Tɔ̀ɔ̀-ɓìɔ̀ 21 - Ɓǎsɔ́ɔ̀ Báɓòɔ̀

Bɛ̃́címà-gàà ɓěɔ̀ nyɔ́nɔ́ jè

¹ Hwɛ̀ ɓɛ́ ɖɛ ɓěɛ̀ ké ma kpáa, Éézùɖùɛ̀-gàà ɓěɔ̀ ɖi ma wuɖu ɖé Mípà-hwɔ̀ɖɔ̀ɔ̀ mú, ké wa ɖá, “À se à dyú-màà ɓěɔ̀ ɖò Bɛ̃́címà-gàà ɖò nyíɛ mu, ɓɛ́ ɔ ké ɔ gmàà jǔ.”

² Ti ɓɛ́ toɔ̀ ɖǎ ma dyi ziɛɛ, Éézùɖùɛ̀-nyɔ̀ ɓěɔ̀ mu ma ɖé Bɛ́fèò-hwɔ̀ɖɔ̀ɔ̀ mú, ké wa kò ma ɓó Gèɖèpɔ́ɔ̀ dyúa dyi, ké wa ɖú ma vĩ̌ kpàǐ ɖé wìì vɛ̀nɛ̀ mú. Wa gã̀ ma vĩ̌ɛń dyi tee ké dyóɖó zi ma.

³ Waà vĩ̌-wùɖùɔ̀ ɖá, “Óó Bounɓo, mɔ̀ mɔ̀à Éézùɖùɛ̀ Gèɖèpɔ́ɔ̀ kɛɛ, ɖɛ́ kɔ̃̀ jè ɖɛ nì kàà kpáà Éézùɖùɛ̀-ɓòɖòɛ̀ gbo kɛ́? Ɖɛ́ kɔ̃̀ jè xwéɖé-dù ɖò paà dyi nɔ̄ Éézùɖùɛ̀-ɓòɖòɛ̀ kɔ̃ ɓó zɛ̃̌ɛ̀ kɛ́?”

⁴ Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Éézùɖùɛ̀-nyɔ̀ ɓěɔ̀ po ma sáa-kɔ̃-zàìn-gbàà ɖò, ké wa nyùìn ma ɓó fɔ̃ɔ-sàǎ-zàìn-ɖɛ̀ ɓě kè gbo-kpɔ̃ìn-sàǎ-zàìn-ɖɛ̀ ɓě.

⁵ Ké wa diè ma ɖɛi, ké wa ɖá, “Nyɛ́ nì dà à hwìɛ̀, ké ɔ se ma ɖé Mípà-hwɔ̀ɖɔ̀ɔ̀ mú mu, ti ɓɛ́ à poìn ma kà ɓó Bounɓoɔ̀ dyúa dyíɛɛ kɛ́?” Wa diè ma ɖɛi, sepóɛɖé wa ɖǎ ma wuɖu ɖi kà nyɔ mɔ̀ nyɔ ɓɛ́ ɔ se ma Bounɓoɔ̀ dyúa dyí-poìn-poìnɔ̀ hwìɛ̀ nì ɖé Mípà-hwɔ̀ɖɔ̀ɔ̀ múɛɛ ɓéɖé ɔ ké mɛ́ɛ.

⁶ Ɓó tia ɓaɖaa, Éézùɖùɛ̀-nyɔ̀ ɓěɔ̀ nì ma wìì mú ɓó wa ɖíí ɓě mɔ̀à Bɛ̃́címà-nyɔ̀ ɓěɔ̀ kɛɛ jè, ké wa ɖá, “Éézùɖùɛ̀ xwéɖé-dù ɓěɔ̀ ɖò ɖǎ ɓó cɛ̃̀ ɓó zɛ̃̌ɛ̀.

⁷ Kà ɓɛ́ à ɖǎà Bounɓoɔ̀ dyí gboò kà à se à dyú-màà ɓěɔ̀ ɖò waà gàa ɓěɔ̀ ɖò nyíɛ mu, ɓɛ́ ɔ kéà ɔ gmàà jǔɛɛ, nìí, dɛ̌ à mu nyɔ́nɔ́ zàùn ɓó waà nyɔ ɓě sèà ɓóɛɛ bììɛ́?”

⁸ Ɔ jèɛɛ, wa diè ma kà ɖɛi, ké wa ɖá, “Nyɛ́ nì ɖé Éézùɖùɛ̀ɛ̀ xwéɖé-dù ɓěɔ̀ hwìɛ̀, ké ɔ se ma dyí-poìn-poìn nì ma kà ɖé Mípà-hwɔ̀ɖɔ̀ɔ̀ mú ɓó Bounɓoɔ̀ dyúa kɛɛ hwìɛ̀ nìɛ́?” kɛ̀. Hwɛ̀ ké wa wɔ̃́ɔ ma múin kà nyɔ ɖò se ma ɖé Jáɓè-hwɔ̀ɖɔ̀ nìà ɖé Gíɖèà-ɓòɖòɔ̀ kɔ̃ɛɛ mú sɔ̀, ɓɛ́ ɔ ké ma dyí-poìn-poìnɔ̀ hwìɛ̀ nìɛ.

⁹ Kà wa nyuɛ ma dyí dyuòɛ̀ kɛɛ mɔ̀, ti wa gbɛ̌ìn ma nyɔ ɓěɔ̀ dyíɛɛ, púɛɛ, wa dyéɛ kà Jáɓè-nyɔ̀ ɖò se ma wa hwìɛ̀ nì kɛ.

¹⁰ Ké Éézùɖùɛ̀-nyɔ̀ séín ɓěɔ̀ ɖoɓo ma gàa-zà-nyɔ̀ ɓěɔ̀ táázĩ̀ìn ɓaɖa-bùè sè sɔ̃́. Wa cuò ma wa, ké wa ɖá, “Ɓě mu ɖé Jáɓè-hwɔ̀ɖɔ̀ɔ̀ mú, ɓɛ́ ɓě ké nyɔ séín ɓě nì ɖéɛɛ gàsíà dyí ɖáɓá. Ɓě mɛ ɖáɓá màa ɓě kè dyú mɛ́nɛ́ɛ́ ɓěɔ̀ ɖekè.

¹¹ Kǎà ɓě mɛ nyuɛ kà. Ɓě mɛ ɖáɓá gàa séín ɓěɔ̀ ɔ kè màa séín ɓɛ́ wa ɖǎ toɖo kɔ̃ jè dyuòɛ.”

¹² Ti wa mu ma ɖé Jáɓè-hwɔ̀ɖɔ̀ɔ̀ múɛɛ, wa dyé ma ɖé màa-dyù gmɔ̀ ɓɛ́ wa se toɖo kɔ̃ jè dyuòɛɛ hɔ̃dɛ̀ɖɛ̀ hĩinyɛ ɖé nyɔ ɓě cĩ́ ma ɖéɛɛ hwìɛ̀. Ké wa ɖú ma wa dyí, ké wa kpa ma wa ɖé Síɖò-hwɔ̀ɖɔ̀ nìà ɖé Kénà-ɓòɖòɔ̀ kɔ̃ɛɛ mú, dɛ̀ ɓɛ́ Éézùɖùɛ̀-nyɔ̀ ɓěɔ̀ poìn ma kà dyíɛ.

¹³ Hwɛ̀ ké Éézùɖùɛ̀-nyɔ̀ séín ɓěɔ̀ ɖoɓo ma nyɔ ɖé Bɛ̃́címà-gàà ɓě cĩ́ ma kà ɖé Wíɖímɔ̀-sɔ̀ɔ̌-kpòɔ̀ wáún wɛ̃ɛ gbo, ɓɛ́ gìɖìǐ ké ma ɓó wa pṹa nì.

¹⁴ Ɔ jèɛɛ, Bɛ̃́címà-gàà ɓěɔ̀ dyi ma ɖe ɓó tia ɓaɖa. Ké Éézùɖùɛ̀-nyɔ̀ ɓěɔ̀ nyí ma wa Jáɓè-màà ɓě ɓɛ́ wa se ma kà ɖáɓáa. Kɛɛ màa ɓěɔ̀ se ma gàa séín ɓěɔ̀ dyí gbɛ̌.

¹⁵ Ɓó tia ɓaɖaa, Éézùɖùɛ̀-nyɔ̀ ɓěɔ̀ nì ma wìì mú ɓó Bɛ̃́címà-gàà ɓěɔ̀ jè, sepóɛɖé Bounɓoɔ̀ ɖǎ ma ɓí vɛ̀nɛ̀ ɖò ɖé Éézùɖùɛ̀-xwèɖè-dù ɓěɔ̀ hwìɛ̀ po.

¹⁶ Hwɛ̀ ké Éézùɖùɛ̀-nyɔ̀ séín ɓěɔ̀ nyɔ vɛ̀nɛ̀ ɓěɔ̀ ɖá, “Xwɛ̌ à mu Bɛ̃́címà-gàà ɓě sèà ɓóɛɛ nììn nyɔ́nɔ́ jè nyuùn wɛ̃́, kà ɓɛ́ Bɛ̃́címà-màà ɓěɔ̀ ɖǎà mɛ́ɛ hwɛ̀ɛ kɛ́?

¹⁷ À ɓéɖé ɓɛ́ à ké hwìè ɖò dyi mɔ́ ɓó Bɛ̃́címà-gàà ɓě sèà ɓóɛɛ bìì, ɓɛ́ wa ké dyú wóɖóìn, ɓɛ́ Éézùɖùɛ̀-xwèɖè-dù ɓaɖa-bùè sè sɔ̃́ ɓěɔ̀ ɖòɛ̀ xwéɖé ní kɔ̃̀ ɖà dyi wáɖá.

¹⁸ À se wa à dyú-màà ɓěɔ̀ nyíɛ ɓɛ́ìn, ɓɛ́ wa ké wa gmàà jǔ, sepóɛɖé à ɖǎ wuɖu ɖi ɓá ɖɛ nìà kɛ jè dyí. Wuɖuɔ̀ mɔ̀, gboò-wùɖù mɛ nì nyɔ mu Bɛ̃́címà-gàà ɖò nyɔ́nɔ́ nyíìn nyɛɛ kɔ̃.”

¹⁹ Hwɛ̀ ké wa ɖá, “Má, Bounɓoɔ̀ hwɔ ɓɛ́ à paà nɔ̄ Síɖò-hwɔ̀ɖɔ̀ɛ̀ mú ɓó zɔ̃ séín xwíníín nyɛɛ ɖǎ dyi xwɛ̃́ìne?” Ɔ nì ná kɛɛ, Síɖò-hwɔ̀ɖɔ̀ɔ̀ hwɔ ma ɖé Bɛ́fèò-hwɔ̀ɖɔ̀ɔ̀ xwía dyí, ké ɔ nì ɖé Ɖɛ̀ɓónà-hwɔ̀ɖɔ̀ɔ̀ zɔ̃̌in, ké ɔ nì ɓó hwìè sɔ̀à Bɛ́fèò-hwɔ̀ɖɔ̀ɔ̀ mú, ɓɛ́ ɔ muà Sɛ́kɛ̃̀ìn-hwɔ̀ɖɔ̀ɔ̀ múɛɛ dyóɖó-xwáɖáún-wóɖóìn-naínɔ̀.

²⁰ Ɔ jèɛɛ, wa cɛ̃ɛ ma Bɛ̃́címà-gàà ɓěɔ̀ gbo, ké wa ɖá, “Ɓě mu, ɓɛ́ ɓě ké ɖé géɖéè-gbǎ ɓěɔ̀ mú vǐè,

²¹ ɓɛ́ ɓě ké hwìè fò. Ti ɓɛ́ Síɖò-màà-dyù gmɔ̀ ɓěɔ̀ mu wɛ́ɖɛ́ kpáa dyàùn ɓó hwɔɔ̀ tiín nyɛɛ, nìí, ɓě mɛ sɔ̀ géɖéè-gbǎ ɓěɔ̀ mú, ɓɛ́ ɓě ké ɓó sí, ɓɛ́ ɓě ɖò-ɖò ké Síɖò-màà-dyù ɓěɔ̀ nyɔ ɓě mɔ́ɛɛ kpɔ̃, ɓɛ́ ɓě ké wa ɓě ɓíɖí Bɛ̃́címà-ɓòɖòɔ̀ kɔ̃ kpa.

²² Ɔ jǔ ké wa ɓǎ ɓě mɔɔ wa ɖíí-gàà ɓě dyi à zaa dè ní, nìí, à muɛ wa gbo cɛ̃ìn, ɓɛ́ à ké níiń, ‘À ɓaà ɓě ní, ɓě táà wa dyi ɓɛ́ wa ké wa kpa, sepóɛɖé à se ma nyɔ́nɔ́ ɖò ɖé toɔ̀ gbo zà ɓó wa ɖò-ɖò bìì. Ké zaa se ɓě kpɔ̃ɔ́ mu, sepóɛɖé ɓě mìɔùn se ɓěɛ̀ dyú-màà ɓěɔ̀ dyí ɖú, ɓɛ́ ɓě kéɛ wa nyí.’ ”

²³ Ɔ jèɛɛ, Bɛ̃́címà-gàà ɓěɔ̀ nyuɛ ma náa. Ti ɓɛ́ màa-dyù gmɔ̀ ɓěɔ̀ nì ma wɛ́ɖɛ́ kpáuń wɛ̃ɛ, gàa ɓěɔ̀ ɓéɖé ma ɓó màa-dyù gmɔ̀ ɓěɔ̀ ɖò-ɖò kpɔ̃uń, ké wa kpa ma wa, ɓɛ́ wa ké waà gmàà ɓě jǔ. Hwɛ̀ ké wa mu wa ɓíɖí ɖe, ké wa po ma waà hwɔɖɔ ɓěɔ̀ ɖe, ké wa cĩ́ ma ɖé wa mú.

²⁴ Ti ɓɛ́ ɖɛ ɓěɛ̀ ɖǎ ma dyi ziɛɛ, Éézùɖùɛ̀-nyɔ̀ tɔ̀ɔ̀ ɓěɔ̀ sɔ̀ ma ɓó Síɖò-hwɔ̀ɖɔ̀ɔ̀ mú, ké wa mu ma wa nììn xwéɖé-dù ɖò-ɖò ɓěɔ̀ gbo ɖe ɖé wa nììn hwɔɖɔ ɖò-ɖò ɓěɔ̀ mú.

²⁵ Ɓó tia ɓaɖaa, Éézùɖùɛ̀-nyɔ̀ ɓěɔ̀ se ma kã́á ɖò ɓéɖé. Nyɔ ɖò-ɖò séín nyu ma ɖɛ sɛ́ɖɛ́ìn dyí ɖé ɔ mìɔùn dyéɖéín nyɛɛ pū.