Tɔ̀ɔ̀-ɓìɔ̀ 17 - Ɓǎsɔ́ɔ̀ Báɓòɔ̀

Mákàà kũùn-kpò ɓěɔ̀ jè

¹ Wé ɖòɛ̀ ɓaɖaa, gàa ɖò kɔ̃̀ nyɛ́nɛ́ mɔ̀ Mákà ɓɛ́ ɔ mɔ̀ Ífèɖèìn Toɖo-ɓòɖòɔ̀ nyɔ ɖòɛɛ

² cɛ̃ɛ ma ɔ ɖe gbo, ké ɔ ɖá, “Nì séɓàɖà-pĩ̀à táázĩ̀ìn kè hɔ̃dɛ̀ɖɛ̀ dyúáɖò ɓɛ́ ɔ pa ma kà dyi, kɔ̃̀ jè ḿ wɔ̃́ ma kà m̀ hwòɛ̌ poɛ kɛɛ, mɔ̄ mɔ̀ nyɔ ɖúɛ dyí.” Ké ɔ ɖe zà ma ɖé wuɖu, ké ɔ ɖá, “Bounɓoɔ̀ mɛ po m̀ mana kɔ̃, ní dyú.”

³ Hwɛ̀ ké Mákà dyà ma séɓàɖà-pĩ̀à táázĩ̀ìn kè hɔ̃dɛ̀ɖɛ̀ dyúáɖòɔ̀ ɔ ɖe gbo ɖe. Ké ɔ ɖe ɖá, “Ḿ nì séɓàɖàɔ̀ Bounɓoɔ̀ xwáɖáún zàǐn, ɓɛ́ hwòɛ̌-wùɖùɔ̀ ní kɔ̃̀ ɖà mɔ̀ mɔ̀à ní dyú-gààɔ̀ kɛɛ kɔ̃ dyi. Wa mɛ nyuɛ hwɔìn-ɖɛ̀ sɛ-sɛ ɓɛ́ wa po séɓàɖà bũ̌in nyɛ kè kũùn-kpò mɛ-mɛ ɖò mú. Ɔ jèɛɛ, ní muɛ m̀ nyíìn ɖe ɓó kàǔn.”

⁴ Ti ɓɛ́ Mákà zà ma kà ɖé séɓàɖàɔ̀, ɓɛ́ ɔ dyiɛ ma kà ɔ ɖe nyíɛɛ, ɔ ɖe ɖú ma séɓàɖàɔ̀ pĩ́á hɔ̃dɛ̀ɖɛ̀ sɔ̃́ dyí, ké ɔ nyíɛ ma ɓé-pa-nyɔ̀ ɖò, ké ɓé-pa-nyɔ̀ɔ̀ nyuɛ ma hwɔìn-ɖɛ̀ sɛ-sɛ ɓɛ́ ɔ po séɓàɖà bũ̌in nyɛ kè kũùn-kpò mɛ-mɛ ɖò mú. Ké wa po ma kũùn-kpò ɓěɔ̀ ɖé Mákà ɓíɖí-gbǒǔn.

⁵ Ɔ nì ná kɛɛ, Mákà-gàà nìà kɛ ɓéɖé ma gbǒ ɖò kɔ̃̀ mú ɔ dèìn ma ɔ kũùn-kpò ɓě dyiɛ. Ɔ nyu ma ífɔ̀ ɖò kè kũùn-kpò ɖíɛ́ ɓě. Ké ɔ gã ma ɔ dyú-gàà ɓěɔ̀ ɖò, ɓɛ́ ɔ ké ma sáa-zà-nyɔ̀ jǔ.

⁶ Ɓó tia ɓaɖaa, Éézùɖùɛ̀-nyɔ̀ ɓěɔ̀ se ma kã́á ɖò ɓéɖé. Nyɔ ɖò-ɖò séín nyu ma ɖɛ sɛ́ɖɛ́ìn dyí ɖé ɔ mìɔùn dyéɖéín nyɛɛ pū.

⁷ Ɓó tia ɓaɖaa, gàa-dyù gmɔ̀ ɖò cĩ́ ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú, ɖé Júɖà-ɓòɖòɔ̀ kɔ̃. Ɔ mɔ̀ ma Ɖíìváà-nyɔ̀.

⁸ Gàa-dyù gmɔ̀ɔ̀ sɔ̀ ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú, ké ɔ mu, ɓɛ́ ɔ ké ma pá ɖò dyi mɔ́, ɓɛ́ ɔ ké ɖé cĩ́. Ti ɔ nì ma muɛń nyɛɛ, ɔ nyini ma ɓó Mákà ɓíɖí-taún, ɖé Ífèɖèìn Toɖo-ɓòɖòɔ̀ kɔ̃.

⁹ Ti ɓɛ́ Mákà dyé ma ɔ kɛɛ, ɔ diè ma ɔ dyi, ké ɔ ɖá, “Dɛ̌ m̀ sɔ̀ kɛ́?” Ké ɔ ɖá, “Ḿ mɔ̀ Ɖíìváà-nyɔ̀, ké ḿ sɔ̀ ɖé Bɛ́fèɖèhɛ̃́ɛ̀-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú. Ḿ nì dɛ̀ ḿ ké cĩ́ɛɛ dyi mɔ́uń.”

¹⁰ Hwɛ̀ ké Mákà cɛ̃ɛ ma ɔ gbo, ké ɔ ɖá, “Nì dà ḿ gbo, ɓɛ́ m̀ ké ní ɓǎ kè ní sáa-zà-nyɔ̀ jǔ. Nìí, ní mu m̀ séɓàɖà-pĩ̀à ɓaɖa-bùè nyíìn ɓó zɔ̃. Ké ní mu m̀ ɖɔún poùn, ɓɛ́ ḿ ké m̀ ɖii-ɖɛ̀ nyí.”

¹¹ Ké Ɖíìváà-nyɔ̀ɔ̀ wɔ̃́ ma ɓɛ́ ɔ ké ma ɓó ɔ gbo nì. Ké Mákà kpɔ̃ ma ɔ kà ɔ kpɔ̃à ɔ mìɔùn nììn xwíníín-zà-dyù kɛ.

¹² Hwɛ̀ ké Mákà po ma gàa-dyù gmɔ̀ mɔ̀à Ɖíìváà-nyɔ̀ɔ̀ kɛɛ kũ̀à kɔ̃ún, ké ɔ mɔ̀ǎ ma ɔ nììn sáa-zà-nyɔ̀. Ké gàa-dyù gmɔ̀ɔ̀ cĩ́ ma ɖé Mákàà gbǒɔ̀ mú.

¹³ Ké Mákà ɖá, “Ɓó kàǔn wɛ̃ɛ, ḿ ɖǎa dyuò kà Bounɓoɔ̀ muá ḿ nɔ̀mɔ̀ dyíin dyí nyuùn wɛ̃, sepóɛɖé Ɖíìváà-nyɔ̀ ɖò ɖǎ ní sáa-zà-nyɔ̀ jǔ jè.”