Tɔ̀ɔ̀-ɓìɔ̀ 3 - Ɓǎsɔ́ɔ̀ Báɓòɔ̀

Ɓóɖó-dù ɓě sè ɖé páɔ̀ múɛ

^1-2 Bounɓoɔ̀ sè ma ɓóɖó-dù ɓě ɖé Éézùɖùɛ̀-nyɔ̀ ɓěɔ̀ hwìɛ̀, ɓɛ́ ɔ ké waà nyɔ séín ɓě séè to ɓě nì ma kà ɖé Kénà-ɓòɖòɔ̀ kɔ̃ɛɛ vɔ̃ ɖòɛɛ mú dɔ̃̌. Ɔ nyuɛ ma náa ɓɛ́ ɔ ké Éézùɖùɛ̀-nyɔ̀ ɓěɔ̀ nyɔ ɓě séè to vɔ̃ ɖòɛɛ to jè tɛ̀mɛ̀ìn. Ɓóɖó-dù ɓěɔ̀ kɛà kɛ̀.

³ Wa mɔ̀ Féɖésìà-nyɔ̀ ɓěɔ̀ kã́á hm̀m̌ ɓěɔ̀ kè Kénà-nyɔ̀ séín ɓěɔ̀ kè Zíɖɔ̀ùn-nyɔ̀ ɓěɔ̀ ɔ kè Hívì-nyɔ̀ ɓě cĩ́ ma ɖé Ɖɛ́ɓèɖɔ́ùn-tòɖò ɓěɔ̀ gbo, sɔ̀ìn ɖé Béò-Hɛ́mɔ̀-tòɖòɔ̀ gbo, muà ɖé Ɖíɓò-Hámà-hwɔ̀ɖɔ̀ɔ̀ múɛ.

⁴ Bounɓoɔ̀ sè ma ɖé nyɔ ɓěɛ̀, ɓɛ́ ɔ ké ma Éézùɖùɛ̀-nyɔ̀ ɓěɔ̀ mú dɔ̃̌, ɓɛ́ ɔ kéɛ dyé kɛbì wa mu gma ɓě ɓɛ́ ɔ nyí zɔ̃̌ɔ̀ kà wa ɓǎ nììn ɓǎ ɓěɔ̀ dyììn ɖé Mózè múɛɛ dyi kpɔ̃ùn ní.

⁵ Éézùɖùɛ̀-nyɔ̀ ɓěɔ̀ cĩ́ ma ɖé Kénà-nyɔ̀ ɓěɔ̀ kè Hítì-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ hwìɛ̀.

⁶ Ké Éézùɖùɛ̀-nyɔ̀ ɓěɔ̀ kpɔ̃ ma nyɔ ɓěɔ̀ nììn dyú-màà ɓě dyi, ké wa nyí ma wa nììn dyú-màà ɓě nyɔ ɓěɔ̀ nììn dyú-gàà ɓěɔ̀, ké wa ɓiè ma nyɔ ɓěɔ̀ nììn gèɖèpɔ́ɔ̀ ɓěɔ̀.

Àníè jè

⁷ Ɓó tia ɓaɖaa, Éézùɖùɛ̀-nyɔ̀ ɓěɔ̀ nyu ma Bounɓoɔ̀ nàmàǔn bũ̌. Wa táà ma Bounɓo mɔ̀à waà Gèɖèpɔ́ɔ̀ kɛɛ dyi, ké wa ɓiè ma kũùn-kpò-gèɖèpɔ́ɔ̀ ɓě mɔ̀à Béò kè Àséwàɖà kɛ.

⁸ Ɔ jèɛɛ, Bounɓoɔ̀ kpáìn ma wa dyoɖoún mìɔ, ké ɔ po ma wa Kúsàùn-Wìɖìsàfáìn mɔ̀ ma Mɛ̀sɔ̀pɔ̀témìà-ɓòɖòɔ̀ kã́á kɛɛ xwaún dyi. Ké wa nì ma ɔ xwíɖíi ɓó zɔ̃ mɛ̀nɛ̌ìn-tã xwíníín.

⁹ Hwɛ̀ ké Éézùɖùɛ̀-nyɔ̀ ɓěɔ̀ pòìn ma Bounɓoɔ̀ kpéi, ɓɛ́ ɔ ké wa gbo kpá. Ké Bounɓoɔ̀ nyí ma wa gàa ɖò kɔ̃̀ nyɛ́nɛ́ mɔ̀ Àníè kɛ, ɓɛ́ ɔ ké wa póìn. Gàaɔ̀ mɔ̀ ma Kéɖɛ̀ ɖíí-gàà dyùwè mɔ̀à Kɛ́nà kɛɛ dyú-gàà. Ké Àníè póìn ma wa.

¹⁰ Bounɓoɔ̀ Zùùɔ̀ dyi ma Àníè kɔ̃, ké ɔ mɔ̀ ma Éézùɖùɛ̀-nyɔ̀ ɓěɔ̀ tɔ̀ɔ̀-ɓìɔ̀. Ké ɔ kpa ma wa to gbo. Ké Bounɓoɔ̀ po ma Kúsàùn-Wìɖìsàfáìn mɔ̀à Mɛ̀sɔ̀pɔ̀témìà-ɓòɖòɔ̀ kã́áɔ̀ kɛɛ ɔ xwaún dyi, ké Àníè ɖu ma ɔ toún.

¹¹ Sɔ̀ìn ɓóɛ gboɛɛ, gìɖìǐ nì ma ɖé ɓóɖóɔ̀ kɔ̃ ɓó zɔ̃ kpáɖá-nyɔ sɔ̃́ mú, ké Àníè mɔ̀à Kɛ́nàà dyú-gààɔ̀ kɛɛ mɛ́ ma hwɛ̀.

Éhù jè

¹² Púɛɛ, Éézùɖùɛ̀-nyɔ̀ ɓěɔ̀ nyu ma Bounɓoɔ̀ nàmàǔn bũ̌ ɖe. Ɔ jèɛɛ, Bounɓoɔ̀ po ma wa Ɛ́gɔ̀nɔ̀ ɓɛ́ ɔ mɔ̀ ma Móà-ɓòɖòɔ̀ kã́á kɛɛ xwaún dyi.

¹³ Ké Ɛ́gɔ̀nɔ̀ poìn ma Ámànà-nyɔ̀ ɓěɔ̀ kè Àmáɖɛ̀-nyɔ̀ ɓěɔ̀ dyí, ɓɛ́ wa ké ɔ gbo kpá. Ké ɔ dyà ma Éézùɖùɛ̀-nyɔ̀ ɓěɔ̀ to kɔ̃, ké ɔ kè ɔ sójà ɓěɔ̀ ɖú ma Hwɛ̃-Gbǎ-hwɔ̀ɖɔ̀ɔ̀ dyí.

¹⁴ Púɛɛ, Éézùɖùɛ̀-nyɔ̀ ɓěɔ̀ nì ma Ɛ́gɔ̀nɔ̀ mɔ̀à Móà-kã̀ǎɔ̀ kɛɛ xwíɖíi ɓó zɔ̃ ɓaɖa-bùè sè mɛ̀nɛ̌ìn-tã xwíníín.

¹⁵ Hwɛ̀ ké Éézùɖùɛ̀-nyɔ̀ ɓěɔ̀ pòìn ma Bounɓoɔ̀ kpéi ɖe. Ké ɔ nyí ma wa gàa ɖò kɔ̃ nyɛ́nɛ́ mɔ̀ Éhù kɛ, ɓɛ́ ɔ ké wa póìn. Gàaɔ̀ mɔ̀ ma Géwàɖà ɓɛ́ ɔ sɔ̀ ma Bɛ̃́címà nììn xwéɖé-dùɔ̀ múɛɛ dyú-gàà. Ɔ sè ma kunuà. Wé ɖòɛ̀ ɓaɖaa, Éézùɖùɛ̀-nyɔ̀ ɓěɔ̀ dèìn ma ɔ tácì-wìɖì xwa, ɓɛ́ ɔ kéɛ ma Ɛ́gɔ̀nɔ̀ mɔ̀à Móà-kã̀ǎɔ̀ kɛɛ gbo kpa.

¹⁶ Ɔ nì ná kɛɛ, Éhù nyu ma gàsíà ɓéɖé dyéɖé sɔ̃́ ɖò. Ɔ tɔ̀mɔ̀-tɔ̀mɔ̀ mɔ̀ ma jìì-ɓàɖàǎ sɔ̃́. Ké ɔ jìnìɛ̀n ma gbo, hwɔ ɖé ɔ ɖiaún dyí, ké ɔ wáɖáa ɔ mú-po-ɖɔ̀ɔ̀ kɔ̃in.

¹⁷ Ké Éhù kpa ma tácì-wìɖìɔ̀, ké ɔ nyíɛ ma Ɛ́gɔ̀nɔ̀ mɔ̀à Móà-kã̀ǎɔ̀ kɛɛ xwa. Ɛ́gɔ̀nɔ̀ mɔ̀ ma gàa búún-bùùn.

^18-19 Ti ɓɛ́ Éhù ɖǎ ma tácì-wìɖìɔ̀ tòɛɛ, ɔ kè ɔ gbo-nì-gàà ɓěɔ̀ kɔ́ìn ma ɖe. Ké wa nyini ma ɓó sɔ́ɔ́-bũ̌in-wàìn-naín nì ma ɓó Gíógàò-hwɔ̀ɖɔ̀ɔ̀ wĩin nyɛɛ gbo. Ké ɔ ɖoɓo ma ɔ gbo-nì-gàà ɓěɔ̀ dyúa, kɛɛ ɔ mìɔùn kɔ́ìn ma ɖe. Ké ɔ dyi ma ɖé kã́áɔ̀ gbo ɖe, ké ɔ ɖá, “Ɓɔ̌ɔ̀, ḿ ɓéɖé sáná ɖò, ɓɛ́ ḿ kè mɔ̀ kéɛ pa.” Ké kã́áɔ̀ cɛ̃ɛ ma ɔ gbo-nì-nyɔ̀ ɓěɔ̀ gbo, ké ɔ ɖá, “Ɓě sí píé.” Ké ɔ gbo-nì-nyɔ̀ ɓěɔ̀ sí ma píé.

²⁰ Hwɛ̀ ké Éhù mu ma ɔ wɔ̃ ti ɓɛ́ ɔ ɖòùn kò ma ɖé ɔ dyií-gbòɔ̀ ɓí-dyùɔ̀ mú dyi, ɖé ɔ pìɔ̌-kpɔ̃̀ìn-naínɔ̀ kɛ. Ké Éhù ɖá, “Ḿ ɓéɖé bɔ̃̌ ɖò sɔ̀ìn ɖé Gèɖèpɔ́ɔ̀ gbo ɓó m̀ bìì.” Ké kã́áɔ̀ sɔ̀ ma ɔ kɔ̃-kò-ɖɛ̀ɔ̀ kɔ̃ dyí.

²¹ Púɛɛ, Éhù kpa ma ɔ kunuà-sɔ̃̀ɔ̀ ɓó ɔ ɖiaún-gbùà-dyèɖèɔ̀ dyí, ké ɔ jiɖi ma ɓó ɔ gàsíàɔ̀, ké ɔ sṹɛ ma kã́áɔ̀ xwíníín.

²² Ké gàsíàɔ̀ kèɛ̀ ɖoɔ̀ pa ma, ké gàsíàɔ̀ dyéɖéɔ̀ wóɖóìn ma ɔ kɔ̃ún. Éhù se ma gàsíàɔ̀ ɖe jiɖi, ké kã́áɔ̀ cáná kã ma ɓíɔ̀, ké ɔ ɓáìn ma gàsíàɔ̀ kɔ̃in.

²³ Hwɛ̀ ké Éhù sí ma píé, ké ɔ kã ma dyií-gbòɔ̀ ɓí-dyùɔ̀ gbǒ-wɔ̃̀ ɓěɔ̀, ké ɔ gbǎ ma wa.

²⁴ Ti ɓɛ́ Éhù ɖǎ ma muɛɛ, púɛɛ, kã́áɔ̀ gbo-nì-nyɔ̀ ɓěɔ̀ dyi ma, ké wa dyɛ̀ìn ma dyií-gbòɔ̀ ɓí-dyùɔ̀ gbǒ-wɔ̃̀ ɓěɔ̀ gbǎa dyi. Ké wa ɖá, “À hwòɖǒ ɖá ɔ nì ɖɛ ɖeín muɛń ɖé ɔ ɖɛ-ɖeín-mùìn-ɓì-dyù nìà ɖé gbǒɔ̀ múɛɛ mú.”

²⁵ Ɔ jèɛɛ, wa gã̀ ma fòèɛ̌n dyi tee cá, ké ɔ ɖǎ dɛ̃-kà kpá. Kɛɛ ti ɓɛ́ wa ɖǎ ɓó gmɔ̀ tee, ké ɔ se ma gbǒɔ̀ kaàǔn nìɛɛ, púɛɛ, wa ɖú ma kaàìn-ɖɛ̀ ɖò dyí, ké wa kaà ma gbǒ-wɔ̃̀ ɓěɔ̀. Ti wa ɖǎ ma gbǒɔ̀ kaà kɛɛ, wa dyɛ̀ìn ma waà kã́áɔ̀ xwɛ́ ɓó ɓíɖíi dyi.

²⁶ Ti wa nì ma kà fòèɛ̌n nyɛɛ, púɛɛ, Éhù ɖǎ ma xwáɖáún kpá, ké ɔ ɖǎ ma mu. Ɔ ɖǎ ma sɔ́ɔ́-bũ̌in-wàìn-naínɔ̀ zi, ké ɔ ɖǎ ma ɖé Séíwàɖà-pàɔ̀ mú mu.

²⁷ Ti ɓɛ́ ɔ nyini ma ɖé Séíwàɖà-pà ɓɛ́ ɔ nì ɖé Ífèɖèìn Toɖo-ɓòɖòɔ̀ kɔ̃ɛ múɛɛ, ɔ ɖá ma Éézùɖùɛ̀-nyɔ̀ ɓě nì ma ɖéɛɛ to gbo dyììn ɖé ɖɔ-kpa-wùɖù mú. Ké ɔ kè Éézùɖùɛ̀-nyɔ̀ ɓěɔ̀ mu ma. Ɔ mìɔùn nì ma wa dyúa.

²⁸ Ɔ cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Ɓě sí ḿ kíɖíí, sepóɛɖé Bounɓoɔ̀ ɖǎ Móà-nyɔ̀ ɓě mɔ̀à ɓěɛ̀ mú-nyɛ́-nyɔ̀ ɓěɔ̀ kɛɛ ɓě xwaún dyi po.” Ɔ jèɛɛ, wa sí ma ɔ kíɖíí. Ké wa kpɔ̃ ma dɛ̀ mɔ̀ ma Jɔ́nì-nìɔ̀ péɖéìn-naín nyɛ. Ɔ mɔ̀ hwìè mu ma ɖé Móà-ɓòɖòɔ̀ kɔ̃ɛ, ké nyɔ ɖò se ma péɖéɛ ɓɛ́ìn.

²⁹ Ɓó tia ɓaɖaa, wa ɖáɓá ma Móà-nyɔ̀ ɓěɔ̀ gàa-zà-nyɔ̀ táázĩ̀ìn ɓaɖa-bùè. Wa nyɔ dyúáɖò se ma pó dyɛ mɔ̀ùn.

³⁰ Ké Móà-nyɔ̀ ɓěɔ̀ kpá ma Éézùɖùɛ̀-nyɔ̀ ɓěɔ̀ xwíɖíi ɓó wéa ɓaɖa. Sɔ̀ìn ɓóɛ gboɛɛ, gìɖìǐ nì ma ɖé ɓóɖóɔ̀ kɔ̃ ɓó zɔ̃ kpáɖá-nyɔ hĩinyɛ xwíníín.

Sã́gà jè

³¹ Tɔ̀ɔ̀-ɓìɔ̀ nyɔ kɔ ma ɓó Éhù ɖeín dyíɛɛ mɔ̀ gàa ɖò kɔ̃̀ nyɛ́nɛ́ mɔ̀ Sã́gà kɛ. Ɔ mɔ̀ ma Ánàfìɛ̀ dyú-gàà. Ɔ ɖáɓá ma Féɖésìà-nyɔ̀ hɔ̃dɛ̀ɖɛ̀ mɛ̀nɛ̌ìn-ɖò ɓìɖǐ-nàìn-ɓà-cù dyí. Ké ɔ mɔ̀ùn póìn ma Éézùɖùɛ̀-nyɔ̀ ɓěɔ̀ ɖekè.