Tɔ̀ɔ̀-ɓìɔ̀ 8 - Ɓǎsɔ́ɔ̀ Báɓòɔ̀

Míɖìàùn-nyɔ̀ ɓěɔ̀ toún-ɖu-ɖu hwɛ̀ìn-gbɔɔ̀

¹ Hwɛ̀ ké Ífèɖèìn-gàà ɓěɔ̀ diè ma Gíɖìɔ̀ùn dyi, ké wa ɖá, “Ɖɛ́ kɔ̃̀ jè m̀ seà à ɖá ti ɓɛ́ m̀ nì ma kà Míɖìàùn-nyɔ̀ ɓěɔ̀ gbo vɔ̃ùn muɛń nyɛɛ kɛ́?” Ké wa jɛ̀ìn ma ɔ dúi.

² Kɛɛ Gíɖìɔ̀ùn jǔ ma wa gɔ̃̌, ké ɔ ɖá, “Ɖɛ́ ḿ nyu ɓɛ́ ɔ dyi ɓě mɔ̀ùn dyí ziɛ́? Ɓě ɖǎ ɖɛ ɓáún-ɓáún nyu, ké ɔ zi ḿ dyí. Má, Ífèɖèìn-nyɔ̀ ɓěɔ̀ nììn mɔɔ́-bɛ̃̌-po-po kpa ɖɛ ké ɔ zi Áɓìɛ́zɛ̀ɛ̀ xwíníín-dyù ɓěɔ̀ nììn mɔɔ́-cɛ̃-cɛ̃ gànáɔ̀ dyíe?

³ Gèɖèpɔ́ɔ̀ ɖǎ ɓě Ówèɖè kè Zééɓì mɔ̀à Míɖìàùn-nyɔ̀ ɓěɔ̀ nàìn-nyɔ̀ ɓěɔ̀ kɛɛ ɓě xwaún dyi po. Ɖɛ́ ḿ ɓɛ́ìn má nyuɛ ɓɛ́ ɔ kè ɖɛ ɓě ɖǎà nyuɛɛ ké wɔ̃ ɓɛ́ìn nyɛ́?” Ti ɓɛ́ ɔ cɛ̃ ma ɖɛ nìà kɛɛ, púɛɛ, waà dyoɖo-hwòɖòɔ̀ wáɖá ma ní.

⁴ Ɔ nì ná kɛɛ Gíɖìɔ̀ùn kè ɔ gàa hɔ̃dɛ̀ɖɛ̀ tã ɓěɔ̀ ɖǎ ma Jɔ́nì-nìɔ̀ péɖé. Wa sa ma ní dyɛo, kɛɛ wɛ̃́ɛ́ kɛɛ, wa nì ma mú-nyɛ́-nyɔ̀ ɓěɔ̀ kíɖíí ke.

⁵ Ti wa dyá ma Súkò-hwɔ̀ɖɔ̀ɔ̀ kɛɛ, Gíɖìɔ̀ùn cɛ̃ɛ ma hwɔɖɔɔ̀ gàa ɓěɔ̀ gbo, ké ɔ ɖá, “Ní ɓaà ɓě ní, ɓě nyí ní sójà ɓěɛ̀ bɛɖɛɛ̀-kpò gbɛ̀ǐ-gbɛ̀ǐ, sepóɛɖé wa sa ní mìɔ, ké à nì Zɛ́ɓà kè Zààmúnà mɔ̀à Míɖìàùn-kã̀ǎ ɓěɔ̀ kɛɛ kíɖíí kpáuń ke.”

⁶ Kɛɛ Súkò-hwɔ̀ɖɔ̀ɔ̀ wuɖuí-kɔ̃̀-nyɔ̀ ɓěɔ̀ ɖá, “Nì hwòɖǒ ɖá Zɛ́ɓà kè Zààmúnà ɖǎ m̀ xwaún dyi kpá nɔ̀ɔ̀e, ɓɛ́ à kéà nì sójà ɓěɔ̀ bɛɖɛɛ̀ nyíɛ̀e?”

⁷ Hwɛ̀ ké Gíɖìɔ̀ùn jǔ ma wa gɔ̃̌, ké ɔ ɖá, “Ti ɓɛ́ Bounɓoɔ̀ mu Zɛ́ɓà kè Zààmúnà ḿ xwaún dyi poùn wɛ̃ɛ, ní mu ɓě wí-cù ɓě sɔ̀à ɖé gbǎùn-fúɖúáɔ̀ kɔ̃ɛɛ ɓàɖàìn, ɓɛ́ ɓěɛ̀ fɔ́ ké dyi fáìn ɓó ɖɛ ɓě nyuà kɛɛ jè.”

⁸ Ké ɔ sɔ̀ ma ɓó, ké ɔ mu ma ɖé Pɛ̀níè-hwɔ̀ɖɔ̀ɔ̀ mú, ké ɔ zɔ̀ìn ma wa ɖɛ dyúáɖòɔ̀ ɖekè. Kɛɛ wa mɔ̀ùn jǔ ma ɔ gɔ̃̌ kà Súkò-gàà ɓěɔ̀ nyu ma kà ɔ gɔ̃̌ jǔɛ kɛ.

⁹ Ɔ jèɛɛ, ɔ cɛ̃ɛ ma Pɛ̀níè-gàà ɓěɔ̀ gbo, ké ɔ ɖá, “Ɔ jǔ ké ḿ dyi toɔ̀ ɖu, ké ḿ dyi ɖe dyi ní, nìí, ní mu hwɔɖɔ-dyí-gmɔ̀ìn-gbò nìà kɛ wáɖáùn.”

¹⁰ Ɓó tia ɓaɖaa, Zɛ́ɓà kè Zààmúnà kè waà sójà ɓěɔ̀ nì ma ɖé Kákɔ̀-hwɔ̀ɖɔ̀ɔ̀ mú. Waà sójà ɓěɔ̀ mɔ̀ ma nyɔ táázĩ̀ìn ɓaɖa-bùè sè hm̀m̌. Wa mɔ̀ nyɔ ɓě sɔ̀à ɖé ɓóɖó ɓě nìà ɖé dyóɖó-xwáɖáún-wóɖóìn-naínɔ̀ kɔ̃ɛɛ nììn sójà ɓě sèà ɓóɛ. Waà sójà ɓěɔ̀ táázĩ̀ìn hɔ̃dɛ̀ɖɛ̀ dyúáɖò kè táázĩ̀ìn kpáɖá-nyɔ ɖǎ ma dyi kpá.

¹¹ Ké Gíɖìɔ̀ùn kpa ma hwìè ɓɛ́ nyɔ ɓě cĩ́ jàɖàìn-gbò ɓě múɛɛ kpa ma tee, ɓɛ́ ɔ hwɔ ma ɖé Nɔ́ɓà-hwɔ̀ɖɔ̀ɔ̀ kè Jɔ́ɓàhà-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀ dyíɛ. Ké ɔ gèìn ma mú-nyɛ́-nyɔ̀ ɓěɔ̀ sójà ɓě se ma kà ɔ jè hwìɖǐi dèɛɛ kɔ̃ún.

¹² Púɛɛ, Zɛ́ɓà kè Zààmúnà mɔ̀à Míɖìàùn-nyɔ̀ ɓěɔ̀ kã́á ɓěɔ̀ kɛɛ kpá ma xwáɖáún. Kɛɛ Gíɖìɔ̀ùn kpá ma wa kíɖíí, ké ɔ kpɔ̃ ma wa. Ké ɔ nyuɛ ké mú-nyɛ́-nyɔ̀ ɓěɔ̀ sójà kúɖúú ɓěɔ̀ gbɛ̀ìn ma dyi.

¹³ Ti ɓɛ́ Gíɖìɔ̀ùn mɔ̀à Jóàsìɛ̀ dyú-gààɔ̀ kɛɛ nìǎ ma toɔ̀ gbo sɔ̀ǔn wɛ̃ɛ, ɔ zĩ̀ìn ma ɖé Hɛ́wɛ̀ɖɛ̀-tòɖò ɓěɔ̀ pṹa.

¹⁴ Ké ɔ kpɔ̃ ma gàa-dyù gmɔ̀ ɖò ɓó hwìèɔ̀ kɔ̃. Gàa-dyù gmɔ̀ɔ̀ sɔ̀ ma ɖé Súkò-hwɔ̀ɖɔ̀ɔ̀ mú. Ɔ diè ma gàa-dyù gmɔ̀ɔ̀ dyi, ké gàa-dyù gmɔ̀ɔ̀ céè ma Súkò-hwɔ̀ɖɔ̀ɔ̀ nyɔ vɛ̀nɛ̀ kpáɖá-nyɔ tã ɓaɖa-bùè sè mɛ̀nɛ̌ìn-sɔ̃́ ɓěɔ̀ nyɛ́nɛ́ ɓíɖíi.

¹⁵ Hwɛ̀ ké Gíɖìɔ̀ùn mu ma ɖé Súkò-hwɔ̀ɖɔ̀ɔ̀ nyɔ vɛ̀nɛ̀ ɓěɔ̀ gbo, ké ɔ ɖá, “Ɓě gmɔ̀ nɔ̄, kà Zɛ́ɓà kè Zààmúnà kɔ̃̀ jè ɓě taɓa ma kà ḿ tĩ́ɔ, ɓɛ́ ɓě dyi níiń, ‘Nì hwòɖǒ ɖá Zɛ́ɓà kè Zààmúnà ɖǎ m̀ xwaún dyi kpá, ɓɛ́ à kéà nì sójà ɓě saà kɛɛ bɛɖɛɛ̀ nyíɛ̀e?’ kɛɛ nìɛ.”

¹⁶ Ké ɔ ɖú ma wí-cù ɓě sɔ̀ìn ɖé gbǎùn-fúɖúáɔ̀ kɔ̃ɛɛ dyí, ké ɔ ɓàɖàìn ma Súkò-hwɔ̀ɖɔ̀ɔ̀ nyɔ vɛ̀nɛ̀ ɓěɔ̀, ɓɛ́ ɔ ké wa náún-pòìn-ɖɛ̀ jǔ.

¹⁷ Sɔ̀ìn ɓóɛ gboɛɛ, ɔ mu, ké ɔ wáɖá ma Pɛ̀níè-hwɔ̀ɖɔ̀ɔ̀ hwɔɖɔ-dyí-gmɔ̀ìn-gbòɔ̀, ké ɔ ɖáɓá ma hwɔɖɔɔ̀ gàa ɓěɔ̀.

¹⁸ Hwɛ̀ ké ɔ diè ma Zɛ́ɓà kè Zààmúnà dyi, ké ɔ ɖá, “Xwɛ̌ gàa ɓě ɓɛ́ ɓě ɖáɓá ma kà ɖé Táɓɔ̀-hwɔ̀ɖɔ̀ɔ̀ múɛɛ nyu nìɛ̀ kɛ́?” Ké wa jǔ ma ɔ gɔ̃̌, ké wa ɖá, “Wa nì kà m̀ nìà kɛ. Wa ɖò-ɖò nì kà kã́á dyú-gàà ɓě nìà kɛ.”

¹⁹ Ké Gíɖìɔ̀ùn cɛ̃ɛ ma wa gbo, ké ɔ ɖá, “Wa mɔ̀ ḿ ɖíí-gàà ɓě. Ḿ kè wa wóɖó ɖe dyúáɖò xwíníín. Ḿ ɓɛ́ìn gboòɛ̀ ɓó Bounɓoɔ̀ dyúa kà ɔ jǔ ké ɓě se ma wa ɖáɓá ní, nìí, ḿ seɔ́ ɓě mɔ̀ùn ɖáɓáa muɛ.”

²⁰ Ké ɔ cɛ̃ɛ ma ɔ dyú-gàà vɛ̀nɛ̀ mɔ̀ Jɛ́tɛ̀ɖɛ̀ kɛɛ gbo, ké ɔ ɖá, “Ɖáɓá wa!” Kɛɛ Jɛ́tɛ̀ɖɛ̀ se ma ɔ gàsíàɔ̀ kpaɖaún zà, sepóɛɖé ɔ mɔ̀ ma gàa-dyù-gbɔ́ɔ́ ke, ké ɔ fɛ̃̀ìn ma ní.

²¹ Ké Zɛ́ɓà kè Zààmúnà ɖá, “M̀ mìɔùn mɛ dyiɛ nyu, sepóɛɖé gàa mɔ̀ gàa-ɖɛ̀-nyu-nyɔ̀.” Ɔ jèɛɛ, Gíɖìɔ̀ùn sɔ̀ ma dyí, ké ɔ ɖáɓá ma wa. Ké ɔ zà ma bɛ̃̀ìn-ɖɛ̀ ɓě nì ma waà sǒ-nì-gbu-kɔ̃ún ɓěɔ̀ ɖɔiɛɛ ɓó dyi.

²² Sɔ̀ìn ɓó ɖɛ ɓěɛ̀ gboɛɛ, Éézùɖùɛ̀-nyɔ̀ ɓěɔ̀ cɛ̃ɛ ma Gíɖìɔ̀ùn gbo, ké wa ɖá, “À mɔ́ ɓɛ́ m̀ ké à wuɖuí kɔ̃̀, m̀ kè nì xwíníín-dyù ɓě, sepóɛɖé m̀ ɖǎ à póìn sɔ̀ìn ɖé Míɖìàùn-nyɔ̀ ɓěɔ̀ xwaún.”

²³ Kɛɛ Gíɖìɔ̀ùn cɛ̃ɛ ma wa gbo, ké ɔ ɖá, “Ḿ se mɔ́ ḿ ké ɓě wuɖuí kɔ̃̀, mɔɔ ké ní dyú-gààɔ̀ se ɓě wuɖuí kɔ̃̀ɔ̌ mu. Bounɓoɔ̀ mɔ̀ nyɔ mu ɓě wuɖuí kɔ̃̀ùn.”

²⁴ Kɛɛ ɔ cɛ̃ɛ ma wa gbo ɖe, ké ɔ ɖá, “Ní mɔ́ ɖɛ dyúáɖò ɖé ɓě gbo. Ɖɛɔ̀ mɔ̀ ɓɛ́ ɓě ɖò-ɖò ké ḿ ɓěɛ̀ ɖùǔn-po-ɖɛ̀ ɓě ɓɛ́ ɓě zàà toɔ̀ gboɛɛ nyí.” Ɔ nì ná kɛɛ, góò-ɖùǔn-po-ɖɛ̀ ɖùǔn-po-po mɔ̀ ma Míɖìàùn-nyɔ̀ ɓě mɔ̀à Ésìméò-nyɔ̀ kɛɛ kpeɖe.

²⁵ Ké wa jǔ ma ɔ gɔ̃̌, ké wa ɖá, “À wɔ̃́ ní. À muɛ náa nyuùn.” Ɔ jèɛɛ, wa soɖo ma mú-po-ɖɔ̀ ɖò dyi. Ké nyɔ ɖò-ɖò séín po ma ɓó ɖùǔn-po-ɖɛ̀ ɓɛ́ wa zà ɖé waà to-gbo-zà-ɖɛ̀ ɓěɔ̀ hwìɛ̀ kɛ.

²⁶ Góò-ɖùǔn-po-ɖɛ̀ ɓɛ́ ɔ zà ma kà nyɔ ɓěɔ̀ xwaiɛɛ xwa-ku-ku ɓɛ́ìn ma pṹá-dyèɖè kpáɖá-nyɔ sɔ̃́ sè tã jǔɛ. Ɓó kɔ̃in ɖeɛɛ, ɔ dyé ma bɛ̃̀ìn-ɖɛ̀ ɓě kè ɖɔ-po-ɖɛ̀-dù kò-kò ɓě kè ɖɔ nɔ̀mɔ̀ kɔ̃in ɓě ɓɛ́ Míɖìàùn-kã̀ǎ ɓěɔ̀ po ma kà múɛ ɔ kè ɖɔ-po-ɖɛ̀ ɓě nì ma kà waà sǒ-nì-gbu-kɔ̃ún ɓěɔ̀ ɖɔɛ.

²⁷ Ké Gíɖìɔ̀ùn ɖú ma góòɔ̀ dyí, ké ɔ mɛɛ ma kũùn-kpò ɖò mú. Ké ɔ dèɛ̀ ma ɖé ɔ ɓíɖí-hwɔ̀ɖɔ̀ kɔ̃̀ nyɛ́nɛ́ mɔ̀à Áfàɖà kɛɛ mú dyi. Ké Éézùɖùɛ̀-nyɔ̀ séín ɓěɔ̀ táà ma Gèɖèpɔ́ɔ̀ dyi, ké wa mu, ɓɛ́ wa ké ma kũùn-kpòɔ̀ ɓiè. Púɛɛ, ɖɛ nìà kɛ mɔ̀ǎ ma xwáɖá-gbǎ-mú ɓó Gíɖìɔ̀ùn kè ɔ gbǒ-xwíníín-nyɔ̀ ɓěɔ̀ bìì.

²⁸ Kǎà Éézùɖùɛ̀-nyɔ̀ ɓěɔ̀ nyu ma Míɖìàùn-nyɔ̀ ɓěɔ̀ toún ɖuɛ. Ké wa se ma dú dyií ɖú ɖe fɔɔ cá. Sɔ̀ìn ɓó ɖɛ ɓěɛ̀ gboɛɛ, púɛɛ, gìɖìǐ nì ma ɖé ɓóɖóɔ̀ kɔ̃ ɓó zɔ̃ kpáɖá-nyɔ sɔ̃́ xwíníín ti ɓɛ́ Gíɖìɔ̀ùn nì ma toɖo kɔ̃ keɛ.

Gíɖìɔ̀ùnɛ̀ mɛ́ jè

²⁹ Ti ɓɛ́ Jɛ́wùɖù-Béò kɔ̃ nyɛ́nɛ́ tɔ̀ɔ̀ mɔ̀à Gíɖìɔ̀ùn mɔ̀à Jóàsìɛ̀ dyú-gààɔ̀ kɛɛ ɖǎ ma Míɖìàùn-nyɔ̀ ɓěɔ̀ toún ɖuɛɛ, ɔ mu ma ɔ ɓíɖí ɖe.

³⁰ Gíɖìɔ̀ùn wóɖóìn ma gàa-dyù kpáɖá-nyɔ tã ɓaɖa-bùè, sepóɛɖé ɔ nyɔ́nɔ́ ɓěɔ̀ vò ma dyí mìɔ.

³¹ Ɔ kè ɔ gmaɖe-nyɔ̀nɔ̀ ɓɛ́ ɔ cĩ́ ma ɖé Sɛ́kɛ̃̀ìn-hwɔ̀ɖɔ̀ɔ̀ múɛɛ wóɖóìn ma gàa-dyù ɖò ɖekè, ké ɔ jǔìn ma dyúɔ̀ Àbímɛ̀nɛ̀-nyɛ̀nɛ̀.

³² Púɛɛ, Gíɖìɔ̀ùn mɔ̀à Jóàsìɛ̀ dyú-gààɔ̀ kɛɛ mɛ́ ma ní. Ɔ nyɛ ma mìɔ hwɛ̀ ké ɔ mɛ́ ma. Ké wa zàìn ma ɔ dyóɖóún ɖé Áfàɖà-hwɔ̀ɖɔ̀ mɔ̀à Áɓìɛ́zɛ̀ɛ̀ xwíníín-dyù ɓěɔ̀ ɓíɖí-hwɔ̀ɖɔ̀ɔ̀ kɛɛ mú, ɖé ɔ ɓǎ Jóàsì nììn xwɛ́-ɓìɔ̀ mú.

³³ Ti ɓɛ́ Gíɖìɔ̀ùn mɛ́ ma nyɛ̀nɛ̀ɛ̀ kɛɛ, púɛɛ, Éézùɖùɛ̀-nyɔ̀ ɓěɔ̀ táà ma Gèɖèpɔ́ɔ̀ dyi, ké wa ɖú ma Béò ɓiè kpàǐ ɖe. Wa nyànàìn ma Béò-Bɛ́wìɖì dyi, ɓɛ́ ɔ ké ma waà gèɖèpɔ́ɔ̀ jǔ.

³⁴ Ké Bounɓo mɔ̀à waà Gèɖèpɔ́ɔ̀, ɓɛ́ ɔ póìn ma kà wa sɔ̀ìn ɖé waà mú-nyɛ́-nyɔ̀ séín ɓě nì wáká séín kɔ̃ɛɛ xwaún wɛ̃ɛ jè sɔ̀ ma wa hwìɖǐi.

³⁵ Ké wa se ma zùo-po-hwòɖò ɓéɖé ɓó Jɛ́wùɖù-Béò mɔ̀à Gíɖìɔ̀ùn kɛɛ gbǒ-xwíníín-nyɔ̀ ɓěɔ̀ bìì, ɓó nɔ̀mɔ̀ dyíin séín ɔ ɖǎ ma kà wa bìì nyuɛɛ jè.