Tɔ̀ɔ̀-ɓìɔ̀ 19 - Ɓǎsɔ́ɔ̀ Báɓòɔ̀

Ɖíìváà-gàà ɖò kè ɔ gmaɖe-nyɔ̀nɔ̀ jè

¹ Ɓó tia ɓaɖaa, Éézùɖùɛ̀-nyɔ̀ ɓěɔ̀ séè ma kã́á ɖò ɓéɖé. Ké Ɖíìváà-gàà ɖò ɓɛ́ ɔ cĩ́ ma ɖé Ífèɖèìn Toɖo-ɓòɖòɔ̀ dà vɛ̃in ɖòɛɛ kpɔ̃ ma gmaɖe-nyɔ̀nɔ̀ ɖò dyi. Gmaɖe-nyɔ̀nɔ̀ɔ̀ sɔ̀ ɖé Bɛ́fèɖèhɛ̃́ɛ̀-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú.

² Kɛɛ màaɔ̀ po ma gbàɖàùn. Sɔ̀ìn ɓóɛ gboɛɛ, ɔ táà ma ɔ dyú-ɓǎɔ̀ dyi, ké ɔ mu ma ɔ ɓǎ ɓíɖí-taún ɖe ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú, ɖé Júɖà-ɓòɖòɔ̀ kɔ̃. Ti ɓɛ́ ɔ ɖǎ ma ɖé dɛ̀nɛ̀ hĩinyɛ nyuɛɛ,

³ ɔ dyú-ɓǎɔ̀ mu, ɓɛ́ ɔ ké ma ɔ pɛ́í po, ɓɛ́ ɔ ké taún ɖe dyi. Gàaɔ̀ kè ɔ gbo-nì-nyɔ̀ ɖò kè jǎkasì sɔ̃́ mu ma. Ké màaɔ̀ kpɔ̃ ma ɔ hwìǐ, ké ɔ kpa ɔ ɖé ɔ ɓǎ ɓíɖí-taún. Ké ti ɔ ɓǎ dyé ma ɔ dyú-ɓǎɔ̀ kɛɛ, ɔ kpɔ̃ ma ɔ hwìǐ ɖé múà mú.

⁴ Ɔ bùǐ-gàà mɔ̀à màa-dyùɔ̀ ɓǎɔ̀ kɛɛ kpɔ̃ ma ɔ dyi, ké ɔ pɛ̃́ ma ɓó wé tã. Wa ɖi ma ɖɛ, ké wa ná ma.

⁵ Ɓó wéɔ̀ hĩinyɛ nììnɔ̀ gànà-kṹún mɛ̀nɛ̀ɛ̀ kɛɛ, gàaɔ̀ dyé ti, ɓɛ́ ɔ ké hwìè kɔ̃ kpá. Kɛɛ màa-dyùɔ̀ ɓǎɔ̀ cɛ̃ɛ ma ɔ dyúɛ̀ dyú-ɓǎɔ̀ gbo, ké ɔ ɖá, “M̀ mɛ ɖi ɖɛ ɖò wè, ɓɛ́ kpé ké m̀ dyí kpá, hwɛ̀ ɓě ké mu.”

⁶ Ɔ jèɛɛ, wa sɔ̃́ɔ̀ kò ma dyi, ké wa ɖi ma ɖɛ, ké wa ná ma. Hwɛ̀ ké màaɔ̀ ɓǎɔ̀ ɖá, “Ní ɓaà m̀ ní, pɛ̃́ dà ɖe ɓó máaǔn, ɓɛ́ à ké hwɔ pa.”

⁷ Gàaɔ̀ sɔ̀ ma dyí, ɓɛ́ ɔ ké ma mu. Kɛɛ ɔ bùǐ-gààɔ̀ kùìn ma ɔ hwòɖǒǔn jèɛɛ, ɔ pɛ̃́ ma ɓó ɖe.

⁸ Ɓó wéɔ̀ hm̀m̌ nììnɔ̀ gànà-kṹún mɛ̀nɛ̀ɛ̀, ti ɔ sɔ̀ ma dyí ɓɛ́ ɔ kéá ma hwìè kɔ̃ kpáa, màaɔ̀ ɓǎɔ̀ ɖá, “Kpɔ̃ nì hwòɖǒ-dyùàɔ̀ dyí. Ɖi ɖɛ, nìí, dyóɖóaún hwɛ̀ ɓě ké mu.” Ɔ jèɛɛ, wa sɔ̃́ɔ̀ ɖi ma ɖɛ.

⁹ Ti ɓɛ́ gàaɔ̀ kè ɔ gmaɖe-nyɔ̀nɔ̀ɔ̀ kè ɔ gbo-nì-nyɔ̀ɔ̀ nìǎ ma dyí sɔ̀ǔn wɛ̃ɛ, ɔ bùǐ-gààɔ̀ ɖá, “Gmɔ̀ nɔ̄, dyé kà dyóɖó nìǎ ziɛń nyɛ. Ɓě pɛ̃́ dà, sepóɛɖé tíe nìǎ kpɔ̃uń. Pɛ̃́ dà, ɓɛ́ à ké hwɔ pa. Gàɖàà gànà-kṹún mɛ̀nɛ̀ɛ̀ ní, ɓě ké ɓě ɓíɖí mu.”

¹⁰ Kɛɛ gàaɔ̀ se wɔ̃́ ɓɛ́ ɔ ké ma ɓó pɛ̃́ ɖe. Ɔ jèɛɛ, ɔ kè ɔ jǎkasì sɔ̃́ ɓéɖé gbɛ̌ ɓěɔ̀ kè ɔ gmaɖe-nyɔ̀nɔ̀ɔ̀ sɔ̀ ma dyí, ké wa mu ma. Wa mùìn ma ɖé Jɛ́ɓù-hwɔ̀ɖɔ̀ kɔ̃̀ nyɛ́nɛ́ ɖò mɔ̀ Jùɖúsɛ̀ɖɛ̀ìn kɛɛ gbo.

¹¹ Ti wa nìǎ ma Jɛ́ɓù-hwɔ̀ɖɔ̀ɔ̀ bũ̌in xwɛ̃́ǐn nyɛɛ, dyóɖóɔ̀ ɖǎ ma zi. Ɔ jèɛɛ, gbo-nì-nyɔ̀ɔ̀ cɛ̃ɛ ma ɔ gbo-nì-ɓǎɔ̀ gbo, ké ɔ ɖá, “Ɓěà pàìn dà Jɛ́ɓù-nyɔ̀ ɓěɛ̀ ɓíɖí-hwɔ̀ɖɔ̀ɛ̀ mú, ɓɛ́ ɓěà ké ɓó pɛ̃́.”

¹² Kɛɛ ɔ gbo-nì-ɓǎɔ̀ ɖá, “Gbào, à mɛ ɓɔ́ nyɔ ɓě ɓɛ́ wa se Éézùɖùɛ̀-nyɔ̀ɛɛ ɓíɖí-hwɔ̀ɖɔ̀ mú pɛ̃́ɛ. Ɓěà mɛ mu ɖé Gíɓìà-hwɔ̀ɖɔ̀ɔ̀ mú.

¹³ Ɓěà vɔ̃ ɓɛ́ ɓěà ké Gíɓìà-hwɔ̀ɖɔ̀ɔ̀ mɔɔ Wáɖámà-hwɔ̀ɖɔ̀ɔ̀ mu nyini, ɓɛ́ ɓěà ké hwɔɖɔ ɓěa ɖò mú pɛ̃́.”

¹⁴ Ɔ jèɛɛ, wa mu ma dyúa, ké dyóɖóɔ̀ kpá ma dyi, hwɛ̀ ké wa nyini ma ɖé Gíɓìà-hwɔ̀ɖɔ̀ nì ma ɖé Bɛ̃́címà-ɓòɖòɔ̀ kɔ̃ɛɛ mú.

¹⁵ Ké wa pàìn ma ɓó, ɓɛ́ wa ké ma ɓó pɛ̃́. Wa mu, ké wa kò ma ɓó hwɔɖɔɔ̀ píé hwòɖǒǔn dyi, kɛɛ nyɔ ɖò se ma wa taún kpa, ɓɛ́ wa ké ɖé pɛ̃́.

¹⁶ Ti ɓɛ́ tíe nìǎ ma kpɔ̃uń wɛ̃ɛ, gàa sùà ɖò sɔ̀ ma geɖeín, ké ɔ dyi ma. Ɔ mɔ̀ ma Ífèɖèìn Toɖo-ɓòɖòɔ̀ nyɔ ɖò, ké ɔ cĩ́ ma ɖé Gíɓìà-hwɔ̀ɖɔ̀ɔ̀ mú. Nyɔ ɓě nì ɖé hwɔɖɔɔ̀ múɛɛ mɔ̀ ma Bɛ̃́címà-nyɔ̀ ɓě.

¹⁷ Ti ɔ gmɔ̀ ma ɖé hwɔɖɔɔ̀ píé hwòɖǒǔn wɛ̃ɛ, ɔ dyé ma zii-nyɔ̀ɔ̀ ɖé, ké ɔ diè ma ɔ dyi, ké ɔ ɖá, “Dɛ̌ m̀ sɔ̀ kɛ́? Ké dɛ̌ m̀ nì muɛń nyɛ́?”

¹⁸ Ké zii-nyɔ̀ɔ̀ ɖá, “À sɔ̀ ɖé Bɛ́fèɖèhɛ̃́ɛ̀-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú, ké à nì ɖéé ɖé ḿ ɓíɖí Ífèɖèìn Toɖo-ɓòɖòɔ̀ kɔ̃ muɛń. Ḿ mu ma ɖé Bɛ́fèɖèhɛ̃́ɛ̀-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú, ké ɓó kàǔn wɛ̃ɛ, à nìǎ ḿ ɓíɖí ɖe muɛń. Kɛɛ nyɔ ké à pɛ̃́-naín nyíɛɛ ɖò se nì.

¹⁹ À ɓéɖé pìǐ kè ɖii-ɖɛ̀ ɖíɛ́ ɓě ɓɛ́ à jǎkasì ɓěɛ̀ ké ɖiɛ. Ké à mɔ̀à nì gbo-nì-nyɔ̀ ɓě mɔ̀à ḿ kè ní gmàà ɔ kè gàa-dyù gmɔ̀ nìà dà kɛɛ ɓéɖé à mìɔùn nììn bɛɖɛɛ̀ kè wã́ìn. À ɓéɖé ɖɛ séín.”

²⁰ Ké gàa sùàɔ̀ ɖá, “Dyi ɖé ḿ ɓíɖí-taún. Ní mu m̀ ɖɛ séín m̀ mɔ́ɛɛ nyíìn. Kɛɛ ɓɔ́ dà píéɛ̀ hwòɖǒǔn pɛ̃́ɛ.”

²¹ Ɔ jèɛɛ, gàa sùàɔ̀ kpa ma wa ɖé ɔ ɓíɖí-taún. Ké ɔ nyí ma waà jǎkasì ɓěɔ̀ ɖii-ɖɛ̀, ké wa mɔ̀ùn dèɖè ma ɓoi, ké wa ɖi ma ɖɛ, ké wa ná ma.

²² Ti waà hwòɖǒɔ̀ nì ma múà múɛɛ, púɛɛ, hwòɖǒ-kɔ̃in-nyìnììn-gàà ɖíɛ́ ɓě nì ma hwɔɖɔɔ̀ múɛɛ dɛ́ɖɛ́ ma gbǒɔ̀. Wa nì ma gbǒɔ̀ kɔ̃ún ɓaɖauń gana-kà, ké wa nì gàa sùà kɔ̃̀à gbǒɔ̀ kɛɛ ɖáuń, ké wa ɖá, “Síìn nɔ̄ gàa dyià m̀ gboɛ, ɓɛ́ à kè ɔ ké ɓó da nì.”

²³ Ké gbǒ-ɓǎɔ̀ sí ma píé ɖé wa gbo, ké ɔ ɖá, “Gbào, ḿ mǔè ɓě. Ní ɓaà ɓě ní, ɓě ɓɔ́ hwòɖǒ-kɔ̃in-nyìnììn-ɖɛ̀ nì kàà nyuɛ, sepóɛɖé gàa nìà kɛ mɔ̀ ní ɖéè. Ɓě ɓɔ́ dɛ̃-ɖɛ̀ nì kàà nyuɛ.

²⁴ Ɓě gmɔ̀ nɔ̄, ní dyú-màà ɓɛ́ ɔ séè toɖo kɔ̃ jè dyuòɛ kè gàaɔ̀ gmaɖe-nyɔ̀nɔ̀ɔ̀, wa kɛà kɛ̀. Ḿ mɛ síìn wa píé ɖé ɓě gbo, ɓɛ́ ɓě kè wa ké ɓó da nì, ɓɛ́ ɓě ké ɖɛ ɓěɛ̀ hwòɖǒ mɔ́ɛɛ wa bũ̌ nyu. Kɛɛ ɓě ɓɔ́ gàaɔ̀ dɛ̃-ɖɛ̀ nì kàà bũ̌ nyuɛ.”

²⁵ Kɛɛ gàa ɓěɔ̀ se ma ɔ wuɖuɔ̀ ɖùǔ gbo tò. Ɔ jèɛɛ, Ɖíìváà-gààɔ̀ ɖú ma ɔ gmaɖe-nyɔ̀nɔ̀ɔ̀ dyí, ké ɔ síìn ma ɔ píé ɖé wa gbo. Ké wa kpɔ̃̀ìn ma ɔ ganaún, ké wa gã̀ ma ɔ zùǔn zàǐn dyi tee ɓó máaún-hwùɖù gànáɔ̀ mú. Ti ɓɛ́ zɔ̃ nìǎ ma zɔ̃uń wɛ̃ɛ, wa táà ma màaɔ̀ dyi,

²⁶ ké ɔ mu ma ɖé gàa sùàɔ̀ gbǒ kɔ̃̀ mú ɔ dyú-ɓǎɔ̀ nì ma kà kɛ, ké ɔ ɓùɖùìn ma ɓó gbǒ-wɔ̃̀ɔ̀ gbo, ké zɔ̃ zɔ̃̀ìn ma ɓó ɔ.

²⁷ Ti ɓɛ́ zɔ̃ ɖǎ ma zɔ̃ɛɛ, ɔ dyú-ɓǎɔ̀ sɔ̀ ma dyí, ké ɔ kaà ma gbǒɔ̀, ɓɛ́ ɔ ké ma hwìè kɔ̃ kpá. Púɛɛ, ɔ gmaɖe-nyɔ̀nɔ̀ ɓɛ́ ɔ ɓùɖùìn ma kà ɓó gbǒ-wɔ̃̀ɔ̀ gboɛɛ pɛ̃́ ma ɓó dyi, ké ɔ sɔ̃ sɔ̃́ɔ̀ wáɖá ma ɓó gbǒɔ̀ wĩín dyi.

²⁸ Ké ɔ cɛ̃ɛ ma màaɔ̀ gbo, ké ɔ ɖá, “Sɔ̀ dyí, ɓɛ́ à ké mu.” Kɛɛ ɔ se ma gɔ̃̌-jǔ-wùɖù ɖò wɔ̃́, sepóɛɖé màaɔ̀ ɖǎ ma mɛ́. Hwɛ̀ ké gàaɔ̀ ɖú ma màaɔ̀ xwɛ́ɔ̀ dyí, ké ɔ po ma ɔ jǎkasìɔ̀ kɔ̃ún, ké ɔ ɖú ma ɔ ɓíɖí-hwìè dyí.

²⁹ Ti ɓɛ́ gàaɔ̀ nyini ma ɔ ɓíɖíɛɛ, ɔ ɖú ma ɖǎ ɖò dyí, ké ɔ cɛ̃ìn ma ɔ gmaɖe-nyɔ̀nɔ̀ɔ̀ xwɛ́ɔ̀ dyi mɛ́nɛ́-mɛ́nɛ́, ké ɔ mɔ̀ ma pĩ́á ɓaɖa-bùè sè sɔ̃́. Ké ɔ toìn ma pĩ́á ɓěɔ̀ Éézùɖùɛ̀-ɓòɖòɔ̀ wáká séín kɔ̃ dyi.

³⁰ Ké nyɔ séín dyéɛ ma kɛɛ ɖá, “À ɖǎǒ Íjè-ɓòɖòɔ̀ kɔ̃ sɔ̀ɛɛ, ɖɛ nì kàà séè kpá ɖò, mɔɔ ké à séèɛ̀ dyé ɖò. Ɓěà poìn hwìɖǐi, ɓɛ́ ɓěà ké dú dyéìn, ɓɛ́ ɓěà kéɛ ɖéɛ wuɖu zà.”