Jɛ̀ɖèmádyà 3 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ se Gèɖèpɔ́ɔ̀ jǎà gbo nyu

¹ “Ɔ jǔ ké gàa ɖò dyi ɔ gmàà ɓɔ́, ké màaɔ̀ dyi mu, ké ɔ dyi gàa kà kò ɖò xwa kpáín, gàa ɓɔ́à nyɔ́nɔ́ɔ̀ kɛɛ ɓɛ́ìn muɛ, ɓɛ́ ɔ ké màaɔ̀ dyi kpɔ̃ ɖeè? Má, nyɔ ɖò dyi ɖɛ nì náa nyuín, ɔ nyuɛ ké ɓóɖó gànáɔ̀ se mú hwɛ̀e? Kɛɛ dyéɛ, ɓě cĩ́ kà gbàɖàùn-màà nyuà cĩ́ɛ kɛ. Ɓě ɓéɖé gmaɖe kúɖúú ɓě, ké ɓó kàǔn wɛ̃ɛ, ɓě mɔ́á ḿ gbo dyiɛ dyi ɖeè? Mɔ̄ Bounɓoɔ̀ mɔ̀ nyɔ cɛ̃à kɛ̀.

² Ɓě gmɔ̀ ɖé toɖo ɓěɔ̀ dya, ɓɛ́ ɓě ké pá púú ɓě nìà ɖéɛɛ dyé. Ɓě kè ɓěɛ̀ gmaɖe ɓěɔ̀ ɖǎ ɖé dà séín ɓěa dyi pɛ̃́ nyɛ̀nɛ̀ɛ̀. Ɓě kò ɓó hwìè ɓěɔ̀ wĩin, ké ɓě nì ɓěɛ̀ gmaɖe ɓěɔ̀ fòèɛ̌n kà sṹún-gɔ̀-nyɔ̀ ɓě ɓɛ́ wa mɔ̀ Àwéɖéɓìà-nyɔ̀ ɓěɛɛ fòà hwìè ɖé gbǎùn-fúɖúáɔ̀ kɔ̃ɛ. Ɓě ɖǎa nyu ké ɓóɖóɔ̀ se mú hwɛ̀ ɖe dyììn ɖé ɓěɛ̀ gbàɖàùn-po-po kè ɓěɛ̀ hwòɖǒ-kɔ̃in-nyìnììn-nyìnììn mú.

³ Ɔ jèɛɛ, níɔ̀ ní ɖaɓa ɖe fɔɔ cá. Gbàɖàùn-po-poɔ̀ tó nì ɖé ɓěɛ̀ dyéɖé-kpɔ̀ɔ̌ kɔ̃, ké dɛ̃ ɖò ní nyu ɓě.

⁴ “Ɓě se dɛ̃ ɖò kɔ̃̀ ɖe fɔɔ cá, ké ɓě nì ḿ ɓě ɓǎ ɖáǐn, ké ɓě ɖá ḿ mɔ̀ ɓěɛ̀ ɓǎto sɔ̀ìn ɖé ɓě dyú-gbɔ́ɔ́-tìǐn.

⁵ Ɓě cɛ̃ɛ ɓá ḿ jè dyí, ké ɓě ɖá, ‘Ɔ dyoɖo-hwòɖòɔ̀ se ná sèɛ̌ mu. Ɔ se à dyoɖoún kpáǐn mu kánáá pū.’ Kǎà ɓě nyu kà ɓó wùɖùɛ̀, kɛɛ ɓě nì ɖɛ gbà jĩ̀ kà ɓě ɓɛ́ìn nyuɛ kɛɛ dyúa kpauń ke kánáá pū.”

Éézùɖùɛ̀-nyɔ̀ ɓěɔ̀ kè Júɖà-nyɔ̀ ɓěɔ̀ ɓéɖé ɓɛ́ wa ké wìǐn kpá ɓó waà ɖɛ gbà ɓěɔ̀ jè

⁶ Ti ɓɛ́ Jòsádyà mɔ̀ ma kã́á kɛɛ, Bounɓoɔ̀ cɛ̃ɛ ma ḿ gbo, ké ɔ ɖá, “Má, m̀ dyé ɖɛ Éézùɖùɛ̀-ɓòɖò hwɔìn gbàɖàùn-mààɔ̀ nyuɛɛ níe? Ɔ ɖǎ ḿ kɔ̃ín pòìn, ké ɔ ɖǎ ɔ gbàɖàùn-kpèɖè ɓěɔ̀ xwai nyu ɖé toɖo séín ɓě dya kè ɖé cu gùsùù séín ɓě xwíɖíi.

⁷ Ní hwòɖǒ ɖá kà ti ɔ ɖǎɔ̌ kà ɖɛ séín ɓěɛ̀ nyuɛɛ, ɔ hwòɖǒ muɔ́ má ḿ gbo gmɔ̀ìn ɖeɛ. Kɛɛ ɔ seɛ náa nyu. Ké Júɖà-ɓòɖò mɔ̀à ɔ ɖíí-màà, ɓɛ́ ɔ seà mɔ́ún jǎà gbo nyu ɖekèɛɛ dyéɛ ma ní.

⁸ Júɖà mɔ̀ùn dyéɛ kà ḿ ɓɔ́ ma Éézùɖùɛ̀, ké ḿ nyí ma ɔ buɛ̀-cèè-ɖɛ̀, sepóɛɖé ɔ ɖǎ ḿ kɔ̃ín pòìn, ké ɔ ɖǎ gbàɖàùn-po-nyɔ̀ jǔ jèɛ. Kɛɛ wɛ̃́ɛ́ kɛɛ, ɖɛ nìà kɛ se ma Júɖà mɔ̀à Éézùɖùɛ̀ɛ̀ ɖíí-màà, ɓɛ́ ɔ seà mɔ́ún jǎà gbo nyu ɖekèɛɛ fã̀àǔn po fɔɔ cá. Kɛɛ ɔ mɔ̀ùn ɖú gbàɖàùn po kpàǐ ɖekè,

⁹ ké dɛ̃ ɖò se ɔ nyu fɔɔ cá. Ɔ ɖǎa nyu ké ɓóɖóɔ̀ se mú hwɛ̀ ɖe dyììn ɖé ɔ gbàɖàùn-po-po mɔ̀à kũùn-kpò ɓě mɔ̀à sɔ́ɔ́-kpò ɓě kè cu ɓěɛɛ ɓiè-ɓièɛɛ mú.

¹⁰ Kɛbì ɖɛ séín ɓěɛ̀ mɛ nì náa, Júɖà ɓɛ́ ɔ mɔ̀à Éézùɖùɛ̀ɛ̀ ɖíí-màà, ɓɛ́ ɔ seà ḿ jǎà gbo nyu ɖekèɛɛ se ḿ gbo gmɔ̀ìn hwòɖǒɛ̀-ɖé-hwɛ̀-kà, kɛɛ ɔ nyu dyéɖéi pū. Mɔ̄ Bounɓoɔ̀ mɔ̀ nyɔ cɛ̃à kɛ̀.”

¹¹ Ké Bounɓoɔ̀ cɛ̃ɛ ḿ gbo kà Éézùɖùɛ̀ pòìn ɔ kɔ̃ín dyɛo, kɛɛ ɔ nììn nyuu-ɖɛ̀ zà póɖó ɓó Júɖà ɓɛ́ ɔ seà ɔ jǎà gbo nyuɛɛ nììn nyuu-ɖɛ̀ɔ̀ gbo kɛ.

¹² Ɔ ná nì jèɛɛ, Bounɓoɔ̀ cɛ̃ɛ ḿ gbo ɖe, ké ɔ ɖá, “Mu, ɓɛ́ m̀ kéɛ Éézùɖùɛ̀-dyù ɓěɔ̀ gbo cɛ̃ kà ḿ ɖá wa pòìn ḿ kɔ̃ín dyɛo, kɛɛ wa mɛ dyi ḿ gbo ɖe. Ní mu wa wìǐn dyéìn, ké ḿ se wa dyoɖoún kpáǐn mu ɖe. Ní dyoɖo-hwòɖòɔ̀ se ná sèɛ̌ mu kánáá pū.

¹³ Kɛɛ wa ɓéɖé wa ké waà nàmàǔn ɓěɔ̀ dyéɖéi hwɔ̀ìn, ɓɛ́ wa kéɛ mú wɔ̃́ìn kà ɓɛ́ wa ɖǎ mɔ̄ Bounɓo mɔ̀à waà Gèɖèpɔ́ɔ̀ kɛɛ kɛ́ɛ́ mú nyuɛ. Wa mɛ wɔ̃́ìn mú kà ɓɛ́ wa ɖǎ waà ɖɛ̀ɓɛ̀ǐn-ɖɛ̀ɓɛ̀ǐnɔ̀ gèɖèpɔ́ɔ̀ kà kò ɖò nyí ɖé cu gùsùù séín ɓě xwíɖíi, ké wa se ní wuɖuɔ̀ nyuɛ. Mɔ̄ Bounɓoɔ̀ mɔ̀ nyɔ cɛ̃à kɛ̀.”

¹⁴ Bounɓoɔ̀ cɛ̃ɛ ɖe, ké ɔ ɖá, “Éézùɖùɛ̀-dyù ɓě, ɓě mɔ̀à ní dyú ɓě ɓɛ́ ɓě pòìn kà ḿ kɔ̃ín nyɛɛ, ɓě dyi ḿ gbo ɖe. Mɔ̄ mɔ̀ nyɔ kɔ̃̀ ɓě wuɖuí. Ní mu ɓě nyɔ dyúáɖò-dyúáɖò ɖé hwɔɖɔ ɖò-ɖò mú zàùn, ké ní mu ɓě nyɔ sɔ̃́-sɔ̃́ ɖé gbɛ̌ɛ̀ ɖò-ɖò mú zàùn, ɓɛ́ ḿ ké ɓě nɔ̄ Zádyɔún-tòɖòɛ̀ dya dyà.

¹⁵ Ɔ ɖǎ ná nìǐn, ní mu ɓě wuɖuí-kɔ̃̀-nyɔ̀ ɓě ɓɛ́ ní hwòɖǒ dèìn múin nyɛɛ nyíìn. Wa mɔ̀ nyɔ mu ɓě ɖɛ-múin-wɔ̃́-wɔ̃́ kè fɔ̀nɔ̀-hwòɖǒ nyíìn kà nyɔ nyíà nyɔ ɖii-ɖɛ̀ kɛ.

¹⁶ Ti ɓě ɖǎ dyí vò mìɔ ɖé ɓóɖóɔ̀ kɔ̃ɛɛ ní, ɓě se ní gma-gbɔ̀ɖɔ̀ɔ̀ jè cɛ̃ɛ́ mu ɖe. Ɓě seɛ jè hwìɖǐi poɛ̌n mu ɖe, mɔɔ ké ɔ jè se ɓě hwìɖǐi nìɛ̌ mu, hwɛ̀ ḿ po níiń, ɓě ké ɖie ɖò nyu ɖe.

¹⁷ Ɓó tia ɓaɖaa, wa mu Jùɖúsɛ̀ɖɛ̀ìn-hwɔ̀ɖɔ̀ɔ̀ Bounɓoɔ̀ zèèɔ̀ ɖáìn. Ké ɓóɖó-dù séín mu ɖéɛ mú dyí poìn, ɓɛ́ wa ké ḿ ɓiè. Ké wa se ɖɛ ɓě ɓɛ́ waà hwòɖǒ-kɔ̃in-nyìnììn-hwòɖò mɔ̀ kɛ́ɛ́-hwòɖò-dyùàɔ̀ cɛ̃ wa gboɛɛ nyuɛ́ mu ɖe.

¹⁸ Ké ɓě mɔ̀ Éézùɖùɛ̀-dyù ɓě kè Júɖà-nyɔ̀ ɓěɛɛ mu dyí poìn, ɓɛ́ ɓě ké ɖé ɓóɖó nì ɖé xwía kɛɛ kɔ̃ sɔ̀, dɛ̀ ɓɛ́ to muà ɓě kpaùn wɛ̃, ɓɛ́ ɓě ké ɓóɖó ɓɛ́ ḿ nyí zɔ̃̌ɔ̀ kà ɓě ɓǎ nììn ɓǎ ɓě ɓɛ́ ɔ kéà waà kɔ̃̀ɔ̀-ɖɛ̀ jǔɛɛ kɔ̃ dyi ɖe.”

Gèɖèpɔ́ɔ̀ nyɔ ɓěɔ̀ kũùn-kpò ɓiè-ɓiè

¹⁹ Bounɓoɔ̀ cɛ̃ɛ ɖe, ké ɔ ɖá, “Éézùɖùɛ̀-dyù ɓě, ní mɔ́ ɓɛ́ ḿ kéɔ́ má ɓě ní dyú mú nyu, ɓɛ́ ḿ kéɔ́ má ɓě ɓóɖó ɓɛ́ ɔ nɔ̀mɔ̀ dyíin ké ɔ zi ɓóɖó séín dyíɛɛ nyí. Ké ní mɔ́ ɓɛ́ ɓě kéɔ́ má ḿ ɓǎ ɖáìn, ɓɛ́ ɓě ké seɔ́ má ḿ kɔ̃ín pòìn ɖe.

²⁰ Éézùɖùɛ̀-dyù ɓě, ɓěɛ̀ nyuu-ɖɛ̀ kè màa ɓɛ́ ɔ táà ɔ dyú-ɓǎ dyi ɓó gbàɖàùn po jèɛɛ nyuu-ɖɛ̀ hwɔìn ní. Ɓě se ḿ jǎà gbo nyu. Mɔ̄ Bounɓoɔ̀ mɔ̀ nyɔ cɛ̃à kɛ̀.”

²¹ Wuɖu ɖò dyi ɖé pá púú ɓě nìà ɖé toɖo ɓěɔ̀ dyaa mú. Éézùɖùɛ̀-nyɔ̀ ɓěɔ̀ nì vĩ̌ɛń, ké wa nì ɓaàǔn ɓó hwòɖǒ-kɔ̃in-nyìnììn-ɖɛ̀ ɓě ɓɛ́ wa ɖǎà nyu, ké Bounɓo mɔ̀à waà Gèɖèpɔ́ɔ̀ kɛɛ jè ɖǎà wa hwìɖǐi sɔ̀ɛɛ jè.

²² Ɔ jèɛɛ, Bounɓoɔ̀ cɛ̃ɛ wa gbo, ké ɔ ɖá, “Ɓě mɔ̀ nyɔ ɓě ɓɛ́ ɓě ɖǎà ḿ kɔ̃ín pòìn nyɛɛ, ɓě dyi ḿ gbo ɖe. Ní mu ɓěɛ̀ ní kɔ̃ín-pòìn-kpèɖèɔ̀ ɓě mú zàùn kà nyɔ zàà nyɔ wɛ́ múɛ.” Ké nyɔ ɓěɔ̀ ɖá, “Ǹdye, à nì m̀ gbo ɖe dyiɛń, sepóɛɖé mɔ̀ mɔ̀ Bounɓo mɔ̀à à Gèɖèpɔ́ɔ̀ kɛ̀.

²³ Jǎà jɛ́ɛ́, kũùn-kpò ɓiè-ɓiè ɓɛ́ à nyu ma kà ɖé toɖo mɛ́nɛ́-mɛ́nɛ́ kèɛ̀ vɛ̀nɛ̀-vɛ̀nɛ̀ ɓěɔ̀ dya kɛɛ ɖò se à gbo kpáa ɓɛ́ìn fɔɔ cá. À mɔ̀à Éézùɖùɛ̀-nyɔ̀ ɓěɔ̀ kɛɛ, à gbo-kpá-kpá sɔ̀ìn ɖé mɔ̀ Bounɓo mɔ̀à à Gèɖèpɔ́ɔ̀ kɛɛ ɖòùn gbo.

²⁴ Kɛɛ Béò mɔ̀à nyɔ-dɛ̃-nyùìn-gèɖèpɔ́ɔ̀ kɛɛ ɓiè-ɓiè nyuɛ ké nyúà-ɖɛ̀ séín mɔ̀ ɓáɖáá kè wiɖi ɔ kè ɓìɖǐ ɓě ɓɛ́ à ɓǎ nììn ɓǎ ɓě ɖúó zɔ̃̌ɔ̀ poɛń dyíɛ kè à dyú-gàà kè à dyú-màà ɓěɔ̀ ɖǎ máa hwɛ̀.

²⁵ Ɔ wɛ̃̀ìn ɓɛ́ à ké à dɛ̃-ɖɛ̀ɔ̀ mú dyi pɛ̃́, ɓɛ́ à zùǔn-sɔ̀ìn-sɔ̀ìnɔ̀ ké à kɔ̃in ɓáìn kà nyɔ wáɖáà ɖɔ kɔ̃in nyɛ, sepóɛɖé à kè à ɓǎ ɓěɔ̀ ɖúó mɔ̀ Bounɓo mɔ̀à à Gèɖèpɔ́ɔ̀ kɛɛ nàmàǔn bũ̌ nyuɛń dyíɛ. Sɔ̀ìn ɖé à dyú-gbɔ́ɔ́-tìǐn ké zɛ̃̌ɛ̀ dyɛ̀ìn nyɛɛ, à séè ɖɛ ɓě ɓɛ́ m̀ cɛ̃ à gboɛɛ ɖò nyu ɖò.”