Tɔ̀ɔ̀-ɓìɔ̀ 13 - Ɓǎsɔ́ɔ̀ Báɓòɔ̀

Sã́sĩ́ìn wóɖó-wóɖó

¹ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ nyu ma Bounɓoɔ̀ nàmàǔn bũ̌ ɖe. Ɔ jèɛɛ, Bounɓoɔ̀ po ma wa Féɖésìà-nyɔ̀ ɓěɔ̀ xwaún dyi ɓó zɔ̃ kpáɖá-nyɔ sɔ̃́ mú.

² Ɓó tia ɓaɖaa, gàa ɖò nì ma ɖé Záwàɖà-hwɔ̀ɖɔ̀ɔ̀ mú, ké ɔ nyɛ́nɛ́ mɔ̀ ma Mànóà. Ɔ sɔ̀ ma ɖé Dɛ̃́ìn nììn xwéɖé-dùɔ̀ mú. Ɔ gmàà mɔ̀ ma ɖàà-màà.

³ Wé ɖòɛ̀ ɓaɖaa, Bounɓoɔ̀ zɛ̃̀ìn ma ínjà ɖò mú, ké ɔ wóɖóìn ma màaɔ̀ dyí, ké ɔ ɖá, “M̀ mɔ̀ ɖàà-màà. M̀ se dyú ɖò ɓéɖé dyɛo, kɛɛ gmɔ̀ nɔ̄, nì mu zùù kɔ̃ nììn, ɓɛ́ m̀ ké gàa-dyù ɖò wóɖóìn.

⁴ Ɔ jèɛɛ, mɔ̀ǔn ɖá ɓɛ́ m̀ ké wã́ìn mɔɔ náá-ɖɛ̀ kàmà-kàmà ɖò ná. Ké m̀ mɛ ɓɔ́ ɖɛ se mú hwɛ̀ ɖò ɖiɛ.

⁵ Ti ɓɛ́ nì gàa-dyùɔ̀ mu wóɖóìn wɛ̃ɛ, jɛ̃̌ ɖò ní ɖá ɔ ké ɔ dú mu, sepóɛɖé gàa-dyùɔ̀ mu Názìwàɖà-nyɔ̀ jǔùn ɓó Gèɖèpɔ́ɔ̀ bìì sɔ̀ìn ɖé ɔ wóɖó-tìǐn. Ké ɔ mu Éézùɖùɛ̀-nyɔ̀ ɓěɔ̀ póɛ̀n gbɔ dèìn sɔ̀ìn ɖé Féɖésìà-nyɔ̀ ɓěɔ̀ xwaún.”

⁶ Hwɛ̀ ké màaɔ̀ sɔ̀ ma dyí, ké ɔ mu, ké ɔ cɛ̃ɛ ma ɔ dyú-ɓǎɔ̀ gbo, ké ɔ ɖá, “Gèɖèpɔ́ɔ̀-gàà ɖò dyiɔ́ má ḿ gbo. Ɔ nì kà Gèɖèpɔ́ɔ̀ ínjà ɖò nìà kɛ, ké ɔ nì díɖí mìɔ cá. Ḿ se dɛ̀ ɔ sɔ̀ɛɛ jè dyi diè, ké ɔ se ɔ nyɛ́nɛ́ ɖá ɖé ḿ gbo.

⁷ Kɛɛ ɔ cɛ̃ɛ ḿ gbo, ké ɔ ɖá, ‘Nì mu zùù kɔ̃ nììn, ɓɛ́ m̀ ké gàa-dyù ɖò wóɖóìn. Ɔ jèɛɛ, mɔ̀ǔn ɖá ɓɛ́ m̀ ké wã́ìn mɔɔ náá-ɖɛ̀ kàmà-kàmà ɖò ná. Ké m̀ mɛ ɓɔ́ ɖɛ se mú hwɛ̀ ɖò ɖiɛ. Sepóɛɖé gàa-dyùɔ̀ mu Názìwàɖà-nyɔ̀ jǔùn ɓó Gèɖèpɔ́ɔ̀ bìì, ké kǎà ɔ mu nììn tee sɔ̀ìn ɖé ɔ wóɖó-tìǐn, ké ɔ dyɛ̀ìn ɔ gĩɔ-tì.’ ”

⁸ Hwɛ̀ ké Mànóà ɓaà ma, ké ɔ ɖá, “Óó Bounɓo, ní ɓaà m̀ ní, Gèɖèpɔ́ɔ̀-gàà ɓɛ́ m̀ ɖoɓo ma kà kɛɛ mɛ dyi à gbo ɖe, ɓɛ́ ɔ ké kà à ké dyú muà wóɖóùn wɛ̃ɛ gmɛ̀ìn nyuɛɛ jè à gbo cɛ̃.”

⁹ Ɔ jèɛɛ, Gèɖèpɔ́ɔ̀ wɔ̃́ ma Mànóàà ɓaà-wùɖùɔ̀, ké ínjà mɔ̀à Gèɖèpɔ́ɔ̀ kɛɛ dyi ma ɖé màaɔ̀ gbo ɖe ti ɔ nì ma ɖé ɔ ɓíɖí-geɖeín nyɛ. Kɛɛ ɔ dyú-ɓǎ Mànóà se ma ɓó nì ɓó tia ɓaɖa.

¹⁰ Ké màaɔ̀ fṹà, ké ɔ mu ma ɔ dyú-ɓǎɔ̀ ɖáùn, ké ɔ ɖá, “Dyi nɔ̄, Gèɖèpɔ́ɔ̀-gàà ɓɛ́ ɔ wóɖóìn ma kà ḿ dyíɛɛ ɖǎ dyi ɖe.”

¹¹ Hwɛ̀ ké Mànóà sɔ̀ ma dyí, ké ɔ sí ma ɔ gmààɔ̀ kíɖíí. Ti Mànóà dyɛ̀ìn ma gàaɔ̀ kɛɛ, ɔ diè ma gàaɔ̀ dyi, ké ɔ ɖá, “Mɔ̀ mɔ̀ nyɔ wùɖù ma kà ní gmàà gboɛɛ̀?” Ké gàaɔ̀ ɖá, “Ǹdye, ɔ mɔ̀ mɔ̄.”

¹² Ké Mànóà diè ma ɔ dyi, ké ɔ ɖá, “Ti ɓɛ́ ɖɛ m̀ cɛ̃à kɛɛ mu kpáùn wɛ̃ɛ, nìí, xwɛ̌ dyúɔ̀ mɛ nyu cĩ́ɛ kɛ́? Ɖɛ́ ɔ mɛ nyu kɛ́?”

¹³ Ké ínjàɔ̀ jǔ ma ɔ gɔ̃̌, ké ɔ ɖá, “Nì gmààɔ̀ mɛ kpɔ̃ gma séín ḿ nyíà ɔ kɛɛ dyi.

¹⁴ Ɔ mɛ ɓɔ́ ɖɛ sɔ̀ìn géɖéè-ɖúú-gbǒ dya kɛɛ ɖiɛ. Ké ɔ mɛ ɓɔ́ wã́ìn mɔɔ náá-ɖɛ̀ kàmà-kàmà ɖò náa. Ké ɔ mɛ ɓɔ́ ɖɛ se mú hwɛ̀ ɖò ɖiɛ. Ɔ mɛ kpɔ̃ gma séín ḿ nyíà ɔ kɛɛ dyi.”

^15-16 Mànóà seɛ ma dyuò kà Bounɓoɔ̀ mɔ̀ nyɔ zɛ̃̀ìn ma kà ínjàɔ̀ múɛ jèɛɛ, ɔ cɛ̃ɛ ma ínjàɔ̀ gbo, ké ɔ ɖá, “À ɓaà m̀ ní, ku hwòɖǒ, ɓɛ́ à ké m̀ wiɖi gmɔ̀ ɖò ɖáɓáìn, ɓɛ́ à ké nì ɖii-ɖɛ̀ pĩ.” Hwɛ̀ ké ínjàɔ̀ ɖá, “Kɛbì m̀ mɛ kpɔ̃ ḿ dyiɛɛ, ḿ se nì ɖii-ɖɛ̀ ɖò ɖiɛ́ mu. Kɛɛ ɖú wiɖi gmɔ̀ɔ̀ dyí, ɓɛ́ m̀ kéɛ fɔ̃ɔ-sàǎ-zàìn-ɖɛ̀ mú nyu ɓó Bounɓoɔ̀ bìì.”

¹⁷ Ké Mànóà diè ma ínjàɔ̀ dyi, ké ɔ ɖá, “Xwɛ̌ nì nyɛ́nɛ́ jǔ kɛ́? À mɔ́ à ké nì nyɛ́nɛ́ dyuò, nìí, ɖɛ ɓě m̀ cɛ̃à kɛɛ dyi ná kpáín, à ké m̀ dya dè.”

¹⁸ Ké ínjàɔ̀ ɖá, “Ɖɛ́ kɔ̃̀ jè nì mɔ́à ní nyɛ́nɛ́ dyuòɛ̀ dyiɛ́? Ɔ mɔ̀ dĩ́ín-dĩ̀ìn-ɖɛ̀.”

¹⁹ Hwɛ̀ ké Mànóà ɖú ma wiɖi gmɔ̀ ɖò kè ɖii-ɖɛ̀ dyí, ké ɔ zàìn ma sáa ɓó Bounɓoɔ̀ bìì, ɓó sɔ́ɔ́-kpò ɖò kɔ̃. Ké ínjàɔ̀ nyu ma dĩ́ín-dĩ̀ìn-ɖɛ̀ ɖò ti ɓɛ́ Mànóà kè ɔ gmààɔ̀ nì ma ɓó gmɔ̀ǔn wɛ̃.

^20-21 Ti ɓɛ́ nyɛɔ̀ nì ma wãuń ɓó sɔ́ɔ́-kpòɔ̀ kɔ̃ɛɛ, púɛɛ, ínjàɔ̀ mùìn ma nyɛ-mìɔ̀ɔ̀ mú, ké ɔ mu ma dyɔún. Ti ɓɛ́ Mànóà kè ɔ gmààɔ̀ dyéɛ ma kà ínjàɔ̀ mɔ̀ ma Bounɓoɔ̀ kɛɛ, wa jìɖǐ ma ɓó ɓóɖó-kpàɔ̀ kɔ̃ dyi. Sɔ̀ìn ɓóɛ gboɛɛ, wa se ma ínjàɔ̀ dyé ɖe.

²² Hwɛ̀ ké Mànóà cɛ̃ɛ ma ɔ gmààɔ̀ gbo, ké ɔ ɖá, “À ɖǎ Gèɖèpɔ́ɔ̀ dyé wà! À mu mɛ́ìno!”

²³ Ké Mànóà gmààɔ̀ ɖá, “Ɔ jǔ ké Bounɓoɔ̀ dyiɔ́ má à ɖáɓáa mɔ́ ní, nìí, ɔ seɔ́ má fɔ̃ɔ-sàǎ-zàìn-ɖɛ̀ɔ̀ kè ɖii-ɖɛ̀-sàǎ-zàìn-ɖɛ̀ɔ̀ à xwaún kpɔ̃ɔ́ mu, ké ɔ seɔ́ má à ɖɛ séín ɓěɛ̀ dyí tɛ̀mɛ̀ǐn mu, mɔɔ ɓɛ́ ɔ kéɔ́ má à ɖɛ nìà kɛ gbo cɛ̃.”

²⁴ Sɔ̀ìn ɓó ɖɛ ɓěɛ̀ gboɛɛ, màaɔ̀ wóɖóìn ma gàa-dyù ɖò, ké ɔ jǔìn ma ɔ Sã́sĩ́ìn-nyɛ̀nɛ̀. Dyúɔ̀ ɓúá ma, ké Bounɓoɔ̀ po ma ɔ mana kɔ̃.

²⁵ Ti ɓɛ́ Sã́sĩ́ìn nì ma ɖé Máhànè-Dɛ̃́ìn-pà ɓɛ́ ɔ nì ma ɖé Záwàɖà-hwɔ̀ɖɔ̀ɔ̀ kè Ɛ̀táò-hwɔ̀ɖɔ̀ɔ̀ pṹa kɛ múɛɛ, púɛɛ, Gèɖèpɔ́ɔ̀ Zùùɔ̀ dè ma ɔ kpé nyíɛ gbɔ.