Tɔ̀ɔ̀-ɓìɔ̀ 11 - Ɓǎsɔ́ɔ̀ Báɓòɔ̀

¹ Ɓó tia ɓaɖaa, gàa-zà-nyɔ̀ ɖò nì ma ɓó, ké ɔ nyɛ́nɛ́ mɔ̀ ma Jítà. Ɔ mɔ̀ ma Gíɖèà-nyɔ̀. Ɔ mɔ̀ ma gbàɖàùn-màà ɖòɛ̀ dyú. Ɔ ɓǎà nyɛ́nɛ́ mɔ̀ Gíɖèà.

² Gíɖèà gmàà jɛ́ɛ́ ɔ ɓéɖéɛɛ wóɖóìn ma gàa-dyù ɓě ɖekè. Ké ti ɓɛ́ gàa-dyù ɓěɔ̀ ɖǎ ma ɖɛ hwɛ̀ɛ, wa kúmú ma Jítà. Wa cɛ̃ɛ ma ɔ gbo, ké wa ɖá, “M̀ se dúí-sè-ɖɛ̀ ɖò dyéɛ mu ɖé à gbǒɔ̀ xwíníín, sepóɛɖé m̀ mɔ̀ màa kà kò ɖòɛ̀ dyú.”

³ Ɔ jèɛɛ, Jítà kpá ma xwáɖáún. Ɔ sɔ̀ ma ɓó ɔ ɖíí-gàà ɓěɔ̀ hwìɛ̀, ké ɔ mu, ké ɔ cĩ́ ma ɖé Tóɓì-ɓòɖòɔ̀ kɔ̃. Púɛɛ, fùɖù-fùɖù-nyɔ̀ ɖíɛ́ ɓě poìn ma ɓó ɔ gbo dyí, ké ɔ kè wa naìn ma mú.

⁴ Ti ɓɛ́ Ámànà-nyɔ̀ ɓěɔ̀ dyà ma Éézùɖùɛ̀-nyɔ̀ ɓěɔ̀ to kɔ̃ɛɛ,

⁵ púɛɛ, Gíɖèà-ɓòɖòɔ̀ nàìn-nyɔ̀ ɓěɔ̀ mu ma Jítà ɓóɛń ɖé Tóɓì-ɓòɖòɔ̀ kɔ̃.

⁶ Wa ɖá, “Dyi, ɓɛ́ m̀ ké à sójà ɓěɔ̀ nàìn-nyɔ̀ jǔ, ɓɛ́ ɓěà ké Ámànà-nyɔ̀ ɓěɔ̀ gbo vɔ̃.”

⁷ Kɛɛ Jítà jǔ ma wa gɔ̃̌, ké ɔ ɖá, “Má, ɓě nyɛ́ ma ḿ mú, ké ɓě kúmú ma ḿ sɔ̀ìn ɓó ḿ ɓǎ ɓíɖí-taàɔ̀ múe? Kà ɓɛ́ ɓě ɖǎà kà fũ̀à-fṹá mú nì kàǔn wɛ̃ɛ, nìí, ɖɛ́ kɔ̃̀ jè ɓě dyià ḿ gboɛ́?”

⁸ Ké Gíɖèà-ɓòɖòɔ̀ nàìn-nyɔ̀ ɓěɔ̀ cɛ̃ɛ ma ɔ gbo, ké wa ɖá, “À hwòɖǒ ɖǎ m̀ gbo gmɔ̀ìn ɓó kàǔn, sepóɛɖé à mɔ́ à kè mɔ̀ ké mu, ɓɛ́ ɓěà ké Ámànà-nyɔ̀ ɓěɔ̀ gbo vɔ̃. Ɔ ɖǎ ná nìǐn, nìí, ɓɛ́ m̀ ké Gíɖèà-nyɔ̀ séín ɓěɔ̀ wuɖuí-kɔ̃̀-nyɔ̀ jǔ.”

⁹ Ké Jítà diè ma wa dyi ɖe, ké ɔ ɖá, “Ɔ jǔ ké ɓě dyi ḿ ɖe kpa, ké ḿ dyi Ámànà-nyɔ̀ ɓěɔ̀ gbo vɔ̃, ké Bounɓoɔ̀ dyi wa ḿ xwaún dyi po ní, nìí, ɓě mu wɔ̃́ùn ɓɛ́ ḿ ké ɓěɛ̀ wuɖuí-kɔ̃̀-nyɔ̀ jǔ jǎà cáe?”

¹⁰ Ké Gíɖèà-ɓòɖòɔ̀ nàìn-nyɔ̀ ɓěɔ̀ jǔ ɔ ma gɔ̃̌, ké wa ɖá, “Ǹdye, kà m̀ nyuà cɛ̃ɛ kɛɛ, kǎà ɔ mu nììn. Bounɓoɔ̀ mɔ̀ ɓěà zàse.”

¹¹ Ɔ jèɛɛ, Jítà kè Gíɖèà-ɓòɖòɔ̀ nàìn-nyɔ̀ ɓěɔ̀ mu ma. Ké nyɔ ɓěɔ̀ nyu ma ɔ wa kè sójà ɓěɔ̀ nàìn-nyɔ̀ mú. Ké Jítà kpɔ̃ ma Bounɓoɔ̀ zàse mú ɓá wuɖu wa poà ɓíín nyɛɛ jè dyí ɖé Mípà-hwɔ̀ɖɔ̀ɔ̀ mú.

¹² Sɔ̀ìn ɓóɛ gboɛɛ, Jítà ɖoɓo ma kíá ɖé Ámànà-nyɔ̀ ɓěɔ̀ kã́áɔ̀ gbo, ké ɔ diè ma ɔ dyi, ké ɔ ɖá “Ɖɛ́ à nyu m̀ bũ̌, ɓɛ́ m̀ dyià à ɓóɖóɔ̀ to kɔ̃ dyà kɛ́?”

¹³ Ké Ámànà-nyɔ̀ ɓěɔ̀ kã́áɔ̀ jǔ ma Jítà kíá ɓěɔ̀ gɔ̃̌, ké ɔ ɖá, “Ti ɓɛ́ Éézùɖùɛ̀-nyɔ̀ ɓěɔ̀ ké zɔ̃̌ɔ̀ ɖé Íjè-ɓòɖòɔ̀ kɔ̃ sɔ̀ǔn nìɛɛ, wa zà zɔ̃̌ɔ̀ ní ɓóɖóɔ̀ wáká síàìn ɖé Áánɔ̀-nìɔ̀ wĩín, ɓɛ́ ɔ zĩ̀àìn ɖé Jáɓò-nìɔ̀ wĩín, ké ɔ síàìn ɖé Jɔ́nì-nìɔ̀ wĩín dyiɛɛ ḿ xwa. Ɔ jèɛɛ, wa mɛ tòɛ̀ ɖe ɖé gìɖìǐ mú ɓó kàǔn.”

¹⁴ Ké Jítà ɖoɓo ma kíá ɖé Ámànà-nyɔ̀ ɓěɔ̀ kã́áɔ̀ gbo ɖe,

¹⁵ ké wa cɛ̃ɛ ma kã́áɔ̀ gbo, ké wa ɖá, “Jítà ɖá Éézùɖùɛ̀-nyɔ̀ ɓěɔ̀ se zɔ̃̌ɔ̀ Móà-ɓòɖòɔ̀ mɔɔ Ámànà-ɓòɖòɔ̀ ɓě xwa zà.

¹⁶ Kɛɛ ɖɛ kpá ma kɛɛ kɛà kɛ̀. Ti ɓɛ́ Éézùɖùɛ̀-nyɔ̀ ɓěɔ̀ sɔ̀ zɔ̃̌ɔ̀ ɖé Íjè-ɓòɖòɔ̀ kɔ̃ɛɛ, wa zĩ̀ìn zɔ̃̌ɔ̀ ɖé gbǎùn-fúɖúáɔ̀ kɔ̃, ké wa dyɛ̀ìn ma Dyóó Zĩ-zãɔ̀. Ké wa zi zɔ̃̌ɔ̀, ké wa nyini zɔ̃̌ɔ̀ ɖé Káɖɛ̀-hwɔ̀ɖɔ̀ɔ̀ mú.

¹⁷ Hwɛ̀ ké wa ɖoɓo zɔ̃̌ɔ̀ kíá ɖé Íɖɔ̀ùn-ɓòɖòɔ̀ kã́áɔ̀ gbo, ké wa ɖá, ‘À ɓaà m̀ ní, wɔ̃́ ɓɛ́ à ké nì ɓóɖóɔ̀ mú zĩ̀ìn.’ Kɛɛ Íɖɔ̀ùn-kã̀ǎɔ̀ nɔ́ɔ̀ zɔ̃̌ɔ̀ ní. Ké wa ɖoɓo zɔ̃̌ɔ̀ ɖé Móà-ɓòɖòɔ̀ kã́áɔ̀ gbo wuɖu ɖekè, ké ɔ mɔ̀ùn nɔ́ɔ̀ zɔ̃̌ɔ̀. Ɔ jèɛɛ, Éézùɖùɛ̀-nyɔ̀ ɓěɔ̀ sèìn zɔ̃̌ɔ̀ ɓó Káɖɛ̀-hwɔ̀ɖɔ̀ɔ̀ mú.

¹⁸ Hwɛ̀ ké wa zĩ̀ìn zɔ̃̌ɔ̀ ɖé gbǎùn-fúɖúáɔ̀ kɔ̃, ké wa ɓàɖàìn zɔ̃̌ɔ̀ Íɖɔ̀ùn-ɓòɖòɔ̀ kè Móà-ɓòɖòɔ̀. Ké wa wóɖóìn zɔ̃̌ɔ̀ ɖé Móà-ɓòɖòɔ̀ dyóɖó-xwáɖáún-wóɖóìn-naínɔ̀, ké wa nyànàìn zɔ̃̌ɔ̀ waà jàɖàìn-gbò ɓěɔ̀ dyi ɖé Áánɔ̀-nìɔ̀ ɖeín. Wa se zɔ̃̌ɔ̀ níɔ̀ péɖé, ɓɛ́ wa ké zɔ̃̌ɔ̀ Móà-ɓòɖòɔ̀ mú dyá, sepóɛɖé níɔ̀ wĩín mɔ̀ ma Móà-ɓòɖòɔ̀ sèìn-naín.

¹⁹ “Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ ɖoɓo zɔ̃̌ɔ̀ kíá ɖé Síhɔ̃̀ ɓɛ́ mɔ̀ zɔ̃̌ɔ̀ kà Ámɔ̀-nyɔ̀ ɓěɔ̀ kã́á, ɓɛ́ ɔ cĩ́ zɔ̃̌ɔ̀ kà ɖé Hɛ́ɓɔ̀ùn-hwɔ̀ɖɔ̀ɔ̀ múɛɛ gbo, ké wa diè zɔ̃̌ɔ̀ ɔ dyi, ké wa ɖá, ‘À ɓaà m̀ ní, à mɛ zĩ̀ìn nì ɓóɖóɔ̀ mú, ɓɛ́ à ké à ɓíɖí mu.’

²⁰ Kɛɛ Síhɔ̃̀ se zɔ̃̌ɔ̀ wɔ̃́ ɓɛ́ Éézùɖùɛ̀-nyɔ̀ ɓěɔ̀ ké ɔ ɓóɖóɔ̀ mú zĩ̀ìn. Ké ɔ poìn zɔ̃̌ɔ̀ ɔ sójà ɓěɔ̀ dyí, ké wa nyànàìn waà jàɖàìn-gbò ɓěɔ̀ dyi ɖé Jáhàzì-hwɔ̀ɖɔ̀ɔ̀ mú, ké wa vɔ̃ Éézùɖùɛ̀-nyɔ̀ ɓěɔ̀ gbo.

²¹ Hwɛ̀ ké Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ po zɔ̃̌ɔ̀ kà Síhɔ̃̀ kè ɔ sójà séín ɓěɔ̀ Éézùɖùɛ̀-nyɔ̀ ɓěɔ̀ xwaún dyi, ké Éézùɖùɛ̀-nyɔ̀ ɓěɔ̀ ɖu zɔ̃̌ɔ̀ kà wa toún wɛ̃̀. Hwɛ̀ ké wa ɖú zɔ̃̌ɔ̀ kà Ámɔ̀-nyɔ̀ ɓě cĩ́ zɔ̃̌ɔ̀ kà ɖé ɓóɖóɔ̀ múɛɛ pá gànáɔ̀ dyíɛ̀.

²² Wa ɖú zɔ̃̌ɔ̀ Ámɔ̀-ɓòɖò gàná ɓɛ́ ɔ sɔ̀àìn ɖé Áánɔ̀-nìɔ̀ wĩín, ké ɔ nyinià ɖé Jáɓò-nìɔ̀ wĩín nyɛ ɔ kè sɔ̀ìn ɖé gbǎùn-fúɖúáɔ̀ kɔ̃, ké ɔ nyinià ɖé Jɔ́nì-nìɔ̀ wĩín nyɛɛ dyí.

²³ “Ɔ jèɛɛ, kà ɓɛ́ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖǎà Ámɔ̀-nyɔ̀ ɓěɔ̀ kúmú sɔ̀ìn ɓó ɔ nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ dyúa kɛɛ, nìí, kpéɔ̀ nyɛ́ m̀ ɓéɖé ɓɛ́ m̀ kéà ɓóɖóɔ̀ dyí ɖú ɖe kɛ́?

²⁴ Nì gèɖèpɔ́ɔ̀ mɔ̀à Kɛ́mɔ̀ kɛɛ dyi m̀ ɖɛ ɖò nyí ní, nìí, m̀ seɛ wuɖuí kɔ̃̀ɔ̌ mue? Kà ɔ nìà náa, ɔ nyɔ ɓɛ́ Bounɓo mɔ̀à à nììn Gèɖèpɔ́ɔ̀ kɛɛ ɖǎà à nyíɛɛ, à muɛ wuɖuí kɔ̃̀ùn.

²⁵ Nì hwòɖǒ ɖá m̀ kpa ɖɛ ké m̀ zi Béɖà ɓɛ́ ɔ mɔ̀ ma kà Zípɔ̀ɛ̀ dyú-gàà, ɓɛ́ ɔ mɔ̀ ma kà Móà-ɓòɖòɔ̀ kã́áɔ̀ kɛɛ dyíì? Ɔ po ma Éézùɖùɛ̀-nyɔ̀ ɓěɔ̀ sóɖóò? Mɔɔ ké ɔ vɔ̃ wa gboò?

²⁶ Éézùɖùɛ̀-nyɔ̀ ɓěɔ̀ ɖǎ Hɛ́ɓɔ̀ùn-hwɔ̀ɖɔ̀ɔ̀ kè Àwóɖóè-hwɔ̀ɖɔ̀ɔ̀ kè hwɔɖɔ-kpàǎ ɓě ɓá wa dyíɛ ɔ kè hwɔɖɔ séín ɓě nìà ɖé Áánɔ̀-nìɔ̀ wĩín nyɛɛ wuɖuí kɔ̃̀ ɓó zɔ̃ hɔ̃dɛ̀ɖɛ̀ tã xwíníín. Ɖɛ́ kɔ̃̀ jè m̀ se ma wa dyí ɖú ɖe ɓó tia ɓaɖaá?

²⁷ Ḿ se m̀ jeín mɔ́, kɛɛ mɔ̀ mɔ̀ nyɔ mɔ́ ḿ jeín dyììn ɖé ḿ to kɔ̃ dyà-dyà mú. Bounɓo mɔ̀à zaa-wɔ̃-po-nyɔ̀ɔ̀ kɛɛ mɛ po zaa nìà ɓó Éézùɖùɛ̀-nyɔ̀ ɓěɔ̀ kè Ámànà-nyɔ̀ ɓěɔ̀ pṹa kɛɛ wɔ̃ ɓó kàǔn.”

²⁸ Kɛɛ Ámànà-kã̀ǎɔ̀ se ma wuɖu ɓɛ́ Jítà tò ma kà kɛɛ ɖùǔ gbo tò.

²⁹ Hwɛ̀ ké Bounɓoɔ̀ Zùùɔ̀ dyi ma Jítà kɔ̃. Ké ɔ sɔ̀ ma dyí, ké ɔ nama ma Gíɖèà-ɓòɖòɔ̀ kè Mànásì-ɓòɖòɔ̀ mú. Ké ɔ dyi ma ɖé Mípà-hwɔ̀ɖɔ̀ɔ̀ mú ɖe ɖé Gíɖèà-ɓòɖòɔ̀ kɔ̃. Ké sɔ̀ìn ɓóɛ gboɛɛ, ɔ dyɛ̀ìn ma Ámànà-nyɔ̀ ɓěɔ̀.

³⁰ Hwɛ̀ ké Jítà ɖi ma wuɖu ɓó Bounɓoɔ̀ dyúa, ké ɔ ɖá, “Ɔ jǔ ké m̀ dyi Ámànà-nyɔ̀ ɓěɔ̀ ḿ xwaún dyi po ní,

³¹ nìí, ti ní mu toɔ̀ gbo sɔ̀ǔn nììn nyɛɛ, ɖɛ mu ɖé ní gbǒɔ̀ mú sɔ̀ùn, ké ɔ mu ḿ hwìǐ dyiìn nyɛɛ mu nììn jǔùn. Ní muɛ fɔ̃ɔ-sàǎ-zàìn-ɖɛ̀ mú nyuùn.”

³² Sɔ̀ìn ɓóɛ gboɛɛ, Jítà mu ma, ɓɛ́ ɔ ké ma Ámànà-nyɔ̀ ɓěɔ̀ gbo vɔ̃. Ké Bounɓoɔ̀ po ma wa ɔ xwaún dyi.

³³ Ké ɔ ɖáɓá ma nyɔ ɓě nì ma waà hwɔɖɔ ɓěɔ̀ kpáɖá-nyɔ ɖò múɛɛ ɓáún-ɓáún sɔ̀ìn ɖé Àwóɖóè-hwɔ̀ɖɔ̀ɔ̀ mú, nyinià ɖé Mínìfì-hwɔ̀ɖɔ̀ɔ̀ gbɛ̌ɛ̀ɔ̀ múɛ. Ɔ mu tee ké ɔ nyini ma ɖé Éɓò-Kɛ̀wáɖámì-hwɔ̀ɖɔ̀ɔ̀ mú. Kǎà Éézùɖùɛ̀-nyɔ̀ ɓěɔ̀ nyu ma Ámànà-nyɔ̀ ɓěɔ̀ toún ɖuɛ.

Jítàà dyú-mààɔ̀ jè

³⁴ Ti ɓɛ́ Jítà dyi ma ɔ ɓíɖí-taún ɖé Mípà-hwɔ̀ɖɔ̀ɔ̀ múɛɛ, púɛɛ, ɔ dyú-màà dyi ma ɔ hwìǐ kpɔ̃ùn. Ɔ dyà ma bòùnbá ɓaɖaa, ké ɔ dyà ma wɛ́ɖɛ́ kpáa. Ɔ mɔ̀ ma ɔ ɓǎà dyú-kpò dyúáɖò kpeé-kpeé. Jítà se ma dyú-gàà mɔɔ dyú-màà kà kò ɖò ɓéɖé ɖe ɓó ɔ wáún.

³⁵ Ti ɓɛ́ Jítà dyé ma ɔ dyúɔ̀ kɛɛ, ɔ fáìn ma ɔ mìɔùn ɖɔún dyi, ké ɔ páná ma mú, ké ɔ ɖá, “Éé, ní dyú! M̀ ɖǎ ḿ fũ̀à-fṹá nyùìn, ké m̀ ɖǎ ḿ wìì vɛ̀nɛ̀ kɔ̃ dyà ɓó zɛ̃̌ɛ̀, sepóɛɖé ḿ ɖǎ wuɖu ɖi ɖé Bounɓoɔ̀ gbo, ké ḿ seɛ kɔ̃ péɖéɛ ɓɛ́ìn.”

³⁶ Ké ɔ dyú-mààɔ̀ zà ma ɖé wuɖu, ké ɔ ɖá, “Ḿ ɓǎ, kà m̀ ɖǎà Bounɓoɔ̀ wuɖu nìà kɛ gbo cɛ̃ɛ, m̀ mɛ nyuɛ. Kà ɓɛ́ Bounɓoɔ̀ ɖǎà nì mú-nyɛ́-nyɔ̀ ɓě mɔ̀à Ámànà-nyɔ̀ ɓěɔ̀ kɛɛ kpa kɔ̃in zàìn nyɛɛ, m̀ mɛ nyu ḿ ɖɛ kɔ̃̀ wuɖu m̀ ɖià kɛɛ bũ̌.

³⁷ Kɛɛ ní ɓaà m̀ ní, nyu ḿ bìì ɖɛ dyúáɖò nìà kɛ. Ɖɛɔ̀ mɔ̀, nyí ḿ dɛ̀nɛ̀ sɔ̃́, ɓɛ́ ḿ kè ní ɓǎto ɓěɔ̀ ké ɖé toɖo ɓěɔ̀ dya mu, ɓɛ́ à ké vĩ̌ ɓó ní se toɖo kɔ̃ jè dyuòɛ̌n muɔ̀ jè.”

³⁸ Ké ɔ ɓǎ ɖá, “Mu.” Ɔ ɓǎ táà ma ɔ dyi ɓó dɛ̀nɛ̀ sɔ̃́ xwíníín. Ké ɔ kè ɔ ɓǎto ɓěɔ̀ mu ma ɖé toɖo ɓěɔ̀ gbo, ké wa vĩ̌ ma ɓó ɔ se toɖo kɔ̃ jè dyuòɛ̌n muɔ̀ jè.

³⁹ Ti ɓɛ́ dɛ̀nɛ̀ sɔ̃́ ɖǎ ma ziɛɛ, púɛɛ, ɔ dyi ma ɖé ɔ ɓǎ gbo ɖe. Ké ɔ ɓǎ nyu ma ɖɛ kɔ̃̀ wuɖu ɔ ɖi ma kà kɛɛ ɔ bũ̌. Màa-dyùɔ̀ se ma toɖo kɔ̃ jè dyuò. Sɔ̀ìn ɓóɛɛ, ɖɛ nìà kɛ mɔ̀ǎ ma Éézùɖùɛ̀-nyɔ̀ ɓěɔ̀ kpeɖe.

⁴⁰ Kpeɖeɔ̀ mɔ̀, ɓó zɔ̃ séín xwíníín ní, Éézùɖùɛ̀-màà-dyù gmɔ̀ ɓěɔ̀ ɖú wé hĩinyɛ dyí, ké wa mu, ké wa vĩ̌ ɓó Jítà mɔ̀à Gíɖèà-nyɔ̀ɔ̀ kɛɛ dyú-mààɔ̀ jè.