Jɛ̀ɖèmádyà 10 - Ɓǎsɔ́ɔ̀ Báɓòɔ̀

Gèɖèpɔ́ɔ̀ ɓiè-ɓiè kè kũùn-kpò ɓiè-ɓiè

¹ Éézùɖùɛ̀-nyɔ̀ ɓě, ɓě tò ɖɛ ɓɛ́ Bounɓoɔ̀ ɓéɖé ɔ ké ɓě gbo cɛ̃ɛ ɖùǔ gbo.

² Ɔ ɖá, “Ɓěǐn ɖá ɓɛ́ ɓě ké ɓóɖó-dù kà kò ɖò ɓěɔ̀ nììn kpeɖe cɛ̃́. Ké ɓěɛ̀ hwòɖǒ ní ɖá ɔ ké ɓaɖa ɓá dyí-tɛ̀mɛ̀ìn-ɖɛ̀ ɓě ɓɛ́ ɓě dyé ɖé dyɔɔ̀ dyíɛɛ jè dyí, kɛbì ɖɛ ɓěa mɛ ɓàɖàìn ɓóɖó-dù kà kò ɖò ɓěɛ̀ nyɔ ɓěɔ̀ nììn hwòɖǒ kɛ.

³ Ɓóɖó-dù kà kò ɖò ɓěɛ̀ nyɔ ɓěɔ̀ nììn kpeɖe ɓěɔ̀ se kpáná ɖò mú nì. Wa mu, ké wa ɖaɓa cu, ké sɛ́ɖɛ́-nyɔ̀ ɖò mɔ̀ùn ɖú ɔ kũ̀à-nyùìn-nɛ̀ɛ̀-kpà ɓě dyí, ké ɔ sɛ cuɔ̀.

⁴ Ké wa bɛ̃̀ìn ɔ séɓàɖà kè góò. Ké wa ɖú jũ̌ kè túu-dyùà dyí, ké wa kɔɔ, nìí ɓɛ́ ɔ ní kɔ̃̀ ɖà dyi túò.

⁵ Waà kũùn-kpò ɓěɔ̀ kè cu ɓɛ́ nyɔ ɖò bɛ̃̀ìn ɖɔ-zɔ̃̀ ké ɔ nyànàìn ɖé geɖe ɖò gboiɛɛ hwɔìn ní. Wa ní wùɖù. Ké nyɔ ɖò ɓéɖé ɔ ké wa dyí ɖú, hwɛ̀ ɓɛ́ ɔ ké wa daí zàìn, sepóɛɖé wa ní nà. Ɓěǐn ɖá ɓɛ́ ɓě ké wa dyi fɛ̃̀ìn, sepóɛɖé wa se ɓě ɖɛ gbà ɖò bũ̌ nyuɛ ɓɛ́ìn, hwɛ̀ ḿ po níiń, wa ké ɓě ɖɛín-ɖɛ̀ ɖò dyí nyuɛ.”

⁶ Bounɓo, nyɔ ɖò se nì kà m̀ nìà kɛ, sepóɛɖé nì kpéɔ̀ ɓúá dyí mìɔ, ké nì nyɛ́nɛ́ mu ní mìɔ.

⁷ Mɔ̀ mɔ̀à ɓóɖó-dù séín ɓěɔ̀ kã́á kɛɛ, nyɛ́ se m̀ dya dèɛ̌ muɛ́? M̀ ɓéɖé m̀ ké dya-dè-dè dyé. Nyɔ ɖò se nì kà m̀ nìà kɛ, ɖé hwòɖǒ-fɔ̀nɔ̀-nyɔ̀ séín ɓě nì toɖo-kpàà kɔ̃ɛɛ hwìɛ̀ kè ɖé kã́á-ɓòɖò séín kɔ̃.

⁸ Wa se hwòɖǒ kɔ̃in cɛ̃̀, ké wa zuɖu ní. Kũùn-kpò ɓě ɓɛ́ wa mɔ̀ cu fóɖóún wɛ̃ɛ mɔ̀ wa ɖɛ-tɛ̀mɛ̀ìn-nyɔ̀.

⁹ Wa po kũùn-kpò ɓěɔ̀ séɓàɖà sɔ̀ ɖé Tásìà-hwɔ̀ɖɔ̀ɔ̀ múɛ kè góò sɔ̀ ɖé Dyúfà-pàɔ̀ múɛɛ bũ̌in. Wa mɔ̀ ɖɛ ɓě ɓɛ́ cu-sɛ-nyɔ̀ ɓěɔ̀ ɖǎ sɛ ké góò-ɓaɖa-nyɔ̀ ɓěɔ̀ ɖǎ góò bũ̌in po kɛ. Ɖɔ ɓě ɓɛ́ wa po wa múɛɛ mɔ̀ ɖɔ kpa wíɖí ɓáún-ɓáún ɓɛ́ ɔ ɓéɖé ɓùɖǔù-dyèɖè kè dyéɖé ɖàɓàìn kpèɛ̀ kɛ. Wa séín mɔ̀ sɛ́ɖɛ́-nyɔ̀ ɓěɔ̀ nyuu-kũ̀à.

¹⁰ Kɛɛ Bounɓo, m̀ mɔ̀ jǎà Gèɖèpɔ́ɔ̀. M̀ mɔ̀ nì-nì Gèɖèpɔ́ɔ̀, ké m̀ mɔ̀ sè-ná-sèɛ̀ kã́áɔ̀. M̀ dyi dyoɖoún kpá ní, ɓóɖó-kpà gànáà tɛɖɛ ní. Ké ɓóɖó-dù ɓěɔ̀ ɖò se nì dyoɖoɔ̀ dyúa dyi nyànàà ɓɛ́ìn.

¹¹ Bounɓo, m̀ ɖá ḿ mɛ cɛ̃ɛ wa gbo kà gèɖèpɔ́ɔ̀ ɓě ɓɛ́ wa mɔ̀ nyɔ seà ɓóɖó-kpàà kè dyɔɔ̀ mɛ kɛɛ, wa mu mú gbɔɔ̀ùn, ɓɛ́ wa jè ké dyi zi fɔɔ cá kɛ.

Bounɓoɔ̀ ɓàìn-wɛ̀ɖɛ̀

¹² Bounɓoɔ̀ mɔ̀ nyɔ mɛ ɓóɖó-kpàà dyììn ɖé ɔ kpéɔ̀ mú. Ɔ mɛ ɓóɖó-kpà gànáà dyììn ɖé ɔ fɔ̀nɔ̀-hwòɖǒɔ̀ mú, ké dyììn ɖé ɔ ɖɛ-múin-wɔ̃́-wɔ̃́ɔ̀ múɛɛ, ɔ pɛ́ɛ̀ dyɔɔ̀ kɔ̃in.

¹³ Ɔ dyi wuɖu tò nyɛ̀nɛ̀ɛ̀ ní, nìí, ní nìà ɖé dyɔɔ̀ dyíɛɛ ɖú kuɖu kpàǐ. Ɔ mɔ̀ nyɔ nyuɛ ké ní-kpò ɓěɔ̀ sɔ̀ dyí ɖé ɓóɖó-kpàà sèìn-naín. Ɔ mɔ̀ nyɔ nyuɛ ké wɛ́ɖɛ́-wɛ́ɖɛ́ po ti ɓɛ́ ní nì ɖaɓauń wɛ̃, ké ɔ mɔ̀ nyɔ mɔ̀ pìɔ̌ɔ̀ ɖé ɔ dyi-dèìn-naín ɓěɔ̀ zà-nyɔ̀.

¹⁴ Nyɔǔn séín se hwòɖǒ kɔ̃in cɛ̃̀, ké wa se ɖɛ ɖò dyuò. Kũùn-kpò ɓě ɓɛ́ góò-ɓaɖa-nyɔ̀ ɓě po góò bũ̌in nyɛɛ ɖǎ wa dɛ̃ nyùìn, sepóɛɖé waà kũùn-kpò ɓěɔ̀ mɔ̀ ɖɛ fóɖóún, ké fɛ̀ɛ̀ ɖò se wa mú nì.

¹⁵ Wa se kpáná ɖò mú nì, ké wa mɔ̀ dyɔ́-cù pū. Ti ɓɛ́ Bounɓoɔ̀ mu wa gǎ kɔ̃ tòùn wɛ̃ɛ, wa mu mú gbɔɔ̀ùn nyɛ̀nɛ̀ɛ̀.

¹⁶ Éézùɖùɛ̀ Gèɖèpɔ́ɔ̀ se nì kà wa nìà kɛ, sepóɛɖé ɔ mɔ̀ nyɔ mɛà ɖɛ séín nyɛ̀. Ɔ ɖǎ Éézùɖùɛ̀-nyɔ̀ ɓěɔ̀ gã, ɓɛ́ wa ké ɔ mìɔùn nììn nyɔ ɓě jǔ. Ɔ nyɛ́nɛ́ mɔ̀ Bounɓo mɔ̀ nyɔ nìà ɖɛ séín kɔ̃in nyɛ.

Júɖà-nyɔ̀ ɓěɔ̀ ɓóɖó-dù kà kò ɖò kɔ̃ kpa jè

¹⁷ Ḿ cɛ̃ɛ ma Júɖà-nyɔ̀ ɓěɔ̀ gbo, ké ḿ ɖá, “Ɓě mɔ̀ nyɔ ɓě nìà ɖé Jùɖúsɛ̀ɖɛ̀ìn-hwɔ̀ɖɔ̀ ɓɛ́ mú-nyɛ́-nyɔ̀ ɓěɔ̀ gbǎìn wɔ̃ɛ múɛɛ, ɓě poìn ɓěɛ̀ kɔ̃̀ɔ̀-ɖɛ̀ ɓěɔ̀ dyí, ɓɛ́ ɓě ké ɓɛ́ɖɛ́ kɔ̃ nì.

¹⁸ Bounɓoɔ̀ mu ɓě ɓóɖó nìà kɛ kɔ̃ dyi kúmúùn kà nyɔ poà ɖɛ ɖò xwáɖáún wɛ̃. Ɔ mu ɓě dyi wàìn, ké ɓěɛ̀ nyɔ dyúáɖò dyɛ mɔ̀ùn seɛ xwaún póɛ mu. Bounɓoɔ̀ ɖǎa cɛ̃o.”

¹⁹ Ké Jùɖúsɛ̀ɖɛ̀ìn-nyɔ̀ ɓěɔ̀ páná ma mú, ké wa ɖá, “Gboò-wùɖù nì à kɔ̃! À puà-bɛ̃̀ ɓěɔ̀ ɓúá kɔ̃in mìɔ. Ɖɛ ké à jě ɓěɔ̀ ɓɔ́ìn ɓɛ́ìn nyɛɛ ɖò se nì. À hwòɖǒ ɖá ɔ mɔ̀ɔ̌ ɖɛ ɖò ɓɛ́ à ɓɛ́ìnɔ̌ má hwìɖǐi kùɛ̀n nyɛ.

²⁰ À jàɖàìn-gbò ɓěɔ̀ ɖǎ wáɖáa hwɛ̀. Waà sã̀ìn-ɖùǔ ɓěɔ̀ ɖǎ dyi cɛ̃ìn hwɛ̀. À dyú ɓěɔ̀ séín ɖǎ à ɖei hwɛ̀, ké nyɔ ké à jàɖàìn-gbò ɓěɔ̀ dyi nyànàìn ɖeɛɛ ɖò se nì. Nyɔ ké waà ɖɔ ɓěɔ̀ dyií ɓáa ɖò se nì.”

²¹ Hwɛ̀ ké ḿ zà ma ɖé wuɖu, ké ḿ ɖá, “Ɖɛ kɔ̃̀ jè ɔ nìà náa mɔ̀, sepóɛɖé à wuɖuí-kɔ̃̀-nyɔ̀ ɓěɔ̀ se hwòɖǒ kɔ̃in cɛ̃̀, ké wa ní diè Bounɓoɔ̀ dyi. Ɔ jèɛɛ, waà nyuu-ɖɛ̀ ɓěɔ̀ ní wóɖó kpáná ɖò gbo, ké à nyɔ séín ɓěɔ̀ ɖǎà dyi gbɛ̀ìn hwɔɛ̀.

²² Ɓě tò ɖùǔ, bɔ̃̌ ɖò nì dyiɛń. Kuɖu-kuɖu vɛ̀nɛ̀ nì ɖé ɓóɖó-dù nìà ɖé xwía kɛɛ kɔ̃ sɔ̀ǔn. Ɓóɖó-dùɔ̀ sójà ɓě mu Júɖà-hwɔ̀ɖɔ̀ ɓěɔ̀ wáɖáùn, ɓɛ́ ɖé ké xwáɖá-xwíɖíi-nìmìì ɓěɔ̀ cĩ́-naín jǔ.”

²³ Óó Bounɓo, ḿ dyuòɛ̀ kà nyɔ ɖò se ɔ fɛ̀ɛ̀ɔ̀ sèìn-naín wuɖuí kɔ̃̀ɛ, hwɛ̀ ḿ po níiń, ɔ cĩ́-cĩ́ gànáɔ̀.

²⁴ Bounɓo, zà ḿ kpeɖe, kɛɛ ɔ mɛ mɔ̀ nyɔ ɓɛ́ìn ḿ dyí nyɛ̀nɛ̀ɛ̀ kɛ. Mɔ̀ǔn ɖá ɓɛ́ m̀ kéɛ ɖé nì dyoɖoɔ̀ mú nyùìn, ní jè ní kɔ̃̀ ɖà dyi zi.

²⁵ Púè nì dyoɖoɔ̀ ɓóɖó-dù ɓě ɓɛ́ wa seà m̀ jè dyi kpɔ̃ɛɛ kɔ̃. Wa mɔ̀ nyɔ ɓě ɓɛ́ wa ní ɓiè m̀ wɛ̃. M̀ mɛ nyuɛ náa, sepóɛɖé wa ɖǎ à mɔ̀à nì nyɔ ɓěɔ̀ kɛɛ ɖáɓá. Wa ɖǎ à mú gbɔɔ̀ hwɔ, ké à ɓóɖó gànáà ɖǎ wáɖá, ké ɔ ɖǎ fóɖóún kpá.