Tɔ̀ɔ̀-ɓìɔ̀ 5 - Ɓǎsɔ́ɔ̀ Báɓòɔ̀

Dìbówàɖà kè Báwàɖàà wɛ́ɖɛ́

¹ Ɓó wéa ɓaɖaa, Dìbówàɖà kè Báwàɖà mɔ̀à Àbìnóàà dyú-gààɔ̀ kɛɛ ɓeɖe ma wɛ́ɖɛ́ ɖò. Wɛ́ɖɛ́ɔ̀ wuɖu ɖá,

² “Ɓě ɓàìn Bounɓoɔ̀, sepóɛɖé ɔ nyuɛ ké Éézùɖùɛ̀-nyɔ̀ vɛ̀nɛ̀ ɓěɔ̀ kpa toɔ̀, ké Éézùɖùɛ̀-nyɔ̀ tɔ̀ɔ̀ ɓěɔ̀ tò ma wa mìɔùn ɖé hwòɖǒ-wɔ̃́-wɔ̃́ mú.

³ “Ɓě mɔ̀ kã́á ɓěɛɛ, ɓě tò ɖùǔ. Ɓě mɔ̀à wuɖuí-kɔ̃̀-nyɔ̀ ɓěɛɛ, ɓě wɔ̃́ ɖɛ nìà kɛ múin. Ní mu Bounɓoɔ̀ gbo ɓèɖèìn. Ní mu Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ múà dyi nyùìn.

⁴ “Ti ɓɛ́ Bounɓoɔ̀ sɔ̀ ma ɖé Séì-tòɖòɔ̀ gbo ɖé Íɖɔ̀ùn-ɓòɖòɔ̀ kɔ̃ɛɛ, ɓóɖó-kpàɔ̀ túò ma dyi, ké ní ɖaɓa ma. Ní-kpò ɓěɔ̀ púè ma ní ɖé ɓóɖó-kpàɔ̀ kɔ̃.

⁵ Ké toɖo ɓěɔ̀ túò ma dyi ɓó Bounɓoɔ̀ dyúa, ti ɓɛ́ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ dyi zɔ̃̌ɔ̀ kà ɖé Sányà-tòɖòɔ̀ dya kɛ.

⁶ “Ɖé Sã́gà mɔ̀à Ánàfìɛ̀ dyú-gààɔ̀ kɛɛ nììn tiɔ̀ múɛ, mɔɔ ɖé Jáè nììn tiɔ̀ múɛɛ, nyɔǔn-dyù ɓɔ́ ma hwìè ɓěɔ̀ kpaa. Zii-nyɔ̀ ɓě ɖú ma ɓàɖàìn-hwìè ɓě dyí.

⁷ Hwɔɖɔ-kpàǎ ɓě nì ma Éézùɖùɛ̀-ɓòɖòɔ̀ kɔ̃ɛɛ wáɖá ma ní. Kǎà wa nì ma tee ké mɔ̄ mɔ̀à Dìbówàɖà kɛɛ sɔ̀ ma dyí, ɓɛ́ ḿ ké Éézùɖùɛ̀-ɓòɖòɔ̀ ɖe jǔ hwɛ̀.

⁸ Ti ɓɛ́ Éézùɖùɛ̀-nyɔ̀ ɓěɔ̀ gã ma gèɖèpɔ́ɔ̀ ɖìè ɓě kɛɛ, to dyi ma Éézùɖùɛ̀-ɓòɖòɔ̀ kɔ̃, ké dyí-zĩ̀ìn-ɖɛ̀ mɔɔ ɖí ɖò se ma ɖé gàa táázĩ̀ìn kpáɖá-nyɔ sɔ̃́ ɓě nìà Éézùɖùɛ̀-ɓòɖòɔ̀ kɔ̃ɛɛ hwìɛ̀ nì.

⁹ Ní hwòɖǒ nì Éézùɖùɛ̀-nyɔ̀ vɛ̀nɛ̀ ɓě mɔ̀ nyɔ ɓě kɔ̃̀ hwòɖǒ wɔ̃́à ɖé nyɔ ɓěɔ̀ hwìɛ̀ kɛ gbo. Ɓě ɓàìn Bounɓoɔ̀!

¹⁰ “Ɓě mɔ̀ nyɔ ɓě kpáà jǎkasì púú ɓě kɔ̃ún wɛ̃ kè ɓě mɔ̀ nyɔ ɓě kòà ɓěɛ̀ kɔ̃-kò-ɖɛ̀ vùɖùɛ̀-vùɖùɛ̀ ɓě kɔ̃ɛɛ ɔ kè ɓě mɔ̀ nyɔ nàà hwìè kɔ̃ɛɛ,

¹¹ ɓě mɛ tò wɛ́ɖɛ́-wùɖù ɓě nì dyiɛń sɔ̀ìn ɖé ní-wĩín-hwìè ɓěɔ̀ xwíníín nyɛɛ gbo ɖùǔ. Wa nì to ɓě ɓɛ́ Bounɓoɔ̀ ɖǎ ɖuɛ ɔ kè to ɓě ɓɛ́ to-vɔ̃-nyɔ̀ ɓě nì Éézùɖùɛ̀-ɓòɖòɔ̀ kɔ̃ɛɛ ɖǎ ɖuɛɛ jè cɛ̃iń. “Ɓó tia ɓaɖaa, Bounɓoɔ̀ nyɔ ɓěɔ̀ mu ma ɖé gmɔ-wɔ̃̀ ɓěɔ̀ gbo, ké wa ɖá,

¹² ‘Sɔ̀ dyí, Dìbówàɖà! Sɔ̀ dyí! Sɔ̀ dyí, Dìbówàɖà! Sɔ̀ dyí! Ɖú wɛ́ɖɛ́-wùɖù dyí. Óó, Báwàɖà, mɔ̀ mɔ̀à Àbìnóàà dyú-gààɔ̀ kɛɛ sɔ̀ dyí! Kpa nyɔ ɓě ɓɛ́ m̀ kpɔ̃à ɖé toɔ̀ gboɛ.’

¹³ Hwɛ̀ ké nyɔ ɓě sè ma ɓíɖíiɛɛ dyi ma ɖé nyɔ vɛ̀nɛ̀ ɓěɔ̀ gbo. Bounɓoɔ̀ nyɔ ɓěɔ̀ kè gàa-zà-nyɔ̀ ɓěɔ̀ dyi ma ɖé ḿ gbo.

¹⁴ Wa ɖíɛ́ ɓě mɔ̀ Ífèɖèìn-nyɔ̀ ɓě cĩ́ ma kà ɖé ɓóɖó ɓɛ́ ɔ mɔ̀ zɔ̃̌ɔ̀ kà Àmáɖɛ̀-nyɔ̀ ɓěɔ̀ ɓóɖó kĩ́ín nyɛɛ kɔ̃ɛ. Ífèɖèìn-nyɔ̀ ɓěɔ̀ sí ma Bɛ̃́címà-nyɔ̀ ɓěɔ̀ kíɖíí. Sójà-nàìn-nyɔ̀ ɓě sɔ̀ ma ɖé Mákì nììn xwíníín-dyù ɓěɔ̀ hwìɛ̀, ké sójà-nàìn-nyɔ̀ ɓě sɔ̀ ma ɖé Zɛ́ɓíúɖɔ̀ùn nììn xwéɖé-dùɔ̀ mú ɖekè.

¹⁵ Nyɔ vɛ̀nɛ̀ ɓě sɔ̀ ma ɖé Ɛ́sàkà nììn xwéɖé-dùɔ̀ múɛɛ nì ma ɓó mɔ̄ Dìbówàɖà gbo. Ǹdye, Ɛ́sàkà nì ma ɓó Báwàɖà gbo. Wa kè ɔ kpa ma peɖeɛ tee, ké wa nyini ma ɖé bɔɔ-kpàɔ̀ kɔ̃. Wuɖuɓíín nììn xwéɖé-dùɔ̀ nì ma hwìɖǐi poɛ̌n ɓá ɖɛ wa ké nyuɛɛ jè dyí.

¹⁶ Ɖɛ́ kɔ̃̀ jè ɓě kòà ɖé ɓáɖáá ɓěɔ̀ hwìɛ̀ dyi kɛ́? Ɔ mɔ̀ ɓɛ́ ɓě ké ɓáɖáá-dyí-gmɔ̀-nyɔ̀ ɓěɔ̀ ɓáɖáá-ɖá-wùɖùɔ̀ wɔ̃́ jèè? Ɖé Wuɖuɓíín nììn xwéɖé-dùɔ̀ múɛɛ, hwìɖǐi-poìn-poìn vɛ̀nɛ̀ nì ma ɖé.

¹⁷ Gíɖèà-ɓòɖòɔ̀ nyɔ ɓěɔ̀ sè ma ɖé Jɔ́nì-nìɔ̀ ɖeín. Dɛ̃́ìn-xwèɖè-dù, ɖɛ́ kɔ̃̀ jè ɓě bũà ɖé méè ɓě múin nyɛ́? Ásè nììn xwéɖé-dùɔ̀ mɔ̀ùn sè ma ɓó dyóóɔ̀ wĩín. Wa nì ma ɓó pĩ́ɔɔ̀ kɔ̃ kánáá pū.

¹⁸ Kɛɛ Zɛ́ɓíúɖɔ̀ùn nììn xwéɖé-dùɔ̀ zà waà fɛ̀ɛ̀ ɓěɔ̀ hwòɖǒ gbo. Kǎà Náfátàɖì nììn xwéɖé-dùɔ̀ nyuɛ ma ɖekè. Wa nyuɛ ma náa ɖé to-vɔ̃̀ìn-naínɔ̀.

¹⁹ “Kã́á ɓě mɔ̀à Kénà-ɓòɖòɔ̀ kã́á ɓěɛɛ dyi, ké wa vɔ̃̀ìn ma ɖé Táánà-hwɔ̀ɖɔ̀ nìà ɖé Mɛ̀gíɖò-nìɔ̀ wĩín nyɛɛ mú. Wa vɔ̃ ma, kɛɛ wa se ma séɓàɖà ɖò toɔ̀ gbo zà.

²⁰ Dyɔɔ̀ vɔ̃ ma ní ɖekè. Ɔ vɔ̃ ma Sìsɛ́wàɖà gbo.

²¹ Sìsɛ́wàɖàà sójà ɓěɔ̀ sè Kísɔ̃̀ùn-nìɔ̀ kɔ̃. Ɓóɖó-sùàǔn-nì vɛ̀nɛ̀ mɔ̀à Kísɔ̃̀ùn kɛɛ kpa wa séín. Mu dyúa, Dìbówàɖà. Ku dyi, Dìbówàɖà.

²² Sìsɛ́wàɖàà sǒ ɓěɔ̀ ɓo-jĩ̌ dyi ma pū kà zɛ pánáà kɛ. Waà ɓo jĩ̌ɔ̀ dyi gìɖì-gìɖì.

²³ Ké Bounɓoɔ̀ ínjàɔ̀ ɖá, ‘Ɓě ɓàɖàìn Méwòɖò-hwɔ̀ɖɔ̀ɔ̀ hwòɛ̌. Ɓě ɓàɖàìn nyɔ ɓě cĩ́ ɖéɛ múɛɛ hwòɛ̌. Sepóɛɖé wa se dyi, ɓɛ́ wa ké Bounɓoɔ̀ gbo kpá. Wa se Bounɓoɔ̀ gbo kpá, ɓɛ́ wa ké gàa-zà-nyɔ̀ ɓěɔ̀ gbo vɔ̃.’

²⁴ “Mana mɛ nì Hɛ́ɓɛ̀ mɔ̀à Kénɛ̀-nyɔ̀ɔ̀ kɛɛ gmàà Jáè kɔ̃ ɖé màa ɓě hwìɛ̀. Mana nì ɔ kɔ̃ ɖé màa ɓě cĩ́ jàɖàìn-gbò múɛɛ hwìɛ̀.

²⁵ Sìsɛ́wàɖà zɔ̀ ma náá-nì, kɛɛ Jáè nyí ma ɔ ɓìɖǐ-nɛɛ̀-nì kuún-kuún. Ɔ nyíɛ̀n ma ɔ gbòɖòò mɔ̀ síí-dyùɛ̀ ɖii-ɖɛ̀-mú-po-ɖɛ̀ kɛɛ mú.

²⁶ Hwɛ̀ ké Jáè pɛ́ɛ̀ ma sɔ̃, ké ɔ ɖú ma jàɖàìn-gbò hwuɖu-pòìn-cù té-té ɖò dyí, ké ɔ ɖiaùn-sɔ̃̀ɔ̀ fáɖá ma kũ̀à-nyùìn-jũ̌ ɖò ɓíɖíi. Ɔ kɔ̀ìn ma cu té-téɔ̀ Sìsɛ́wàɖà dú, ké ɔ nama ma ɔ ɖúɔ̀ mú. Ɔ wàìn ma ɔ dúɔ̀ dyi.

²⁷ Púɛɛ, ɔ dyi ma ɓíɖíi ɓó Jáè ɓo zɔ̃̌. Ɔ kpá ma dyi, ké ɓóɛ̀ ɔ pɛ̃́ ma dyi. Ɔ dyi ma ɓíɖíi ɓó Jáè ɓo zɔ̃̌. Ɔ kpá ma dyi. Dɛ̀ ɔ dyi ma kà ɓíɖíiɛɛ, ɓóɛ̀ ɔ kpá ma dyi, ké ɓóɛ̀ ɔ mɛ́ìn ma.

²⁸ “Sìsɛ́wàɖà ɖe gmɔ̀ìn ma wúɖɛ̀-wɔ̃̀ gbo. Ɔ nì ma ɖé wúɖɛ̀-wɔ̃̀-cù ɓěɔ̀ ɖeín, ké ɔ ɖú ma vĩ̌-wùɖù dyí, ké ɔ ɖá, ‘Ɖɛ́ kɔ̃̀ jè ɔ hwíì-sǒɔ̀ sèà kà ɖe, ké ɔ séèà dyi keɛ́? Ɖɛ́ kɔ̃̀ jè ɔ hwíì-sǒ ɓěɔ̀ jĩ̌ɔ̀ séèà dyiɛ́?’

²⁹ Ké ɔ hwòɖǒ-fɔ̀nɔ̀-màà ɓěɔ̀ jǔ ma ɔ gɔ̃̌. Ké ɔ nì ma ɖɛ dyúáɖòɔ̀ cɛ̃iń ɖé ɔ hwòɖǒ bũ̌, ké ɔ ɖá,

³⁰ ‘Wa se to-gbo-zà-ɖɛ̀ ɖò dyéɛń nì, ɓɛ́ wa kéɛ geɛ̌n nì kpɛ́ɛ̀? Wa se màa ɓě geɛ̌n nì, ɓɛ́ gàa ɖò ké màa-dyù dyúáɖò mɔɔ sɔ̃́ kpaà? Ké wa se mú-po-ɖɔ̀ nɔ̀mɔ̀ kɔ̃in ɓě wáká poɛń nì ɓó Sìsɛ́wàɖà bìì? Ké wa se mú-po-ɖɔ̀ nɔ̀mɔ̀ kɔ̃in ɓéɖé ɖaɓa-dyèɖè kò-kò ɓěɛɛ wáká poɛń nì ɓó ḿ bìì? Má, ɖɛ nì kà séín ɓěɛ̀ mɔ̀ to-gbo-zà-ɖɛ̀e?’

³¹ “Óó Bounɓo, kǎà nì mú-nyɛ́-nyɔ̀ séín ɓě mɛ nyu kà ɓó mɛ́ɛ. Kɛɛ nyɔ ɓě ɖɛ̀ɓɛ̀ m̀ múɛɛ mɛ fã kà dyóɖóɔ̀ dyi xwáɖáún wóɖó ɖé ɔ kpé múín, kà ɔ fãà kɛ.” Sɔ̀ìn ɓó ɖɛ ɓěɛ̀ gboɛɛ, púɛɛ, gìɖìǐ nì ma ɖé ɓóɖóɔ̀ kɔ̃ ɓó zɔ̃ kpáɖá-nyɔ sɔ̃́ mú.