Tɔ̀ɔ̀-ɓìɔ̀ 7 - Ɓǎsɔ́ɔ̀ Báɓòɔ̀

Gíɖìɔ̀ùn ɖu Míɖìàùn-nyɔ̀ ɓěɔ̀ toún

¹ Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Jɛ́wùɖù-Béò kɔ̃̀ nyɛ́nɛ́ tɔ̀ɔ̀ mɔ̀à Gíɖìɔ̀ùn kɛ kè ɔ gàa séín ɓěɔ̀ sɔ̀ ma dyí, ké wa mu ma ɖé Háwòɖò-nì-dùɔ̀ wĩín, ké wa nyànàìn ma waà jàɖàìn-gbò ɓěɔ̀ ɖé dyi. Míɖìàùn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ hwɔ ma ɖé Gíɖìɔ̀ùn kè ɔ gàa ɓěɔ̀ jàɖàìn-hwɔ̀ɖɔ̀ɔ̀ xwía dyí. Míɖìàùn-nyɔ̀ ɓěɔ̀ nì ma ɖé bɔɔ-kpà nì ma ɖé Mɔ́wɛ̀ɖɛ̀-tòɖòɔ̀ wáún wɛ̃ɛ kɔ̃.

² Ɓó tia ɓaɖaa, Bounɓoɔ̀ cɛ̃ɛ ma Gíɖìɔ̀ùn gbo, ké ɔ ɖá, “Gàa ɓě m̀ ɓéɖéà kɛɛ vò dyí mìɔ ɓó ḿ bìì, ɓɛ́ ḿ ké Míɖìàùn-nyɔ̀ ɓěɔ̀ wa xwaún dyi poɛ. Ɔ dyi ná nìǐn, Éézùɖùɛ̀-dyù ɓěɔ̀ mu ɓɔ́ɖɔ́ùn, ɓɛ́ wa ké níiń, wa mìɔùn nììn kpéɔ̀ ɖǎ wa póìn.

³ Ɔ jèɛɛ, ɓó kàǔn wɛ̃ɛ, m̀ mɛ po wuɖui, ɓɛ́ m̀ ké níiń, ‘Nyɔ ɓɛ́ fã̀à nyu ké ɔ dyɔɔ̀ nì tɛɖɛiń nyɛɛ mɛ sɔ̀ Gíɖèà-tòɖòɔ̀ dya, ɓɛ́ ɔ ké ɖe kɔ́ìn.’ ” Púɛɛ, gàa táázĩ̀ìn kpáɖá-nyɔ sè sɔ̃́ kɔ́ìn ma ɖe. Ké gàa táázĩ̀ìn ɓaɖa-bùè sè ma ɓó.

⁴ Kɛɛ Bounɓoɔ̀ cɛ̃ɛ ma Gíɖìɔ̀ùn gbo ɖe, ké ɔ ɖá, “Gàa ɓěɔ̀ vò dyí ke mìɔ. Kpa wa ɖé níɔ̀ wĩín, nìí, ní mu ɖé wa múin cɛ̃́ìn ɓó m̀ bìì. Ɔ jǔ ké ḿ dyi níiń, ‘M̀ kè nyɔ nìà kɛ mɛ muo’ ní, nìí, m̀ kè ɔ mɛ mu. Ɔ jǔ ké ḿ dyi níiń, ‘M̀ kè nyɔ nìà kɛ mɛ ɓɔ́ muɛo’ ní, nìí, m̀ kè ɔ mɛ ɓɔ́ muɛ.”

⁵ Ɔ jèɛɛ, Gíɖìɔ̀ùn kpa ma gàa ɓěɔ̀ ɖé níɔ̀ wĩín. Ké Bounɓoɔ̀ cɛ̃ɛ ma ɔ gbo, ké ɔ ɖá, “Zà nyɔ ɓě ɓɛ́ wa mu níɔ̀ náùn kà gbe ɓɛà níɛɛ ɖé nyɔ ɓě ɓɛ́ wa mu kɔ́-dù hwuɖu taɓaùn, ɓɛ́ wa ké níɔ̀ wɔ̃ gboi ɓaɖa, ɓɛ́ wa kéɛ náa hwìɛ̀.”

⁶ Ké nyɔ ɓě píníìn ma níɔ̀ xwaún, hwɛ̀ wa dyiɛ ma náa mɔ̀ ma gàa hɔ̃dɛ̀ɖɛ̀ tã. Nyɔ séín ɓě sèà ɓó ɖeɛɛ taɓa ma kɔ́-dù hwuɖu, ké wa ɓaɖa ma níɔ̀ wɔ̃ gboi.

⁷ Hwɛ̀ ké Bounɓoɔ̀ cɛ̃ɛ ma Gíɖìɔ̀ùn gbo, ké ɔ ɖá, “Ní mu ɓě póìn, ɓɛ́ ḿ ké Míɖìàùn-nyɔ̀ ɓěɔ̀ ɓě xwaún dyi po dyììn ɖé gàa hɔ̃dɛ̀ɖɛ̀ tã ɓě ɓɛ́ wa píníàìn níɔ̀ xwaún wɛ̃ɛ mú. Gàa ɓě sèà ɓóɛɛ ɖò-ɖò séín mɛ mu wa ɓíɖí-taún.”

⁸ Ɔ jèɛɛ, Gíɖìɔ̀ùn ɖoɓo ma Éézùɖùɛ̀-nyɔ̀ séín ɓě sèà ɓóɛɛ wa ɓíɖí-taún ɖe. Ké gàa hɔ̃dɛ̀ɖɛ̀ tã ɓěɔ̀ ɖú ma gàa ɓě kɔ́ìn ma kà ɖeɛɛ nììn ɖii-ɖɛ̀ kè ɖɔ-kpa ɓěɔ̀ dyí. Ɓó tia ɓaɖaa, Míɖìàùn-nyɔ̀ ɓěɔ̀ nììn jàɖàìn-hwɔ̀ɖɔ̀ɔ̀ nì ma ɖé wa xwíɖíi ɖé bɔɔ̀ kɔ̃.

⁹ Ké Bounɓoɔ̀ cɛ̃ɛ ma Gíɖìɔ̀ùn gbo ɓó máaún, ké ɔ ɖá, “Sɔ̀ dyí, ɓɛ́ m̀ ké Míɖìàùn-nyɔ̀ ɓěɔ̀ nììn jàɖàìn-hwɔ̀ɖɔ̀ɔ̀ to kpa, sepóɛɖé ní mu wa m̀ xwaún dyi poùn.

¹⁰ Ɔ jǔ ké m̀ dyi fɛ̃̀ìn, ké m̀ se wa to kpaa ɓɛ́ìn ní, nìí, m̀ kè nì gbo-nì-nyɔ̀ mɔ̀à Púwàɖà kɛɛ mɛ mu ɖé ɓíɖíi dɛ̀ wa nìà kɛ,

¹¹ ɓɛ́ m̀ ké waà dɔ́ɔ́-dè-wùɖù wɔ̃́. Sɔ̀ìn ɓóɛ gboɛɛ, ní kpé mu m̀ dyí kpáùn, ɓɛ́ m̀ ké wa to kɔ̃ kpa.” Ɔ jèɛɛ, Gíɖìɔ̀ùn kè ɔ gbo-nì-nyɔ̀ mɔ̀à Púwàɖà kɛɛ sɔ̀ ma dyí, ké wa mu ma ɓíɖíi ɖé mú-nyɛ́-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wĩín.

¹² Ɓó tia ɓaɖaa, Míɖìàùn-nyɔ̀ ɓěɔ̀ kè Àmáɖɛ̀-nyɔ̀ ɓěɔ̀ ɔ kè nyɔ tɔ̀ɔ̀ séín ɓě sɔ̀à ɖé ɓóɖó ɓě nìà ɖé dyóɖó-xwáɖáún-wóɖóìn-naínɔ̀ kɔ̃ɛɛ nì ma ɖé bɔɔ-kpàɔ̀ kɔ̃ kà kpã̌ùn-tò nìà kɛɛ ɓó dyí vò jè. Ké waà sǒ-nì-gbu-kɔ̃ún ɓěɔ̀ vò ma dyí mìɔ, ké wa se zɛɖɛɛ ɓɛ́ìn.

¹³ Ti ɓɛ́ Gíɖìɔ̀ùn nyini ma ɓóɛɛ, púɛɛ, gàa ɖò nì ma ɔ dya-wùɖù ɔ ɓǎto ɖò gbo poɛń. Ɔ nìɛ̀ ma ɔ ɓǎtoɔ̀ gbo cɛ̃iń, ké ɔ ɖá, “Ḿ dya ké báɖè-bɛ̀ɖɛ̀ɛ̀-kpò hìɖìì ɖò dyà kiɖiòɛ̀, ké ɔ kpá nɔ̄ à jàɖàìn-hwɔ̀ɖɔ̀ɛ̀ mú. Ɔ tĩ́ ma jàɖàìn-gbò ɖò gana-kà jèɛɛ, jàɖàìn-gbòɔ̀ cɛ́ɛ̀ ma xwa, ké ɔ wáɖáìn xwíníín.”

¹⁴ Ké ɔ mǔèɔ̀ zà ma ɖé wuɖu, ké ɔ ɖá, “Ɖɛ nìà kɛ se ɖɛ kà kò ɖò, kɛɛ ɔ mɔ̀ Gíɖìɔ̀ùn mɔ̀à Jóàsìɛ̀ dyú-gàà mɔ̀à Éézùɖùɛ̀-nyɔ̀ɔ̀ kɛɛ gàsíàɔ̀. Gèɖèpɔ́ɔ̀ ɖǎ Míɖìàùn-nyɔ̀ ɓěɔ̀ kè waà sójà séín ɓěɔ̀ ɔ xwaún dyi po.”

¹⁵ Ti ɓɛ́ Gíɖìɔ̀ùn wɔ̃́ ma dya-wùɖùɔ̀ kè ɔ xwíníín-zà-wùɖùɔ̀ kɛɛ, púɛɛ, ɔ ɓiè ma Gèɖèpɔ́ɔ̀. Hwɛ̀ ké ɔ sɔ̀ dyí, ké ɔ mu ma ɖé Éézùɖùɛ̀-sòjà ɓěɔ̀ jàɖàìn-hwɔ̀ɖɔ̀ɔ̀ mú ɖe, ké ɔ cɛ̃ɛ ma Éézùɖùɛ̀-sòjà ɓěɔ̀ gbo, ké ɔ ɖá, “Ɓě sɔ̀ dyí! Bounɓoɔ̀ ɖǎ Míɖìàùn-sòjà ɓěɔ̀ ɓě xwaún dyi po.”

¹⁶ Ké ɔ ge ma ɔ gàa hɔ̃dɛ̀ɖɛ̀ tã ɓěɔ̀ dú tã mú. Ké ɔ nyí ma gàa ɖò-ɖò séín mɛ-dyàà nì dɔ̀ɔ̀-kpà múɛ kè ɖɔ-kpa xwa.

¹⁷ Ké ɔ cɛ̃ɛ ma wa gbo, ké ɔ ɖá, “Ɓě mɛ dè ḿ dyéɖé gbo. Ɓě nyu ɖɛ ní mu nyuùn wɛ̃. Gmɔ̀ nɔ̄, ḿ dyi ɓó mú-nyɛ́-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wĩín nyini ní, nìí, ɓě mɛ nyu ɖɛ ní mu nyuùn wɛ̃ɛ nyɛ̀nɛ̀ɛ̀.

¹⁸ Ɔ jǔ ké ḿ kè nyɔ ɓě nìà ɓó ḿ gboɛɛ dyi à ɖɔ-kpa ɓěɔ̀ ɓaɖa ní, nìí, ɓě mɛ ɓaɖa ɓě nììn ɖɔ-kpa ɓěɔ̀ jàɖàìn-hwɔ̀ɖɔ̀ɔ̀ ɖei dà séín, ɓɛ́ ɓě ké mú páná, ɓɛ́ ɓě ké níiń, ‘À vɔ̃ Bounɓoɔ̀ kè Gíɖìɔ̀ùn bìì.’ ”

¹⁹ Ti ɓɛ́ ɔ sèǎ ma ɖɛ tííwè ɓɛ́ hwuɖuɔ̀ kéá ma hwìɛ̀ ɓɛ́ìn nyɛɛ, Gíɖìɔ̀ùn kè gàa hɔ̃dɛ̀ɖɛ̀ ɖò nì ma kà ɓó ɔ gboɛɛ nyini ma jàɖàìn-hwɔ̀ɖɔ̀ɔ̀ wĩín. Ɔ mɔ̀ ti ɓɛ́ wa zĩàìn ma sójà ɓě mɔ̀ ma hwìǐ-gmɔ̀-nyɔ̀ ɓěɛɛ gbo nyɛ̀nɛ̀ɛ̀ kɛ. Púɛɛ, wa ɓaɖa ma waà ɖɔ-kpa ɓěɔ̀, ké wa wa ma mɛ-dyàà ɓě nì ma kà wa xwaa.

²⁰ Kǎà nyɔ-dù sɔ̃́ ɓě nìà ɓó ɖeɛɛ mɔ̀ùn nyuɛ ma ɖekè. Wa séín ɓaɖa ma waà ɖɔ-kpa ɓěɔ̀, ké wa wa ma mɛ-dyàà ɓěɔ̀. Dɔ̀ɔ̀-kpà ɓěɔ̀ nì ma waà kunuà-xwà ɓěɔ̀ mú, ké ɖɔ-kpa ɓě ɓɛ́ wa ɓaɖa ma kà kɛɛ nì ma waà ɖiaùn-xwà ɓěɔ̀ mú. Ké wa páná ma mú, ké wa ɖá, “À vɔ̃ Bounɓoɔ̀ kè Gíɖìɔ̀ùn bìì.”

²¹ Ti ɓɛ́ gàa ɖò-ɖò séín nyànà ma waà pá ɓěɔ̀ múin ɓó Míɖìàùn-nyɔ̀ ɓěɔ̀ jàɖàìn-hwɔ̀ɖɔ̀ɔ̀ ɖeiɛɛ, púɛɛ, Míɖìàùn-nyɔ̀ séín ɓěɔ̀ gbǔ ma ní. Wa ɓéɖé ma mú pánáuń ti wa nì ma muɛń nyɛ.

²² Ti ɓɛ́ ɖɔ-kpa hɔ̃dɛ̀ɖɛ̀ tã ɓěɔ̀ wúɖú ma kɛɛ, Bounɓoɔ̀ nyuɛ ké Míɖìàùn-sòjà ɓě nì ma ɖé jàɖàìn-hwɔ̀ɖɔ̀ɔ̀ múɛɛ ɖú ma gbo vɔ̃ìn kpàǐ. Ké wa kpá ma xwáɖáún, ké wa pòìn ma ɖé Zɛ̀wéɖéwàɖà-hwɔ̀ɖɔ̀ɔ̀ gbo dú, ké wa nyini ma ɖé Bɛ̀-Sítà-hwɔ̀ɖɔ̀ɔ̀ gbo. Wa mu tee ké wa nyini ma ɖé Éɓò-Mɛ̀hóɖà-hwɔ̀ɖɔ̀ ɓɛ́ ɔ nì ma ɖé Táɓà-hwɔ̀ɖɔ̀ɔ̀ wĩín nyɛɛ mú.

²³ Hwɛ̀ ké Gíɖìɔ̀ùn ɖá ma Éézùɖùɛ̀-nyɔ̀ tɔ̀ɔ̀ ɓě sɔ̀à ɖé Náfátàɖì kè Ásè ɔ kè Mànásì nììn xwéɖé-dù ɓěɔ̀ múɛ. Ké wa kpá ma Míɖìàùn-nyɔ̀ ɓěɔ̀ kíɖíí.

²⁴ Ké Gíɖìɔ̀ùn tò ma wuɖu ɖé Ífèɖèìn Toɖo-ɓòɖòɔ̀ kɔ̃, ké ɔ ɖá, “Ɓě dyi, ɓɛ́ ɓěà ké Míɖìàùn-nyɔ̀ ɓěɔ̀ gbo vɔ̃. Ɓě zi ɖé wa dyúa, ɓɛ́ ɓě ké Jɔ́nì-nìɔ̀ kè ní séín ɓě nìà ɓó Jɔ́nì-nìɔ̀ kè Bɛ̀-Ɓáwàɖà-hwɔ̀ɖɔ̀ɔ̀ pṹa kɛɛ kpɔ̃.” Ɔ jèɛɛ, Ífèɖèìn-gàà séín ɓěɔ̀ dyi, ké wa kpɔ̃ ma Jɔ́nì-nìɔ̀ kè ní ɓě nì ma kà ɓó Jɔ́nì-nìɔ̀ kè Bɛ̀-Ɓáwàɖà-hwɔ̀ɖɔ̀ɔ̀ pṹa kɛ.

²⁵ Ké wa kpɔ̃ ma Míɖìàùn-nyɔ̀ ɓěɔ̀ nàìn-nyɔ̀ sɔ̃́ ɓě mɔ̀ Ówèɖè kè Zééɓì kɛ. Ké wa ɖáɓáìn ma Ówèɖè ɓó sɔ́ɔ́-kpò ɖò ɓɛ́ wa ɖáìn Ówèɖè-sɔ̀ɔ̌-kpòɔ̀ kɛɛ wáún, ké wa ɖáɓáìn ma Zééɓì ɓó géɖéè-mú-píníìn-naín ɖò ɓɛ́ wa ɖáìn Zééɓì Géɖéè-mú-píníìn-naínɔ̀ kɛɛ wáún. Ké wa kpá ma Míɖìàùn-nyɔ̀ ɓěɔ̀ kíɖíí. Sɔ̀ìn ɓóɛ gboɛɛ, wa dyà ma Ówèɖè kè Zééɓì dú-ɓò ɓěɔ̀ Gíɖìɔ̀ùn gbo, ti ɔ nì ma ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛ.