Tɔ̀ɔ̀-ɓìɔ̀ 16 - Ɓǎsɔ́ɔ̀ Báɓòɔ̀

Sã́sĩ́ìn kè Gázà-hwɔ̀ɖɔ̀ɔ̀ nyɔ ɓěɔ̀ jè

¹ Wé ɖòɛ̀ ɓaɖaa, Sã́sĩ́ìn mu ma ɖé Gázà-hwɔ̀ɖɔ̀ɔ̀ mú. Ké ɔ dyé ma ɖé gbàɖàùn-màà ɖò, ké ɔ pɛ̃́ ma ɔ gbo.

² Hwɛ̀ ké nyɔ ɖò cɛ̃ɛ ma Gázà-nyɔ̀ ɓěɔ̀ gbo, ké ɔ ɖá, “Sã́sĩ́ìn nì hwɔɖɔɛ̀ múo.” Ɔ jèɛɛ, wa dɛ́ɖɛ́ ma dɛ̀ ɔ nì ma kà kɛ, ké wa fò ma ɔ hwìè ɓó gmɔ-wɔ̃̀ɔ̀ gbo, ɓó máaún-hwùɖù gànáɔ̀ mú. Wa se ma dyi túò ɓó máaún-hwùɖù gànáɔ̀ mú, sepóɛɖé wa ɖá, “Zɔ̃ zɔ̃ kà nyɛ̀nɛ̀ɛ̀ ní, à mu ɔ ɖáɓáùn.”

³ Kɛɛ Sã́sĩ́ìn pɛ̃́ ma dyi tee ké hwuɖuɔ̀ ɓɛ́ìn ma hwìɛ̀. Hwɛ̀ ké ɔ sɔ̀ ma dyí, ké ɔ kpɔ̃ ma hwɔɖɔɔ̀ gmɔ-wɔ̃̀ɔ̀ xwìɖìɔ̀ dyi, ké ɔ zàà kè gmɔ-wɔ̃̀ɔ̀ pɛ̃́-nyɛ́nɛ́ín ɓěɔ̀ kèɛ̀ gbǎìn-ɖɛ̀ séín ɓěɔ̀ hwuɖu, ké ɔ dèɛ̀ ma kɔún, ké ɔ kpaa ma ɖéɛ toɖo ɓɛ́ ɔ bò ma Hɛ́bɔ̀nɔ̀-hwɔ̀ɖɔ̀ɔ̀ kɔ̃in nyɛɛ dya.

Sã́sĩ́ìn kè Dìɖáɖà jè

⁴ Ti ɖò ɓaɖa ɖeɛɛ, Sã́sĩ́ìn mɔ́ ma màa ɖò ɖe. Màaɔ̀ cĩ́ ma ɖé Sówèɖè Bɔɔ-kpàɔ̀ kɔ̃. Ɔ nyɛ́nɛ́ mɔ̀ ma Dìɖáɖà.

⁵ Wé ɖòɛ̀ ɓaɖaa, Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ mu ma ɖé màaɔ̀ gbo, ké wa ɖá, “Po Sã́sĩ́ìn pɛ́í, ɓɛ́ ɔ ké m̀ dɛ̀ ɔ kpé vɛ̀nɛ̀ɔ̀ sɔ̀à kɛɛ gbo cɛ̃. Ɔ ɖǎ ná nìǐn, nìí ɓɛ́ à ké ɔ kpɔ̃, à ké ɔ sã, ɓɛ́ à ké ɔ gǎ dyéìn. M̀ dyiɛ náa nyuín, à ɖò-ɖò mu m̀ séɓàɖà-pĩ̀à táázĩ̀ìn kè hɔ̃dɛ̀ɖɛ̀ dyúáɖò nyíìn.”

⁶ Ɔ jèɛɛ, Dìɖáɖà mu ma, ké ɔ cɛ̃ɛ ma Sã́sĩ́ìn gbo, ké ɔ ɖá, “Cɛ̃ ḿ dɛ̀ nì kpé vɛ̀nɛ̀ɛ̀ sɔ̀à kɛɛ gbo ɔ kè kà nyɔ ɖò ké m̀ sã ní, ɓɛ́ ɔ ké m̀ gǎ dyéìn nyuɛ.”

⁷ Ké Sã́sĩ́ìn jǔ ma ɔ gɔ̃̌, ké ɔ ɖá, “Ɔ jǔ ké nyɔ ɖò dyi ḿ pɔnɔ-ɖúú ɖìè mɛ̀nɛ̌ìn-sɔ̃́ sã̀ìn ní, nìí, kpé mu ḿ dyí hwɛ̀ìn, ké ní mu nììn kà gàa tɔ̀ɔ̀ ɓě nìà kɛ.”

⁸ Hwɛ̀ ké Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ dyà ma Dìɖáɖà pɔnɔ-ɖúú ɖìè mɛ̀nɛ̌ìn-sɔ̃́, ké ɔ sã̀ìn ma wa Sã́sĩ́ìn.

⁹ Ɓó tia ɓaɖaa, gàa ɓě vǐè ma ɖé wa gbo, ɖé ɓí-dyù ɖò mú. Púɛɛ, Dìɖáɖà páná ma mú, ké ɔ ɖá, “Sã́sĩ́ìn, Féɖésìà-nyɔ̀ ɓěɔ̀ nì m̀ kpɔ̃uń dyiɛńo.” Kɛɛ Sã́sĩ́ìn cɛ̃ ma ɖúú ɓěɔ̀ bũ̌in kà dyèě-ɖúú dyià dyéɖé kpá ní, ɔ nyuà dyi cɛ̃ìn nyɛ. Ké wa se ma dɛ̀ ɔ kpéɔ̀ sɔ̀à kɛɛ da dyé.

¹⁰ Ké Dìɖáɖà cɛ̃ɛ ma Sã́sĩ́ìn gbo, ké ɔ ɖá, “Dyéɛ, kà m̀ tɔ́mɔ́ìn ḿ se wĩin, ké ḿ sɔ̀ìn zùǔn wɛ̃. Ɓó kàǔn wɛ̃ɛ, ní ɓaà m̀ ní, cɛ̃ɛ ḿ gbo. Xwɛ̌ nyɔ mɛ nyu m̀ sãa cá kɛ́?”

¹¹ Ké Sã́sĩ́ìn ɖá, “Ɔ jǔ ké nyɔ ɖò dyi ḿ ɖúú ɖìè ɓɛ́ wa séè ɖɛ ɖò mú nyùìn nyɛɛ sã̀ìn kóɖó-kóɖó ní, nìí, kpé mu ḿ dyí hwɛ̀ìn, ké ní mu nììn kà gàa tɔ̀ɔ̀ ɓě nìà kɛ.”

¹² Ɔ jèɛɛ, Dìɖáɖà ɖú ma ɖúú ɖìè ɓě dyí, ké ɔ sã̀ìn ma wa Sã́sĩ́ìn. Ɓó tia ɓaɖa ɖeɛɛ, gàa ɓě vǐè ma ɖé wa gbo, ɖé ɓí-dyù ɖò mú. Púɛɛ, Dìɖáɖà páná ma mú, ké ɔ ɖá, “Sã́sĩ́ìn, Féɖésìà-nyɔ̀ ɓěɔ̀ nì m̀ kpɔ̃uń dyiɛńo.” Kɛɛ Sã́sĩ́ìn cɛ̃ ma ɖúú ɓěɔ̀ sɔ̃in kà dyèě-ɖúú nìà kɛ.

¹³ Hwɛ̀ ké Dìɖáɖà cɛ̃ɛ ma Sã́sĩ́ìn gbo, ké ɔ ɖá, “M̀ ɖǎ ḿ se wĩin tɔ́mɔ́ìn, ké ḿ ɖǎ zùǔn sɔ̀ìn dyɛ̀ìn ɓó kàǔn. Cɛ̃áa ḿ gbo. Xwɛ̌ nyɔ mɛ nyu m̀ sãa kɛ́?” Ké Sã́sĩ́ìn ɖá, “Ɔ jǔ ké m̀ dyi ní mí-kpóɖó mɛ̀nɛ̌ìn-sɔ̃́ nìà ḿ dúɛɛ ɖɔ-kɔ̃-ɖàɓàìn-ɖɛ̀ mú po, ké m̀ dyiɛ píni gbǎìn kóɖó-kóɖó ní, nìí, kpé mu ḿ dyí hwɛ̀ìn, ké ní mu nììn kà gàa tɔ̀ɔ̀ ɓě nìà kɛ.”

¹⁴ Ɔ jèɛɛ, ti ɔ nì ma nyíɔún wɛ̃ɛ, Dìɖáɖà ɖú ma ɔ mí-kpóɖó mɛ̀nɛ̌ìn-sɔ̃́ɔ̀ dyí, ké ɔ poɛ ma ɖɔ-kɔ̃-ɖàɓàìn-ɖɛ̀ɔ̀ mú, ké ɔ gbǎìn ma píni kóɖó-kóɖó. Hwɛ̀ ké ɔ páná ma mú ɖe, ké ɔ ɖá, “Sã́sĩ́ìn, Féɖésìà-nyɔ̀ ɓěɔ̀ nì m̀ kpɔ̃uń dyiɛńo!” Ké Sã́sĩ́ìn giniìn ma nyíɔún dyi, ké ɔ zà ma ɖɔ-ɖàɓàìn-ɖɛ̀ɔ̀ hwuɖu.

¹⁵ Ké Dìɖáɖà cɛ̃ɛ ma ɔ gbo, ké ɔ ɖá, “Xwɛ̌ m̀ ɓɛ́ìn cɛ̃ɛ kà m̀ ɖɛ̀ɓɛ̀ ḿ múɛ́, ɔ jǔ ké nì hwòɖǒ se ḿ gbo nìǐn nyɛ́? M̀ nyuá ḿ cáìn-kpà tã nìà kɛ, ké m̀ séè dɛ̀ nì kpé vɛ̀nɛ̀ɔ̀ sɔ̀à kɛɛ ḿ gbo cɛ̃.”

¹⁶ Kǎà màaɔ̀ gã̀ ma ɔ fũ̀à-fṹá nyùɛ̌n dyi tee ɓá ɖɛa dyí ɓó wé kè wé mú. Ɔ fũ̀à-fṹáɔ̀ ɖǎ ma Sã́sĩ́ìn dyí sa mìɔ, ké hwɔ ɔ mɛ mɛ́á.

¹⁷ Ɔ jèɛɛ, Sã́sĩ́ìn hwaɖa ma hwǒ, ké ɔ ɖá, “Jɛ̃̌ ɖò séè ḿ dú mu ɖò, sepóɛɖé ḿ mɔ̀ Názìwàɖà-nyɔ̀ sɔ̀ìn ɖé ní wóɖó-tìǐn. Ḿ kpá wáká ɓó Gèɖèpɔ́ɔ̀ bìì. Ɔ jǔ ké m̀ dyi ḿ dúi kpana ní, nìí, kpé mu ḿ dyí hwɛ̀ìn, ké ní mu nììn kà gàa tɔ̀ɔ̀ ɓě nìà kɛ.”

¹⁸ Ti ɓɛ́ Dìɖáɖà dyéɛ ma kà ɔ ɖǎ ma ɔ jǎà gbo cɛ̃ɛ, púɛɛ, ɔ ɖoɓo ma Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ gbo wuɖu, ké ɔ ɖá, “Ɓě dyi ɖe kpa dyúáɖò. Ɔ ɖǎ hwǒ hwaɖa ɖé ḿ gbo.” Ɔ jèɛɛ, Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ dyi ma ɔ gbo ɖe, ké wíɖíɔ̀ nì ma wa xwaún.

¹⁹ Ké Dìɖáɖà po ma Sã́sĩ́ìn nyíɔún ɓó ɔ pɔ̃́ kɔ̃. Ké ɔ ɖá ma gàa ɖò, ɓɛ́ ɔ ké ma ɔ mí-kpóɖó mɛ̀nɛ̌ìn-sɔ̃́ɔ̀ ɓó dyi kpana. Púɛɛ, ɔ dè ma Sã́sĩ́ìn gǎ dyéɛ̀n gbɔ, sepóɛɖé ɔ kpéɔ̀ ɖǎ ma ɔ mú sɔ̀.

²⁰ Hwɛ̀ ké ɔ páná ma mú, ké ɔ ɖá, “Sã́sĩ́ìn, Féɖésìà-nyɔ̀ ɓěɔ̀ nì m̀ kpɔ̃uń dyiɛńo!” Ké ɔ giniìn ma nyíɔún dyi, ké ɔ cɛ̃ɛ ma ɖé ɔ hwòɖǒ bũ̌, ké ɔ ɖá, “Ní mu píé muùn kà mɔ́ún ɓɔ́ɔ ma kà nyuɛ kĩ́ín nyɛ, ɓɛ́ ḿ ké ḿ mìɔùn dyi túò.” Kɛɛ ɔ seɛ ma dyuò kà Bounɓoɔ̀ ɖǎ ma ɓó ɔ gbo sɔ̀ɛ.

²¹ Púɛɛ, Féɖésìà-nyɔ̀ ɓěɔ̀ kpɔ̃ ma ɔ. Ké wa zà ɔ dyéɖé sɔ̃́ɔ̀ dú, ké wa kpa ɔ ɖé Gázà-hwɔ̀ɖɔ̀ɔ̀ mú. Ké wa sã̀ìn ma ɔ bàɖàsǐ-dyɔ̀ɔ̌, ké wa nyu ma ɔ mɔɔ́-kpá-cɛ̃-nyɔ̀ mú ɖé kpɔɖɔɔ̀ ɖeín.

²² Kɛɛ wɛ̃́ɛ́ kɛɛ, ɔ mí ɓɛ́ wa kpana ma kà ɔ dúiɛɛ dè ma mɛɛ gbɔ ɖe.

Sã́sĩ́ìnɛ̀ mɛ́-mɛ́

²³ Wé ɖòɛ̀ ɓaɖaa, Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ poìn ma dyí, ɓɛ́ wa ké ma sáa-zàìn-ɖɛ̀ vɛ̀nɛ̀ ɖò nyu ɓó Dágɔ̃̀ mɔ̀à waà gèɖèpɔ́ɔ̀ kɛɛ bìì, nìí ɓɛ́ wa ké hwɔ pa. Ké wa cɛ̃ɛ ma, ké wa ɖá, “À gèɖèpɔ́ɔ̀ ɖǎ Sã́sĩ́ìn mɔ̀à à mú-nyɛ́-nyɔ̀ɔ̀ kɛɛ à xwaún dyi po.”

^24-25 Ti ɓɛ́ náá-ɖɛ̀ɔ̀ ɖǎ ma wa nyuɛɛ, wa ɖá, “Ɓě dyà Sã́sĩ́ìn, ɓɛ́ ɔ ké dyɔ́-ɖɛ̀ nyu ɓó à bìì.” Ké wa dyà ma ɔ sɔ̀ìn ɖé kpɔɖɔɔ̀ ɖeín. Ké ɔ nì ma dyɔ́-ɖɛ̀ nyuɛń ɓó wa bìì. Púɛɛ, ti nyɔ ɓěɔ̀ dyé ma ɔ kɛɛ, wa ɖú ma waà gèɖèpɔ́ɔ̀ ɓàìn kpàǐ, ké wa ɖá, “À gèɖèpɔ́ɔ̀ ɖǎ à mú-nyɛ́-nyɔ̀ ɓɛ́ ɔ nìà à ɓóɖóɛ̀ dyíin nyìnìɛ̌n ké ɔ nìà nyɔ ɓáún-ɓáún ɖáɓáuń wɛ̃ɛ à xwaún dyi po.” Ké wa nyànàìn ma ɔ ɓó cúè-ɓò ɓěɔ̀ hwìɛ̀ dyi.

²⁶ Ké Sã́sĩ́ìn cɛ̃ɛ ma gàa-dyù ɓá ma kà ɔ sɔ̃ún wɛ̃ɛ gbo, ké ɔ ɖá, “Tòɛ̀ ɓɛ́ ḿ ké cúè-ɓò ɓě kpɔ̃à gbǒɔ̀ dyií dyiɛɛ dyi tìnììn, nìí ɓɛ́ ḿ ké wa mú tè.”

²⁷ Ɓó tia ɓaɖaa, gàa kè màa dyí ma ɖé gbǒɔ̀ mú. Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ séín ɓěɔ̀ nì ma ɖé, ké gàa kè màa ɓě ɓɛ́ìn ma nyɔ táázĩ̀ìn tã jǔɛ kɛɛ nì ma ɖé gbǒɔ̀ dú-hwìɛ̀. Wa nì ma Sã́sĩ́ìn dyi dyéɛń, ké ɔ nì ma dyɔ́-ɖɛ̀ da zàǔn.

²⁸ Hwɛ̀ ké Sã́sĩ́ìn ɓaà ma Bounɓo Ɖɛɓíɔ́, ké ɔ ɖá, “Ɖɛɓíɔ́, ní ɓaà m̀ ní, poìn ḿ jè hwìɖǐi. Óó Gèɖèpɔ́ɔ̀, ní ɓaà m̀ ní, nyí ḿ kpé ɖe ɓó kpa dyúáɖò nìà kɛ, ɓɛ́ ḿ ké Féɖésìà-nyɔ̀ ɓěɔ̀ kpa kɔ̃in zàìn ɓó ní dyéɖé sɔ̃́ ɓěɔ̀ jè.”

²⁹ Ké Sã́sĩ́ìn pɛ́ɛ̀ ma sɔ̃, ké ɔ kpɔ̃ ma cúè-ɓò sɔ̃́ ɓě ɓɛ́ wa kpɔ̃ ma kà gbǒ gànáɔ̀ dyií dyiɛɛ dyi. Ɔ kpɔ̃̀ìn ɖò ɖiaùn-sɔ̃̀ dyi, ké ɔ kpɔ̃̀ìn ɖò kunuà-sɔ̃̀ dyi.

³⁰ Ké Sã́sĩ́ìn ɖá, “Ḿ kè Féɖésìà-nyɔ̀ ɓěɔ̀ mɛ mɛ́.” Púɛɛ, ɔ cṹ ma gbǒɔ̀ ɖé ɔ kpé séín mú, ké gbǒɔ̀ wáɖáìn ma Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ kè nyɔ séín ɓě nì ma ɖé gbǒɔ̀ múɛɛ kɔ̃in. Nyɔ jĩ̀ kà ɔ ɖáɓá ma ɓó ɔ mɛ́-tìɔ̀ ɓaɖaa vò ma dyí mìɔ ké wa zi nyɔ jĩ̀ kà ɔ ɖúó ɖáɓáuń dyí ɖé ti ɔ nì ma toɖo-kpàà kɔ̃ɛɛ dyí.

³¹ Sɔ̀ìn ɓóɛ gboɛɛ, ɔ ɖíí-gàà ɓěɔ̀ kè ɔ ɓǎà gbǒ-xwíníín-nyɔ̀ ɓěɔ̀ dyi, ké wa ɖú ma ɔ xwɛ́ɔ̀ dyí, ké wa kpaa, ké wa zàà ma dyóɖóún ɓó Záwàɖà-hwɔ̀ɖɔ̀ɔ̀ kè Ɛ̀táò-hwɔ̀ɖɔ̀ɔ̀ pṹa, ɖé ɔ ɓǎ Mànóàà xwɛ́-ɓìɔ̀ mú. Sã́sĩ́ìn nàìn ma Éézùɖùɛ̀-nyɔ̀ ɓěɔ̀ ɓó zɔ̃ kpáɖá-nyɔ ɖò mú.