔ̀ wáká tɔ̀ɔ̀ kɔ̃ɛɛ, ɓě kpɔ̃ dèè-wùɖù nìà ɓó ɓě kè mɔ̄ mɔ̀à Bounɓoɔ̀ kɛɛ pṹa kɛɛ dyi kóɖó-kóɖó. Ɓěɛ̀ hwòɖǒ-dyùà kùmù-kùmù ɓěɔ̀ mɛ ɓɛɖɛɛ̀ dyí ɓá ḿ jè dyí. Ɓě seɛ náa nyuín, ní dyoɖo-hwòɖòɔ̀ mu dyí kpɔ̃ùn ɓó ɓě kɔ̃ kà nyɛ kpɔ̃à dyíɛɛ, ɓó ɖɛ gbà ɓě ɓɛ́ ɓě ɖǎ nyuɛɛ jè, ké nyɔ kéɛ ɓɔ́í poɛ ɓɛ́ìn nyɛɛ ɖò se nìɛ̌ mu.”

Mú-nyɛ́-nyɔ̀ ɓě mu ɖé xwía sɔ̀ùn ɓɛ́ wa ké Júɖà-ɓòɖòɔ̀ dyí ɖú

⁵ Ɓě ɓaɖa ɖɔ-kpaɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖòɔ̀ dà séín. Ɓě páná mú, ɓɛ́ nyɔ séín kéɛ múin wɔ̃́. Ɓě cɛ̃ɛ nyɔ ɓěɔ̀ gbo, ɓɛ́ ɓě ké ɖé toún-pèɖèìn-hwɔ̀ɖɔ̀ ɓěɔ̀ mú mu wàɖà.

⁶ Ɓě po nyɔ-hwìè-da-zàìn-ɖɛ̀ dyií, ɓɛ́ ɔ ké hwìè mu ɖé Zádyɔún-hwɔ̀ɖɔ̀ɔ̀ múɛɛ da zà. Ɓě gbǔ wàɖà. Ɓě ɓɔ́ ti zĩ̀ɛ̀n. Bounɓoɔ̀ nì ɖɛ gbà dyàǔn. Ɔ mɔ̀ mú-gbɔɔ̀-gbɔɔ̀ vɛ̀nɛ̀ sɔ̀ìn ɖé xwía kɛ.

⁷ Ɓóɖó-dù ɓě mú-gbɔɔ̀-nyɔ̀ ɓěɔ̀ nì hwìè kɔ̃, ké wa nì dyiɛń. Wa nì kà ganìǎ sɔ̀ ɔ vǐè-naín nyɛɛ nìà kɛ. Wa nì dyiɛń, ɓɛ́ wa ké ɓěɛ̀ ɓóɖóɛ̀ mú gbɔɔ̀. Ɓěɛ̀ hwɔɖɔ ɓěɔ̀ mu wáɖáùn, ɓɛ́ wa ké hwùɖùǎ jǔ nyɛ̀nɛ̀ɛ̀.

⁸ Ɔ jèɛɛ, ɓě po ɖɔ-zɔ̃̀ mú, ɓɛ́ ɓě ké vĩ̌ ɖé wuɖu zoo mú, sepóɛɖé Bounɓoɔ̀ dyoɖo-hwòɖò ku wɔ̃ɔ̀ séè à kɔ̃ sɔ̀ ke.

⁹ Ké Bounɓoɔ̀ ɖá, “Ɓó wéa ɓaɖaa, kã́áɔ̀ kè gɔ̌mànà-nyɔ̀ vɛ̀nɛ̀ ɓěɔ̀ mu fã̀à peɖeìn. Ké sáa-zà-nyɔ̀ ɓěɔ̀ kè kpáá-ɖɛ̀-cɛ̃-nyɔ̀ ɓěɔ̀ mu dyi giniìn mìɔ.”

¹⁰ Hwɛ̀ ké ḿ ɖá, “Aké, Bounɓo Ɖɛɓíɔ́, ɖɛ́ kɔ̃̀ jè m̀ cáà kà Jùɖúsɛ̀ɖɛ̀ìn-nyɔ̀ ɓěɛ̀ cá kɛ́? M̀ cɛ̃ɛ kà gìɖìǐ mu nììn nyɛ, kɛɛ dyéɛ kà wa ɖǎ nyɔ ɓěɛ̀ ɖǎ bùnù dèɛ.”

¹¹ Ɓó wéa ɓaɖaa, Bounɓoɔ̀ muɛ Jùɖúsɛ̀ɖɛ̀ìn-nyɔ̀ ɓěɔ̀ gbo cɛ̃ìn, ɓɛ́ ɔ ké níiń, “Pìɔ̌ sùmùù ɖò nì ɖé toɖo ɓě nì ɖé gbǎùn-fúɖúáɔ̀ kɔ̃ɛɛ dya sɔ̀ǔn, ɓɛ́ ɔ ké ɓě ɓaɖa. Ɔ se pìɔ̌ dyià dyi ní, ɓɛ́ ɔ dyià mɔɔ́ mú vũ, nìí ɓɛ́ ɔ dyià feɖeɔ̀ ɖòùn kpa kɛ.

¹² Pìɔ̌ ɓɛ́ ḿ mìɔùn tò kɛɛ mu wɔ̃ kuùn mìɔ. Ḿ mìɔùn mɔ̀ nyɔ nì ɓě gǎ kɔ̃ tòɛ̌n ɓó kàǔn.”

Mú-nyɛ́-nyɔ̀ ɓěɔ̀ gbǎìn Júɖà-ɓòɖòɔ̀ wɔ̃

¹³ Ɓě gmɔ̀ ɖéa kà à mú-nyɛ́-nyɔ̀ ɓěɔ̀ nìě dyiɛń nyɛ. Wa nì dyiɛń kà wɛ́ɖɛ́-wɛ́ɖɛ́ poà kɛ. Waà hwíì-sǒ ɓěɔ̀ nì dyiɛń kà wɔ́ɔ́-pìɔ̌ dyià kɛ, ké waà sǒ ɓěɔ̀ ɓo fɛ̃́ìn xwa ké wa zi ke dyí. Gboò-wùɖù nì à kɔ̃! À ɖǎ mú gbɔɔ̀ wà!

¹⁴ Jùɖúsɛ̀ɖɛ̀ìn-nyɔ̀ ɓě, ɓě zà ɖɛ gbà ɓěɔ̀ ɖé ɓě hwòɖǒ bũ̌ dyi, ɓɛ́ ɓě ké pó. Ti jĩ̀ xwɛ̌ ɓě mu ɖɛ gbà hwìɖǐi poìn keɛ́?

¹⁵ Kíá ɓě ɓɛ́ wa sɔ̀ìn ɖé Dɛ̃́ìn-ɓòɖòɔ̀ kɔ̃ ɔ kè ɖé Ífèɖèìn Toɖo-ɓòɖò kɔ̃ɛɛ nì bɔ̃̌ gbàɔ̀ zio mú pòɛ̌n.

¹⁶ Ké Bounɓoɔ̀ ɖá, “Ɓě cɛ̃ɛ ɓóɖó-dù ɓěɔ̀ kè nyɔ ɓě nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbo kà Júɖà-nyɔ̀ ɓěɔ̀ mú-nyɛ́-nyɔ̀ ɓěɔ̀ nì ɖé ɓóɖó vɛ̃in ɖò kɔ̃ sɔ̀ǔn, ké wa nì dyiɛń, ɓɛ́ wa ké Júɖà-hwɔ̀ɖɔ̀ ɓěɔ̀ ɖò-ɖò séín wɔ̃ gbǎìn, ɓɛ́ wa ké wa to kɔ̃ dyà jè zio mú pòɛ̌n nìɛ.

¹⁷ Wa mu Jùɖúsɛ̀ɖɛ̀ìn-hwɔ̀ɖɔ̀ɔ̀ wɔ̃ gbǎìn kà sójà ɓě kéɔ́ kà pá ɖò dyí gmɔ̀ǔn nìɛ, sepóɛɖé Júɖà-nyɔ̀ ɓěɔ̀ ɖǎ ḿ kɛ́ɛ́ mú nyu. Mɔ̄ Bounɓoɔ̀ mɔ̀ nyɔ cɛ̃à kɛ̀.

¹⁸ “Júɖà-nyɔ̀ ɓě, ɓě mìɔùn nììn kpeɖe kè ɓěɛ̀ xwai-nyu-ɖɛ̀ mɔ̀ ɖɛ ɖǎ ɓě ɖɛ gbà nìà kɛ kɔ̃ dyà. Ɔ mɔ̀ ɓěɛ̀ dyí-dyé-ɖɛ̀. Ɔ nɛɛ̀ ní, ké ɔ ɖǎ ɖéé ɖé ɓěɛ̀ hwòɖǒ-dyùàɔ̀ dyéɖéí nyini.”

Jɛ̀ɖèmádyà kpá wìǐn ɓó ɔ nyɔ ɓěɔ̀ jè

¹⁹ Ní hwòɖǒ-dyùàɔ̀ puà ní. Ɔ síà ní, ké ɔ nì ɖɛ ɖuɛń mìɔ, ké ḿ se gìɖìǐ nìɛ̀ ɓɛ́ìn, sepóɛɖé ní wɔ̃́ ɖɔ-kpaɔ̀ wuɖu ɔ kè to-gbo-mu-nyɔ̀ ɓěɔ̀ mú-páná-wùɖù.

²⁰ Mú-gbɔɔ̀-gbɔɔ̀ deìn kɔ̃in. À ɓóɖó gànáà ɖǎ wáɖá. À jàɖàìn-gbò ɓěɔ̀ ɖǎ wáɖá, ké waà ɖɔ ɓěɔ̀ ɖǎ dyi fáìn hwɛ̀ wàɖà.

²¹ Ti jĩ̀ xwɛ̌ ní mu ní mú-nyɛ́-nyɔ̀ ɓěɔ̀ kɔ́ɖɔ̀ɔ̀ dyi dyéɛń nììn ke, ɓɛ́ ḿ ké ɖɔ-kpaɔ̀ wuɖu wɔ̃́uń nì keɛ́?

²² Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Ní nyɔ ɓěɔ̀ zuɖu ní. Wa se ḿ dyí dyuò. Wa mɔ̀ dyú se hwòɖǒ kɔ̃in cɛ̃̀ ɓě. Wa se ɖɛ-múin-wɔ̃́-wɔ̃́ ɖò ɓéɖé. Wa fɔ̀nɔ̀ ɖɛ-gbà-nyu-hwòɖò, kɛɛ wa se ɖɛín-ɖɛ̀ nyuɛ dyuò.”

Jɛ̀ɖèmádyà dyé dyí-tɛ̀mɛ̀ìn-ɖɛ̀ ɖò ɓá mú-gbɔɔ̀-gbɔɔ̀ nì dyiɛń nyɛɛ jè dyí

²³ Ḿ gmɔìn ma ɓóɖó-kpà gànáà kɔ̃in, ké ḿ dyéɛ kà ɔ se ma kpoún kpá, ké ɔ mɔ̀ ma ɖɛ fóɖóún wɛ̃. Ké ḿ gmɔ̀ ma ɖé dyɔɔ̀ dyí, ké ce ɖò se ma ɖé nì.

²⁴ Ḿ gmɔìn ma toɖo vɛ̀nɛ̀ ɓěɔ̀ dyai, ké ḿ dyé ma wa kɔ̃in tɛɖɛɛ. Ké ḿ gmɔìn ma toɖo-dyù ɓěɔ̀ dyai, ké ḿ dyé ma wa dyi túòɛ̀ ɖekè.

²⁵ Ké ḿ gmɔìn ma dyi, kɛɛ ḿ se ma nyɔ ɖò dyéɛ ɓɛ́ìn. Naà séín ɓěɔ̀ ɖǎ ma wã, ké wa ɖǎ vǐè.

²⁶ Ḿ dyéɛ kà bãa-ɓòɖò nì ma kà kɛɛ mɔ̀ǎ gbǎùn-fúɖúá kɛ. Ké hwɔɖɔ séín nì nɔ̄ ɓóɖóɛ̀ kɔ̃ɛɛ ɖǎ wáɖá. Ɓóɖó gànáà mɔ̀ǎ hwùɖùǎ ɓó Bounɓoɔ̀ dyúa, ɓó ɔ dyoɖo-hwòɖò ku wɔ̃ɔ̀ jè.

²⁷ Bounɓoɔ̀ cɛ̃ɛ, ké ɔ ɖá, “Ní mu ɓóɖóɔ̀ wáɖáùn, kɛɛ ḿ seɛ mú gbɔɔ̌ mu gàná cá.

²⁸ Ɓó ɖɛa jèɛɛ, ɓóɖó-kpàɔ̀ mu vĩ̌ìn, ɓɛ́ dyɔɔ̀ dyí ké kpè. Mɔ̄ ɖǎ ɖɛ nìà kɛ cɛ̃, ké ḿ seɛ dyí zàǐn mu. Ḿ ɖǎa dyí sɔ́, ké ḿ seɛ dyi táǎ mu.”

²⁹ Sǒ-nàìn-nyɔ̀ ɓěɔ̀ sǒ ɓěɔ̀ kè sé-po-nyɔ̀ ɓěɔ̀ ɓo-jĩ̌ muɛ nyuùn, ɓɛ́ nyɔ séín nì hwɔɖɔ séín múɛɛ ké gbǔ, ɓɛ́ wa ɖíɛ́ ɓě ké xwíɖíi pa, ɓɛ́ wa ɖíɛ́ ɓě ké sɔ́ɔ́-kpò ɓě pṹa pa. Wa mu hwɔɖɔ séín ɓěɔ̀ kɔ̃ wãùn, ké nyɔ ké wa mú cĩ́ɛɛ ɖò se nìɛ̌ mu.

³⁰ Jùɖúsɛ̀ɖɛ̀ìn-hwɔ̀ɖɔ̀ wè, mɔ̀ nìà mú-gbɔɔ̀-hwìèɔ̀ kɔ̃ɛɛ, ɖɛ́ kɔ̃̀ jè m̀ bɛ̃̀ìn kà m̀ mìɔùn ɖe, ɓɛ́ m̀ dyià wee nì pídyiɛ́? Ɖɛ́ kɔ̃̀ jè m̀ bɛ̃̀ìn kà m̀ mìɔùn góò-bɛ̃̀ìn-ɖɛ̀, ɓɛ́ m̀ dyià tìɖó poɛ́? M̀ nɔ̀mɔ̀ìn m̀ mìɔùn xwa pídyi. Nì gmaɖe ɓěɔ̀ ɖǎ m̀ ɓɔ́. Wa mɔ́á m̀ ɖáɓáa dyi.

³¹ Ḿ wɔ̃́ mú-páná-wùɖù ɖò kà màa ɖò ɓɛ́ ɔ nì póó-gbò ɖeín nyɛɛ mú-páná-wùɖù nìà kɛ. Kpò-wùɖùɔ̀ hwɔìn màa ɓɛ́ ɔ nì ɔ nyíɔ́-dyù wóɖóɛ̌n nyɛɛ kpò-wùɖù. Zádyɔún-hwɔ̀ɖɔ̀ɔ̀ nì kpòɛ̌n, ké fɛ̀ɛ̀ nì ɔ dyí dèɛ̌n. Ɔ nì sɔ̃ xwáɖá gbauń, ké ɔ ɖá, “Gǎ ɖǎ ḿ kɔ̃ dyio! Wa nì ḿ ɖáɓáuń dyiɛńe!”