Tɔ̀ɔ̀-ɓìɔ̀ 12 - Ɓǎsɔ́ɔ̀ Báɓòɔ̀

Jítà kè Ífèɖèìn-nyɔ̀ ɓěɔ̀ jè

¹ Ti ɓɛ́ Jítà ɖǎ ma Ámànà-nyɔ̀ ɓěɔ̀ toún ɖuɛɛ, Ífèɖèìn-nyɔ̀ ɓěɔ̀ poìn ma waà sójà ɓěɔ̀ dyí, ké wa péɖé ma Jɔ́nì-nìɔ̀, ké wa mu ma ɖé Záfɔ̀ùn-hwɔ̀ɖɔ̀ɔ̀ mú. Ké wa cɛ̃ɛ ma Jítà gbo, ké wa ɖá, “Ɖɛ́ kɔ̃̀ jè m̀ muà Ámànà-nyɔ̀ ɓěɔ̀ gbo vɔ̃ùn, ké m̀ seà à ɖá ɓɛ́ à kè mɔ̀ kéà muɛ́? M̀ ɖǎ ɖɛ nìà kɛ nyu jèɛɛ, à mu nì gbǒɔ̀ m̀ dúi fɔ̃ùn.”

² Hwɛ̀ ké Jítà jǔ ma wa gɔ̃̌, ké ɔ ɖá, “Ḿ kè ní nyɔ ɓěɔ̀ kè Ámànà-nyɔ̀ ɓěɔ̀ nì ma zàǔn-zàǔn nyuɛń, ké ḿ ɖá ma ɓě. Kɛɛ ɓě se ma dyi, ɓɛ́ ɓě ké ma ḿ póìn sɔ̀ìn ɖé wa xwaún.

³ Ti ɓɛ́ ḿ dyéɛ kà ɓě se ma ḿ póɛ̌n dyiɛń nìɛɛ, ḿ zà ma ní fɛ̀ɛ̀ɔ̀ jè hwòɖǒ gbo, ké ḿ péɖé ma bã̀àɔ̀, ɓɛ́ ḿ ké ma Ámànà-nyɔ̀ ɓěɔ̀ gbo vɔ̃. Ké Bounɓoɔ̀ po ma wa ḿ xwaún dyi. Ɖɛ́ kɔ̃̀ jè ɓě dyià ḿ gbo vɔ̃ùn ɓó kàǔn wɛ̃́?”

⁴ Ké Jítà poìn ma Gíɖèà-gàà ɓěɔ̀ dyí, ké wa vɔ̃ ma Ífèɖèìn nììn xwéɖé-dùɔ̀ gbo. Ké Gíɖèà-gàà ɓěɔ̀ ɖu ma Ífèɖèìn nììn xwéɖé-dùɔ̀ toún. Wa vɔ̃ ma Ífèɖèìn nììn xwéɖé-dùɔ̀ gbo, sepóɛɖé Ífèɖèìn nììn xwéɖé-dùɔ̀ cɛ̃ɛ ma Gíɖèà-gàà ɓěɔ̀ gbo, ké wa ɖá, “Ɓě mɔ̀ ɓee-ɓee-nyɔ̀. Ɓě ɖǎ xwáɖáún kpá sɔ̀ìn ɓó Ífèɖèìn nììn xwéɖé-dùɔ̀ kè Mànásì nììn xwéɖé-dùɔ̀ hwìɛ̀.”

⁵ Ké Gíɖèà-gàà ɓěɔ̀ kpɔ̃ ma Jɔ́nì-nìɔ̀ péɖéìn-naín ɓě mɔ̀à hwìè ɓě muà ɖé Ífèɖèìn-ɓòɖòɔ̀ kɔ̃ɛ. Ɔ jǔ ké Ífèɖèìn-nyɔ̀ ɓě nì ma toɔ̀ dyúa gbǔɛń nyɛɛ ɖò dyiɛ cɛ̃, ké ɔ dyi níiń, “Ɓě tòɛ̀ ɓɛ́ ḿ ké péɖéo” ní, nìí, Gíɖèà-gàà ɓěɔ̀ diè ɔ dyi, ké wa ɖá, “M̀ mɔ̀ Ífèɖèìn-nyɔ̀ɔ̀?” Ɔ dyi níiń, “Gbào” ní,

⁶ nìí, wa ɖá, “M̀ mɛ cɛ̃ɛ, ɓɛ́ m̀ ké níiń, ‘Cíbòɖɛ̀.’ ” Ti ɓɛ́ nyɔɔ̀ ɖá, “Síbòɖɛ̀” kɛɛ ní, nìí, wa kpɔ̃ ɔ, ké wa ɖáɓáìn ɓó ɔ Jɔ́nì-nìɔ̀ péɖéìn-naínɔ̀, sepóɛɖé ɔ se wuɖuɔ̀ nyɛ́nɛ́ ɖáa dyuò. Ɓó tia ɓaɖaa, wa ɖáɓá ma Ífèɖèìn-nyɔ̀ ɓěɔ̀ táázĩ̀ìn kpáɖá-nyɔ sɔ̃́ sè sɔ̃́.

⁷ Jítà mɔ̀à Gíɖèà-nyɔ̀ɔ̀ kɛɛ nàìn ma Éézùɖùɛ̀-nyɔ̀ ɓěɔ̀ ɓó zɔ̃ mɛ̀nɛ̌ìn-ɖò mú. Hwɛ̀ ké ɔ mɛ́ ma, ké wa zà ma ɔ dyóɖóún ɖé Gíɖèà-hwɔ̀ɖɔ̀ ɓěɔ̀ ɖò mú.

Ízàùn kè Éɖɔ̀ùn ɔ kè Ɛ́bɔ̀nɔ̀ jè

⁸ Tɔ̀ɔ̀-ɓìɔ̀ nyɔ kɔ ma ɓó Jítà ɖeín dyíɛɛ mɔ̀ Ízàùn ɓɛ́ ɔ mɔ̀ ma Bɛ́fèɖèhɛ̃́ɛ̀-nyɔ̀ ɖòɛ. Ɔ nàìn ma Éézùɖùɛ̀-nyɔ̀ ɓěɔ̀.

⁹ Ɔ wóɖóìn ma gàa-dyù kpáɖá-nyɔ ɓaɖa-bùè kè màa-dyù kpáɖá-nyɔ ɓaɖa-bùè. Ɔ dè ma ɔ dyú-màà ɓěɔ̀ dyia ɖé xwéɖé-dù kà kò ɖò ɓě gbo. Ké ɔ zà ma màa-dyù gmɔ̀ kpáɖá-nyɔ ɓaɖa-bùè ɖé xwéɖé-dù kà kò ɖò ɓě mú, ɓɛ́ wa ké ma ɔ dyú-gàà ɓěɔ̀ gmàà ɓě jǔ. Ízàùn nàìn ma Éézùɖùɛ̀-nyɔ̀ ɓěɔ̀ ɓó zɔ̃ mɛ̀nɛ̌ìn-sɔ̃́ mú.

¹⁰ Hwɛ̀ ké ɔ mɛ́ ma, ké wa zà ma ɔ dyóɖóún ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú.

¹¹ Sɔ̀ìn ɓóɛ gboɛɛ, Éɖɔ̀ùn ɓɛ́ ɔ mɔ̀ ma Zɛ́ɓíúɖɔ̀ùn-nyɔ̀ ɖòɛɛ nàìn ma Éézùɖùɛ̀-nyɔ̀ ɓěɔ̀ ɓó zɔ̃ ɓaɖa-bùè mú.

¹² Hwɛ̀ ké ɔ mɛ́ ma, ké wa zà ma ɔ dyóɖóún ɖé Àjáɖɔ̀ùn-hwɔ̀ɖɔ̀ nì ma ɖé Zɛ́ɓíúɖɔ̀ùn-ɓòɖòɔ̀ kɔ̃ɛɛ mú.

¹³ Tɔ̀ɔ̀-ɓìɔ̀ nyɔ kɔ ma ɓó Éɖɔ̀ùn ɖeín dyíɛɛ mɔ̀ Ɛ́bɔ̀nɔ̀ ɓɛ́ ɔ mɔ̀ ma Híɖèò mɔ̀ ma Pìwáɖáfàùn-hwɔ̀ɖɔ̀ɔ̀ nyɔ ɖòɛɛ dyú-gàà kɛ. Ɔ nàìn ma Éézùɖùɛ̀-nyɔ̀ ɓěɔ̀.

¹⁴ Ɔ wóɖóìn ma gàa-dyù kpáɖá-nyɔ sɔ̃́, ké ɔ ɓéɖé ma gàa-dyù kpáɖá-nyɔ ɓaɖa-bùè ɓɛ́ wa mɔ̀ ma ɔ nyúà-dyú ɓě kɛ. Gàa-dyù ɓěɛ̀ kpá ma jǎkasì kpáɖá-nyɔ tã ɓaɖa-bùè ɓě kɔ̃ún. Ɛ́bɔ̀nɔ̀ nàìn ma Éézùɖùɛ̀-nyɔ̀ ɓěɔ̀ ɓó zɔ̃ mɛ̀nɛ̌ìn-tã mú.

¹⁵ Hwɛ̀ ké Ɛ́bɔ̀nɔ̀ mɔ̀à Híɖèò dyú-gààɔ̀ kɛɛ mɛ́ ma, ké wa zà ma ɔ dyóɖóún ɖé Pìwáɖáfàùn-hwɔ̀ɖɔ̀ ɓɛ́ ɔ nì ma ɖé Àmáɖɛ̀-nyɔ̀ ɓěɔ̀ toɖo-ɓòɖò nìà ɖé Ífèɖèìn-ɓòɖòɔ̀ kɔ̃ɛɛ mú.