Tɔ̀ɔ̀-ɓìɔ̀ 6 - Ɓǎsɔ́ɔ̀ Báɓòɔ̀

Gíɖìɔ̀ùn jè

¹ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ nyu ma Bounɓoɔ̀ nàmàǔn bũ̌ ɖe. Ɔ jèɛɛ, ɔ po ma wa Míɖìàùn-nyɔ̀ ɓěɔ̀ xwaún dyi ɓó zɔ̃ mɛ̀nɛ̌ìn-sɔ̃́ xwíníín.

² Míɖìàùn-nyɔ̀ ɓěɔ̀ pĩ́à ma wa dyi mìɔ jèɛɛ, wa vǐè ma wa mìɔùn ɖé ɓí ɓě kè vǐè-naín tɔ̀ɔ̀ ɓě nì ɖé toɖo ɓě gboɛɛ mú.

³ Ɔ jǔ ké Éézùɖùɛ̀-nyɔ̀ ɓěɔ̀ dyi waà geɖe ɓě nyu ní, nìí, Míɖìàùn-nyɔ̀ ɓěɔ̀ kè Àmáɖɛ̀-nyɔ̀ ɓěɔ̀ ɔ kè nyɔ tɔ̀ɔ̀ ɓě nì ɖé ɓóɖó ɓě nìà ɖé dyóɖó-xwáɖáún-wóɖóìn-naínɔ̀ kɛ kɔ̃ɛɛ dyi, ké wa po wa to kɔ̃.

⁴ Wa dyi dyi ní, nìí, wa nyànàìn waà jàɖàìn-gbò ɓě dyi, ké wa kpa ɓáá-ɖɛ̀ séín ɓě nì ɓóɖóɔ̀ kɔ̃ɛɛ dyíin nyìnìɛ̀n tee, ké wa nyini ɖé Gázà-hwɔ̀ɖɔ̀ɔ̀ wĩín. Wa ní sè ɓó ɓáɖáá ɖò mɔɔ ɓìɖǐ ɖò mɔɔ jǎkasì ɖò mɔɔ nyúà-ɖɛ̀ ɖò ɓó Éézùɖùɛ̀-nyɔ̀ ɓěɔ̀ bìì.

⁵ Wa dyi dyi ní, nìí, wa kè waà nyúà-ɖɛ̀ ɓěɔ̀ kè waà jàɖàìn-gbò ɓěɔ̀ dyi. Ké wa dyi xwáɖáún wóɖó ní, nìí, wa nì kà kpã̌ùn-tò nìà kɛ ɓó waà dyí vò jè. Wa kè waà sǒ-nì-gbu-kɔ̃ún ɓěɔ̀ se zɛɖɛɛ ɓɛ́ìn. Wa dɛ́ɖɛ́ ma ɓóɖóɔ̀, ɓɛ́ wa kéɛ ma dyíin nyìnììn.

⁶ Míɖìàùn-nyɔ̀ ɓěɔ̀ dyéìn ma Éézùɖùɛ̀-nyɔ̀ ɓěɔ̀ gǎ mìɔ jèɛɛ, wa pòìn ma Bounɓoɔ̀ kpéi, ɓɛ́ ɔ ké ma wa gbo kpá.

⁷ Ti ɓɛ́ Éézùɖùɛ̀-nyɔ̀ ɓěɔ̀ pòìn ma Bounɓoɔ̀ kpéi ɓó Míɖìàùn-nyɔ̀ ɓěɔ̀ jèɛɛ,

⁸ Bounɓoɔ̀ ɖoɓo ma wa kpáá-ɖɛ̀-cɛ̃-nyɔ̀ ɖò gbo. Ké kpáá-ɖɛ̀-cɛ̃-nyɔ̀ɔ̀ ɖá, “Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖá, ‘Ḿ zà zɔ̃̌ɔ̀ ɓě gǐì-kũ̀à mú ɖé Íjè-ɓòɖòɔ̀ kɔ̃.

⁹ Ḿ póìn zɔ̃̌ɔ̀ ɓě sɔ̀ìn ɖé Íjè-nyɔ̀ ɓěɔ̀ xwaún. Ké nyɔ séín ɓě ɓɛ́ wa pĩ́à zɔ̃̌ɔ̀ kà ɓě dyi nɔ̄ ɓóɖóɛ̀ múɛɛ, ḿ kúmú zɔ̃̌ɔ̀ wa, ké ḿ nyí zɔ̃̌ɔ̀ ɓě waà ɓóɖóɔ̀.

¹⁰ Hwɛ̀ ké ḿ cɛ̃ɛ zɔ̃̌ɔ̀ ɓě gbo, ké ḿ ɖá, “Mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀. Ɓěǐn ɖá ɓɛ́ ɓě ké Ámɔ̀-nyɔ̀ ɓě kɔ̃̀ ɓóɖó ɓě cĩ́à kɔ̃ɛɛ gèɖèpɔ́ɔ̀ ɓěɔ̀ ɓiè.” Kɛɛ ɓě se ní wuɖuɔ̀ dyi kpɔ̃.’ ”

¹¹ Wé ɖòɛ̀ ɓaɖaa, Bounɓoɔ̀ zɛ̃̀ìn ma ínjà ɖò mú, ké ɔ kò ma ɓó óò-cù ɖò xwíɖíi dyi ɖé Áfàɖà-hwɔ̀ɖɔ̀ɔ̀ wĩín. Jóàsì ɓɛ́ ɔ mɔ̀ ma Áɓìɛ́zɛ̀ xwíníín-dyù ɓěɔ̀ ɖò kɛɛ mɔ̀ nyɔ kɔ̃̀ ma óò-cùɔ̀. Ké ɔ dyú-gàà Gíɖìɔ̀ùn nì ma hwítì dyí síɛń ɖé óò-cùɔ̀ xwíɖíi. Dɛ̀ ɔ nì ma kà hwítìɔ̀ dyí síɛń nyɛɛ mɔ̀ ma géɖéè-mú-píníìn-naín ɖò. Ɔ nyuɛ ma náa, ɓɛ́ ɔ kéɛ ma Míɖìàùn-nyɔ̀ ɓěɔ̀ dyí vǐè.

¹² Ti ɓɛ́ ínjàɔ̀ wóɖóìn ma Gíɖìɔ̀ùn dyíɛɛ, ínjàɔ̀ ɖá, “Bounɓoɔ̀ nì ɓó m̀ gboo, gàa-zà-nyɔ̀.”

¹³ Hwɛ̀ ké Gíɖìɔ̀ùn zà ma ɖé wuɖu, ké ɔ ɖá, “Ɓɔ̌ɔ̀, ɔ jǔ ké Bounɓoɔ̀ dyi ɓó à gbo nì ní, nìí, ɖɛ́ kɔ̃̀ jè ɖɛ jĩ̀ kà dyíɛ̀ nìà à gbo kpáuń wɛ̃́? Dɛ̌ dĩ́ín-dĩ̀ìn-ɖɛ̀ ɓě ɔ nyu zɔ̃̌ɔ̀ kà, kɔ̃̀ jè à ɓǎ ɓě cɛ̃ ma kà à gbo, ɓɛ́ wa dyi níiń, ‘Má, Bounɓoɔ̀ zà zɔ̃̌ɔ̀ à ɖé Íjè-ɓòɖòɔ̀ kɔ̃e’ kɛɛ nì kɛ́? Dyéɛ, ɓó kàǔn wɛ̃ɛ, Bounɓoɔ̀ ɖǎ à dyi táà, ké ɔ ɖǎ à Míɖìàùn-nyɔ̀ ɓěɔ̀ xwaún dyi po.”

¹⁴ Ké Bounɓoɔ̀ gmɔ̀ìn ma ɖé ɔ gbo, ké ɔ ɖá, “Mu ɖé nì kpé m̀ ɓéɖéà kɛɛ mú, ɓɛ́ m̀ ké Éézùɖùɛ̀-dyù ɓěɔ̀ Míɖìàùn-nyɔ̀ ɓěɔ̀ xwaún póìn. Má, mɔ̄ nìà m̀ ɖoɓoɛń nyɛe?”

¹⁵ Kɛɛ Gíɖìɔ̀ùn diè ma ɖɛi, ké ɔ ɖá, “Ɓɔ̌ɔ̀, xwɛ̌ ḿ ɓɛ́ìn Éézùɖùɛ̀-nyɔ̀ ɓěɔ̀ póɛ̀n nyuɛ kɛ́? M̀ dyuòɛ̀ kà níǐn gbǒ-xwíníín mɔ̀ gbǒ-xwíníín hwɛ̀ kpéí ké ɔ zi gbǒ-xwíníín séín nì ɖé Mànásì nììn xwéɖé-dùɔ̀ múɛɛ dyíɛ. Ké ḿ mɔ̀ dyú ɖé ní gbǒ-xwíníínɔ̀ mú.”

¹⁶ Ké Bounɓoɔ̀ jǔ ma ɔ gɔ̃̌, ké ɔ ɖá, “Ní mu ɓó m̀ gbo nììn, ké nì mu Míɖìàùn-nyɔ̀ ɓěɔ̀ ɓíɖíi dyi poùn kà nyɔ poà gàa dyúáɖò ɓíɖíi dyiɛ.”

¹⁷ Ké Gíɖìɔ̀ùn jǔ ma ɔ gɔ̃̌, ké ɔ ɖá, “Ɔ jǔ ké nì hwòɖǒ dyi ḿ múin dèìn ní, nìí, tɛ̀mɛ̀ìn ḿ dyí jɛ́ɛ́ cá kà mɔ̀ mɔ̀ Bounɓoɔ̀ mɔ̀ nyɔ wùɖùà ḿ gboɛ̀.

¹⁸ Ní ɓaà m̀ ní, ɓɔ́ daí sɔ̀ìn, ɓɛ́ ḿ ké nì nyíí-ɖɛ̀ ɖò dyà, ɓɛ́ ḿ kéɛ ɓóɛ m̀ dyúa dyi dè.” Ké Bounɓoɔ̀ ɖá, “Ní mu m̀ fòìn, ɓɛ́ m̀ ké ɖe dyi hwɛ̀.”

¹⁹ Hwɛ̀ ké Gíɖìɔ̀ùn mu ma ɖé ɔ gbǒɔ̀ mú, ké ɔ ɖáɓá ma wiɖi gmɔ̀ ɖò, ké ɔ pĩɛ ma. Ké ɔ ɖú ma fáɖáɓà gbǎ-wĩín-wè sɔ̃́ dyí, ké ɔ nyuɛ ma bɛɖɛɛ̀ se dyáìn-ɖɛ̀ gbo nìɛɛ mú. Ké ɔ po ma suaɖɛ̀ɔ̀ tìě ɖò mú, ké ɔ po cɔ́ɔ́ɔ̀ jìà ɖò mú. Ké ɔ dyà ma ɖɛ ɓěɛ̀ Bounɓoɔ̀ gbo, ɖé óò-cùɔ̀ xwíɖíi.

²⁰ Hwɛ̀ ké ínjà mɔ̀à Gèɖèpɔ́ɔ̀ kɛɛ cɛ̃ɛ ma ɔ gbo, ké ɔ ɖá, “Ɖú suaɖɛ̀ɔ̀ kè bɛɖɛɛ̀-se-dyáìn-ɖɛ̀-gbo-nìɔ̀ dyí, ɓɛ́ m̀ ké wa ɓó sɔ́ɔ́ nìà kɛ kɔ̃ dyi pɛ̃́ìn, ɓɛ́ m̀ kéɛ cɔ́ɔ́ɔ̀ kɔ̃ púè.” Ké Gíɖìɔ̀ùn nyuɛ ma náa.

²¹ Ké ínjàɔ̀ pɛ́ɛ̀ ma sɔ̃, ké kùì-kpà nì ma ɔ xwaa mánáɔ̀ tìnììn ma suaɖɛ̀ɔ̀ kè bɛɖɛɛ̀-se-dyáìn-ɖɛ̀-gbo-nìɔ̀ dyi. Púɛɛ, nyɛ sɔ̀ ma ɖé sɔ́ɔ́ɔ̀ mú, ké ɔ fɔ̃ ma suaɖɛ̀ɔ̀ kè bɛɖɛɛ̀ɔ̀. Ké ínjàɔ̀ pa ma ɔ dyéɖéín dyi.

²² Ti ɓɛ́ Gíɖìɔ̀ùn dyéɛ ma kà ínjàɔ̀ mɔ̀ ma Bounɓoɔ̀ kɛɛ, púɛɛ, ɔ páná ma mú, ké ɔ ɖá, “Aké, Bounɓo Ɖɛɓíɔ́, ḿ kè mɔ̀ ɖǎ dyéɖéín gmɔìn wà!”

²³ Kɛɛ Bounɓoɔ̀ cɛ̃ɛ ma ɔ gbo, ké ɔ ɖá, “Gìɖìǐ mɛ nì m̀ kɔ̃. Ɓɔ́ fɛ̃̀ìn. M̀ se mɛ́ɛ mu.”

²⁴ Ɔ jèɛɛ, Gíɖìɔ̀ùn po ma ɓó sáa-kɔ̃-zàìn-gbàà ɖò ɓó Bounɓoɔ̀ bìì, ké nyɛ́nɛ́ ɔ jǔɛ̀n ma kɛɛ mɔ̀ “Bounɓoɔ̀ Mɔ̀ Gìɖìǐ.” Sáa-kɔ̃-zàìn-gbàà nìà kɛ nyànà ɖé Áfàɖà-hwɔ̀ɖɔ̀ mɔ̀à Áɓìɛ́zɛ̀ nììn xwíníín-dyù ɓěɔ̀ ɓíɖí-hwɔ̀ɖɔ̀ɔ̀ kɛɛ wĩín dyi ke ɓó zɛ̃̌ɛ̀.

²⁵ Ɓó máaún wɛ̃ɛ, Bounɓoɔ̀ cɛ̃ɛ ma Gíɖìɔ̀ùn gbo, ké ɔ ɖá, “Zà ɓìɖǐ ɓíɔ́ ɖò ɖé m̀ ɓǎà ɓìɖǐ ɓěɔ̀ hwìɛ̀, ɓɛ́ m̀ ké ɓìɖǐ ɓíɔ́ ɖò dyí ɖú ɖe. Ɔ sɔ̃́ nììnɔ̀ mɛ nyuá zɔ̃ mɛ̀nɛ̌ìn-sɔ̃́. Ɔ ɖǎ ná nìǐn, nìí, m̀ mɛ wáɖá Béòɛ̀ sáa-kɔ̃-zàìn-gbàà ɓɛ́ m̀ ɓǎ ɓéɖéà kɛ, ɓɛ́ m̀ ké cu-kpóɖó mɔ̀à Àséwàɖàà hwɔìn-ɖɛ̀ ɓɛ́ ɔ ɓéɖéà ɓóɛ wáún wɛ̃ɛ ɖaɓa.

²⁶ Ɔ ɖǎ ná nìǐn, nìí, m̀ mɛ po mɔ̄ Bounɓo mɔ̀à nì Gèɖèpɔ́ɔ̀ kɛɛ bìì sáa-kɔ̃-zàìn-gbàà ɖò kà ḿ nyuɛ mɔ́ɔ kɛɛ dà toɖo nìà kɛ dya. M̀ mɛ nyu cu ɓě ɓɛ́ nì muà ɖaɓaùn wɛ̃ɛ nyɛ mú, ɓɛ́ m̀ ké ɓó ɓìɖǐɔ̀ sɔ̃́ nììnɔ̀ sáa zàìn, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ.”

²⁷ Ɔ jèɛɛ, Gíɖìɔ̀ùn ɖú ma ɔ gbo-nì-nyɔ̀ ɓěɔ̀ ɓaɖa-bùè dyí, ké ɔ nyu ɖɛ Bounɓoɔ̀ cɛ̃ ma kà ɔ gboɛ. Kɛɛ ɔ nyuɛ ma ɓó máaún. Ɔ seɛ ma nyu ɓó dyóɖóaún, sepóɛɖé ɔ fɛ̃̀ìn ma ɔ gbǒ-xwíníín-nyɔ̀ ɓěɔ̀ kè ɔ ɓíɖí-hwɔ̀ɖɔ̀-nyɔ̀ ɓěɔ̀ ní.

²⁸ Ti ɓɛ́ hwɔɖɔɔ̀ nyɔ ɓěɔ̀ sɔ̀ ma dyí ɓó gànà-kṹún mɛ̀nɛ̀ɛ̀ kɛɛ, púɛɛ, wa dyéɛ ma kà nyɔ ɖò ɖǎ Béòɛ̀ sáa-kɔ̃-zàìn-gbààɔ̀ wáɖá kɛ. Ké nyɔɔ̀ ɖǎ cu-kpóɖó mɔ̀à Àséwàɖàà hwɔìn-ɖɛ̀ nìà ɓóɛ wáún wɛ̃ɛ ɖaɓa, ké ɔ ɖǎ ɓìɖǐ ɓíɔ́ sɔ̃́ nììnɔ̀ ɓó sáa-kɔ̃-zàìn-gbàà ɖìè ɓɛ́ ɔ poà kɛɛ kɔ̃ sáa zàìn ɖekè.

²⁹ Hwɛ̀ ké hwɔɖɔɔ̀ gàa ɓěɔ̀ dièìn dìèìn ma dyi, ké wa ɖá, “Nyɛ́ nyuà ɖɛ nì kàà kɛ́?” Ti ɓɛ́ wa ɖeɛ ma múin nyɛɛ, wa wɔ̃́ɔ kà Gíɖìɔ̀ùn mɔ̀à Jóàsìɛ̀ dyú-gààɔ̀ kɛɛ mɔ̀ nyɔ nyuɛ ma náa kɛ.

³⁰ Ɔ jèɛɛ, hwɔɖɔɔ̀ gàa ɓěɔ̀ cɛ̃ɛ ma Jóàsì gbo, ké wa ɖá, “Síìn nì dyú-gààɔ̀! Ɔ ɓéɖé ɔ ké mɛ́, sepóɛɖé ɔ ɖǎ Béòɛ̀ sáa-kɔ̃-zàìn-gbààɔ̀ wáɖá, ké ɔ ɖǎ Àséwàɖàà cu-kpóɖó nìà ɓóɛ wáún wɛ̃ɛ ɖaɓa.”

³¹ Hwɛ̀ ké Jóàsì cɛ̃ɛ ma nyɔ séín ɓě nì ma kà ɔ gbo jɛiń nyɛɛ gbo, ké ɔ ɖá, “Ɓě mɔ́ ɓɛ́ ɓě ké Béò bìì zaa zie? Ɓě mɔ́ ɓɛ́ ɓě ké ɔ póìne? Nyɔ séín mu Béò bìì vɔ̃ùn wɛ̃ɛ ɓéɖé ɔ ké mɛ́, hwɛ̀ dyóɖó ké zi. Ɔ jǔ ké Béò dyi Gèɖèpɔ́ɔ̀ jǔ jǎà ní, nìí, ɔ mɛ vɔ̃ ɔ mìɔùn bìì. Ɔ mɛ vɔ̃ nyɔ wáɖáà ɔ sáa-kɔ̃-zàìn-gbààɔ̀ kɛɛ gbo.”

³² Ɔ jèɛɛ, wa jǔìn ma Gíɖìɔ̀ùn nyɛ́nɛ́ ɖò ɓó wéa ɓaɖa. Wa ɖáìn ma ɔ Jɛ́wùɖù-Béò-nyɛ̀nɛ̀ kɔ̃̀ xwíníín mɔ̀à Béò mìɔùn mɛ vɔ̃ ɔ gboɛ, sepóɛɖé ɔ wáɖá ma Béòɛ̀ sáa-kɔ̃-zàìn-gbààɔ̀ ní.

³³ Wé ɖòɛ̀ ɓaɖaa, Míɖìàùn-nyɔ̀ ɓěɔ̀ kè Àmáɖɛ̀-nyɔ̀ ɓěɔ̀ ɔ kè nyɔ tɔ̀ɔ̀ séín ɓě nì ɖé ɓóɖó ɓě nìà ɖé dyóɖó-xwáɖáún-wóɖóìn-naínɔ̀ kɛɛ poìn ma dyí. Ké wa péɖé ma Jɔ́nì-nìɔ̀, ké wa nyànàìn ma waà jàɖàìn-gbò ɓěɔ̀ dyi ɖé Jìzéɖéò Bɔɔ-kpàɔ̀ kɔ̃.

³⁴ Púɛɛ, Bounɓoɔ̀ Zùùɔ̀ dyi ma Gíɖìɔ̀ùn kɔ̃, ké ɔ ɓaɖa ma ɖɔ-kpa ɖò, ké ɔ poìn ma Áɓìɛ́zɛ̀ɛ̀ xwíníín-dyù ɓěɔ̀ dyí.

³⁵ Ké ɔ ɖoɓo ma kíá ɖé Mànásì nììn xwéɖé-dùɔ̀ gbo, ɓɛ́ ɔ kè wa ké ma to gbo mu. Ké ɔ ɖoɓo ma kíá ɖé Ásè kè Zɛ́ɓíúɖɔ̀ùn ɔ kè Náfátàɖì nììn xwéɖé-dù ɓěɔ̀ gbo ɖekè. Ké wa séín mu ma ɔ hwìǐ.

³⁶ Hwɛ̀ ké Gíɖìɔ̀ùn cɛ̃ɛ ma Gèɖèpɔ́ɔ̀ gbo, ké ɔ ɖá, “Ɔ jǔ ké m̀ dyi Éézùɖùɛ̀-nyɔ̀ ɓěɔ̀ póɛ̌n mu dyììn ɖé ḿ mú jǎà kà m̀ nyuɛ ma kà ḿ nyɛ́nɛ́ín ɖáìn nyɛɛ ní, nìí,

³⁷ gmɔ̀ nɔ̄, ní mu ɓáɖáá-fíɖí ɖò nɔ̄ hwítì-dyí-síìn-naínɔ̀ ɓíɖíi dyi soɖoùn. Ɔ jǔ ké dunu dyi ɓáɖáá-fíɖíɔ̀ ɖòùn tèìn, ké ɓóɖó-kpàɔ̀ dyi dyɛ ɓóɛ ɖei ní, nìí, ní muɛ dyuòùn kà nì mu Éézùɖùɛ̀-nyɔ̀ ɓěɔ̀ póìn dyììn ɖé ḿ mú kà m̀ nyuàà cɛ̃ɛ kɛɛ jǎà.”

³⁸ Kà Gíɖìɔ̀ùn nyuɛ ma kà cɛ̃ɛ kɛɛ, kǎà ɔ kpá ma nyɛ̀nɛ̀ɛ̀. Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Gíɖìɔ̀ùn sɔ̀ ma dyí, ké ɔ píní ma ɓáɖáá-fíɖíɔ̀ mú, ké ní sɔ̀ ma ɓáɖáá-fíɖíɔ̀ múɛɛ mɔ̀ ma gbòɖòò ɖòɛ̀ wé.

³⁹ Ké Gíɖìɔ̀ùn cɛ̃ɛ ma Gèɖèpɔ́ɔ̀ gbo ɖe, ké ɔ ɖá, “Mɔ̀ǔn ɖá ɓɛ́ m̀ ké ḿ dyoɖoún kpáìno, ɓɔ̌ɔ̀. Ní ɓaà m̀ ní, ḿ mɛ diè m̀ ɖɛ dyúáɖò dyi ɖe. Ḿ mɛ dɔ̃̌ìn ɓáɖáá-fíɖí nìà kɛ ɖɛ mú ɖe kpa dyúáɖò. Zɔ̃ǔn wɛ̃ɛ, nyuɛ ɓɛ́ ɓáɖáá-fíɖíɔ̀ ké dyɛ, nìí ɓɛ́ dunuɔ̀ ké ɓóɖó-kpàɔ̀ tèìn ɓóɛ ɖei dà séín.”

⁴⁰ Ké Gèɖèpɔ́ɔ̀ nyuɛ ma náa ɓó máaún. Ɓáɖáá-fíɖíɔ̀ ɖòùn dyɛ ma ní, kɛɛ dunuɔ̀ tèìn ma ɓóɖó-kpàɔ̀ ní.