Tɔ̀ɔ̀-ɓìɔ̀ 4 - Ɓǎsɔ́ɔ̀ Báɓòɔ̀

Dìbówàɖà kè Báwàɖà jè

¹ Ti ɓɛ́ Éhù ɖǎ ma mɛ́ɛ, Éézùɖùɛ̀-nyɔ̀ ɓěɔ̀ nyu ma Bounɓoɔ̀ nàmàǔn bũ̌ ɖe.

² Ɔ jèɛɛ, Bounɓoɔ̀ po ma wa Jáɓììn ɓɛ́ ɔ mɔ̀ ma Kénà-ɓòɖòɔ̀ kã́á ɓěɔ̀ ɖòɛɛ xwaún dyi. Jáɓììn cĩ́ ma ɖé Házɔ̀-hwɔ̀ɖɔ̀ɔ̀ mú. Ɔ sójà ɓěɔ̀ nàìn-nyɔ̀ nyɛ́nɛ́ mɔ̀ ma Sìsɛ́wàɖà. Sìsɛ́wàɖà mɔ̀ùn cĩ́ ma ɖé Hàwóɖósɛ̀-Hàgódyììn-hwɔ̀ɖɔ̀ɔ̀ mú.

³ Jáɓììn ɓéɖé ma nɛɛ̀-kpà-hwìì-sǒ hɔ̃dɛ̀ɖɛ̀ mɛ̀nɛ̌ìn-hĩinyɛ. Éézùɖùɛ̀-nyɔ̀ ɓěɔ̀ nì ma ɔ xwíɖíi ɓó zɔ̃ kpáɖá-nyɔ ɖò xwíníín, ké ɔ pĩ́à ma wa dyi mìɔ. Ɔ jèɛɛ, wa pòìn ma Bounɓoɔ̀ kpéi, ɓɛ́ ɔ ké wa gbo kpá.

⁴ Ɓó tia ɓaɖaa, màa ɖò kɔ̃̀ nyɛ́nɛ́ mɔ̀ ma Dìbówàɖà kɛɛ mɔ̀ ma Éézùɖùɛ̀-nyɔ̀ ɓěɔ̀ tɔ̀ɔ̀-ɓìɔ̀. Ɔ mɔ̀ ma kpáá-ɖɛ̀-cɛ̃-nyɔ̀. Ɔ dyú-ɓǎ nyɛ́nɛ́ mɔ̀ ma Ɖápìɖò.

⁵ Ɔ zaa-wɔ̃-pòìn-naínɔ̀ nì ma ɓó Wáɖámà-hwɔ̀ɖɔ̀ɔ̀ kè Bɛ́fèò-hwɔ̀ɖɔ̀ɔ̀ pṹa. Ɔ pòìn ma zaa wɔ̃ ɓó hwɛ̃-cù ɖò ɓɛ́ wa ɖáìn Dìbówàɖà-hwɛ̃̀-cù kɛɛ xwíɖíi, ɖé Ífèɖèìn Toɖo-ɓòɖòɔ̀ kɔ̃. Ké Éézùɖùɛ̀-nyɔ̀ ɓěɔ̀ mu ma ɖé ɔ gbo, ɓɛ́ ɔ ké waà zaa ɓě wɔ̃ po.

⁶ Wé ɖòɛ ɓaɖaa, Dìbówàɖà ɖá ma Báwàɖà ɓɛ́ ɔ mɔ̀ ma Àbìnóàà dyú-gàà ɓɛ́ ɔ cĩ́ ma ɖé Kɛ́ɖɛ̀-hwɔ̀ɖɔ̀ nìà ɖé Náfátàɖì-ɓòɖòɔ̀ kɔ̃ɛɛ mú kɛ. Ti ɓɛ́ Báwàɖà dyi ma kɛɛ, Dìbówàɖà cɛ̃ɛ ma ɔ gbo, ké ɔ ɖá, “Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖá, ‘Sɔ̀ dyí, ɓɛ́ m̀ ké Náfátàɖì kè Zɛ́ɓíúɖɔ̀ùn nììn xwéɖé-dù ɓěɔ̀ gàa táázĩ̀ìn ɓaɖa-bùè dyí ɖú, ɓɛ́ m̀ ké wa ɖé Táɓɔ̀-tòɖòɔ̀ dya kpa.

⁷ Ní mu Sìsɛ́wàɖà mɔ̀à Jáɓììnɛ̀ sójà ɓěɔ̀ nàìn-nyɔ̀ɔ̀ kɛɛ ɖé Kísɔ̃̀ùn-nìɔ̀ wĩín dyàùn, ɓɛ́ ḿ ké ɔ kè sójà kúɖúú ɓěɔ̀ kè hwíì-sǒ ɓěɔ̀ m̀ xwaún dyi po.’ ”

⁸ Hwɛ̀ ké Báwàɖà cɛ̃ɛ ma Dìbówàɖà gbo, ké ɔ ɖá, “Ɔ jǔ ké m̀ dyi wɔ̃́ ɓɛ́ ḿ kè mɔ̀ ké mu ní, nìí, ní mu muùn. Kɛɛ m̀ se wɔ̃́ ɓɛ́ ḿ kè mɔ̀ ké mu ní, nìí, ḿ se muɛ́ mu.”

⁹ Ké Dìbówàɖà ɖá, “Ɔ mɔ̀ ɖɛ sɛ́ɖɛ́ìn dyí. Ḿ kè mɔ̀ mu muùn. Kɛɛ kà ɓɛ́ m̀ nyuà ɖɛɔ̀ dyí ɖúɛ kɛ jèɛɛ, mɔ̀ se dya-dè-dèɔ̀ dyéɛ mu, sepóɛɖé Bounɓoɔ̀ mu Sìsɛ́wàɖà màa ɖò xwaún dyi poùn.” Ɔ jèɛɛ, Dìbówàɖà sɔ̀ ma dyí, ké ɔ kè Báwàɖà mu ma ɖé Kɛ́ɖɛ̀-hwɔ̀ɖɔ̀ɔ̀ mú.

¹⁰ Ké Báwàɖà poìn ma gàa ɓě sɔ̀ìn ɖé Zɛ́ɓíúɖɔ̀ùn kè Náfátàɖì nììn xwéɖé-dù ɓěɔ̀ múɛɛ dyí. Ké gàa táázĩ̀ìn ɓaɖa-bùè ɓěɔ̀ sí ma ɔ kíɖíí, ké ɔ kè Dìbówàɖà mu ma.

¹¹ Ɔ nì ná kɛɛ, gàa ɖò mɔ̀ Hɛ́ɓɛ̀ ɓɛ́ ɔ mɔ̀ ma Kénɛ̀-nyɔ̀ kɛɛ ɖǎ ma ɔ mǔè Kénɛ̀-nyɔ̀ ɓěɔ̀ hwìɛ̀ sɔ̀, ké ɔ ɖǎ ma ɔ jàɖàìn-gbò ɖé óò-cù nì ma ɖé Zàànánì-hwɔ̀ɖɔ̀ɔ̀ múɛɛ xwíɖíi po. Zàànánì-hwɔ̀ɖɔ̀ɔ̀ nì ɖé Kɛ́ɖɛ̀-hwɔ̀ɖɔ̀ɔ̀ wĩín. Kénɛ̀-nyɔ̀ ɓěɔ̀ mɔ̀ Hóbà mɔ̀ ma Mózèɛ̀ bùǐ-gàà kɛɛ nììn xwíníín-dyù ɓě.

¹² Ti ɓɛ́ Sìsɛ́wàɖà wɔ̃́ɔ ma kà Báwàɖà mɔ̀à Àbìnóàà dyú-gààɔ̀ kɛɛ ɖǎ ma ɖé Táɓɔ̀-tòɖòɔ̀ dya muɛɛ,

¹³ púɛɛ, ɔ poìn ma nɛɛ̀-kpà-hwìì-sǒ hɔ̃dɛ̀ɖɛ̀ mɛ̀nɛ̌ìn-hĩinyɛ ɓěɔ̀ kè ɔ gàa séín ɓěɔ̀ dyí, ké wa sɔ̀ ma ɖé Hàwóɖósɛ̀-Hàgódyììn-hwɔ̀ɖɔ̀ɔ̀ mú, ké wa dyi ma ɖé Kísɔ̃̀ùn-nìɔ̀ wĩín.

¹⁴ Hwɛ̀ ké Dìbówàɖà cɛ̃ɛ ma Báwàɖà gbo, ké ɔ ɖá, “Mu Sìsɛ́wàɖà wɔ̃, sepóɛɖé Bounɓoɔ̀ ɖǎ ɔ m̀ xwaún dyi po ɓó zɛ̃̌ɛ̀. Má, Bounɓoɔ̀ mìɔùn nì ḿ dyúae?” Ɔ jèɛɛ, Báwàɖà dèɖě ma Táɓɔ̀-tòɖòɔ̀, ké ɔ gàa táázĩ̀ìn ɓaɖa-bùè ɓěɔ̀ sí ma ɔ kíɖíí.

¹⁵ Ti Báwàɖà nì ma wa gbo vɔ̃uń dyiɛń nyɛɛ, Bounɓoɔ̀ nyuɛ ké Sìsɛ́wàɖà kè ɔ hwíì-sǒ-nàìn-nyɔ̀ séín ɓěɔ̀ kè ɔ sójà tɔ̀ɔ̀ séín ɓěɔ̀ gbɛ̀ìn ma dyi. Ké Sìsɛ́wàɖà sɔ̀ ma ɔ hwíì-sǒɔ̀ mú, ké ɔ gbǔ ma.

¹⁶ Kɛɛ Báwàɖà kpá ma ɔ hwíì-sǒ-nàìn-nyɔ̀ ɓěɔ̀ kè ɔ sójà tɔ̀ɔ̀ ɓěɔ̀ kíɖíí tee, ké ɔ dyɛ̀ìn ma Hàwóɖósɛ̀-Hàgódyììn-hwɔ̀ɖɔ̀ɔ̀. Sìsɛ́wàɖàà sójà séín ɓěɔ̀ sè ma gàsíà dyúa nyɛ̀nɛ̀ɛ̀. Waà nyɔ dyúáɖò se ma ɓíɖíi sè.

¹⁷ Kɛɛ wɛ̃́ɛ́ kɛɛ, Sìsɛ́wàɖà kpá ma xwáɖáún, ké ɔ mùìn ma ɖé màa ɖò kɔ̃̀ nyɛ́nɛ́ mɔ̀ Jáè ɓɛ́ ɔ mɔ̀ ma Hɛ́ɓɛ̀ mɔ̀à Kénɛ̀-nyɔ̀ɔ̀ kɛɛ gmàà kɛɛ jàɖàìn-gbòɔ̀ gbo. Ɔ nyuɛ ma náa, sepóɛɖé Jáɓììn mɔ̀à Házɔ̀-kã̀ǎɔ̀ kɛ kè Hɛ́ɓɛ̀ nììn gbǒ-xwíníín-nyɔ̀ ɓě mɔ̀ ma ɓǎto.

¹⁸ Ti ɓɛ́ Sìsɛ́wàɖà nì ma Jáèɛ̀ jàɖàìn-gbòɔ̀ wɔ̃ dyiɛń nyɛɛ, Jáè mu ma ɔ hwìǐ, ké ɔ ɖá, “Dyi, ɓɔ̌ɔ̀. Dyi m̀ ké nɔ̄ ní gbǒɔ̀ mú dyá. Ɓɔ́ fɛ̃̀ìn.” Ɔ jèɛɛ, ɔ dyá ma ɖé Jáèɛ̀ jàɖàìn-gbòɔ̀ mú. Ké Jáè vǐè ma ɔ ɖɔ ɖò xwíɖíi.

¹⁹ Ké Sìsɛ́wàɖà ɖá, “Ní-ná-tò nì ḿ nyuɛń. Ní ɓaà m̀ ní, nyí ḿ ní.” Ké Jáè kaà ma ɓìɖǐ-nɛɛ̀-nì-tɛ̀ɓɛ̀ɛ̌ ɖò dyí, ké ɔ nyíɛ ma ɔ, ké ɔ náa ma. Hwɛ̀ ké ɔ wáɖá ɔ ɖɔ kɔ̃in ɖe.

²⁰ Ké Sìsɛ́wàɖà cɛ̃ɛ ma Jáè gbo, ké ɔ ɖá, “Nyànà ɓó gbǒ-wɔ̃̀ɔ̀ gbo dyi. Ɔ jǔ ké nyɔ ɖò dyi dyi, ké ɔ dyi m̀ dyi diè, ké ɔ dyi níiń, ‘Nyɔ ɖò nì dàà?’ ní, nìí, m̀ mɛ ɖá, ‘Gbào.’ ”

²¹ Kɛɛ Jáè mɔ̀à Hɛ́ɓɛ̀ gmààɔ̀ kɛɛ ɖú ma cu té-té ɖò mɔ̀ jàɖàìn-gbò hwuɖu-pòìn-cù ɖòɛ kè jũ̌ ɖò dyí. Ké ɔ mu ma sànàà-sànàà ɖé dɛ̀ Sìsɛ́wàɖà pɛ̃́ ma kà dyiɛ. Ɓó tia ɓaɖaa, Sìsɛ́wàɖà nì ma mɔ́uń, sepóɛɖé ɔ sa ma ní mìɔ jè. Púɛɛ, Jáè kɔ̀ìn ma ɔ cu té-téɔ̀ dú, ké ɔ nama ɔ dúɔ̀ mú, ké ɔ wóɖóìn ɖé ɖe, ké ɔ pa ɓóɖóún. Ké Sìsɛ́wàɖà mɛ́ ma.

²² Púɛɛ, Báwàɖà kpá ma kà Sìsɛ́wàɖà kíɖííɛɛ wóɖóìn ma ɓó. Ké Jáè mu ma ɔ hwìǐ, ké ɔ ɖá, “Dyi, ɓɛ́ ḿ ké m̀ gàa m̀ nìà dyi mɔ́uń wɛ̃ɛ da zàìn.” Ké ɔ kè ɔ dyá ma ɖé jàɖàìn-gbòɔ̀ mú. Púɛɛ, ɔ dyɛ̀ìn ma ɓó Sìsɛ́wàɖàà xwɛ́ɔ̀ dyi, ké cu té-téɔ̀ nì ma ɔ dúɔ̀ mú.

²³ Kǎà Gèɖèpɔ́ɔ̀ nyu ma Jáɓììn mɔ̀à Kénà-ɓòɖòɔ̀ kã́áɔ̀ kɛɛ ɓíɖíi dyi poɛ ɓó Éézùɖùɛ̀-nyɔ̀ ɓěɔ̀ dyúa ɓó wéa ɓaɖa.

²⁴ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ kpéɔ̀ kpá ma kɔ̃ ɖe mìɔ, ké waà sɔ̃ nì ma ɖé Jáɓììn mɔ̀à Kénà-ɓòɖòɔ̀ kã́áɔ̀ kɛɛ kɔ̃in tee, ké wa gbɔɔ̀ ma ɔ mú hwɛ̀.