Tɔ̀ɔ̀-ɓìɔ̀ 14 - Ɓǎsɔ́ɔ̀ Báɓòɔ̀

Sã́sĩ́ìn kpɔ̃ nyɔ́nɔ́ dyi

¹ Wé ɖòɛ̀ ɓaɖaa, Sã́sĩ́ìn mu ma ɖé Tímínà-hwɔ̀ɖɔ̀ɔ̀ mú, ké ɔ dyé ma ɖé Féɖésìà-màà-dyù ɖò.

² Ké ɔ dyi ɔ ɓíɖí ɖe, ké ɔ cɛ̃ɛ ma ɔ ɖe kè ɔ ɓǎ gbo, ké ɔ ɖá, “Ḿ dyé Féɖésìà-màà-dyù ɖò ɖé Tímínà-hwɔ̀ɖɔ̀ɔ̀ mú. Ɓě mɔ́ ɔ ɓó ḿ bìì, ɓɛ́ ɔ ké ní gmàà jǔ.”

³ Ké ɔ ɖe kè ɔ ɓǎ diè ɔ dyi, ké wa ɖá, “M̀ se màa-dyù ɖò dyéɛ ɓɛ́ìn ɖé nì gbǒ-xwíníín-nyɔ̀ ɓěɔ̀ hwìɛ̀, mɔɔ ɖé Éézùɖùɛ̀-nyɔ̀ tɔ̀ɔ̀ ɓěɔ̀ hwìɛ̀, ɓɛ́ m̀ kéà ɖé Féɖésìà-nyɔ̀ mɔ̀ nyɔ se sàà mɛ́ ɓěɔ̀ hwìɛ̀ nyɔ́nɔ́ zà kɛɛ̀?” Kɛɛ ɔ cɛ̃ɛ ma ɔ ɓǎ gbo, ké ɔ ɖá, “Mɔ́ ɔ ɓó ḿ bìì. Ɔ mɔ̀ nyɔ nɔ̀mɔ̀ ḿ hwìɖǐi mìɔ.”

⁴ Ɔ ɖe kè ɔ ɓǎ seɛ ma dyuò kà Bounɓoɔ̀ mɔ̀ nyɔ sɔ́ ma ɖɛ nìà kɛ dyí, ɓɛ́ dyììn ɖéɛ múɛɛ, ɔ ké ma Féɖésìà-nyɔ̀ ɓěɔ̀ gbo vɔ̃ɛ. Ɓó tia ɓaɖaa, Féɖésìà-nyɔ̀ ɓěɔ̀ kɔ̃̀ ma Éézùɖùɛ̀-nyɔ̀ ɓěɔ̀ wuɖuí.

⁵ Ti ɓɛ́ Sã́sĩ́ìn ɖe kè ɔ ɓǎ dyéɛ ma kà Sã́sĩ́ìn mɔ́ ma Féɖésìà-màà-dyùɔ̀ xwéé kɛɛ, wa sɔ̀ ma dyí, ké wa mu ma ɖé Tímínà-hwɔ̀ɖɔ̀ɔ̀ mú. Ti wa nìǎ ma Tímínà-nyɔ̀ ɓěɔ̀ géɖéè-gbǎ ɓěɔ̀ dyɛ̀ǐn nyɛɛ, wàɖà kɛɛ, ganìǎ gmɔ̀ ɖò wóɖó ma xwáɖáún, ké ɔ nì ma dyoɖo poɛń, ké ganìǎɔ̀ nì ma Sã́sĩ́ìn wɔ̃ dyiɛń.

⁶ Púɛɛ, Bounɓoɔ̀ Zùùɔ̀ dyi ma Sã́sĩ́ìn kɔ̃ ɖé kpé mú. Ké ɔ sɔ̃ fóɖóúnɔ̀ fáìn ma ganìǎɔ̀ dyi kà nyɔ kéɔ́ kà wiɖi-dyù bèɖě ɖò dyi fáìn nyɛ. Kɛɛ ɔ se ɖɛ ɔ nyu ma kà kɛɛ ɔ ɖe kè ɔ ɓǎ gbo cɛ̃.

⁷ Ké Sã́sĩ́ìn mu, ké ɔ kè màa-dyùɔ̀ dè ma dɔ́ɔ́. Màa-dyùɔ̀ nɔ̀mɔ̀ ma Sã́sĩ́ìn hwìɖǐi mìɔ.

⁸ Ti ɓɛ́ Sã́sĩ́ìn nì ma ɔ nyɔ́nɔ́ɔ̀ dyi kpɔ̃uń muɛń nyɛɛ, ɔ pàìn ma ɓó hwìèɔ̀ gaún, ɓɛ́ ɔ ké dɛ̀ ganìǎɔ̀ xwɛ́ɔ̀ pɛ̃́ ma kà dyiɛɛ dyé. Púɛɛ, ɔ dyéɛ ké ɖo pa ma ganìǎ-kùɔ̀ mú.

⁹ Ké ɔ kpa ɖé sɔ̃, ké ɔ zà ma ɖé ɖoɔ̀ kpã́ ɖò, ké ɔ kpaa ma ɖiɛ. Ti ɔ dyɛ̀ìn ma ɔ ɖe kè ɔ ɓǎ kɛɛ, ɔ nyí ma wa ɖò, ké wa mɔ̀ùn ɖiɛ ma. Kɛɛ ɔ seɛ ma wa gbo cɛ̃ kà ɔ zàà ma ɖéɛ ganìǎ-kùɔ̀ múɛ.

¹⁰ Ké Sã́sĩ́ìn ɓǎ mu, ké ɔ dyé ma màaɔ̀. Ké Sã́sĩ́ìn pa ma ɖé hwɔ ɖò. Ɖɛ nìà kɛ mɔ̀ ma gàa-dyù gmɔ̀ dyé nyɔ́nɔ́ɛɛ nyuu-ɖɛ̀.

¹¹ Ti ɓɛ́ Féɖésìà-nyɔ̀ ɓěɔ̀ dyé ma Sã́sĩ́ìn nyɛɛ, wa tò ma gàa-dyù gmɔ̀ kpáɖá-nyɔ ɓaɖa-bùè, ɓɛ́ wa ké ma ɖé ɔ gbo nì.

¹² Hwɛ̀ ké Sã́sĩ́ìn cɛ̃ɛ ma wa gbo, ké ɔ ɖá, “Ɓě tòɛ̀ ɓɛ́ ḿ ké ɓě doìn-nɔ̀ɔ̌ ɖò gbo po. Ɔ jǔ ké ɓě dyiɛ xwíníín zà ɖé ḿ gbo, hwɛ̀ ké hwɔ-wè mɛ̀nɛ̌ìn-sɔ̃́ɛ̀ dyi ɖé hwɛ̀ ní, nìí, ḿ mɛ nyí ɓě ɖénì-ɖɔ̀ɔ̀ gã́ùn kpáɖá-nyɔ ɓaɖa-bùè kè ɖɔ-sùtù kpáɖá-nyɔ ɓaɖa-bùè.

¹³ Kɛɛ ɔ jǔ ké ɓě seɛ xwíníín zàà ɓɛ́ìn ɖé ḿ gbo ní, nìí, ɓě ké mɔ́ún ɖénì-ɖɔ̀ɔ̀ gã́ùn kpáɖá-nyɔ ɓaɖa-bùè kè ɖɔ-sùtù kpáɖá-nyɔ ɓaɖa-bùè nyí.” Ké wa ɖá, “Po à nì doìn-nɔ̀ɔ̌ɔ̀ gbo, ɓɛ́ à kéɛ wɔ̃́.”

¹⁴ Hwɛ̀ ké ɔ ɖá, “Ɖé ɖɛ-ɖi-nyɔ̀ɔ̀ múɛɛ, ɖéɛ̀ ɖii-ɖɛ̀ sɔ̀. Ké ɖé kpé-ɓéɖé-nyɔ̀ɔ̀ múɛɛ, ɖéɛ̀ ɖɛ ɖéé-ɖéé ɖò sɔ̀.” Wa ɖú ma wé tã dyí, ké wa seɛ ma xwíníín zàà ɓɛ́ìn.

¹⁵ Wéɔ̀ hĩinyɛ nììnɔ̀ ɓaɖaa, wa cɛ̃ɛ ma Sã́sĩ́ìnɛ̀ gmààɔ̀ gbo, ké wa ɖá, “Po nì dyú-ɓǎɔ̀ pɛ́í, ɓɛ́ ɔ ké doìn-nɔ̀ɔ̌ɔ̀ xwíníín zà ɓó à bìì. Ɔ se ná nìǐn, nìí, à mu m̀ kè nì ɓǎà gbǒ-xwíníín gànáɔ̀ fɔ̃ùn, ɓɛ́ ɓě ké mɛ́. Dyà, ɖɛ kɔ̃̀ jè ɓě ɖáà à kɛɛ mɔ̀ ɓɛ́ ɓě ké à kɔ̃̀ɔ̀-ɖɛ̀ ɓěɔ̀ à xwai zà jèè?”

¹⁶ Hwɛ̀ ké Sã́sĩ́ìnɛ̀ gmààɔ̀ sɔ̀ ma dyí, ké ɔ mu, ké ɔ kpá ma Sã́sĩ́ìn ɖɔ, ké ɔ nì ma xwíníín vĩ̌ɛń. Ɔ cɛ̃ɛ ma Sã́sĩ́ìn gbo, ké ɔ ɖá, “M̀ se ḿ mú ɖɛ̀ɓɛ̀. M̀ nyɛ́ ḿ mú. Dyéɛ, m̀ po ní nyɔ ɓěɔ̀ doìn-nɔ̀ɔ̌ ɖò gbo, kɛɛ m̀ seɛ xwíníín zà ɖé ḿ gbo.” Ké Sã́sĩ́ìn ɖá, “Ḿ séèɛ̀ xwíníín zà ɖé ḿ ɖe kè ḿ ɓǎ gbo dyɛ mɔ̀ùn, nìí, xwɛ̌ ḿ ɓɛ́ìn xwíníín zàà ɖé m̀ gboɛ́?”

¹⁷ Ké màaɔ̀ gã̀ ma vĩ̌ɛń dyi tee ɓó hwɔ gànáɔ̀ ɓaɖa. Màaɔ̀ nɛ́ ma Sã́sĩ́ìn kɔ̃ mìɔ jèɛɛ, ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɔ zà ma doìn-nɔ̀ɔ̌ɔ̀ xwíníín ɖé ɔ gbo. Ké ɔ mɔ̀ùn mu, ké ɔ cɛ̃ɛ ma ɔ nyɔ ɓěɔ̀ gbo.

¹⁸ Ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, hwɛ̀ ɓɛ́ dyóɖó ké ma ziɛɛ, hwɔɖɔɔ̀ gàa ɓěɔ̀ dyi ma Sã́sĩ́ìn gbo, ké wa ɖá, “Ɖɛ́ ɖéè ké ɔ zi ɖo dyíɛ́? Ɖɛ́ ɓéɖé kpé ké ɔ zi ganìǎ dyíɛ́?” Hwɛ̀ ké Sã́sĩ́ìn cɛ̃ɛ ma wa gbo, ké ɔ ɖá, “Ɔ jǔ ké ɓě seɔ́ má ɖé ní gmàà mɔɔ́-po-kpà dyí zĩ̀ìn ní, nìí, ɓě seɔ́ má ní doìn-nɔ̀ɔ̌ɔ̀ xwíníín dyuòɛ̌ mu.”

¹⁹ Ké Bounɓoɔ̀ Zùùɔ̀ dyi ma Sã́sĩ́ìn kɔ̃ ɖé kpé mú. Ké ɔ sɔ̀ ma dyí, ké ɔ mu ma ɖé Àkéɖɔ̀ùn-hwɔ̀ɖɔ̀ɔ̀ mú. Ké ɔ ɖáɓá ma ɖé gàa kpáɖá-nyɔ ɓaɖa-bùè, ké ɔ ɖú waà kɔ̃̀ɔ̀-ɖɛ̀ ɓěɔ̀ dyí. Ké ɔ nyí ma waà mú-po-ɖɔ̀ ɓěɔ̀ gàa ɓě zà ma kà ɔ doìn-nɔ̀ɔ̌ɔ̀ xwíníín nyɛ. Dyoɖoɔ̀ zi ma Sã́sĩ́ìn mú mìɔ jèɛɛ, ɔ sɔ̀ ma dyí, ké ɔ mu ma ɔ ɓǎ ɓíɖí-taún.

²⁰ Kɛɛ wa ɖú ma Sã́sĩ́ìnɛ̀ gmààɔ̀ dyí, ké wa nyí ma ɔ Sã́sĩ́ìnɛ̀ ɓǎto kpá ma kà ɔ gbo ɓó ɔ nyɔ́nɔ́-dyi-kpɔ̃-tìɔ̀ ɓaɖaa.