Tɔ̀ɔ̀-ɓìɔ̀ 20 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ dyé ti ɓó to jè

¹ Hwɛ̀ ké Éézùɖùɛ̀-nyɔ̀ ɓě sɔ̀ìn Gíɖèà-ɓòɖòɔ̀ kɔ̃ɛ kè Éézùɖùɛ̀-nyɔ̀ tɔ̀ɔ̀ ɓě sɔ̀ìn ɖé Dɛ̃́ìn-hwɔ̀ɖɔ̀ɔ̀ mú, ɓɛ́ ɔ kéà ɓóɖóɔ̀ kpó cɛ̃ ɓɛ́ ɔ kéà Bèsíɓà-hwɔ̀ɖɔ̀ɔ̀ mú nyiniɛɛ poìn ma dyí ɖé hwòɖǒ dyúáɖò mú. Wa poìn ma dyí ɓó Bounɓoɔ̀ dyúa, ɖé Mípà-hwɔ̀ɖɔ̀ɔ̀ mú.

² Éézùɖùɛ̀-xwèɖè-dù ɓěɔ̀ nàìn-nyɔ̀ ɓěɔ̀ nì ma Gèɖèpɔ́ɔ̀ nyɔ ɓěɔ̀ hwìɛ̀, ké gàa ɓě ɓɛ́ìn ma to vɔ̃ɔ kɛɛ mɔ̀ ma nyɔ-kpò táázĩ̀ìn hɔ̃dɛ̀ɖɛ̀ hĩinyɛ.

³ Ɓó tia ɓaɖaa, Bɛ̃́címà-nyɔ̀ ɓěɔ̀ wɔ̃́ɔ ma kà Éézùɖùɛ̀-nyɔ̀ séín sè ɓó ɖeɛɛ poìn ma dyí ɖé Mípà-hwɔ̀ɖɔ̀ɔ̀ mú kɛ. Ti ɓɛ́ Éézùɖùɛ̀-nyɔ̀ ɓěɔ̀ poìn ma kà dyíɛɛ, wa diè ma Ɖíìváà-gàà kɔ̃̀ gmàà wa ɖáɓá ma kà kɛɛ dyi, ké wa ɖá, “Xwɛ̌ ɖɛ nyìnììn dyíin nìà kɛ nyuà kpáa cá kɛ́? Cɛ̃ɛ à gbo.”

⁴ Ké Ɖíìváà-gààɔ̀ ɖá, “Ḿ kè ní gmaɖe-nyɔ̀nɔ̀ɔ̀ dyi ma ɖé Gíɓìà-hwɔ̀ɖɔ̀ nìà ɖé Bɛ̃́címà-ɓòɖòɔ̀ kɔ̃ɛɛ mú, ɓɛ́ à ké ma ɓó pɛ̃́.

⁵ Púɛɛ, ɓó máaún-hwùɖùɔ̀ múɛɛ, Gíɓìà-gàà ɓěɔ̀ dyi ma, ké wa dɛ́ɖɛ́ gbǒɔ̀ ɓó ní jè. Wa mɔ́ wa ké ma ḿ ɖáɓá. Ké wa kpɔ̃̀ìn ma ní gmaɖe-nyɔ̀nɔ̀ɔ̀ ganaún, ké wa kè ɔ nì ɓó da, ké ɔ mɛ́.

⁶ Hwɛ̀ ké ḿ ɖú ma ní gmaɖe-nyɔ̀nɔ̀ɔ̀ xwɛ́ɔ̀ dyí, ké ḿ cɛ̃ìn ma ɔ dyi mɛ́nɛ́-mɛ́nɛ́, ké ḿ tòà pĩ́á ɖò-ɖò ɖé Éézùɖùɛ̀-nyɔ̀ ɓěɔ̀ xwéɖé-dù ɓaɖa-bùè sè sɔ̃́ ɓěɔ̀ ɖò-ɖò gboɛ̀, sepóɛɖé wa nyu hwòɖǒ-kɔ̃in-nyìnììn-ɖɛ̀ kè dɛ̃-ɖɛ̀ vɛ̀nɛ̀ nìà kɛ nɔ̄ Éézùɖùɛ̀-ɓòɖòɛ̀ kɔ̃.

⁷ Ɔ jèɛɛ, ɓě Éézùɖùɛ̀-nyɔ̀ séín ɓěɛ̀ mɛ poìn hwìɖǐi, ɓɛ́ ɓě ké ɖé wuɖu zà ɓá ɖɛ nìà kɛ dyí.”

⁸ Hwɛ̀ ké Éézùɖùɛ̀-nyɔ̀ séín ɓěɔ̀ sɔ̀ ma dyí ɖé hwòɖǒ dyúáɖò mú, ké wa ɖá, “À séín ɖò se hwɔɖɔún muɛ́ mu. À nyɔ dyúáɖò dyɛ mɔ̀ùn se ɔ ɓíɖí-taún ɖe muɛ́ mu.

⁹ Ɖɛ à mu Gíɓìà-hwɔ̀ɖɔ̀ɔ̀ bũ̌ nyuùn wɛ̃ɛ, ɔ kɛà kɛ̀. À mu gbo-ɖàɓàìn-ɖɛ̀ nyuùn, ɓɛ́ à ké kà à kéɛ to kɔ̃ kpaa nyuɛɛ dyí dyuò.

¹⁰ À mu sójà séín sɔ̀ìn ɖé Éézùɖùɛ̀ xwéɖé-dù séín ɓěɔ̀ múɛɛ dú ɓaɖa-bùè mú geìn, ɓɛ́ dú dyúáɖò ké ɖii-ɖɛ̀ dyà ɓó sójà tɔ̀ɔ̀ ɓěɔ̀ bìì. Ɔ ɖǎ ná nìǐn, nìí, sójà séín ɓěɔ̀ mu ɖé Gíɓìà-hwɔ̀ɖɔ̀ nìà ɖé Bɛ̃́címà-ɓòɖòɔ̀ kɔ̃ɛɛ mú muùn, ɓɛ́ wa ké Gíɓìà-nyɔ̀ ɓěɔ̀ gǎ-dyé-dyé kɔ̃ po ɓó hwòɖǒ-kɔ̃in-nyìnììn-ɖɛ̀ wa ɖǎà nyu nɔ̄ Éézùɖùɛ̀-ɓòɖòɛ̀ kɔ̃ɛɛ jè.”

¹¹ Kǎà Éézùɖùɛ̀-gàà séín ɓěɔ̀ poìn ma dyí ɖé hwòɖǒ dyúáɖò mú, ɓɛ́ wa ké hwɔɖɔɔ̀ to kɔ̃ kpa.

¹² Hwɛ̀ ké Éézùɖùɛ̀-xwèɖè-dù ɓěɔ̀ ɖoɓoìn ma kíá dyi ɖé Bɛ̃́címà nììn xwéɖé-dùɔ̀ múin dà séín, ké wa ɖá, “Ɖɛ́ mɔ̀ hwòɖǒ-kɔ̃in-nyìnììn-ɖɛ̀ ɓɛ́ ɓě nyuà kɛɛ xwíníín nyɛ́?

¹³ Ɓó kàǔn wɛ̃ɛ, ɓě tò hwòɖǒ-kɔ̃in-nyìnììn-gàà ɓě nìà ɖé Gíɓìà-hwɔ̀ɖɔ̀ɔ̀ múɛ, ɓɛ́ à ké wa ɖáɓá, nìí ɓɛ́ dyììn ɖéɛ múɛɛ, à ké ɖɛ gbà nìà kɛ Éézùɖùɛ̀-ɓòɖòɔ̀ kɔ̃ dyi zà.” Kɛɛ Bɛ̃́címà-nyɔ̀ ɓěɔ̀ se ma wa mǔè Éézùɖùɛ̀-nyɔ̀ ɓěɔ̀ ɖùǔ gbo tò.

¹⁴ Ké Bɛ̃́címà-nyɔ̀ ɓěɔ̀ poìn ma dyí ɖé Gíɓìà-hwɔ̀ɖɔ̀ɔ̀ mú, ɓɛ́ wa ké ma Éézùɖùɛ̀-nyɔ̀ ɓě sèà ɓóɛɛ gbo vɔ̃.

¹⁵ Ɓó wéa ɓaɖaa, Bɛ̃́címà-nyɔ̀ ɓěɔ̀ poìn ma sójà táázĩ̀ìn kpáɖá-nyɔ sè mɛ̀nɛ̌ìn-ɖò dyí sɔ̀ìn ɖé waà hwɔɖɔ ɓěɔ̀ mú, ké gàa-zà-nyɔ̀ hɔ̃dɛ̀ɖɛ̀ mɛ̀nɛ̌ìn-sɔ̃́ sɔ̀ ma ɖé Gíɓìà-hwɔ̀ɖɔ̀ɔ̀ mú.

¹⁶ Gàa-zà-nyɔ̀ hɔ̃dɛ̀ɖɛ̀ mɛ̀nɛ̌ìn-sɔ̃́ nì ma sójà ɓěɛ̀ hwìɛ̀, ké wa sè ma kunuà. Wa ɖò-ɖò nɔ̀mɔ̀ ma jìǐ mìɔ cá jèɛɛ, ɔ jǔ ké nyɔ ɖò dyiɔ́ má mí-wɔ́ɖɔ́ ɖò dyií beè ní, wa ɖò-ɖò ɓɛ́ìn bǒ-ɖɛ̀-kpò pòɛ̀n, ké wa seɛ bĩ.

¹⁷ Ɓó tia ɓaɖaa, Éézùɖùɛ̀-nyɔ̀ ɓě mɔ̀ùn sèà ɓóɛɛ poìn ma gàa ɓě ɓɛ́ìn to vɔ̃ɔ kɛɛ nyɔ-kpò táázĩ̀ìn hɔ̃dɛ̀ɖɛ̀ hĩinyɛ dyí.

Éézùɖùɛ̀-nyɔ̀ ɓěɔ̀ vɔ̃ Bɛ̃́címà-nyɔ̀ ɓěɔ̀ gbo

¹⁸ Sɔ̀ìn ɓóɛ gboɛɛ, Éézùɖùɛ̀-gàà ɓěɔ̀ sɔ̀ ma dyí, ké wa mu ɖé Bɛ́fèò-hwɔ̀ɖɔ̀ɔ̀ mú, ké wa diè ma Gèɖèpɔ́ɔ̀ dyi, ké wa ɖá, “À nyɛ́ mɛ kpa Bɛ̃́címà-nyɔ̀ ɓěɔ̀ to kɔ̃ kĩ́ín nyɛ́?” Ké Bounɓoɔ̀ jǔ ma wa gɔ̃̌, ké ɔ ɖá, “Júɖà-gàà ɓěɔ̀ mɛ kpa toɔ̀ kĩ́ín.”

¹⁹ Wéɔ̀ nyɔ kɔ ma ɓó dyíɛɛ gànà-kṹún wɛ̃ɛ, Éézùɖùɛ̀-gàà ɓěɔ̀ sɔ̀ ma dyí, ké wa nyànàìn ma waà jàɖàìn-gbò ɓěɔ̀ dyi ɓó Gíɓìà-hwɔ̀ɖɔ̀ɔ̀ wĩín.

²⁰ Ké Éézùɖùɛ̀-gàà ɓěɔ̀ mu ma, ɓɛ́ wa ké ma Bɛ̃́címà-nyɔ̀ ɓěɔ̀ to kɔ̃ po. Wa ɓá waà sójà ɓěɔ̀, ké wa gmɔ̀ìn ma ɖé Gíɓìà-hwɔ̀ɖɔ̀ɔ̀ gbo.

²¹ Púɛɛ, Bɛ̃́címà-gàà ɓěɔ̀ sɔ̀ ma ɖé Gíɓìà-hwɔ̀ɖɔ̀ɔ̀ mú, ké wa ɖáɓá ma Éézùɖùɛ̀-gàà ɓěɔ̀ nyɔ-kpò táázĩ̀ìn kpáɖá-nyɔ sè sɔ̃́ ɖé toɔ̀ gbo, ɓó wéa ɓaɖa.

^22-23 Ké Éézùɖùɛ̀-gàà ɓěɔ̀ mu, ké wa gã̀ ma vĩ̌ɛń dyi ɓó Bounɓoɔ̀ dyúa tee ké dyóɖó zi ma. Sɔ̀ìn ɓóɛ gboɛɛ, wa diè ma Bounɓoɔ̀ dyi, ké wa ɖá, “À mɛ kpa à ɖíí ɓě mɔ̀à Bɛ̃́címà-nyɔ̀ ɓěɔ̀ kɛɛ to kɔ̃ ɖeè?” Ké Bounɓoɔ̀ jǔ ma wa gɔ̃̌, ké ɔ ɖá, “Ɓě kpa wa to kɔ̃.” Ɔ jèɛɛ, Éézùɖùɛ̀-gàà ɓěɔ̀ poìn pòìn ma kpéí, ké wa dyé ma ti ɓó toɔ̀ jè ɖe ɖé pá kɔ̃̀ mú wa nyànà ma kà dyi ɓó wé kĩ́ín-kĩ́ínɔ̀ ɓaɖaa.

²⁴ Ké Éézùɖùɛ̀-gàà ɓěɔ̀ mu ma Bɛ̃́címà-nyɔ̀ ɓěɔ̀ wɔ̃ ɖe ɓó wéa ɓaɖa.

²⁵ Ti ɓɛ́ Bɛ̃́címà-gàà ɓěɔ̀ sɔ̀ ma Gíɓìà-hwɔ̀ɖɔ̀ɔ̀ mú, ké wa vɔ̃ ma Éézùɖùɛ̀-gàà ɓěɔ̀ gboɛɛ, wa ɖáɓá ma Éézùɖùɛ̀-sòjà ɓěɔ̀ táázĩ̀ìn ɓaɖa-bùè sè mɛ̀nɛ̌ìn-tã ɖò ɖe.

²⁶ Hwɛ̀ ké Éézùɖùɛ̀-sòjà séín ɓěɔ̀ kè nyɔ séín ɓěɔ̀ mu ma ɖé Bɛ́fèò-hwɔ̀ɖɔ̀ɔ̀ mú. Ké wa kò ma ɓó Bounɓoɔ̀ dyúa dyi, ké wa vĩ̌ ma, ké wa hwèɖè ma wɔ̃ kɔ̃ tee ké hwìo jǔ ma. Ké wa nyu ma fɔ̃ɔ-sàǎ-zàìn-ɖɛ̀ ɓě kè gbo-kpɔ̃ìn-sàǎ-zàìn-ɖɛ̀ ɓě ɓó Bounɓoɔ̀ bìì.

^27-28 Ɔ nì ná kɛɛ, Gèɖèpɔ́ɔ̀ gma-gbɔ̀ɖɔ̀ɔ̀ nì ma ɖé Bɛ́fèò-hwɔ̀ɖɔ̀ɔ̀ mú, ɓó tia ɓaɖa, ké Fíníhà mɔ̀à Ɛ̀ɖɛ̀ázàà dyú-gààɔ̀ kɛɛ mɔ̀ ma gma-gbɔ̀ɖɔ̀ɔ̀ jè gbo-gmɔ̀-nyɔ̀. Fíníhà mɔ̀ ma Eɖóúnɛ̀ nyúà-dyú. Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma sáa ɓěɛ̀ zàà hwɔɛɛ, wa diè ma Bounɓoɔ̀ dyi ɖe, ké wa ɖá, “À mɛ kpa à ɖíí ɓě mɔ̀à Bɛ̃́címà-nyɔ̀ ɓěɔ̀ kɛɛ to kɔ̃ ɖeè, mɔɔ à mɛ ɓɔ́ɔ náa nyuɛɛ̀?” Ké Bounɓoɔ̀ ɖá, “Ɓě mu, sepóɛɖé ní muɔ̀ wa ɓě xwaún dyi poùn ɓó gàɖàà.”

²⁹ Ɔ jèɛɛ, Éézùɖùɛ̀-gàà ɓěɔ̀ ɖíɛ́ ɓě kò ma pìǐn ɓó Gíɓìà-hwɔ̀ɖɔ̀ɔ̀ ɖei dà séín.

³⁰ Ké ɓó toɔ̀ wé tã nììnɔ̀ ɓaɖaa, wa mu ma, ɓɛ́ wa kè Bɛ̃́címà-nyɔ̀ ɓěɔ̀ ké ma toɔ̀ mú kpáìn. Ké wa ɓá ma waà sójà ɓěɔ̀, ké wa gmɔ̀ìn ma ɖé Gíɓìà-hwɔ̀ɖɔ̀ɔ̀ gbo kà wa ní ɓɔ́ɔ ma kà nyuɛ kĩ́ín nyɛ.

³¹ Ké Bɛ̃́címà-gàà ɓěɔ̀ sɔ̀ ma ɖé hwɔɖɔɔ̀ mú, ké wa dyi ma wa wɔ̃, ké wa ɖú ma Éézùɖùɛ̀-gàà ɓěɔ̀ ɖáɓá kpàǐ kà wa ní ɓɔ́ɔ ma kà nyuɛ kĩ́ín nyɛ. Gàa ɓě ɓɛ́ wa ɖáɓá ma kɛɛ ɓɛ́ìn ma gàa kpáɖá-nyɔ ɓaɖa-bùè jǔɛ. Wa ɖáɓáìn ma wa ɖé hwìè ɓě muà ɖé Bɛ́fèò-hwɔ̀ɖɔ̀ɔ̀ múɛ kè ɖé Gíɓìà-hwɔ̀ɖɔ̀ɔ̀ múɛɛ kɔ̃.

³² Púɛɛ, Bɛ̃́címà-gàà ɓěɔ̀ cɛ̃ɛ ma, ké wa ɖá, “À nìǎ wa toún ɖuɛń ɖe kà à ní ɓɔ́ɔ ma kà nyuɛ kĩ́ín nyɛ.” Kɛɛ Éézùɖùɛ̀-gàà ɓěɔ̀ ɖá, “Ɓěà gbǔ wa dyúa, ɓɛ́ ɓěà ké wa hwɔɖɔɔ̀ mú zà, ɓɛ́ wa ké hwìè ɓěɔ̀ dyí sí.”

³³ Ɔ jèɛɛ, Éézùɖùɛ̀-gàà séín ɓěɔ̀ sɔ̀ ma dà wa ɓá ma kà kɛ, ké wa mu, ké wa ɓá ma ɖé Béò-Támà-pàɔ̀ mú. Hwɛ̀ ké Éézùɖùɛ̀-sòjà ɓě kò ma kà pìǐn ɖé Gíɓìà-hwɔ̀ɖɔ̀ɔ̀ ɖeiɛɛ fṹà, ké wa sɔ̀ ma waà vǐè-naín ɓěɔ̀.

³⁴ Éézùɖùɛ̀-sòjà ɓě ɓɛ́ wa mɔ̀ gàa-zà-nyɔ̀ ɓěɛɛ táázĩ̀ìn ɓaɖa-bùè dyà ma Gíɓìà-hwɔ̀ɖɔ̀ɔ̀ to kɔ̃. Toɔ̀ ku ma wɔ̃ mìɔ cá. Bɛ̃́címà-sòjà ɓěɔ̀ seɛ ma dyuò kà mú-gbɔɔ̀-gbɔɔ̀ nì ma wa kɔ̃ dyiɛń nyɛ.

³⁵ Ɓó wéa ɓaɖaa, Bounɓoɔ̀ po ma Bɛ̃́címà-nyɔ̀ ɓěɔ̀ ɓíɖíi dyi ɓó Éézùɖùɛ̀-gàà ɓěɔ̀ dyúa. Ké Éézùɖùɛ̀-gàà ɓěɔ̀ ɖáɓá ma wa nyɔ-kpò táázĩ̀ìn kpáɖá-nyɔ sè hm̀m̌ kè hɔ̃dɛ̀ɖɛ̀ dyúáɖò. Wa mɔ̀ gàa ɓě ɓɛ́ wa vɔ̃̀ìn ma gàsíà kɛ.

³⁶ Púɛɛ, Bɛ̃́címà-nyɔ̀ ɓěɔ̀ dyéɛ ma kà toɔ̀ ɖǎ ma wa ɖuɛ. Ɖɛ kɔ̃̀ jè Éézùɖùɛ̀-gàà ɓěɔ̀ gbǔ ma kà Bɛ̃́címà-gàà ɓěɔ̀ dyúa kĩ́ín nyɛɛ mɔ̀, sepóɛɖé wa dè ma gàa ɓě wa ɖoɓo ma kà pìǐn-kò-naín ɖé Gíɓìà-hwɔ̀ɖɔ̀ɔ̀ ɖeiɛɛ hwòɖǒ kɔ̃.

Kà Éézùɖùɛ̀ nyu ma toɔ̀ ɖuɛ kɛ

³⁷ Gàa ɓě kò ma kà pìǐn nyɛɛ fṹà, ké wa dyá ma Gíɓìà-hwɔ̀ɖɔ̀ɔ̀ mú wàɖà. Ké wa gbɛ̀ìn ma hwɔɖɔɔ̀ gboi, ké wa ɖáɓá ma nyɔ séín nì hwɔɖɔɔ̀ múɛ.

³⁸ Wuɖu ɓɛ́ Éézùɖùɛ̀-gàà ɓěɔ̀ nyí ma gàa ɓě kò ma kà pìǐn nyɛɛ kɛà kɛ̀. Wa ɖá, “Ɔ jǔ ké ɓě ɖǎ hwɔɖɔɔ̀ kpɔ̃ ní, nìí, ɓě mɛ poɛ dyéɖé.

³⁹ À dyi hwɔɖɔɔ̀ nyànà-sòɔ̀ dyéín, nìí, à mu xwa cɛ́ɛ̀ìn.” Hwɛ̀ ɓɛ́ wa kéà hwɔɖɔɔ̀ dyéɖé poɛɛ, Bɛ̃́címà-gàà ɓěɔ̀ ɓɛ́àǐn ma Éézùɖùɛ̀-gàà ɓěɔ̀ nyɔ-kpò kpáɖá-nyɔ ɓaɖa-bùè ɖáɓáa. Ɔ jèɛɛ, wa ɖá, “Wa ɖǎ ɓíɖíi dyi kpá ɓó à dyúa kà ɔ ní ɓɔ́ ma kà nìɛ̀ ɖé toɔ̀ gbo kĩ́ín nyɛ.”

⁴⁰ Kɛɛ ti ɓɛ́ nyànà-sòɔ̀ ɖú ma ɖé hwɔɖɔɔ̀ mú dyí sɔ̀ kpàǐɛɛ, púɛɛ, Bɛ̃́címà-gàà ɓěɔ̀ cɛ́ɛ̀ ma xwa, ké wa dyé ma hwɔɖɔ gànáɔ̀ nyànà-sòɔ̀ dyií muɛ.

⁴¹ Hwɛ̀ ké Éézùɖùɛ̀-gàà ɓěɔ̀ cɛ́ɛ̀ ma xwa, ké wa nì ma Bɛ̃́címà-gàà ɓěɔ̀ wɔ̃ dyiɛń. Púɛɛ, Bɛ̃́címà-gàà ɓěɔ̀ giniìn ma dyi mìɔ cá, sepóɛɖé wa ɖǎa dyé kà mú-gbɔɔ̀-gbɔɔ̀ nìǎ wa kɔ̃ dyiɛń nyɛ.

⁴² Ɔ jèɛɛ, wa gbǔ ma Éézùɖùɛ̀-nyɔ̀ ɓěɔ̀ dyúa, ké wa mùìn ma ɖé gbǎùn-fúɖúáɔ̀ kɔ̃. Kɛɛ wa se ma toɔ̀ xwaún póɛ ɓɛ́ìn, sepóɛɖé Éézùɖùɛ̀-gàà ɓě sɔ̀ ma kà ɖé hwɔɖɔ ɓěɔ̀ múɛɛ ɖáɓáìn ma wa ɖé gbǎùn-fúɖúáɔ̀ kɔ̃.

⁴³ Wa kpá ma Bɛ̃́címà-gàà ɓěɔ̀ kíɖíí, ké wa kpa ma wa ɖáɓáa tee, ké wa nyini ma ɖé Gíɓìà-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀.

⁴⁴ Bɛ̃́címà-nyɔ̀ ɓěɔ̀ sójà ɓěɔ̀ gàa-zà-nyɔ̀ táázĩ̀ìn ɓaɖa-bùè sè mɛ̀nɛ̌ìn-tã mɛ́ ma.

⁴⁵ Sɔ̀ìn ɓóɛ gboɛɛ, wa nyɔ ɓě sè ɓóɛɛ kpá ma xwáɖáún, ké wa mùìn ma ɖé sɔ́ɔ́-kpò vɛ̀nɛ̀ kɔ̃̀ nyɛ́nɛ́ mɔ̀ Wíɖímɔ̀, ɓɛ́ ɔ nì ma ɖé gbǎùn-fúɖúáɔ̀ kɔ̃ɛɛ gbo. Ké Éézùɖùɛ̀-gàà ɓěɔ̀ ɖáɓáìn ma wa gàa ɓěɔ̀ táázĩ̀ìn hm̀m̌ ɓó hwìè ɓěɔ̀ gba. Ké wa gã̀ ma Bɛ̃́címà-gàà ɓěɔ̀ kíɖíí dyi tee, ké wa nyini ma ɖé Gíɖɔ̀ùn-pàɔ̀ mú. Wa ɖáɓá ma Bɛ̃́címà-gàà ɓěɔ̀ táázĩ̀ìn sɔ̃́ ɖò ɖe.

⁴⁶ Ɔ jèɛɛ, Bɛ̃́címà-gàà ɓě mɔ̀ ma kà gàa-zà-nyɔ̀ ɓěɛɛ nyɔ-kpò táázĩ̀ìn kpáɖá-nyɔ sè hm̀m̌ kpá ma dyi ɓó wéa ɓaɖa.

⁴⁷ Ɓó wé dyúáɖòɔ̀ ɓaɖaa, Bɛ̃́címà-gàà hɔ̃dɛ̀ɖɛ̀ mɛ̀nɛ̌ìn-ɖò kpá ma xwáɖáún, ké wa mùìn ma ɖé Wíɖímɔ̀-sɔ̀ɔ̌-kpò nìà ɖé gbǎùn-fúɖúáɔ̀ kɔ̃ɛɛ gbo, ké wa nyu ma ɖé dɛ̀nɛ̀ hĩinyɛ.

⁴⁸ Ti ɓɛ́ Éézùɖùɛ̀-gàà ɓěɔ̀ ɖǎ ma Bɛ̃́címà-gàà ɓěɔ̀ toún ɖuɛɛ, wa cɛ́ɛ̀ ma xwa, ké wa dyi ma Bɛ̃́címà-nyɔ̀ tɔ̀ɔ̀ ɓě sèà ɓíɖíiɛɛ kɔ̃ ɖe. Ké wa ɖáɓá ma nyɔ séín ɓě nì ɖé waà hwɔɖɔ ɓěɔ̀ múɛ, dè nyúà-ɖɛ̀ séín kè ɖɛ séín ɓě nì cĩ́ɛń ɓě wa dyé ma ɖéɛɛ kɔ̃. Ké wa fɔ̃ ma hwɔɖɔ séín wa dyɛ̀ìn ma kɛ.