Jasúé 9 - Ɓǎsɔ́ɔ̀ Báɓòɔ̀

Gíɓìɔ̀ùn-nyɔ̀ ɓěɔ̀ cá Jasúé

¹ Ɓó tia ɓaɖaa, kã́á séín ɓě ɓɛ́ wa nì ma ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ wɔ̃́ɔ ma kà Éézùɖùɛ̀-nyɔ̀ ɓěɔ̀ ɖu ma Jɛ́ɖèkóò-hwɔ̀ɖɔ̀ɔ̀ kè Éà-hwɔ̀ɖɔ̀ɔ̀ toún wɛ̃. Kã́á ɓěɔ̀ ɖíɛ́ ɓě cĩ́ ma ɖé Kénà Toɖo-ɓòɖòɔ̀ kɔ̃, ké ɖíɛ́ ɓě cĩ́ ma ɖé bɔɔ-kpà hwɔ ma ɖé toɖo-ɓòɖòɔ̀ dyóɖó-dyi-kpáìn-naínɔ̀ dyíɛɛ kɔ̃, ké ɖíɛ́ ɓě cĩ́ ma ɖé Mɛ́ɖɛ̀tɔ̀wéɖénìà-dyòǒɔ̀ wĩin, ké ɖíɛ́ ɓě cĩ́ ma xwía ɖé Ɖɛ́ɓèɖɔ́ùn-ɓòɖòɔ̀ kɔ̃. Ɓóɖó ɓě kɔ̃̀ kã́á ɓě ɓɛ́ wa wɔ̃́ ma kà bɔ̃̌ɔ̀ kɛɛ mɔ̀ ma Hítì kè Ámɔ̀ kè Kénà kè Pɛ́wìɖì kè Hívì ɔ kè Jɛ́ɓù.

² Wa séín poìn ma dyí, ɓɛ́ wa ké ma Jasúé kè Éézùɖùɛ̀-nyɔ̀ ɓěɔ̀ to kɔ̃ dyà.

³ Kɛɛ ti ɓɛ́ Hívì-nyɔ̀ ɓě ɓɛ́ wa sɔ̀ ma ɖé Gíɓìɔ̀ùn-hwɔ̀ɖɔ̀ɔ̀ múɛɛ wɔ̃́ ma ɖɛ ɓě ɓɛ́ Jasúé nyu ma kà Jɛ́ɖèkóò-hwɔ̀ɖɔ̀ɔ̀ kè Éà-hwɔ̀ɖɔ̀ɔ̀ bũ̌ɛɛ,

⁴ wa sɔ́ɔ ma dyí, ɓɛ́ wa ké ma Jasúé kè Éézùɖùɛ̀-nyɔ̀ ɓěɔ̀ cá. Ɔ jèɛɛ, Gíɓìɔ̀ùn-nyɔ̀ ɓěɔ̀ ɖíɛ́ ɓě ɖú ma ɓɔ̀ɔ̌ zɔ̃̌ ɓě kè wã́ìn-tɛ̀ɓɛ̀ɛ̌ sùà ɓě ɖǎ fá, ké wa ɖǎ bũ̌in gma kɛɛ dyí, ké wa po ma wa jǎkasì ɓě kɔ̃ún.

⁵ Ké wa po ma ɖɔ sùà ɓě mú, ké wa po ma bǎ gbà ɓě ɓɛ́ wa gma bũ̌in nyɛɛ ɓoún, ké wa ɖú ma bɛɖɛɛ̀ sùà taɓa ga-bùè ɓě dyí.

⁶ Hwɛ̀ ké wa sɔ̀ ma dyí, ké wa mu ma ɖé Jasúé kè Éézùɖùɛ̀-nyɔ̀ ɓěɔ̀ jàɖàìn-hwɔ̀ɖɔ̀ɔ̀ mú ɖé Gíógàò-hwɔ̀ɖɔ̀ɔ̀ wĩín. Ké wa cɛ̃ɛ ma Jasúé kè Éézùɖùɛ̀-gàà ɓěɔ̀ gbo, ké wa ɖá, “À sɔ̀ ɓóɖó-dù vɛ̃in ɖò kɔ̃, ké à dyi, ɓɛ́ à kè ɓě ké wuɖu táí po, ɓɛ́ ɓěà ké ɓǎto jǔ.”

⁷ Kɛɛ Éézùɖùɛ̀-gàà ɓěɔ̀ jǔ ma wa gɔ̃̌, ké wa ɖá, “Ɓě se dyɛ̀ dà vɛ̃in ɖò sɔ̀o. Ɔ dyi ná nìǐn, nìí, xwɛ̌ à kè ɓě ɓɛ́ìn wuɖu táí poɛ kɛ́?”

⁸ Ké Gíɓìɔ̀ùn-nyɔ̀ ɓěɔ̀ cɛ̃ɛ ma Jasúé gbo, ké wa ɖá, “À mɔ̀ nì gbo-nì-nyɔ̀ ɓě.” Hwɛ̀ ké Jasúé diè ma wa dyi, ké ɔ ɖá, “Ɓě mɔ̀ nyɛ́ɛ̌, ké dɛ̌ ɓě sɔ̀ kɛ́?”

⁹ Ké wa jǔ ma ɔ gɔ̃̌, ké wa ɖá, “Ɓɔ̌ɔ̀, à sɔ̀ ɓóɖó-dù vɛ̃in ɖò kɔ̃. À dyi, sepóɛɖé à wɔ̃́ Bounɓo mɔ̀à ɓěɛ̀ Gèɖèpɔ́ɔ̀ kɛɛ bɔ̃̌. À wɔ̃́ ɖɛ jĩ̀ kà ɓɛ́ ɔ nyu ma kà ɖé Íjè-ɓòɖòɔ̀ kɔ̃ɛɛ jè,

¹⁰ ké à wɔ̃́ ɖɛ jĩ̀ kà ɓɛ́ ɔ nyu ma kà Ámɔ̀-nyɔ̀ ɓěɔ̀ kã́á sɔ̃́ ɓě ɓɛ́ wa nì ma kà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛ bũ̌ɛɛ jè ɖekè. Wa mɔ̀ kã́á ɓě mɔ̀à Síhɔ̃̀ ɓɛ́ ɔ mɔ̀ ma kà Hɛ́ɓɔ̀ùn-hwɔ̀ɖɔ̀ɔ̀ kã́áɔ̀ kɛ kè Ógì ɓɛ́ ɔ mɔ̀ ma kà Básàùn-ɓòɖòɔ̀ kã́áɔ̀, ɓɛ́ ɔ cĩ́ ma kà ɖé Àtáwòɖò-hwɔ̀ɖɔ̀ɔ̀ múɛ.

¹¹ Ɔ jèɛɛ, à nyɔ vɛ̀nɛ̀ ɓěɔ̀ kè nyɔ séín cĩ́ ɖé à ɓóɖóɔ̀ kɔ̃ɛɛ cɛ̃ɛ ma à gbo, ké wa ɖá, ‘Ɓě ɖú hwìè-kɔ̃-ɖìì-ɖɛ̀ dyí, ɓɛ́ ɓě ké hwìè xwíníín kpá, ɓɛ́ ɓě ké Éézùɖùɛ̀-nyɔ̀ ɓěɔ̀ hwìǐ mu, ɓɛ́ ɓě ké níiń, “À mɔ̀ ɓěɛ̀ gbo-nì-nyɔ̀ ɓě. À kè ɓě mɛ po wuɖu ɓíín.” ’

¹² Gmɔ̀ nɔ̄, bɛɖɛɛ̀ ɓě nìà kɛ sɔ̀ ma dyéɖé ɖie ti ɓɛ́ à sɔ̀ ma ɖé à ɓíɖí, ɓɛ́ à ké ma ɓě hwìǐ dyiɛ, kɛɛ dyéɛ, wa ɖǎ dyɛ, ké wa ɖǎ ga-bùè taɓaa hwɔ nyɛ̀nɛ̀ɛ̀.

¹³ Ké wã́ìn-tɛ̀ɓɛ̀ɛ̌ ɓě nìà kɛ mɔ̀ ma tɛ̀ɓɛ̀ɛ̌ ɖìè ɓě ti ɓɛ́ à po ma wa wã́ìn múɛ, kɛɛ dyéɛ, wa ɖǎ fá. Ké gmɔ̀ nɔ̄, à mú-po-ɖɔ̀ ɓěɛ̀ kè à bǎ ɓěɛ̀ hwɛ̀ fáa ɓó hwìè-kpàɔ̀ mú tɔ̀mɔ̀ jè.”

¹⁴ Púɛɛ, Éézùɖùɛ̀-gàà ɓěɔ̀ ɖi ma Gíɓìɔ̀ùn-nyɔ̀ ɓěɔ̀ ɖii-ɖɛ̀ɔ̀ ɖò, ɓɛ́ ɔ kéɛ Gíɓìɔ̀ùn-nyɔ̀ ɓěɔ̀ dyí tɛ̀mɛ̀ìn kà wa ɖǎ wɔ̃́ ɓɛ́ wa kè Gíɓìɔ̀ùn-nyɔ̀ ɓěɔ̀ ké wuɖu táí poɛ. Kɛɛ Éézùɖùɛ̀-gàà ɓěɔ̀ se ma Bounɓoɔ̀ dyi diè ɓá ɖɛ wa ké nyuɛɛ jè dyí.

¹⁵ Ti ɓɛ́ wa ɖǎ ma ɖɛ ɖiɛ hwɔɛɛ, Gíɓìɔ̀ùn-nyɔ̀ ɓěɔ̀ kè Jasúé po ma wuɖu ɓíín kà ɓɛ́ wa mu ma ɓǎto ɓě jǔùn kánáá pūɛ ɔ kè kà Éézùɖùɛ̀-nyɔ̀ ɓěɔ̀ se ma wa ɖáɓáa muɛ. Ké Éézùɖùɛ̀-nyɔ̀ vɛ̀nɛ̀ ɓěɔ̀ ɖi ma wuɖu kà wa mu waà wuɖuɔ̀ kɔ̃in kpɔ̃ùn wɛ̃.

¹⁶ Ti ɓɛ́ Gíɓìɔ̀ùn-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ ɖǎ ma wuɖu ɓíín poɛ hwɔɛɛ, wé tã zi ma, hwɛ̀ ké Éézùɖùɛ̀-nyɔ̀ ɓěɔ̀ ɖúáa ma wɔ̃́ kpàǐ kà Gíɓìɔ̀ùn-nyɔ̀ ɓěɔ̀ se ma dà vɛ̃in ɖò sɔ̀ɛ.

¹⁷ Ɔ jèɛɛ, Éézùɖùɛ̀-nyɔ̀ ɓěɔ̀ kpá ma hwìè xwíníín, ké wa nàìn ma wé sɔ̃́, ké ɓó wéɔ̀ tã nììnɔ̀ ɓaɖaa, wa dyɛ̀ìn ma Gíɓìɔ̀ùn-nyɔ̀ ɓěɔ̀ ɓíɖí-hwɔ̀ɖɔ̀ ɓěɔ̀. Waà hwɔɖɔ ɓěɔ̀ mɔ̀ Gíɓìɔ̀ùn kè Kɛ̀fíwàɖà kè Bééwòɖò ɔ kè Kíjà-Jáwìɖììn.

¹⁸ Kɛɛ Éézùɖùɛ̀-nyɔ̀ ɓěɔ̀ se ma wa gbo vɔ̃, sepóɛɖé Éézùɖùɛ̀-nyɔ̀ vɛ̀nɛ̀ ɓěɔ̀ ɖǎ ma wuɖu ɖi ɓó Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ dyúa kà wa se ma Gíɓìɔ̀ùn-nyɔ̀ ɓěɔ̀ ɖáɓáa muɛ. Ké Éézùɖùɛ̀-nyɔ̀ séín ɓěɔ̀ ɖú ma waà nyɔ vɛ̀nɛ̀ ɓěɔ̀ kàìn kpàǐ ɓó wuɖu ɓɛ́ wa kè Gíɓìɔ̀ùn-nyɔ̀ ɓěɔ̀ po ma kà ɓíín nyɛɛ jè.

¹⁹ Ké nyɔ vɛ̀nɛ̀ ɓěɔ̀ cɛ̃ɛ ma, ké wa ɖá, “À ɖǎ wuɖu ɖi ɓó Bounɓo mɔ̀à ɓěà Gèɖèpɔ́ɔ̀ kɛɛ dyúa kà ɓɛ́ ɓěà se Gíɓìɔ̀ùn-nyɔ̀ ɓěɔ̀ ɖáɓáa muɛ. Ɔ jèɛɛ, ɓěà se wa sɔ̃ dya poɛ ɓɛ́ìn.

²⁰ À mu wa dyi táàùn ɓɛ́ wa ké cĩ́. À se wuɖu ɓɛ́ à ɖǎà ɖiɛɛ kɔ̃ péɖéɛ mu, ɓɛ́ Gèɖèpɔ́ɔ̀ ní kɔ̃̀ ɖà ɓěà gǎ kɔ̃ tò.

²¹ Wa mu cĩ́ìn, kɛɛ wa mu ɓěà nyɛ-mɔ́-nyɔ̀ kè ní-hwùɖǔ-nyɔ̀ ɓě jǔùn.” Ɔ jèɛɛ, ti ɓɛ́ nyɔ vɛ̀nɛ̀ ɓěɔ̀ ɖǎ ma wùɖùɛ̀ hwɔɛɛ,

²² Jasúé poìn ma Gíɓìɔ̀ùn-nyɔ̀ ɓěɔ̀ dyí, ké ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě cáà à nììn nyɛ́? Ɓě cɛ̃ɛ ma à gbo kà ɓě sɔ̀ ma ɓóɖó-dù vɛ̃in ɖò kɔ̃ kɛ. Má, ɓě cĩ́ dà à wĩíne?

²³ Ɓó ɖɛ ɓɛ́ ɓě ɖǎà nyuɛ jèɛɛ, sɔ̀ìn ɓó zɛ̃̌ɛ̀ gboɛɛ, hwòɛ̌-wùɖù nì ɓě kɔ̃. Ɓě muá nyɛ-mɔ́-nyɔ̀ kè ní-hwùɖǔ-nyɔ̀ ɓě jǔùn ɓó ní Gèɖèpɔ́ɔ̀ gbǒɔ̀ bìì kánáá pū.”

²⁴ Hwɛ̀ ké Gíɓìɔ̀ùn-nyɔ̀ ɓěɔ̀ jǔ ma ɔ gɔ̃̌, ké wa ɖá, “Ɓɔ̌ɔ̀, à nyuɛ náa, sepóɛɖé à wɔ̃́ɔ kà ɓɛ́ Bounɓo mɔ̀à nì Gèɖèpɔ́ɔ̀ kɛɛ cɛ̃ɛ ma ɔ gbo-nì-nyɔ̀ Mózè gbo kà ɔ mu ɓě ɓóɖó gàná nìà kɛ nyíìn, ké ɓě mu nyɔ séín cĩ́ nɔ̄ ɓóɖóɛ̀ kɔ̃ɛɛ ɖáɓáùn wɛ̃. Ɔ jèɛɛ, ti ɓɛ́ à wɔ̃́ ma ɓě jèɛɛ, à fɛ̃̀ìn ma ní mìɔ. À se mɔ́ à fɛ̀ɛ̀ɔ̀ ké à xwa sɔ̀.

²⁵ Ɓó kàǔn wɛ̃ɛ, à nì ɖé m̀ xwaún. M̀ mɛ nyu ɖɛ nì hwòɖǒ mɔ́ ɓɛ́ m̀ ké à bũ̌ nyuɛ.”

²⁶ Ɔ jèɛɛ, Jasúé póìn ma Gíɓìɔ̀ùn-nyɔ̀ ɓěɔ̀ sɔ̀ìn ɖé Éézùɖùɛ̀-nyɔ̀ ɓěɔ̀ xwaún, ké Éézùɖùɛ̀-nyɔ̀ ɓěɔ̀ se ma wa ɖáɓá.

²⁷ Kɛɛ sɔ̀ìn ɓó tia gboɛɛ, Jasúé nyu ma Gíɓìɔ̀ùn-nyɔ̀ ɓěɔ̀ nyɛ-mɔ́-nyɔ̀ kè ní-hwùɖǔ-nyɔ̀ ɓě mú ɓó Éézùɖùɛ̀-nyɔ̀ ɓěɔ̀ kè Bounɓoɔ̀ sáa-kɔ̃-zàìn-gbàà ɓɛ́ wa mu poùn ɖé pá ɓɛ́ Bounɓoɔ̀ mu gãùn wɛ̃ múɛɛ bìì, ké ɖɛ nìà kɛ mɔ̀ waà kũ̀à ke ɓó zɛ̃̌ɛ̀.