Tɔ̀ɔ̀-ɓìɔ̀ 18 - Ɓǎsɔ́ɔ̀ Báɓòɔ̀

Mákà kè Dɛ̃́ìn nììn xwéɖé-dùɔ̀ nyɔ ɓě

¹ Ɓó tia ɓaɖaa, Éézùɖùɛ̀-nyɔ̀ ɓěɔ̀ séè ma kã́á ɖò ɓéɖé. Ké Dɛ̃́ìn nììn xwéɖé-dùɔ̀ nì ma wa nììn cĩ́-naín dyi mɔ́uń, sepóɛɖé wa mɔ̀ùn séè ma cĩ́-naín dyé ke ɖé Éézùɖùɛ̀-nyɔ̀ ɓěɔ̀ hwìɛ̀.

² Ɔ jèɛɛ, Dɛ̃́ìn xwéɖé-dùɔ̀ nyɔ vɛ̀nɛ̀ ɓěɔ̀ ɖoɓo ma gàa-zà-nyɔ̀ hm̀m̌ sɔ̀ìn ɖé Záwàɖà-hwɔ̀ɖɔ̀ɔ̀ kè Ɛ̀táò-hwɔ̀ɖɔ̀ɔ̀ mú, ɓɛ́ wa ké ma ɓóɖóɔ̀ dyéɖé gboi kpaìn. Gàa ɓěɛ̀ ɓaɖa ma kɛ́ ɓó waà gbǒ-xwíníín ɖò-ɖò ɓěɔ̀ bìì. Wa cɛ̃ɛ ma wa gbo, ké wa ɖá, “Ɓě mu, ɓɛ́ ɓě ké ɓóɖóɔ̀ dyéɖé gboi kpaìn.” Hwɛ̀ ké gàa ɓěɔ̀ mu ma, ké wa nyini ma ɖé Ífèɖèìn Toɖo-ɓòɖòɔ̀ mú. Ké wa dyɛ̀ìn ma Mákàà taàɔ̀, ké wa pɛ̃́ ma ɓó.

³ Ti wa nìǎ ma kà Mákàà gbǒɔ̀ bũ̌in xwɛ̃́ǐn nyɛɛ, wa wɔ̃́ ma gàa-dyù ɖòɛ̀ wuɖu, ké wa dyuò kà wuɖuɔ̀ mɔ̀ ma Ɖíìváà-nyɔ̀ ɖòɛ̀ wuɖuɛ. Ɔ jèɛɛ, wa pàìn ma ɓó gbǒɔ̀ zɔ̃̌, ké wa diè ma ɔ dyi, ké wa ɖá, “Nyɛ́ dyà nɔ̄ m̀ wɛ̃́? Ɖɛ́ m̀ nì nɔ̄ nyuɛń nyɛ́?”

⁴ Ɔ cɛ̃ ma wa ɖɛ ɓɛ́ Mákà nyu ma ɔ bììɛɛ gbo, ké ɔ ɖá, “Ɔ kpɔ̃ ḿ dyi, ké ḿ mɔ̀ ɔ sáa-zà-nyɔ̀.”

⁵ Hwɛ̀ ké wa cɛ̃ɛ ma ɔ gbo, ké wa ɖá, “À ɓaà m̀ ní, diè Gèɖèpɔ́ɔ̀ dyi ɓó à bìì, ɓɛ́ à kéɛ dyuò kɛbì à hwìè-kpàɔ̀ mu kpáná mú nììn ní.”

⁶ Ké sáa-zà-nyɔ̀ɔ̀ ɖá, “Ɓě mu ɖé gìɖìǐ mú. Bounɓoɔ̀ wɔ̃́ ní ɓó hwìè-kpà ɓě nìà kpauń wɛ̃ɛ jè.”

⁷ Ɔ jèɛɛ, gàa hm̀m̌ ɓěɔ̀ sɔ̀ ma dyí, ké wa mu ma ɖé Ɖáì-hwɔ̀ɖɔ̀ɔ̀ mú. Ké wa dyéɛ kà nyɔ ɓě nì ma ɖé hwɔɖɔɔ̀ múɛɛ fã̀à ɖò se ma wa ɖei nì kà Zíɖɔ̀ùn-nyɔ̀ ɓěɔ̀ nìà kɛ. Wa se ma pòìn-hwìɖǐi ɖò ɓéɖé ɓó ɖɛ gbà mu ma wa kɔ̃ dyiìn nyɛɛ jè. Waà ɓóɖóɔ̀ bã ma ní, ké wa se ɖɛ ɖòɛ̀ gǎ dyé. Wa kè Zíɖɔ̀ùn-nyɔ̀ ɓěɔ̀ tɔmɔìn ma bũ̌in, ké wa ní kpá ma nyɔ tɔ̀ɔ̀ ɓě múin.

⁸ Ti ɓɛ́ gàa hm̀m̌ ɓěɔ̀ kɔ́ìn ma wa ɖíí ɓěɔ̀ gbo ɖe ɖé Záwàɖà-hwɔ̀ɖɔ̀ɔ̀ kè Ɛ̀táò-hwɔ̀ɖɔ̀ɔ̀ múɛɛ, wa ɖíí ɓěɔ̀ diè ma wa dyi, ké wa ɖá, “Ɓěà wɔ̃́ ɖée?”

⁹ Ké gàa ɓěɔ̀ jǔ ma wa ɖíí ɓěɔ̀ gɔ̃̌, ké wa ɖá, “Ɓě dyi, ɓɛ́ ɓěà ké Ɖáì-hwɔ̀ɖɔ̀ɔ̀ to kɔ̃ kpa. À ɖǎ ɓóɖóɔ̀ dyé. Ɔ nɔ̀mɔ̀ dyíin mìɔ cá. Ɓě mu sɔ̃ pɛ̃́ín wáɖáùn, ké ɓě se ɖɛ ɖò nyuɛ́ mu ɓóɛ jèè? Ɓě fṹà, ɓɛ́ ɓě ké mu, ɓɛ́ ɓě ké ɓóɖóɔ̀ dyí ɖú.

¹⁰ Ɓě dyi ɖé nyini ní, ɓě muɛ dyéìn kà nyɔ ɓěɔ̀ se ɖɛ gbà ɖò hwìɖǐi dèɛ̌n nì fɔɔ cá kɛ. Ké ɓě mu ɓóɖó vɛ̀nɛ̀ ɓɛ́ Gèɖèpɔ́ɔ̀ ɖǎ ɓě xwaún dyi poɛɛ dyéìn. Ɔ mɔ̀ ɓóɖó kɔ̃̀ mú ɓɛ́ ɖɛ ɖòɛ̀ gǎ se kpá kɛ.”

¹¹ Hwɛ̀ ké gàa hɔ̃dɛ̀ɖɛ̀ mɛ̀nɛ̌ìn-ɖò sɔ̀ ɖé Dɛ̃́ìn nììn xwéɖé-dùɔ̀ múɛɛ ɖú ma waà toún-vɔ̃̀ìn-ɖɛ̀ ɓě dyí. Ké wa sɔ̀ ma Záwàɖà-hwɔ̀ɖɔ̀ɔ̀ kè Ɛ̀táò-hwɔ̀ɖɔ̀ɔ̀ mú dyí, ké wa mu ma.

¹² Ké wa nyànàìn ma waà jàɖàìn-gbò ɓěɔ̀ dyi ɖé Kíjà-Jáwìɖììn-hwɔ̀ɖɔ̀ nì ma ɖé Júɖà-ɓòɖòɔ̀ kɔ̃ɛɛ wĩín. Ɔ jèɛɛ, wa jǔìn ma kà pá nìà ɖé Kíjà-Jáwìɖììn-hwɔ̀ɖɔ̀ɔ̀ dyóɖó-dyi-kpáìn-naínɔ̀ kɛɛ Máhànè-Dɛ̃́ìn-nyɛ̀nɛ̀ kɔ̃̀ xwíníín mɔ̀à Dɛ̃́ìn jàɖàìn-hwɔ̀ɖɔ̀ kɛ̀. Ké nyɛ́nɛ́ɔ̀ nìɛ̀ dú ke ɓó zɛ̃̌ɛ̀.

¹³ Sɔ̀ìn ɓóɛɛ, wa mùìn ma ɖé Ífèɖèìn Toɖo-ɓòɖòɔ̀ kɔ̃, ké wa dyɛ̀ìn ma Mákàà taàɔ̀.

¹⁴ Hwɛ̀ ké gàa hm̀m̌ ɓě ɓɛ́ wa kpaìn ma kà pá ɓě nìà Ɖáì-hwɔ̀ɖɔ̀ɔ̀ ɖeiɛɛ dyéɖé gboiɛɛ cɛ̃ɛ ma wa ɖíí-gàà ɓěɔ̀ gbo, ké wa ɖá, “Gmɔ̀ nɔ̄, ífɔ̀ ɖò kè hwɔìn-ɖɛ̀ sɛ-sɛ ɖò kè kũùn-kpò mɛ-mɛ ɖò ɔ kè kũùn-kpò ɖíɛ́ ɓě nì gbǒ ɓěɛ̀ ɖò mú. Ɓě dyuò ɖɛ ɓě ké nyuɛ.”

¹⁵ Ɔ jèɛɛ, wa pàìn ma ɓó gàa-dyù gmɔ̀ mɔ̀à Ɖíìváà-nyɔ̀ɔ̀ kɛɛ gbo, ɓó Mákà ɓíɖí-taún, ké wa zà ma ɔ nyíɔún.

¹⁶ Ɓó tia ɓaɖaa, Dɛ̃́ìn-gàà hɔ̃dɛ̀ɖɛ̀ mɛ̀nɛ̌ìn-ɖò ɓɛ́ wa ɖǎà ti dyé ɓó to jèɛɛ nyànà ma ɖé gmɔ-wɔ̃̀ɔ̀ gboi.

¹⁷ Ké gàa hm̀m̌ ɓě ɓɛ́ wa kpaìn ma kà ɓóɖóɔ̀ dyéɖé gboiɛɛ dyá ma ɖé gbǒɔ̀ mú. Ké wa ɖú ma hwɔìn-ɖɛ̀ sɛ-sɛɔ̀ kè ífɔ̀ɔ̀ kè kũùn-kpò mɛ-mɛɔ̀ ɔ kè kũùn-kpò tɔ̀ɔ̀ ɓěɔ̀ dyí. Sáa-zà-nyɔ̀ɔ̀ kè gàa hɔ̃dɛ̀ɖɛ̀ mɛ̀nɛ̌ìn-ɖò ɖǎ ma kà ti dyé ɓó to jèɛɛ nyànà ma ɖé gmɔ-wɔ̃̀ɔ̀ gbo dyi.

¹⁸ Ti ɓɛ́ gàa hm̀m̌ ɓěɛ̀ dyá ma kà ɖé Mákàà gbǒɔ̀ mú, ɓɛ́ wa dyià ɖé hwɔìn-ɖɛ̀ sɛ-sɛɔ̀ kè ífɔ̀ɔ̀ kè kũùn-kpò mɛ-mɛɔ̀ ɔ kè kũùn-kpò tɔ̀ɔ̀ ɓěɔ̀ ɖé zàa, sáa-zà-nyɔ̀ɔ̀ diè ma wa dyi, ké ɔ ɖá, “Ɖɛ́ ɓě nyuà ɓóɛ́?”

¹⁹ Ké wa jǔ ma ɔ gɔ̃̌, ké wa ɖá, “Nì gìɖìǐ. Mɔ̀ǔn ɖá ɓɛ́ m̀ ké wuɖu ɖò wĩín zà. Dyi, ɓɛ́ à kè mɔ̀ ké mu, ɓɛ́ m̀ ké à ɓǎ kè à sáa-zà-nyɔ̀ jǔ. Má, ɔ nɔ̀mɔ̀ dyíin ɓɛ́ m̀ ké Éézùɖùɛ̀ xwéɖé-dù gàná ɖòɛ̀ sáa-zà-nyɔ̀ jǔ ké ɔ zi ɓɛ́ m̀ ké gàa dyúáɖò ɓíɖí-taún nìɛɛ dyíe?”

²⁰ Púɛɛ, sáa-zà-nyɔ̀ɔ̀ hwòɖǒ dè ma dyi. Ɔ jèɛɛ, ɔ ɖú ma ífɔ̀ɔ̀ kè hwɔìn-ɖɛ̀ sɛ-sɛɔ̀ ɔ kè kũùn-kpò tɔ̀ɔ̀ ɓěɔ̀ dyí, ké ɔ sí ma gàa ɓěɔ̀ kíɖíí.

²¹ Ké wa sɔ̀ ma dyí, ké wa kpá ma hwìè xwíníín. Ké wa zĩ̀ìn ma waà dyú mɛ́nɛ́ɛ́ ɓě kè waà nyúà-ɖɛ̀ ɓě kè waà kɔ̃̀ɔ̀-ɖɛ̀ ɓě hwìèɔ̀ dyúa, ké wa mu ma.

²² Ti ɓɛ́ wa ɖǎ ma Mákàà gbǒɔ̀ bũ̌in tɔmɔìn nyɛɛ, Mákà poìn ma gàa ɓě ɓɛ́ ɔ kè wa cĩ́ ma ɓó hwɔɖɔɔ̀ múɛɛ dyí, ké wa kpá ma Dɛ̃́ìn-nyɔ̀ ɓěɔ̀ kíɖíí, ké wa dyɛ̀ìn ma wa.

²³ Ké wa ɖú ma Dɛ̃́ìn-nyɔ̀ ɓěɔ̀ dúi pánáìn kpàǐ. Ké Dɛ̃́ìn-nyɔ̀ ɓěɔ̀ gmɔ̀ ma ɖe, ké wa cɛ̃ɛ ma Mákà gbo, ké wa ɖá, “Ɖɛ́ nyu m̀ wɛ̃́, ɓɛ́ m̀ kè nyɔ kúɖúú ɓěɛ̀ dyià à kíɖíí kpá kɛ́?”

²⁴ Ké Mákà jǔ ma wa gɔ̃̌, ké ɔ ɖá, “Ɔ mɔ̀ sepóɛɖé ɓě ɖú ní gèɖèpɔ́ɔ̀ ɓě ɓɛ́ ḿ mɛ ma kɛ kè ní sáa-zà-nyɔ̀ɔ̀ dyí, ké ɓě kpa wa. Kà ɔ nìà náa, nìí, ɖɛ́ ḿ mɛ nyuɛ́? Xwɛ̌ ɓě ɓɛ́ìn ḿ dyi dièɛ̀, ɓɛ́ ɓě ké níiń, ‘Ɖɛ́ nyu m̀ wɛ̃́’ kɛ́?”

²⁵ Ké Dɛ̃́ìn-nyɔ̀ ɓěɔ̀ jǔ ma ɔ gɔ̃̌, ké wa ɖá, “À se nì wuɖu wɔ̃́ɔ mɔ́ ɖé à hwìɛ̀. Ɔ se ná nìǐn, gàa ɓěɛ̀ mu dyoɖoún kpáùn, ɓɛ́ wa ké m̀ gbo vɔ̃. Ɔ dyi ná nìǐn, nìí, m̀ kè nì gbǒ-xwíníín-nyɔ̀ ɓěɔ̀ fɛ̀ɛ̀ muɛ xwa sèìn.”

²⁶ Ké Dɛ̃́ìn-nyɔ̀ ɓěɔ̀ mu ma wa ɖɛ. Ti ɓɛ́ Mákà dyéɛ ma kà ɔ se wa dyí ɓɛ́ìn nyɛɛ, púɛɛ, ɔ kɔ́ìn ma ɖe, ké ɔ mu ma ɔ ɓíɖí-taún.

²⁷ Ɔ jèɛɛ, wa kpa ma ɖɛ ɓě ɓɛ́ Mákà mɛ ma kà kɛ kè ɔ sáa-zà-nyɔ̀ɔ̀. Ké wa mu, ké wa kpa ma Ɖáì-nyɔ̀ ɓě ɓɛ́ fã̀à ɖò se ma kà ɖei nì mɔɔ ɓɛ́ wa se ma kà pòìn-hwìɖǐi ɖò ɓéɖé ɓó ɖɛ gbà mu ma wa kɔ̃ dyiìn nyɛ jèɛɛ to kɔ̃. Ké wa ɖáɓá ma nyɔ ɓěɔ̀ gàsíà dyí, ké wa fɔ̃ waà hwɔɖɔɔ̀.

²⁸ Nyɔ ké ma Ɖáì-nyɔ̀ ɓěɔ̀ póìn nyɛɛ ɖò se nì, sepóɛɖé wa kè Zíɖɔ̀ùn-nyɔ̀ ɓěɔ̀ se ma bũ̌in xwɛ̃́ìn, ké wa ní kpá nyɔ tɔ̀ɔ̀ ɓě múin. Ɖáì-hwɔ̀ɖɔ̀ɔ̀ nì ma ɖé bɔɔ-kpà ɖò kɔ̃, ɖé Bɛ̀-Wíɖíhɔ̀-hwɔ̀ɖɔ̀ɔ̀ wĩín. Sɔ̀ìn ɓóɛ gboɛɛ, Dɛ̃́ìn-nyɔ̀ ɓěɔ̀ po ma hwɔɖɔɔ̀ ɖe, ké wa cĩ́ ma ɖéɛ mú.

²⁹ Ké wa jǔìn ma hwɔɖɔɔ̀ Dɛ̃́ìn-nyɛ̀nɛ̀ mɔ̀à wa ɓǎ nììn ɓǎ mɔ̀à Éézùɖùɛ̀ dyú-gààɔ̀ kɛɛ nyɛ́nɛ́ kɛ. Kɛɛ hwɔɖɔɔ̀ nyɛ́nɛ́ mɔ̀ ma Ɖáì kĩ́ín.

³⁰ Ké Dɛ̃́ìn-nyɔ̀ ɓěɔ̀ nyànàìn ma ɖé hwɔìn-ɖɛ̀ sɛ-sɛɔ̀ dyi ɓó wa mìɔùn bìì. Ké Ɖíìváà-nyɔ̀ɔ̀ kè ɔ nììn dyú-gàà ɓěɔ̀ mɔ̀ ma sáa-zà-nyɔ̀ ɓě ɓó Dɛ̃́ìn-nyɔ̀ ɓěɔ̀ bìì tee, ké ɔ dyɛ̀ìn ma ti wa kpɔ̃̀ìn ma ɓóɖóɔ̀ nyɔ ɓěɔ̀ ganaún ké wa kpa ma wa ɓóɖó-dù kà kò ɖò kɔ̃ɛɛ hwɛ̀. Ɖíìváà-nyɔ̀ɔ̀ nyɛ́nɛ́ mɔ̀ ma Jònétɔ̃̀. Jònétɔ̃̀ mɔ̀ Gésɔ̃̀ɛ̀ dyú-gàà, ké Gésɔ̃̀ mɔ̀ ma Mózèɛ̀ dyú-gàà.

³¹ Ti séín ɓɛ́ Gèɖèpɔ́ɔ̀ jàɖàìn-gbòɔ̀ nì ma kà ɖé Síɖò-hwɔ̀ɖɔ̀ɔ̀ múɛɛ, Dɛ̃́ìn-nyɔ̀ ɓěɔ̀ ɓiè ma hwɔìn-ɖɛ̀ sɛ-sɛ ɓɛ́ Mákà mɛ ma kà kɛ.