Tɔ̀ɔ̀-ɓìɔ̀ 10 - Ɓǎsɔ́ɔ̀ Báɓòɔ̀

Tóɖà jè

¹ Ti ɓɛ́ Àbímɛ̀nɛ̀ ɖǎ ma mɛ́ɛ, púɛɛ, gàa ɖò sɔ̀ ɖé Ɛ́sàkà nììn xwéɖé-dùɔ̀ múɛɛ kɔ ma ɓó ɔ ɖeín dyí, ɓɛ́ ɔ ké ma Éézùɖùɛ̀-nyɔ̀ ɓěɔ̀ póìn. Ɔ nyɛ́nɛ́ mɔ̀ ma Tóɖà. Ɔ mɔ̀ ma gàa ɖò kɔ̃̀ nyɛ́nɛ́ mɔ̀ Dóɖò kɛɛ nyúà-dyú. Ɔ ɓǎà nyɛ́nɛ́ mɔ̀ Púà. Ɔ cĩ́ ma ɖé Sámì-hwɔ̀ɖɔ̀ɔ̀ mú, ɖé Ífèɖèìn Toɖo-ɓòɖòɔ̀ kɔ̃.

² Ɔ nàìn ma Éézùɖùɛ̀-nyɔ̀ ɓěɔ̀ ɓó zɔ̃ kpáɖá-nyɔ sè tã xwíníín, hwɛ̀ ké ɔ mɛ́ ma, ké wa zà ma ɔ dyóɖóún ɖé Sámì-hwɔ̀ɖɔ̀ɔ̀ mú.

Jáwìɖì jè

³ Tɔ̀ɔ̀-ɓìɔ̀ nyɔ kɔ ma ɓó Tóɖà ɖeín dyíɛɛ mɔ̀ gàa ɖò ɓɛ́ ɔ sɔ̀ ma ɖé Gíɖèà-ɓòɖòɔ̀ kɔ̃, kɔ̃̀ nyɛ́nɛ́ mɔ̀ Jáwìɖì kɛ. Ɔ nàìn ma Éézùɖùɛ̀-nyɔ̀ ɓěɔ̀ ɓó zɔ̃ kpáɖá-nyɔ sè sɔ̃́ xwíníín.

⁴ Ɔ wóɖóìn ma gàa-dyù kpáɖá-nyɔ ɓaɖa-bùè, ké wa kpá ma jǎkasì kpáɖá-nyɔ ɓaɖa-bùè kɔ̃ún. Gàa-dyù ɓě nìà kɛ kɔ̃̀ ma hwɔɖɔ kpáɖá-nyɔ ɓaɖa-bùè wuɖuí ɖé Gíɖèà-ɓòɖòɔ̀ kɔ̃, ké wa ɖáìn hwɔɖɔ ɓě nìà kɛ Jáwìɖì ɓíɖí-hwɔ̀ɖɔ̀ ɓě ke ɓó zɛ̃̌ɛ̀.

⁵ Ti Jáwìɖì mɛ́ ma kɛɛ, wa zà ma ɔ dyóɖóún ɖé Kámɔ̀ùn-hwɔ̀ɖɔ̀ɔ̀ mú.

Jítà jè

⁶ Sɔ̀ìn ɓóɛ gboɛɛ, Éézùɖùɛ̀-nyɔ̀ ɓěɔ̀ ɖú ma Bounɓoɔ̀ nàmàǔn bũ̌ nyu kpàǐ ɖe. Wa ɖú ma kũùn-kpò-gèɖèpɔ́ɔ̀ ɓě mɔ̀à Béò kè Àtáwòɖò kɛ kè Síwíɖíà-nyɔ̀ ɓěɔ̀ nììn gèɖèpɔ́ɔ̀ ɓěɔ̀ kè Zíɖɔ̀ùn-nyɔ̀ ɓěɔ̀ nììn gèɖèpɔ́ɔ̀ ɓěɔ̀ kè Móà-nyɔ̀ ɓěɔ̀ nììn gèɖèpɔ́ɔ̀ ɓěɔ̀ kè Ámànà-nyɔ̀ ɓěɔ̀ nììn gèɖèpɔ́ɔ̀ ɓěɔ̀ ɔ kè Féɖésìà-nyɔ̀ ɓěɔ̀ nììn gèɖèpɔ́ɔ̀ ɓěɔ̀ ɓiè kpàǐ. Wa táà ma Bounɓoɔ̀ dyi, ké wa se ma ɔ ɓièɛ̌n nì ɖe jèɛɛ,

⁷ Bounɓoɔ̀ kpáìn ma wa dyoɖoún mìɔ. Ké ɔ po ma wa Féɖésìà-nyɔ̀ ɓěɔ̀ kè Ámànà-nyɔ̀ ɓěɔ̀ xwaún dyi.

⁸ Ké wa pĩ́à ma Éézùɖùɛ̀-nyɔ̀ ɓěɔ̀ dyi, ké wa dyéìn ma wa gǎ ɓó zɔ̃a mú. Wa gã̀ ma ná Éézùɖùɛ̀-nyɔ̀ ɓěɔ̀ gǎ dyéɛ̌n dyi tee ɓó zɔ̃ ɓaɖa-bùè sè mɛ̀nɛ̌ìn-tã xwíníín. Kǎà wa nyu ma Éézùɖùɛ̀-nyɔ̀ séín ɓě nì ma kà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ ɖé Gíɖèà-ɓòɖò mɔ̀ Ámɔ̀-nyɔ̀ ɓěɔ̀ ɓóɖó kɛɛ kɔ̃ɛ.

⁹ Ké Ámànà-nyɔ̀ ɓěɔ̀ péɖé ma Jɔ́nì-nìɔ̀, ɓɛ́ wa ké ma Júɖà nììn xwéɖé-dùɔ̀ kè Bɛ̃́címà nììn xwéɖé-dùɔ̀ ɔ kè Ífèɖèìn nììn xwéɖé-dùɔ̀ gbo vɔ̃ ɖekè. Ɖɛ nìà kɛ nyuɛ ké Éézùɖùɛ̀-nyɔ̀ ɓěɔ̀ nì ma fũ̀à-fṹá mú mìɔ cá.

¹⁰ Hwɛ̀ ké Éézùɖùɛ̀-nyɔ̀ ɓěɔ̀ pòìn ma Bounɓoɔ̀ kpéi, ké wa ɖá, “À ɖǎ m̀ nàmàǔn bũ̌ nyu, sepóɛɖé à ɖǎ mɔ̀ mɔ̀à à Gèɖèpɔ́ɔ̀ kɛɛ dyi táà, ké à nìǎ Béò ɓièɛ̌n.”

¹¹ Ké Bounɓoɔ̀ jǔ ma wa gɔ̃̌, ké ɔ ɖá, “Ti ɓɛ́ Íjè-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Ámànà-nyɔ̀ ɓěɔ̀ kè Féɖésìà-nyɔ̀ ɓěɔ̀

¹² kè Zíɖɔ̀ùn-nyɔ̀ ɓěɔ̀ kè Àmáɖɛ̀-nyɔ̀ ɓěɔ̀ ɔ kè Máɔ̀ùn-nyɔ̀ ɓěɔ̀ pĩ́à zɔ̃̌ɔ̀ kà ɓě dyi, ké ɓě pòìn zɔ̃̌ɔ̀ kà ḿ kpéi ɓó gbo kpá jèɛɛ, má, ḿ póìn zɔ̃̌ɔ̀ ɓě sɔ̀ìn ɖé wa xwaún we?

¹³ Kɛɛ dyéɛ, ɓě ɖǎ ḿ dyi táà, ké ɓě ɖǎ gèɖèpɔ́ɔ̀ kà kò ɖò ɓě ɓiè. Ɔ jèɛɛ, ḿ se ɓě mɔ̀ùn póɛ̌n mu ɖe.

¹⁴ Ɓě muá, ɓɛ́ ɓě ké gèɖèpɔ́ɔ̀ ɓě ɓɛ́ ɓě ɖǎà gã kɛɛ kpéi pòìn. Wa mɔ̀ nyɔ mɛ póìn ɓě sɔ̀ìn ɖé ɓěɛ̀ fũ̀à-fṹá ɓěɔ̀ mú.”

¹⁵ Kɛɛ Éézùɖùɛ̀-nyɔ̀ ɓěɔ̀ cɛ̃ɛ ma Bounɓoɔ̀ gbo, ké wa ɖá, “À ɖǎ nàmàǔn nyu. Nyu ɖɛ sɛ́ɖɛ́ìn dyí ɖé m̀ dyéɖéín nyɛɛ à bũ̌. Kɛɛ à ɓaà m̀ ní, póìn à ɓó kàǔn.”

¹⁶ Hwɛ̀ ké wa táà ma gèɖèpɔ́ɔ̀ kà kò ɖò ɓě nì ma wa xwa kɛɛ dyi, ké wa ɓiè ma Bounɓoɔ̀. Púɛɛ, Bounɓoɔ̀ se ma waà wìì-ɖɛ̀ ɓěɔ̀ hwìɖǐi kùɛ̀n ɓɛ́ìn ɖe.

¹⁷ Sɔ̀ìn ɓóɛ gboɛɛ, Ámànà-nyɔ̀ ɓěɔ̀ sójà ɓěɔ̀ poìn ma dyí, ké wa nyànàìn ma waà jàɖàìn-gbò ɓěɔ̀ dyi ɖé Gíɖèà-ɓòɖòɔ̀ kɔ̃. Ké Éézùɖùɛ̀-nyɔ̀ ɓěɔ̀ poìn wa nììn sójà ɓěɔ̀ dyí, ké wa nyànàìn ma waà jàɖàìn-gbò ɓěɔ̀ dyi ɖé Mípà-hwɔ̀ɖɔ̀ɔ̀ mú, ɖé Gíɖèà-ɓòɖòɔ̀ kɔ̃.

¹⁸ Hwɛ̀ ké Gíɖèà-ɓòɖòɔ̀ nàìn-nyɔ̀ ɓěɔ̀ cɛ̃ìn cɛ̃̀ìn ma gbo, ké wa ɖá, “Nyɔ mu Ámànà-nyɔ̀ ɓěɔ̀ to kɔ̃ kpaùn wɛ̃ɛ mu Gíɖèà-nyɔ̀ séín ɓěɔ̀ nàìn-nyɔ̀ jǔùn.”