Jɛ̀ɖèmádyà 2 - Ɓǎsɔ́ɔ̀ Báɓòɔ̀

Gèɖèpɔ́ɔ̀ kɔ̃̀ ɖé Éézùɖùɛ̀-nyɔ̀ ɓěɔ̀ jè gbo

¹ Ké Bounɓoɔ̀ wùɖù ma ḿ gbo ɖe, ké ɔ ɖá,

² “Mu, ɓɛ́ m̀ ké zio po nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ nyɔ séín ɓěɔ̀ gbo kà ḿ ɖá, ɔ nì ḿ hwìɖǐi kà ɓɛ́ wa nyu ma ɓó ḿ jè gboi kpɔ̃ɔ kóɖó-kóɖó ɖé waà nyɔ-gmɔ̀-tìɔ̀ múɛ, kè kà wa nyu ma ḿ mú ɖɛ̀ɓɛ̀ɛ̀ mìɔ ti ɓɛ́ à ké ma dyi kpɔ̃ìn nyɛ, ɔ kè kà ɓɛ́ wa nyu ma ḿ kíɖíí síɛ ɖé gbǎùn-fúɖúáɔ̀ kɔ̃ɛ. Ɔ mɔ̀ ɓóɖó kɔ̃̀ kɔ̃ ɓɛ́ nyɔ ɖò séè ɖɛ ɖò ɓá ɖòɛ.

³ Éézùɖùɛ̀-dyù ɓěɔ̀ mɔ̀ ma ḿ ɖòǔn nììn nyɔ ɓě. Wa mɔ̀ ma ní kɔ̃̀ɔ̀-ɖɛ̀ kpa ɖɛ kà nyɔ ɓáá-ɖɛ̀-ɓò kĩ́ín-kĩ́ín nìà kɛ. Ḿ tò ma gǎ kè mú-gbɔɔ̀-gbɔɔ̀ ɓó nyɔ séín ɓě ɓɛ́ wa puà ɓě bũ̌in nyɛɛ kɔ̃. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Éézùɖùɛ̀-nyɔ̀ ɓěɔ̀ ɓǎ nììn ɓǎ ɓěɔ̀ nàmàǔn

⁴ Ɓě mɔ̀à Éézùɖùɛ̀ mɔ̀à Jékɔ̀ kɛɛ xwíníín-dyù séín ɓěɛɛ, ɓě tò Bounɓoɔ̀ wuɖuɔ̀ ɖùǔ gbo.

⁵ Bounɓoɔ̀ ɖá, “Ɖɛ́ mɔ̀ ɖɛ gbà ɖò ɓɛ́ ɓě ɓǎ nììn ɓǎ ɓěɔ̀ dyé ɖé ḿ mú, ɓɛ́ wa dyià ḿ bũ̌in tɔmɔìn, ɓɛ́ wa dyià kũùn-kpò se ɖɛ kpa ɓě kíɖíí sí, ɓɛ́ wa mìɔùn seà ɖɛ kpaa kɛ́?

⁶ Wa seɛ cɛ̃ dyɛ mɔ̀ùn, ɓɛ́ wa ké níiń, ‘Dɛ̌ Bounɓo mɔ̀ nyɔ zà zɔ̃̌ɔ̀ kà à ɖé Íjè-ɓòɖòɔ̀ kɔ̃ɛɛ nì kɛ́? Ɔ mɔ̀ nyɔ nàìn zɔ̃̌ɔ̀ kà à ɖé gbǎùn-fúɖúá kɔ̃̀ mú ɓɛ́ ɓí ɓě nìɛ. Ɔ mɔ̀ dɛ̀ dyɛ dyi ké tíe kpɔ̃ ɖé dyiɛ. Ɔ mɔ̀ dɛ̀ ɓɛ́ nyɔ ɖò ní cĩ́, mɔɔ ké nyɔ ɖò ní zĩ̀ìn ɖéɛ.’

⁷ Ḿ dyà ma wa ɓóɖó bã-bã ɖò kɔ̃, ɓɛ́ wa ké ɓáá-ɖɛ̀-ɓò ɓě kè ɖɛ nɔ̀mɔ̀ kɔ̃in tɔ̀ɔ̀ ɓě nì ɖé ɓóɖóɔ̀ kɔ̃ɛɛ ɖi. Kɛɛ ti ɓɛ́ wa dyi ma ɖé ɓóɖóɔ̀ kɔ̃ nyɛ̀nɛ̀ɛ̀ kɛɛ, wa nyuɛ ma ké ɓóɖó mɔ̀à ní kɔ̃̀ɔ̀-ɖɛ̀ kɛɛ se mú hwɛ̀, ké wa nyuɛ ní dyi-nyàìn-ɖɛ̀ mú.

⁸ Sáa-zà-nyɔ̀ ɓěɔ̀ seɛ cɛ̃, ɓɛ́ wa ké níiń, ‘Dɛ̌ Bounɓoɔ̀ ɖé?’ Nyɔ ɓě ɓɛ́ wa mɔ̀ gmaɔ̀ xwai-poìn-nyɔ̀ kɛɛ se ma ḿ dyí dyuò dyɛ mɔ̀ùn. Waà wuɖuí-kɔ̃̀-nyɔ̀ ɓěɔ̀ nyu ma ḿ kɛ́ɛ́ mú. Ké kpáá-ɖɛ̀-cɛ̃-nyɔ̀ ɓěɔ̀ cɛ̃ ma kpáá-ɖɛ̀ ɖé Béòɛ̀ nyɛ́nɛ́ mú, ké wa sí ma ɖɛ ɓě ɓɛ́ wa se kpáná ɖò mú nìɛɛ kíɖíí.

Zaa nì ɓó Bounɓoɔ̀ kè ɔ nyɔ ɓěɔ̀ pṹa kɛ

⁹ “Ɔ jèɛɛ, mɔ̄ Bounɓoɔ̀, ḿ ɓéɖé zaa ɖò ɓɛ́ ḿ kè ɓě kéɛ zi, ké zaaɔ̀ nì ɓó ḿ kè ɓěɛ̀ xwíníín-dyù ɓě pṹa ɖekè.

¹⁰ Ɓě péɖé dyóóɔ̀, ɓɛ́ ɓě ké ɖé Kítììn-ɓòɖòɔ̀ kɔ̃ dyi gmɔìn, ké ɓě mɛ gmɔìn ɖé Kéɖà-ɓòɖòɔ̀ kɔ̃ dyi nɔ̀mɔ̀ dyíin, ɓɛ́ ɓě kéɛ dyé kɛbì ɖɛ nì kàà ɖò ɖǎ ná ɖé kpá ɖò ní.

¹¹ Ɓóɖó-dù ɓěɔ̀ ɖò séè waà gèɖèpɔ́ɔ̀ ɓě ɓɛ́ wa seà kpaa gbo zĩàìn ɖò dyɛ mɔ̀ùn. Kɛɛ dyéɛ, ɓě mɔ̀à ní nyɔ ɓěɛɛ ɖǎ mɔ̄ mɔ̀à ɓěɛ̀ dĩ́ín-dĩ̀ìn Gèɖèpɔ́ɔ̀ kɛɛ dyi táà, ké ɓě ɖǎ kũùn-kpò ɓě seà kpáná ɖò mú nìɛɛ kíɖíí sí.

¹² Ɖɛ nìà kɛ mɛ giniìn ɖɛ séín nì ɖé dyɔɔ̀ dyíɛɛ dyi, ɓɛ́ ɔ ké wa díɖí tàɓàìn, ɓɛ́ wa ké tɛɖɛ. Mɔ̄ Bounɓoɔ̀ mɔ̀ nyɔ cɛ̃à kɛ̀.

¹³ Ɓě ɖǎ nàmàǔn-dù sɔ̃́ nyu. Ɓě ɖǎ mɔ̄ mɔ̀ ní-dyù ɓɛ́ ɔ mɔ̀ nyɔ-fɛ̀ɛ̀-nyí-nì kɛɛ dyi táà, ké ɓě ɖǎ ní-mú-dyi-dèìn-ɓì dúɖú-dúɖú ɓě ɓɛ́ wa se ní ɖò dyi kpɔ̃ɔ ɓɛ́ìn nyɛɛ ɓúɖú ɓó ɓě mìɔùn bìì.

Éézùɖùɛ̀-nyɔ̀ ɓěɔ̀ nììn se Gèɖèpɔ́ɔ̀ jǎà gbo nyuɔ̀ gbo-wóɖó-ɖɛ̀

¹⁴ “Éézùɖùɛ̀-dyù ɓě, ɓě mɔ̀ gǐìe? Ɓě wóɖó ɖé gǐì múe? Gbào, ɔ se ná nì fɔɔ cá. Ké nìí, ɖɛ́ kɔ̃̀ jè wa kpaà ɓě gǐì múɛ́?

¹⁵ Ganìǎ ɓěɔ̀ ɖǎ kuɖu. Wa ɖǎ ɓě dyoɖoi pòìn. Wa ɖǎa nyu ké ɓěɛ̀ ɓóɖóɔ̀ ɖǎ fóɖóún kpá. Ɓěɛ̀ hwɔɖɔ ɓěɔ̀ ɖǎ wáɖá, ké wa mɔ̀ǎ hwùɖùǎ.

¹⁶ Nyɔ ɓě ɓɛ́ wa sɔ̀ ɖé hwɔɖɔ ɓě kɔ̃̀ nyɛ́nɛ́ mɔ̀ Mɛ́fè kè Tàpánè kɛɛ múɛɛ ɖǎ ɓě dúi kpana.

¹⁷ Éézùɖùɛ̀-dyù ɓě, má, ɓě dyà ɓě mìɔùn ɖɛ gbà nìà kɛ kɔ̃ dyììn ɖé mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi-táà-táà mú, ti ɓɛ́ ḿ nì ma ɓě nàǐn ɖé hwìèɔ̀ kɔ̃ɛe?

¹⁸ Má, ɓě kè Íjè-nyɔ̀ ɓěɔ̀ po ma wuɖu ɓíín, ké ɓě kè Àsíwíɖíà-nyɔ̀ ɓěɔ̀ po ma wuɖu ɓííne? Kɛɛ má, wa se ɓě kpáná ɖò dyí nyue?

¹⁹ Ɓě mìɔùn nììn hwòɖǒ-kɔ̃in-nyìnììn-nyìnììn mu ɓě gǎ kɔ̃ dyàùn. Ké ní kɔ̃ín-pòìn-pòìn ɓɛ́ ɓě nyuɛɛ mu ɓě zaa dúún wáɖáùn. Ɓě muɛ dyéìn kà ɔ mɔ̀ ɖɛ nyìnììn dyíin kè ɖɛ nɛɛ̀-nɛɛ̀, ɓɛ́ ɓě ké mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi táà, nìí ɓɛ́ ɓě ké se ɓó ḿ jè gboi kpɔ̃ ɖe kóɖó-kóɖóɛ. Mɔ̄ Bounɓo Ɖɛɓíɔ́ mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.

Éézùɖùɛ̀-nyɔ̀ ɓěɔ̀ nɔ́ɔ̀ Bounɓoɔ̀ ɓiè jè gbo

²⁰ “Éézùɖùɛ̀-dyù ɓě, ɓě ɖǎǒ zɔ̃̌ɔ̀ ní ɓě wuɖuí kɔ̃̀ jè gbo nɔ́ɔ̀. Ɓě nɔ́ɔ̀ ní wuɖu nyu jè kè ḿ ɓiè jè gbo. Dyéɛ, ɓě ɓiè kũùn-kpò ɓě ɖé toɖo séín dya kè ɖé cu gùsùù séín ɓě xwíɖíi. Ɓě nì kà gbàɖàùn-màà ɓě nìà kɛ.

²¹ Ɓě hwɔìn ma géɖéè-dyùà nɔ̀mɔ̀ kɔ̃in, ké ḿ ɓá ma ɓě, ké ɓě mɔ̀ ma géɖéè-ɖúú nɔ̀mɔ̀ kɔ̃in. Kɛɛ dyéɛ, nyɔ ɓě ɖǎ jǔ ɓó kàǔn wɛ̃. Ɓě hwɔìn géɖéè-ɖúú-zɔ̃̀ ɓɛ́ ɔ se kpáná ɖò mú nìɛ.

²² Kɛbì ɓě mɛ dèɖèìn ɓě mìɔùn nyɔ-zɛ̀nɛ̌-mú-zà-ɖɛ̀-dù kò-kò ɓě kè sùǐ kpa ɖɛ ɓěɛɛ, wɛ̃́ɛ́ kɛɛ, ní muɔ́ má zaa wáɖáà ɓě dúún wɛ̃ɛ kpìǐ-kpàɔ̀ ɓě bũ̌ dyéìn ke kánáá pū. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ.

²³ Xwɛ̌ ɓě ɓɛ́ìn cɛ̃ɛ kà ɓɛ́ ɓě se ɓě mìɔùn se-mú-hwɛ̀-nyɔ̀ mú nyu dyììn ɖé Béò kíɖíí sí-sí múɛ́? Ɓě gmɔ̀ ɖé Hĩ́nɔ̀ Bɔɔ-kpàɔ̀ kɔ̃, ɓɛ́ ɓě ké ɖɛ ɓě ɖǎ nyuɛɛ dyé. Ɓěɛ̀ nyuu-ɖɛ̀ ɓěɔ̀ nì pū kà sǒ-nì-gbu-kɔ̃ún nyɔ́nɔ́ ɖòɛ̀ nyuu-ɖɛ̀ nìà kɛ. Ɔ nì dyɔɔ̀ cà-cà nyuɛń, ké ɔ nì sɔ̀ dà pa dà nyuɛń ɓó dyú-ɓǎ jè.

²⁴ Ɓě hwɔìn xwáɖá-xwíɖíi-jǎkasì ɓɛ́ ɔ nì ɖé gbǎùn-fúɖúáɔ̀ kɔ̃ɛ. Ti ɓɛ́ jǎkasì ɓíɔ́ɔ̀ tó nyu ɔ nyɛ̀nɛ̀ɛ̀ kɛɛ, nìí, ɔ ɖú ɔ nyɔ́ nàìn kpàǐ. Ɓó tia ɓaɖaa, nyɔ ɖò se ɔ ɓɔ́í poɛ ɓɛ́ìn. Jǎkasì ɓíɔ́ ɓɛ́ ɔ mɔ́ ɔ kɔ̃ún kpáa dyiɛɛ se ɓéɖé ɔ ké ɔ mìɔùn saà ɓó ɔ kíɖíí kpá jè.

²⁵ Éézùɖùɛ̀-dyù ɓě, ɓě ɓɔ́ ɓě mìɔùn saà ɓó gèɖèpɔ́ɔ̀ kà kò ɖò kíɖíí kpá jè, mɔɔ ké ní-ná-tò mɛ ɓɔ́ ɓě ɖáɓáa ɓó wa jè. Kɛɛ ɓě ɖá, ‘À se wɔ̃́. À hwòɖǒ ɖǎ gèɖèpɔ́ɔ̀ kà kò ɖò ɓě gbo gmɔ̀ìn, ké à muá wa kíɖíí síìn kánáá pū.’

Gèɖèpɔ́ɔ̀ wɛ̃̀ìn Éézùɖùɛ̀-nyɔ̀ ɓěɔ̀ gǎ kɔ̃ tòɛ̀

²⁶ “Kà wa dyià dyíɖíí-nyɔ̀ ɖò kpɔ̃ ní, dɛ̃ nyuà ɔ nyuɛ kɛɛ, kà dyúáɖòɔ̀ kǎà dɛ̃ mu ɓě mɔ̀ Éézùɖùɛ̀-dyù ɓěɛ̀ kɛɛ nyuùn, ɓě kè ɓěɛ̀ kã́á ɓěɔ̀ kè ɓěɛ̀ gɔ̌mànà-nyɔ̀ vɛ̀nɛ̀ ɓěɔ̀ kè ɓěɛ̀ sáa-zà-nyɔ̀ ɓěɔ̀ ɔ kè ɓěɛ̀ kpáá-ɖɛ̀-cɛ̃-nyɔ̀ ɓěɔ̀ ɖekè.

²⁷ Ɓě ɖǎ ḿ kɔ̃ín pòìn, ké ɓě ní gmɔ̀ìn ɖé ḿ gbo ɖe jèɛɛ, ɓě cɛ̃ɛ cu gbo, ké ɓě ɖá, ‘Mɔ̀ mɔ̀ à ɓǎ.’ Ké ɓě cɛ̃ɛ sɔ́ɔ́-kpò gbo, ké ɓě ɖá, ‘Mɔ̀ mɔ̀ à xwíníín-zà-ɖè.’ Kɛɛ ti ɓɛ́ fũ̀à-fṹá-ɖɛ̀ ɖò mu ɓě kɔ̃ kpɔ̃ùn nyɛ̀nɛ̀ɛ̀ kɛɛ ní, nìí, ɓě cɛ̃ɛ ḿ gbo, ké ɓě ɖá, ‘Sɔ̀ dyí, ɓɛ́ m̀ ké à gbo kpá.’

²⁸ “Júɖà-nyɔ̀ ɓě, dɛ̌ ɓěɛ̀ gèɖèpɔ́ɔ̀ ɓě ɓɛ́ ɓě mìɔùn mɛ ma kà kɛɛ nìɛ́? Wa mɛ sɔ̀ dyí, ɓɛ́ wa kéá ɓě gbo kpá ɖé ɓěɛ̀ fũ̀à-fṹá-tìɔ̀ múe. Má, kà ɓěɛ̀ hwɔɖɔ ɓěɔ̀ jĩ̀ɛɛ, kǎà ɓěɛ̀ gèɖèpɔ́ɔ̀ ɓěɔ̀ jĩ̀e?

²⁹ Kà ɓɛ́ ɓě séín nìà ḿ kɛ́ɛ́ mú nyuɛń nyɛɛ, nìí, xwɛ̌ ɓě ɓɛ́ìn ḿ kàìn nyɛ́? Mɔ̄ Bounɓoɔ̀ mɔ̀ nyɔ cɛ̃à kɛ̀.

³⁰ Ḿ zà ma ɓě kpeɖe pídyi, sepóɛɖé ɓě se ní nyɔ-kpeɖe-zà-zàɔ̀ ɖɛ ɖá. Ɓě ɖǎ ní kpáá-ɖɛ̀-cɛ̃-nyɔ̀ ɓěɔ̀ ɓě mìɔùn nììn gàsíà dyí ɖáɓá kà ganìǎ ɓɛ́ mɔ́ nì nyuɛń mìɔ kɛɛ kpɔ̃à nyɔ kɛ.

³¹ Éézùɖùɛ̀-dyù ɓě, ɓě tò ní wuɖuɔ̀ ɖùǔ gbo. Ḿ hwɔìn gbǎùn-fúɖúá ɖé ɓě gbo, mɔɔ nàdǐ-ɓòɖò kɔ̃̀ kɔ̃ ɓɛ́ tíe kpɔ̃ dyiɛɛ cáe? Ɖɛ́ kɔ̃̀ jè ɓě cɛ̃à, ɓɛ́ ɓě dyi níiń, ‘À ɖǎ buɛ̀, ké à se m̀ gbo dyiɛ́ mu ɖeo’ wɛ́?

³² Màa-dyù gmɔ̀ ɖòɛ̀ bɛ̃̀ìn-ɖɛ̀ jè ɓɛ́ìn ɔ hwìɖǐi sɔ̀ɔ̀e, mɔɔ ké màa ɓɛ́ ɔ nì dyú-ɓǎ dyi kpɔ̃uń muɛń nyɛɛ mú-po-ɖɔ̀ɔ̀ jè ɓɛ́ìn ɔ hwìɖǐi sɔ̀ɔ̀e? Kɛɛ dyéɛ, ní jè ɖǎ ɓě mɔ̀ ní nyɔ ɓěɔ̀ hwìɖǐi sɔ̀, ké ɔ wé se zɛɖɛɛ ɓɛ́ìn ɖe.

³³ Kē, ɓě kɔ̃̀ sɛ́ɖɛ́ ɓó ɓěɛ̀ gmaɖe ɓěɔ̀ mɔ́ jè cá wà! Gbàɖàùn-màà ɓěɔ̀ mɔ̀ùn ɓɛ́ìn ɓě fɔ̀nɔ̀-hwòɖǒ gbo cɛ̃́ɛ ɖekè wà!

³⁴ Ɓó kɔ̃in ɖeɛɛ, gǎ-dyé-nyɔ̀ ɓě ɓɛ́ wa se ɖɛ gbà ɖò nyu, ɓɛ́ ɓě ɖǎ ɖáɓá kɛɛ nyɔmɔɔ hwɔ ɓěɛ̀ mú-po-ɖɔ̀ ɓěɔ̀ dyai. Ɓě se wa ɓěɛ̀ gbǒ ɓěɔ̀ mú ɖɛ ɖò zàà dyi dyɛ̀ìn dyɛ mɔ̀ùn. “Ɓě nyu ɖɛ jĩ̀ kà dyí ɓěɛ̀,

³⁵ kɛɛ wɛ̃́ɛ́ kɛɛ, ɓě ɖá, ‘À se ɖɛ gbà ɖò nyu. Bounɓoɔ̀ se à dyoɖoún kpáǐn mu fɔɔ cá.’ Kɛɛ mɔ̄ Bounɓoɔ̀ mu ɓě gǎ kɔ̃ tòùn, sepóɛɖé ɓě doìn nàmàǔn ɓɛ́ ɓě ɖǎ nyuɛɛ jè mú.

³⁶ Ɓě nyu sɔ̀ dà pa dà ɓó gbo-kpá-kpá dyí mɔ́ jè, kɛɛ Íjè-ɓòɖòɔ̀ mu ɓě dɛ̃ dyéɖéín sèìn, kà dyúáɖò kà Àsíwíɖíà-ɓòɖòɔ̀ sè ma kà ɓě dɛ̃ dyéɖéín nyɛ.

³⁷ Ɓě mu ɖé Íjè-ɓòɖòɔ̀ kɔ̃ dú zàìn ɖekè. Dɛ̃ mu ɓě nyuùn, ké ɓě se dú dyií ɖúɛ ɓɛ́ǐn mu, sepóɛɖé mɔ̄ Bounɓoɔ̀ ɖǎ nyɔ ɓě ɓɛ́ ɓě taɓaà hwìɖǐǐɛɛ ɓɔ́, ké ɓě se kpáná ɖò ɖé wa mú dyéɛ mu.