Jɛ̀ɖèmádyà 12 - Ɓǎsɔ́ɔ̀ Báɓòɔ̀

Jɛ̀ɖèmádyà diè Bounɓoɔ̀ dyi

¹ Bounɓo, ḿ kè mɔ̀ dyiɔ́ zaa zi ní, nì muɔ́ máa gɔ̃̌ dyí dyéìn kánáá pū, sepóɛɖé m̀ mɔ̀ dyí-ɓɛ̀ɖɛ̀ìn-nyɔ̀ kánáá pū. Kɛɛ wɛ̃́ɛ́ kɛɛ, ɓɔ̌ɔ̀, ḿ mɛ diè m̀ ɖɛ ɖíɛ́ ɓě ɓá dyí-sɛ́ɖɛ́ìn-ɖɛ̀ jè dyíɛɛ dyi. Ɖɛ́ kɔ̃̀ jè hwòɖǒ-kɔ̃in-nyìnììn-nyɔ̀ ɓěɔ̀ sɔ̃ún-kpa-ɖɛ̀ wóɖóà gbɔ̀ɖɔ̀ mìɔ cá kɛ́? Ɖɛ́ kɔ̃̀ jè nyɔ ɓě ɓɛ́ jǎà ɖò seà mú nì fɔɔɛɛ fɛ̀ɛ̀ ɓɛɖɛɛ̀à dyí kánáá pū kɛ́?

² M̀ ɓá wa kà nyɔ ɓáà ɓáá-ɖɛ̀ ɖò kɛ. Wa kpa gmɛ̀nɛ̀ɛ̀, ké wa ɓúá dyí, ké wa tòɖò ɓo. Nì jè nì wa wĩín pū, kɛɛ nì jè se ɖé wa hwòɖǒ bũ̌ nì fɔɔ cá.

³ Kpa hwòɖǒ-kɔ̃in-nyìnììn-nyɔ̀ ɓěɛ̀ dyi káɖáa kà nyɔ kpaà ɓáɖáá ɖò ɓɛ́ wa kéà ɔ ɖáɓá kɛ. Gmɔ̀ wa dyí kóɖó-kóɖó, ɓɛ́ waà ɖáɓá-tì ké ɓó nyini hwɛ̀. Kɛɛ Bounɓo, m̀ dyuò ḿ dyí. Nì dyé ɖɛ ɓě ní nyuɛɛ ní, ké m̀ dyuò ní hwìɖǐi-poìn-ɖɛ̀ ɓá m̀ dyíɛɛ dyí.

⁴ Ti jĩ̀ xwɛ̌ à ɓóɖóɔ̀ mu kɔ̃in dyɛìn ke, ɓɛ́ pìǐ nì dà séín nyɛɛ ké mɛ́ɛ hwɛ̀ kɛ́? Nimii ɓěɔ̀ kè naà ɓěɔ̀ nì mɛ́iń ɓó à nyɔ ɓěɔ̀ hwòɖǒ-kɔ̃in-nyìnììn-ɖɛ̀ nyu jè. Wa mɔ̀ nyɔ ɓě cɛ̃à, ɓɛ́ wa dyi níiń, “Gèɖèpɔ́ɔ̀ ní dyé ɖɛ ɓě à nyuà kɛo” wɛ.

⁵ Ké Bounɓoɔ̀ ɖá, “Jɛ̀ɖèmádyà, ɔ jǔ ké m̀ kè m̀ mǔè nyɔǔn-dyù dyi kpɛɖɛ kpa, ké wa dyi m̀ ɖu ní, nì hwòɖǒ ɖá m̀ kè sǒ ɓě ɓɛ́ìn kpɛɖɛ kpaa, ɓɛ́ m̀ ké ɖue? Ké ɔ jǔ ké m̀ dyi gbǒ, ké m̀ dyi ɓuɖu, ti ɓɛ́ m̀ nì ɓó pá wáɖáá gbo dyi nàǔn wɛ̃ɛ ní, nìí, xwɛ̌ nì mu kpɔ̀ɔ̌-xwàɖà nìà Jɔ́nì-nìɔ̀ wĩin nyɛɛ mú nàà ɓɛ́ìn nyɛ́?

⁶ M̀ mìɔùn nììn ɖíí ɓě mɔ̀ nì gbǒ-xwíníín-nyɔ̀ ɓěɔ̀ kɛɛ ɖǎ m̀ kɔ̃ín pòìn. Wa séín poìn dyí, ké wa nìà m̀ gbo vɔ̃uń wɛ̃̀. Kɛbì wa mɛ cɛ̃ m̀ wuɖu ɖéé-ɖéé ɓě gboɛɛ, mɔ̀ǔn ɖá ɓɛ́ m̀ ké wa hwòɖǒ kɔ̃ dè.”

Wìì nyu Bounɓoɔ̀ ní ɓá ɔ nyɔ ɓěɔ̀ nyuu-ɖɛ̀ jè dyí

⁷ Ké Bounɓoɔ̀ cɛ̃ɛ ɖé, ké ɔ ɖá, “Ḿ ɖǎ Júɖà-nyɔ̀ ɓě mɔ̀à ní nyɔ ɓěɔ̀ kɛɛ jè dyi táà. Ḿ ɖǎ nyɔ ɓě ɓɛ́ ḿ ɖɛ̀ɓɛ̀à múɛɛ ɓɔ́, ké ḿ ɖǎ wa ɖé waà mú-nyɛ́-nyɔ̀ ɓěɔ̀ xwaún dyi po.

⁸ Ní nyɔ ɓěɔ̀ kè ganìǎ ɖǎ hwɔìn, ké wa nì ḿ dyoɖoi pòɛ̌n. Ɔ jèɛɛ, ḿ nyɛ́ wa mú.

⁹ Ní nyɔ ɓěɔ̀ hwɔìn naà ɖò ɓɛ́ géé kúɖúú wáɖá kɔ̃ kɛ. Ɓě ɖá xwáɖá-xwíɖíi-nìmìì séín ɓěɔ̀, ɓɛ́ wa ké ɖɛ tà.

¹⁰ Nyɔ-wuɖuí-kɔ̃̀-nyɔ̀ kúɖúú ɓě ɓɛ́ wa sɔ̀ìn ɓóɖó-dù kà kò ɖò ɓě kɔ̃ɛɛ ɖǎ ní géɖéè-gbǎɔ̀ mú gbɔɔ̀. Wa ɖǎ ɓáá-ɖɛ̀ séín nì ɖé ní géɖéè-gbǎɔ̀ múɛɛ kɔ̃in síìn, ké wa ɖǎ ní géɖéè-gbǎ nɔ̀mɔ̀ dyíinɔ̀ gbǎùn-fúɖúá mú nyu.

¹¹ Wa nyuɛ gbǎùn-fúɖúá mú, ké pá fóɖóúnɔ̀ pɛ̃́ ɓó ḿ dyúa dyi. Ɓóɖó gànáɔ̀ mɔ̀ǎ gbǎùn-fúɖúá, ké nyɔ ɖò se ɖéɛ jè gbo kɔ̃̀.

¹² Ɖɛ-mú-gbɔɔ̀-nyɔ̀ ɓěɔ̀ nì ɖé pá púú ɓě nìà ɖé toɖo séín ɓěɔ̀ dya ɖé gbǎùn-fúɖúáɔ̀ kɔ̃ɛɛ mú. Ḿ ɖǎ gàsíà tò, ɓɛ́ ɔ ké ɓóɖó gànáɔ̀ mú gbɔɔ̀, ké nyɔ ɖò se gìɖìǐ ɖò ɓéɖéɛ mu.

¹³ Wa ɓá hwítì ɖé waà geɖe ɓěɔ̀ gbo, kɛɛ pìǐ saá-saá ɖúɛ dyí. Wa saà wa mìɔùn, kɛɛ wa se ɖé ɖɛín-ɖɛ̀ ɖò dyé. Ké dɛ̃ nyu wa ɓó ɖɛ wa dyé ɖé waà geɖe ɓěɔ̀ gboɛɛ jè, sepóɛɖé ní dyoɖoɔ̀ nì wa kɔ̃.”

Ɖɛ ɓɛ́ Bounɓoɔ̀ cɛ̃ ɓá Éézùɖùɛ̀-nyɔ̀ ɓěɔ̀ mǔè ɓěɔ̀ jè dyíɛ

¹⁴ Ké Bounɓoɔ̀ cɛ̃ɛ ɖé, ké ɔ ɖá, “Ḿ ɓéɖé ɖɛ ɖò ɓɛ́ ḿ ké cɛ̃ ɓá ɓóɖó-dù ɓě nìà ɓó ní nyɔ ɓě mɔ̀ Éézùɖùɛ̀-dyù ɓěɔ̀ ɖeiɛɛ jè dyí. Wa mɔ̀ nyɔ ɓě ɓɛ́ wa nyìnììn kà ɓóɖó ɓɛ́ ḿ nyíà ní nyɔ ɓěɔ̀ kɛɛ dyíin nyɛ. Gmɔ̀ nɔ̄, ní mu hwòɖǒ-kɔ̃in-nyìnììn-nyɔ̀ nì ná ɓěa ɖé wa nììn ɓóɖó ɓěɔ̀ kɔ̃ zàùn kà nyɔ zàà ɓáá-ɖɛ̀ ɖò hwuɖuɛ, ké ní mu Júɖà-nyɔ̀ ɓěɔ̀ wa xwaún póìn.

¹⁵ Sɔ̀ìn ɓóɛ gboɛɛ, nìí, ní mu ɓóɖó-dù ɓěɛ̀ wìǐn dyéìn, ké ní mu wa ɖé wa mìɔùn nììn ɓíɖí-ɓòɖò ɓě mɔ̀à waà kɔ̃̀ɔ̀-ɖɛ̀ɔ̀ kɛɛ kɔ̃ ɖe kpaùn.

¹⁶ Ké wa dyi ní nyɔ ɓěɔ̀ kpeɖe ɓěɔ̀ cɛ̃́ nɔ̀mɔ̀ dyíin, ké wa dyi ḿ dyí gboò, kà dyúáɖò kà wa nyuɛ ma kà ní nyɔ ɓěɔ̀ tɛ̀mɛ̀ìn ɓɛ́ wa ké ma kà Béò dyí gboòɛɛ ní, nìí, wa mu ní nyɔ ɓě jǔùn ɖekè, ké waà nyuu-ɖɛ̀ ɓě mu mú wóɖóùn.

¹⁷ Kɛɛ ɓóɖó-dùɔ̀ nyɔ se ní wuɖuɔ̀ nyuɛ́ muɛɛ, ní mu ɔ hwuɖu zàùn gàná cá kà nyɔ zàà ɓáá-ɖɛ̀ ɖò hwuɖuɛ, ké ní mu ɔ mú gbɔɔ̀ùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”