Tɔ̀ɔ̀-ɓìɔ̀ 15 - Ɓǎsɔ́ɔ̀ Báɓòɔ̀

Sã́sĩ́ìn zàìn Féɖésìà-nyɔ̀ ɓěɔ̀ kpa kɔ̃in

¹ Sɔ̀ìn ɓóɛ gboɛɛ, Sã́sĩ́ìn sɔ̀ ma dyí, ké ɔ mu ma ɔ gmàà gbo dyi téìn. Ɔ mɔ̀ ma hwítì-kɔ́-ɓàɖà. Sã́sĩ́ìn kpa ma wiɖi gmɔ̀ ɖò. Ti ɓɛ́ ɔ nyini ma ɖéɛɛ, ɔ cɛ̃ɛ ma ɔ gmààɔ̀ ɓǎ gbo, ké ɔ ɖá, “Ḿ dyi dà ní gmààɔ̀ gbo pɛ̃́ìno.” Kɛɛ ɔ gmààɔ̀ ɓǎ se ma wɔ̃́ ɓɛ́ ɔ ké ma ɖé gbǒɔ̀ mú dyá.

² Ɔ gmààɔ̀ ɓǎ ɖá, “Ní hwòɖǒ ɖá m̀ se ɔ mɔ́ ɖe fɔɔ cá. Ɔ jèɛɛ, ḿ ɖǎ ɔ nì ɓǎtoɔ̀ nyí. Má, ɔ ɖíí-màà dyùwè nìà kɛ nɔ̀mɔ̀ dyíin ké ɔ zi ɔ dyíe? Kpɔ̃ ɔ dyi ɓó ɔ ɖíí-mààɔ̀ bɛ̃̌ǐn.”

³ Ké Sã́sĩ́ìn cɛ̃ɛ ma, ké ɔ ɖá, “Nyɔ ɖò se ḿ kàìn ɓɛ́ìn ɓó kàǔn ɓó ɖɛ ní mu Féɖésìà-nyɔ̀ ɓěɔ̀ bũ̌ nyuùn wɛ̃ɛ jè.”

⁴ Ɔ jèɛɛ, ɔ mu, ké ɔ kpɔ̃ ma tĩ̌ɔ̀-wè hɔ̃dɛ̀ɖɛ̀ tã, ké ɔ sãìn wa sɔ̃́-sɔ̃́ ɓěɛ̀ vɔ̃ dyíin, ké ɔ sãìn ma wa dɔ̀ɔ̀-kpà ɓě dyí.

⁵ Púɛɛ, ɔ kpɔ̃̀ìn ma dɔ̀ɔ̀-kpà ɓěɔ̀ dyí, ké ɔ táà ma tĩ̌ɔ̀-wè ɓěɔ̀ dyi. Ké wa gbɛ̀ìn ma Féɖésìà-nyɔ̀ ɓěɔ̀ geɖe kɔ́-kɔ́ ɓěɔ̀ gbo dyi. Kǎà ɔ nyu ma hwítìɔ̀ jũ̌ ɓěɔ̀ kè nyɔ wa séè cɛ̃ keɛ kè géɖéè-gbǎ ɓěɔ̀ ɔ kè ɔ́ɖè-gbǎ ɓěɔ̀ fɔ̃ɔ.

⁶ Ké Féɖésìà-nyɔ̀ ɓěɔ̀ diè ma ɖɛi, ké wa ɖá, “Nyɛ́ nyu ɖɛà kɛ́?” Ké nyɔ ɖò cɛ̃ɛ ma wa gbo, ké ɔ ɖá, “Ɔ mɔ̀ Sã́sĩ́ìn mɔ̀à Tímínà-nyɔ̀ɔ̀ dyúɛ̀ dyú-ɓǎɔ̀ kɛ. Ɖɛ kɔ̃̀ jè ɔ nyuà náa kɛɛ mɔ̀ ɔ bùǐ-gààɔ̀ zà ma ɔ nyɔ́nɔ́ xwa, ké ɔ nyíɛ Sã́sĩ́ìnɛ̀ ɓǎtoɔ̀ jè.” Hwɛ̀ ké Féɖésìà-nyɔ̀ ɓěɔ̀ mu ma, ké wa fɔ̃ ma màa-dyùɔ̀ kè ɔ ɓǎ, ké wa mɛ́ ma.

⁷ Ti ɓɛ́ Sã́sĩ́ìn wɔ̃́ɔ ma kɛɛ, ɔ cɛ̃ɛ ma Féɖésìà-nyɔ̀ ɓěɔ̀ gbo, ké ɔ ɖá, “Kà ɓɛ́ ɓě ɖǎà ɖɛ nì kàà kɛ nyuɛɛ, ní mu ɓě kpa kɔ̃in zàìn, hwɛ̀ ké ḿ ɓɔ́.”

⁸ Ɔ jèɛɛ, ɔ vɔ̃ ma wa gbo ɖé dyoɖo mú, ké ɔ ɖáɓá ma wa ɓáún-ɓáún. Sɔ̀ìn ɓóɛ gboɛɛ, ɔ mu, ké ɔ cĩ́ ma ɖé ɓí vɛ̀nɛ̀ ɖò nì ma ɖé sɔ́ɔ́-kpò vɛ̀nɛ̀ ɖò nì ɖé Étàùn-hwɔ̀ɖɔ̀ɔ̀ wĩín nyɛ múɛɛ mú.

Sã́sĩ́ìn ɖu Féɖésìà-nyɔ̀ ɓěɔ̀ toún

⁹ Sɔ̀ìn ɓóɛ gboɛɛ, Féɖésìà-nyɔ̀ ɓěɔ̀ poìn ma dyí, ké wa nyànàìn ma waà jàɖàìn-gbò ɓěɔ̀ dyi ɖé Júɖà-ɓòɖòɔ̀ kɔ̃. Ké wa po ma Ɖɛ́hì-hwɔ̀ɖɔ̀ɔ̀ to kɔ̃.

¹⁰ Ké Júɖà-gàà ɓěɔ̀ diè ma wa dyi, ké wa ɖá, “Ɖɛ́ kɔ̃̀ jè ɓě dyàà à to kɔ̃ kɛ́?” Ké wa ɖá, “À dyi Sã́sĩ́ìn ɓóùn, ɓɛ́ à ké ɔ sã, ɓɛ́ à ké ɔ ɖɛ dyúáɖò ɔ nyuà à bũ̌ɛɛ ɖò bũ̌ nyu.”

¹¹ Hwɛ̀ ké Júɖà-gàà ɓěɔ̀ táázĩ̀ìn tã mu ma ɖé Sã́sĩ́ìn gbo, dɛ̀ ɓɛ́ ɔ nì ma kà ɖé ɓí vɛ̀nɛ̀ nìà ɖé sɔ́ɔ́-kpò nìà Étàùn-hwɔ̀ɖɔ̀ɔ̀ wĩín nyɛɛ mú kɛɛ múɛ. Ké wa cɛ̃ɛ ma ɔ gbo, ké wa ɖá “M̀ seɛ dyuò kà Féɖésìà-nyɔ̀ ɓěɔ̀ kɔ̃̀ à wuɖuíɛɛ̀? Ɖɛ́ mɔ̀ ɖɛ m̀ nyuà à bũ̌ɛɛ xwíníín nyɛ́?” Ké Sã́sĩ́ìn jǔ ma wa gɔ̃̌, ké ɔ ɖá, “Ɖɛ wa nyu mɔ́ún bũ̌ɛɛ kɔ̃̀ ɖò ḿ nyuà wa mɔ̀ùn bũ̌ nyɛ̀nɛ̀ɛ̀ kɛ̀.”

¹² Ké wa cɛ̃ɛ ma ɔ gbo, ké wa ɖá, “À dyi, ɓɛ́ à ké m̀ sã, ɓɛ́ à ké m̀ Féɖésìà-nyɔ̀ ɓěɔ̀ xwáɖáún zàìn.” Ké Sã́sĩ́ìn ɖá, “Ɓě ɖi wuɖu kà ɓɛ́ ɓě mìɔùn se ḿ ɖáɓáa muɛ.”

¹³ Ké wa ɖá, “À wɔ̃́ ní. À mu m̀ sãùn nyɛ̀nɛ̀ɛ̀ pū, ɓɛ́ à ké m̀ wa xwáɖáún zàìn. À se m̀ ɖáɓáa mu.” Ké wa sã̀ìn ma ɔ ɖúú ɖìè sɔ̃́. Ké wa zà ma ɔ sɔ́ɔ́-ɓìɔ̀ mú, ké wa kpa ma ɔ.

¹⁴ Ti ɔ nìà ma Ɖɛ́hì-hwɔ̀ɖɔ̀ɔ̀ dyáuń wɛ̃ɛ, Féɖésìà-nyɔ̀ ɓěɔ̀ nì ma ɔ wɔ̃ dyiɛń, ké wa dyà ma mú pánáa. Púɛɛ, Bounɓoɔ̀ Zùùɔ̀ dyi ma ɔ kɔ̃ ɖé kpé mú. Ké ɔ cɛ̃ ma ɖúú ɓě nì ma kà ɔ sɔ̃ɛɛ pū kà dyèě-ɖúú kpáà dyéɖéɛ, ké ɖúú ɓěɔ̀ keè ma ɔ sɔ̃ dyi.

¹⁵ Púɛɛ, ɔ gmɔìn dyi, ké ɔ dyé ma jǎkasìɛ̀ gɔ̀ɔ̀-gbà-kpà ɖìè ɖò. Ké ɔ ɖúɛ ma dyí, ké ɔ ɖáɓáìn ma Féɖésìà-nyɔ̀ ɓěɔ̀ gàa táázĩ̀ìn ɖò.

¹⁶ Hwɛ̀ ké ɔ ɖá, “Ḿ ɖǎ jǎkasìɛ̀ gɔ̀ɔ̀-gbà-kpàɔ̀ gàa táázĩ̀ìn ɖò dyí ɖáɓá. Ḿ ɖǎ waà kòòɔ̀ kòò kɔ̃ gbǒìn dyììn ɖé jǎkasìɛ̀ gɔ̀ɔ̀-gbà-kpà mú.”

¹⁷ Ti ɔ jaɖa ma wuɖuɔ̀ kɛɛ, ɔ po ma jǎkasìɔ̀ gɔ̀ɔ̀-gbà-kpàɔ̀ xwáɖáún. Ɔ jèɛɛ, wa jǔìn ma páɔ̀ Wáɖámàà-Ɖɛ́hì-nyɛ̀nɛ̀ kɔ̃̀ xwíníín mɔ̀à gɔ̀ɔ̀-gbà-kpà-tòɖò kɛ.

¹⁸ Sɔ̀ìn ɓóɛ gboɛɛ, ní-ná-tò nyu ma Sã́sĩ́ìn mìɔ, ké ɔ pòìn ma Bounɓoɔ̀ kpéi, ké ɔ ɖá, “Dyéɛ kà m̀ ɖǎ mɔ̄ mɔ̀à nì gbo-nì-nyɔ̀ɔ̀ kɛɛ to-ɖu-ɖu ɓɛ́ kà nìà kɛɛ nyíɛ. Kɛɛ ɓó kàǔn wɛ̃ɛ, ní-ná-tò kéá ḿ ɖáɓá, ɓɛ́ ḿ kéá Féɖésìà-nyɔ̀ se sàà mɛ́ ɓěɛ̀ xwaún dyi kpáà?”

¹⁹ Hwɛ̀ ké Gèɖèpɔ́ɔ̀ kaà ma ɓí ɖò dyí ɓó ɓíɖíi ɖé Ɖɛ́hì-hwɔ̀ɖɔ̀ɔ̀ wĩín, ké ní sɔ̀ ma ɖéɛ mú. Ti ɓɛ́ Sã́sĩ́ìn ɖǎ ma ní náa, kpé kpá ma ɔ dyí ɖe. Ɔ jèɛɛ, wa jǔìn ma ní-dùɔ̀ Hákòwèɖè-nyɛ̀nɛ̀ kɔ̃̀ xwíníín mɔ̀à kpéi-pòìn-nyɔ̀ kɛ. Ní-dùɔ̀ nì ɖé Ɖɛ́hì-hwɔ̀ɖɔ̀ɔ̀ wĩín ke ɓó kàǔn.

²⁰ Ké Sã́sĩ́ìn nàìn ma Éézùɖùɛ̀-nyɔ̀ ɓěɔ̀ ɓó zɔ̃ kpáɖá-nyɔ ɖò mú, ɓó Féɖésìà-nyɔ̀ ɓěɔ̀ nììn tiɔ̀ mú.