Jɛ̀ɖèmádyà 11 - Ɓǎsɔ́ɔ̀ Báɓòɔ̀

Jɛ̀ɖèmádyà dyà nyɔ ɓěɔ̀ wuɖu wa kè Gèɖèpɔ́ɔ̀ dè ma kɛɛ jè hwìɖǐi

¹ Hwɛ̀ ké Bounɓoɔ̀ cɛ̃ɛ ma ḿ gbo ɖe, ké ɔ ɖá,

² “Tò dèè-wùɖù nìà kɛ ɖùǔ gbo nɔ̀mɔ̀ dyíin, ɓɛ́ m̀ kéɛ nyɔ ɓě nìà ɖé Júɖà-ɓòɖòɔ̀ kɔ̃ kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbo cɛ̃.

³ Cɛ̃ɛ wa gbo kà mɔ̄ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖá gboò-wùɖù nì nyɔ mɔ̀ nyɔ ɓɛ́ ɔ se dèè-wùɖù nìà kɛ dyi kpɔ̃ɔ́ muɛɛ kɔ̃ɛ.

⁴ Ɔ mɔ̀ wuɖu ɓɛ́ ḿ pòìn zɔ̃̌ɔ̀ wa ɓǎ nììn ɓǎ ɓěɔ̀ náún ti ɓɛ́ ḿ zà zɔ̃̌ɔ̀ kà wa ɖé Íjè-ɓòɖò ɓɛ́ ɔ hwɔìn ma kà nyɛ-gbà-wɔ̃̀ kɛɛ múɛ. Ɓó tia ɓaɖaa, ḿ cɛ̃ɛ zɔ̃̌ɔ̀ wa gbo, ké ḿ ɖá, ‘Ɓě tò ní wuɖuɔ̀ ɖùǔ gbo, ɓɛ́ ɓě ké ɖɛ séín ḿ cɛ̃à ɓě gboɛɛ nyu. Ɓě dyiɛ náa nyu ní, nìí, ɓě mu ní nyɔ ɓě jǔùn, ké ní mu ɓěɛ̀ Gèɖèpɔ́ɔ̀ jǔùn.

⁵ Ɔ dyi ná nìǐn, ní mu ɖɛ ɓɛ́ ḿ ɖáìn zɔ̃̌ɔ̀ kà ɓě ɓǎ nììn ɓǎ ɓěɔ̀ nyɛ́nɛ́ín nyɛɛ nyuùn. Ḿ cɛ̃ɛ zɔ̃̌ɔ̀ wa gbo kà ní mu wa ɓóɖó bã-bã ɖò nyíìn nyɛ.’ Ké ɔ mɔ̀ ɓóɖó wa nìà kɔ̃ ɓó kàǔn wɛ̃̀.” Ké ḿ ɖá, “Ǹdyeo, Bounɓo.”

⁶ Hwɛ̀ ké Bounɓoɔ̀ cɛ̃ɛ ḿ gbo ɖe, ké ɔ ɖá, “Mu ɖé Júɖà-hwɔ̀ɖɔ̀ ɓěɔ̀ mú kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gboi hwìè ɓěɔ̀ kɔ̃, ɓɛ́ m̀ ké ní dèè-wùɖùɔ̀ jè zio mú pòìn. Cɛ̃ɛ nyɔ ɓěɔ̀ gbo, ɓɛ́ wa ké wuɖu séín nìà ɖé ní dèè-wùɖùɔ̀ múɛɛ dyi kpɔ̃ kóɖó-kóɖó.

⁷ Ti ɓɛ́ ḿ ké zɔ̃̌ɔ̀ wa ɓǎ nììn ɓǎ ɓěɔ̀ ɖé Íjè-ɓòɖòɔ̀ kɔ̃ zàa, ḿ cɛ̃ɛ wa gbo kóɖó-kóɖó, ɓɛ́ wa ké ní wuɖuɔ̀ dyi kpɔ̃, ké ḿ gã̀ ma wa náún poɛń dyi tee ké ɔ dyɛ̀ìn ɓó kàǔn.

⁸ Kɛɛ wa nɔ́ɔ̀ ma ní wuɖuɔ̀ gbo, ké wa seɛ dyi kpɔ̃. Wa nyu ma ɖɛ ɓě ɓɛ́ waà hwòɖǒ-kɔ̃in-nyìnììn-hwòɖò mɔ̀ kɛ́ɛ́-hwòɖò-dyùàɔ̀ cɛ̃ wa gboɛɛ kánáá pū. Ɔ jèɛɛ, ḿ tò ma wa gǎ ɓɛ́ ní wuɖuɔ̀ dèà mɛ kɛɛ kɔ̃, sepóɛɖé wa se ma ní dèè-wùɖùɔ̀ dyi kpɔ̃.”

⁹ Ké Bounɓoɔ̀ cɛ̃ɛ ḿ gbo ɖe, ké ɔ ɖá, “Júɖà-nyɔ̀ ɓěɔ̀ kè Jùɖúsɛ̀ɖɛ̀ìn-nyɔ̀ ɓěɔ̀ ɖǎ ḿ kɛ́ɛ́ mú nyu.

¹⁰ Wa ɖǎ wa ɓǎ nììn ɓǎ ɓě ɓɛ́ wa nɔ́ɔ̀ zɔ̃̌ɔ̀ kà ní wuɖuɔ̀ dyi kpɔ̃ jè gboɛɛ nììn nàmàǔn ɓěɔ̀ nyu kpàǐ ɖú ɖe. Wa ɖǎ gèɖèpɔ́ɔ̀ kà kò ɖò ɓě gbo gmɔ̀ìn, ɓɛ́ wa ké wa ɓiè. Éézùɖùɛ̀-dyù ɓěɔ̀ kè Júɖà-nyɔ̀ ɓěɔ̀ ɖǎ ní dèè-wùɖù ɓɛ́ ḿ kè wa ɓǎ nììn ɓǎ ɓěɔ̀ dè zɔ̃̌ɔ̀ kɛɛ mú jaɖa.

¹¹ Ɔ ná nì jèɛɛ, ḿ nì wa gǎ kɔ̃ tòɛ̌n, ké wa seɛ xwaún póɛ mu. Wa mu ḿ kpéi pòìn, kɛɛ ḿ se waà kpé-po-wùɖùɔ̀ ɖùǔ gbo tòɛ̌ mu. Mɔ̄ Bounɓoɔ̀ mɔ̀ nyɔ cɛ̃à kɛ̀.

¹² Ɓó tia ɓaɖaa, nyɔ ɓě nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖòɔ̀ hwɔɖɔ tɔ̀ɔ̀ ɓěɔ̀ múɛɛ mu waà kũùn-kpò-gèɖèpɔ́ɔ̀ ɓě kɔ̃̀ bìì wa zàà sáa kɛɛ kpéi pòìn, kɛɛ gèɖèpɔ́ɔ̀ ɓěɔ̀ se wa póɛ̀n ɓɛ́ǐn mu ɖé waà fũ̀à-fṹá-tìɔ̀ mú.

¹³ Kà Júɖà-nyɔ̀ ɓěɔ̀ hwɔɖɔ ɓěɔ̀ nyuà jĩ̀ɛ̀ kɛɛ, kǎà waà gèɖèpɔ́ɔ̀ ɓěɔ̀ nyu jĩ̀ɛ̀. Ké kà hwɔɖɔ-gboi-hwìè ɓě nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ nyuà jĩ̀ɛ̀ kɛɛ, kǎà sáa-kɔ̃-zàìn-gbàà ɓě ɓɛ́ wa po ɓó Béò mɔ̀à nyɔ-dɛ̃-nyùìn-gèɖèpɔ́ɔ̀ kɛ bììɛɛ nyu jĩ̀ɛ̀.

¹⁴ Ɔ jèɛɛ, Jɛ̀ɖèmádyà, mɔ̀ǔn ɖá ɓɛ́ m̀ ké nyɔ ɓěɛ̀ bìì ɓaà, mɔɔ ɓɛ́ m̀ ké ḿ ɖɛ ɖò zɔ̀ìn ɓó wa bìì, sepóɛɖé ti wa mu ḿ ɖáùn ɖé waà fũ̀à-fṹá-tìɔ̀ múɛɛ, ḿ se waà ɖá-wùɖùɔ̀ ɖùǔ gbo tòɛ̌ mu.

¹⁵ “Nyɔ ɓě ɓɛ́ ḿ ɖɛ̀ɓɛ̀à múɛɛ nì ɖɛ gbà nyuɛń kánáá pū. Kà ɔ nìà náa, nìí, kpéɔ̀ nyɛ́ wa ɓéɖé wa ké ɖé ní gbǒɔ̀ mú nìɛ́? Waà hwòɖǒ ɖá wuɖu-ɖi-ɖi kè nyúà-ɖɛ̀ sáa-zàìn-zàìn ɓɛ́ìn mú-gbɔɔ̀-gbɔɔ̀ kéà wa kɔ̃ dyiɛɛ dyí zĩ̀ɛ̀ne? Ɖɛ nì náa nyu-nyu ɓɛ́ìn wa múàǔn poɛe?

¹⁶ Ḿ ɖáìn zɔ̃̌ɔ̀ wa ɔ́ɖè-cù-gɔ̃̀ ɖò ɓéɖé mí ɓɛ̀ɖɛ̀ɛ̀-ɓɛ̀ɖɛ̀ɛ̀, ɓɛ́ ɔ tòɖò mìɔ kɛ. Kɛɛ ɓó kàǔn wɛ̃ɛ, ní mu cu-gɔ̃̀ɔ̀ nyɛ kɔ̃ poùn dyììn ɖé dìì vɛ̀nɛ̀ ɖò mú, ké ɔ ɖɔ́ séín ɓěɔ̀ muɛ dyai sĩɛ hwɛ̀ìn.

¹⁷ “Éézùɖùɛ̀-dyù ɓěɔ̀ kè Júɖà-nyɔ̀ ɓěɔ̀ ɖǎ ḿ ɖɛ gbà bũ̌ nyu. Wa ɖǎ ḿ dyoɖoún po dyììn ɖé Béò gbo sáa-zà-zà mú. Ɔ ná nì jèɛɛ, mɔ̄ Bounɓo nìà ɖɛ séín kɔ̃in, mɔ̀ nyɔ ɓá ma kà wa kà nyɔ ɓáà ɓáá-ɖɛ̀ ɖòɛɛ, ní mu wa gǎ kɔ̃ tòùn.”

Wa sɔ́ Jɛ̀ɖèmádyà ɓɛ́ wa ké ɔ ɖáɓá

¹⁸ Bounɓoɔ̀ cɛ̃ɛ ma ḿ gbo kà ní mú-nyɛ́-nyɔ̀ ɓěɔ̀ nì ma ḿ sɔ́uń wɛ̃.

¹⁹ Ḿ nì ma pū kà ɓáɖáá ɓɛ́ wa po ɖúú ɖɔ ké wa nì ɖáɓá-naín kpauń wɛ̃. Ḿ se ma vɔ̃. Ké ḿ seɛ dyuò kà wa ɖǎ ma ɖɛ gbà ɓě dyí sɔ́ ɓá ḿ jè dyíɛ. Wa cɛ̃ɛ ma, ké wa ɖá, “Kà ɓɛ́ cuɔ̀ tɔɔ̀à ké ɔ tòɖòà keɛɛ, ɓěà ɖaɓa ɔ nɔ̀ɔ̀. Ɓěà ɖáɓá ɔ, ɓɛ́ ɔ jè ké dyi zi dà toɖo-kpàà kɔ̃.”

²⁰ Hwɛ̀ ké ḿ ɖú ma ɓaà kpàǐ, ké ḿ ɖá, “Bounɓo, mɔ̀ mɔ̀ nyɔ nìà ɖɛ séín kɔ̃in nyɛɛ, mɔ̀ mɔ̀à dyí-sɛ́ɖɛ́ìn-ɖɛ̀ wɔ̃-po-nyɔ̀ɛɛ, mɔ̀ dyuòà nyɔǔn-dyùɛ̀ hwòɖǒ-dyùà kè ɔ hwìɖǐi-poìn-ɖɛ̀ dyíɛɛ, ḿ po ní zaaɔ̀ ɖé m̀ xwaún dyi. Nyuɛ ɓɛ́ ḿ ké dyi gã̀, ɓɛ́ m̀ ké nyɔ ɓěɛ̀ kpa kɔ̃in zàìn.

²¹ Nyɔ ɓě ɓɛ́ wa cĩ́à ɖé Ànáfò-hwɔ̀ɖɔ̀ɔ̀ múɛɛ mɔ́ ma ḿ ɖáɓáa dyi. Wa ɖá wa mu ḿ ɖáɓáùn, ɔ jǔ ké ḿ dyi wuɖu ɓɛ́ m̀ dèìn ḿ wĩín nyɛɛ cɛ̃ kánáá pū ní.”

²² Ɔ ná nì jèɛɛ, Bounɓo mɔ̀ nyɔ nìà ɖɛ séín kɔ̃in nyɛɛ ɖá, “Gmɔ̀ nɔ̄, ní mu wa gǎ kɔ̃ tòùn. Waà gàa-dyù gmɔ̀ ɓěɔ̀ mu gàsíà dyúa sèìn, ké mɔ́ mu waà dyú-gàà tɔ̀ɔ̀ ɓěɔ̀ kè waà dyú-màà ɓěɔ̀ ɖáɓáùn.

²³ Ḿ ɖǎ ti ɖò dyi dè, ɓɛ́ ḿ ké Ànáfò-hwɔ̀ɖɔ̀ɔ̀ nyɔ ɓěɔ̀ gǎ kɔ̃ tò. Ké tiɔ̀ dyi ɓó nyini ní, waà nyɔ dyúáɖò dyɛ mɔ̀ùn se ɓíɖíi sèɛ̌ mu.”