Jasúé 8 - Ɓǎsɔ́ɔ̀ Báɓòɔ̀

Éà-hwɔ̀ɖɔ̀ɔ̀ mú-gbɔɔ̀-gbɔɔ̀

¹ Ké Bounɓoɔ̀ cɛ̃ɛ ma Jasúé gbo, ké ɔ ɖá, “Ɖú nì to-vɔ̃-nyɔ̀ séín ɓěɔ̀ dyí, ɓɛ́ ɓě ké mu, ɓɛ́ ɓě ké Éà-hwɔ̀ɖɔ̀ɔ̀ gbo vɔ̃. Ɓɔ́ ɖɛ ɖǎ ma kà kpá kĩ́ín nyɛɛ jè hwìɖǐi poɛ̀n, ɓɛ́ m̀ ké fã̀à peɖe, sepóɛɖé ní mu m̀ Éà-hwɔ̀ɖɔ̀ɔ̀ kè ɔ kã́áɔ̀ kè ɔ nyɔ ɓěɔ̀ ɔ kè ɓóɖó gàná nìà Éà-hwɔ̀ɖɔ̀ɔ̀ ɖeiɛɛ xwaún dyi poùn.

² Ké ɓě mɛ wáɖá Éà-hwɔ̀ɖɔ̀ɔ̀, ɓɛ́ ɓě ké ɔ kã́áɔ̀ ɖáɓá kà dyúáɖò kà ɓě wáɖá ma kà Jɛ́ɖèkóò-hwɔ̀ɖɔ̀ɔ̀, ɓɛ́ ɓě dyi ma kà ɔ kã́áɔ̀ ɖáɓá kɛ. Kɛɛ ɓě mɛ ɖú ɖɛ ɓě nì ɖé hwɔɖɔɔ̀ múɛ kè nyúà-ɖɛ̀ ɓěɔ̀ dyí, ɓɛ́ wa ké ɓěɛ̀ kɔ̃̀ɔ̀-ɖɛ̀ jǔ. Hwɛ̀ ɓɛ́ ɓě ké hwɔɖɔɔ̀ gbo vɔ̃ɛɛ, ɓěɛ̀ ɖíɛ́ ɓě mɛ kò vǐè-xwàɖàǔn ɖé hwɔɖɔɔ̀ ɖeín, ɓɛ́ wa ké hwɔɖɔɔ̀ nyɔ ɓěɔ̀ kɔ̃ún gèìn.”

³ Ɔ jèɛɛ, hwɛ̀ ɓɛ́ Jasúé kè ɔ to-vɔ̃-nyɔ̀ séín ɓěɔ̀ ké ma Éà-hwɔ̀ɖɔ̀ɔ̀ gbo vɔ̃ɔ́ muɛɛ, ɔ ɖoɓo ma gàa-zà-nyɔ̀ táázĩ̀ìn kpáɖá-nyɔ ɓaɖa-bùè dyúa ɓó máaún-kà.

⁴ Ɔ cɛ̃ɛ ma wa gbo, ké ɔ ɖá, “Ɓě tò ḿ gbo ɖùǔ. Ɓě mɛ kò pìǐn ɖé hwɔɖɔɔ̀ ɖeín. Ɓěǐn ɖá ɓɛ́ ɓě ké hwɔɖɔɔ̀ bũ̌in tɔmɔìn, ké ɓě mɛ nì ɓɛ́ɖɛ́ kɔ̃.

⁵ Ḿ kè ní sójà tɔ̀ɔ̀ ɓěɔ̀ mu hwɔɖɔɔ̀ wɔ̃ muùn. Ɔ jǔ ké Éà-gàà ɓěɔ̀ dyi à wɔ̃ dyi, ɓɛ́ wa ké à gbo vɔ̃ín, nìí, à mu wa dyúa gbǔùn kà à nyuɛ ma kà kĩ́ín nyɛ.

⁶ Wa dyiɛ dyéín, wa muɛ cɛ̃ìn, ɓɛ́ wa ké níiń, ‘Wa nìǎ à dyúa gbǔɛń ɖe kà wa nyuɛ ma kà kĩ́ín nyɛ.’ Ɔ dyi ná nìǐn, wa mu hwɔɖɔɔ̀ mú sɔ̀ùn, ɓɛ́ wa ké à kíɖíí kpá. Ɔ jǔ ké à dyi wa dyúa gbǔɛń nìǐn,

⁷ nìí, ɓě mɛ sɔ̀ vǐè-xwàɖàɔ̀ mú, ɓɛ́ ɓě ké hwɔɖɔɔ̀ dyí ɖú. Bounɓo mɔ̀à ɓěà Gèɖèpɔ́ɔ̀ kɛɛ mu ɓě hwɔɖɔɔ̀ xwaún dyi poùn.

⁸ Ɔ jǔ ké ɓě ɖǎ hwɔɖɔɔ̀ kpɔ̃ín, nìí, ɓě mɛ poɛ dyéɖé kà Bounɓoɔ̀ nyuà cɛ̃ɛ kɛ. Ɓě mɛ nyu ɖɛ ḿ cɛ̃à ɓě gboɛ.”

⁹ Ti ɓɛ́ Jasúé ɖǎ ma sójà táázĩ̀ìn kpáɖá-nyɔ ɓaɖa-bùè ɓěɔ̀ cuòɛ̀ hwɔɛɛ, ɔ ɖoɓo ma wa ní. Wa mu, ké wa vǐè ma ɓó Bɛ́fèò-hwɔ̀ɖɔ̀ɔ̀ kè Éà-hwɔ̀ɖɔ̀ɔ̀ pṹa, hwɔ ɖé Éà-hwɔ̀ɖɔ̀ɔ̀ dyóɖó-dyi-kpáìn-naínɔ̀ dyí. Kɛɛ Jasúé pɛ̃́ ma ɖé ɔ nyɔ ɓěɔ̀ jàɖàìn-hwɔ̀ɖɔ̀ɔ̀ mú.

¹⁰ Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Jasúé poìn ma sójà tɔ̀ɔ̀ ɓěɔ̀ kè waà nàìn-nyɔ̀ ɓěɔ̀ dyí. Ké ɔ kè sójà-nàìn-nyɔ̀ ɓěɔ̀ zi ma dyúa, ké wa mu ma Éà-hwɔ̀ɖɔ̀ɔ̀ wɔ̃.

¹¹ Ké wa nyini ma ɓó Éà-hwɔ̀ɖɔ̀ɔ̀ wĩín, ké wa nyànàìn ma waà jàɖàìn-gbò ɓěɔ̀ dyi, hwɔ ɖé hwɔɖɔɔ̀ xwía dyí. Bɔɔ-kpà ɖò nì ma ɓó wa kè hwɔɖɔɔ̀ pṹa.

¹² Ké Jasúé ɖú ma ɔ sójà ɓěɔ̀ nyɔ ɓɛ́ìn ma táázĩ̀ìn hm̀m̌ wɛ̃ɛ dyí, ké ɔ ɖoɓo ma wa vǐè-xwàɖàǔn ɖé Bɛ́fèò-hwɔ̀ɖɔ̀ɔ̀ kè Éà-hwɔ̀ɖɔ̀ɔ̀ pṹa, hwɔ ɖé Éà-hwɔ̀ɖɔ̀ɔ̀ dyóɖó-dyi-kpáìn-naínɔ̀ dyí.

¹³ Ké Jasúé kè sójà-nàìn-nyɔ̀ ɓěɔ̀ nyuɛ ké sójà ɓě nì ma kà ɖé hwɔɖɔɔ̀ xwía kɛ kè nyɔ ɓě nì ma kà vǐè-xwàɖàǔn wɛ̃ɛ dyé ma ti. Ɓó máaún-hwùɖùɔ̀ múɛɛ, Jasúé pɛ̃́ ma ɖé bɔɔ-kpàɔ̀ kɔ̃.

¹⁴ Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Éà-hwɔ̀ɖɔ̀ɔ̀ kã́áɔ̀ dyé ma Éézùɖùɛ̀-sòjà ɓěɔ̀ ní. Ké ɔ kè ɔ sójà ɓěɔ̀ sɔ̀ ma dyí wàɖà, ké wa mu ma Éézùɖùɛ̀-sòjà ɓěɔ̀ wɔ̃ ɖé pá ɖò hwɔ ma ɖé Jɔ́nì Bɔɔ-kpàɔ̀ gbo dyíɛɛ kɔ̃, ɓɛ́ wa ké ma toɔ̀ mú kpáìn. Kɛɛ ɔ seɛ ma dyuò kà Éézùɖùɛ̀-sòjà ɖíɛ́ ɓě nì ma vǐè-xwàɖàǔn ɖé hwɔɖɔɔ̀ ɖeín nyɛ.

¹⁵ Ti ɓɛ́ Éà-gàà ɓěɔ̀ dyi ma, ɓɛ́ wa ké ma Jasúé kè Éézùɖùɛ̀-sòjà ɓěɔ̀ gbo vɔ̃ɛɛ, Éézùɖùɛ̀-sòjà séín ɓěɔ̀ nyuɛ ké ɔ nì pū kà wa nìɔ̌ kà wa dyúa gbǔɛń nyɛ. Ké wa gbǔ ma, ké wa mùìn ma ɖé Jɔ́nì Bɔɔ-kpàɔ̀ kɔ̃.

¹⁶ Ɓó tia ɓaɖaa, Éà-kã̀ǎɔ̀ ɖá ma gàa séín nì ɖé hwɔɖɔɔ̀ múɛ, ɓɛ́ wa ké ma Jasúé kè ɔ sójà ɓěɔ̀ kíɖíí kpá. Ké Jasúé kè ɔ sójà ɓěɔ̀ nyuɛ ké Éà-gàà ɓěɔ̀ tɔmɔìn ma waà hwɔɖɔɔ̀ bũ̌in.

¹⁷ Gàa dyúáɖò kpeé-kpeé se ma ɖé Éà-hwɔ̀ɖɔ̀ɔ̀ mɔɔ Bɛ́fèò-hwɔ̀ɖɔ̀ ɓɛ́ ɔ dyi ma Éà-nyɔ̀ ɓěɔ̀ gbo kpáùn wɛ̃ɛ mú sè. Wa séín wáɖá ma Éézùɖùɛ̀-sòjà ɓěɔ̀ kíɖíí, ké wa se ma waà hwɔɖɔ ɓěɔ̀ gmɔ-wɔ̃̀ ɓěɔ̀ kã fóɖóún.

¹⁸ Ti ɓɛ́ Éà-gàà ɓěɔ̀ ɖǎ ma waà hwɔɖɔɔ̀ bũ̌in tɔmɔìn nyɛɛ, Bounɓoɔ̀ cɛ̃ɛ ma Jasúé gbo, ké ɔ ɖá, “Tòìn ɖí nìà m̀ xwaún wɛ̃ɛ ɖé Éà-hwɔ̀ɖɔ̀ɔ̀ gbo, sepóɛɖé ḿ ɖǎ m̀ hwɔɖɔɔ̀ xwaún dyi po.” Ɔ jèɛɛ, Jasúé tòìn ma ɔ ɖíɔ̀ ɖé Éà-hwɔ̀ɖɔ̀ɔ̀ gbo.

¹⁹ Ti ɓɛ́ sójà ɓě nì ma kà vǐè-xwàɖàǔn wɛ̃ɛ dyé ma ɖíɔ̀ kɛɛ, wa sɔ̀ ma waà vǐè-naínɔ̀ wàɖà, ké wa kpɔ̃ ma hwɔɖɔɔ̀, ké wa poɛ ma dyéɖé.

^20-21 Ɓó tia ɓaɖaa, Éà-gàà ɓěɔ̀ gmɔ̀ ma ɖe. Púɛɛ, wa dyé ma nyànà-sò dyií muɛ sɔ̀ìn ɖé waà hwɔɖɔɔ̀ mú. Ké ti ɓɛ́ Jasúé kè Éézùɖùɛ̀-sòjà séín ɓěɔ̀ mɔ̀ùn dyé ma nyànà-sòɔ̀ kɛɛ, wa cɛ́ɛ̀ ma xwa, ké wa dyi ma Éà-gàà ɓěɔ̀ wɔ̃, ɓɛ́ wa ké ma Éà-gàà ɓěɔ̀ gbo vɔ̃. Éà-gàà ɓěɔ̀ se ma gbǔìn-naín ɖò ɓéɖé, sepóɛɖé Éézùɖùɛ̀-sòjà ɓě nì ma kà wa dyúa gbǔɛń nyɛɛ cɛ́ɛ̀ ma xwa, ké wa nì ma wa wɔ̃ dyiɛń,

²² ké Éézùɖùɛ̀-sòjà ɓě ɓɛ́ wa po ma kà Éà-hwɔ̀ɖɔ̀ɔ̀ dyéɖéɛɛ nì ma ɖé wa ɖeín sɔ̀ǐn, ké wa nì ma wa gbo dyiɛń ɖekè. Éézùɖùɛ̀-sòjà ɓěɔ̀ nì ma wa ɖeín kè wa dyúa, ké wa sè ma ɓó hwòɖǒǔn. Ké Éézùɖùɛ̀-sòjà ɓěɔ̀ ɖáɓá ma wa séín nyɛ̀nɛ̀ɛ̀. Waà nyɔ dyúáɖò kpeé-kpeé se ma ɓíɖíi sè, ké nyɔ dyúáɖò kpeé-kpeé se ma xwáɖáún kpá dyɛ mɔ̀ùn.

²³ Kɛɛ wa se ma Éà-kã̀ǎɔ̀ ɖáɓá. Wa kpɔ̃ ma ɔ, ké wa dyà ma ɔ Jasúé gbo.

²⁴ Ti ɓɛ́ Éézùɖùɛ̀-sòjà ɓěɔ̀ ɖǎ ma Éà-gàà ɓě ɓɛ́ wa kpá ma kà wa kíɖííɛɛ gàsíà dyí ɖáɓáa hwɔ ɖé Jɔ́nì Bɔɔ-kpàɔ̀ kɔ̃ɛɛ, Éézùɖùɛ̀-sòjà séín ɓěɔ̀ kɔ́ìn ma ɖé Éà-hwɔ̀ɖɔ̀ɔ̀ mú ɖe, ké wa ɖáɓá ma nyɔ séín ɓě nì ma ɖé hwɔɖɔɔ̀ múɛɛ nyɛ̀nɛ̀ɛ̀.

^25-26 Jasúé se ma ɖí ɓɛ́ ɔ tòìn ma kà ɖé Éà-hwɔ̀ɖɔ̀ɔ̀ gboɛɛ ɖe jiɖi, ké ɔ sójà ɓěɔ̀ hwɔ ma Éà-nyɔ̀ séín ɓěɔ̀ ɖáɓáa hwɛ̀. Éà-nyɔ̀ séín ɓɛ́ Éézùɖùɛ̀-sòjà ɓěɔ̀ ɖáɓá ma ɓó wéa ɓaɖaa mɔ̀ ma gàa kè màa táázĩ̀ìn ɓaɖa-bùè sè sɔ̃́.

²⁷ Kɛɛ Éézùɖùɛ̀-sòjà ɓěɔ̀ se ma nyúà-ɖɛ̀ ɓě kè ɖɛ ɓě nì ma ɖé hwɔɖɔɔ̀ múɛɛ mú gbɔɔ̀. Wa ɖú ma wa dyí, ɓɛ́ wa ké ma waà kɔ̃̀ɔ̀-ɖɛ̀ ɓě jǔ kà Bounɓoɔ̀ nyuɛ ma kà Jasúé gbo cɛ̃ɛ kɛ.

²⁸ Ké Jasúé kè ɔ sójà ɓěɔ̀ fɔ̃ ma Éà-hwɔ̀ɖɔ̀ gànáɔ̀ nyɛ̀nɛ̀ɛ̀, ké wa nyuɛ ma hwùɖùǎ mú. Kǎà ɔ nì ke ɓó zɛ̃̌ɛ̀.

²⁹ Ti ɓɛ́ Jasúé ɖǎ ma Éà-hwɔ̀ɖɔ̀ɔ̀ fɔ̃ɔ hwɔɛɛ, ɔ ɖáɓá ma hwɔɖɔɔ̀ kã́áɔ̀, ké ɔ ɓá ma ɔ xwɛ́ɔ̀ dyií ɓó cu ɖò dya. Ɔ xwɛ́ɔ̀ gã̀ ma ɓó dyi tee, ké dyóɖó zi ma. Ti ɓɛ́ dyóɖó ɖǎ ma ziɛɛ, Jasúé nyuɛ ké wa zà ma ɔ xwɛ́ɔ̀ dyií, ké wa poɛ ma ɓó hwɔɖɔɔ̀ gmɔ-wɔ̃̀ɔ̀ gbo, ké wa gbǒɛ̀n ma sɔ́ɔ́-kòò vɛ̀nɛ̀ ɖò kɔ̃. Sɔ́ɔ́-kòòɔ̀ nì ɖé ke ɓó zɛ̃̌ɛ̀.

Jasúé zà gma-cèè-ɖɛ̀ɔ̀ wuɖuún ɖé Éɓàò-tòɖòɔ̀ dya

³⁰ Sɔ̀ìn ɓóɛ gboɛɛ, Jasúé po ma sáa-kɔ̃-zàìn-gbàà ɖò ɓó Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ bìì, ɖé Éɓàò-tòɖòɔ̀ dya.

³¹ Ɔ poɛ ma kà Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ nyuɛ ma kà Éézùɖùɛ̀-nyɔ̀ ɓěɔ̀ gbo cɛ̃ɛ, ké ɔ céèɛ̀ ma kà ɖé gma-cèè-ɖɛ̀ɔ̀ múɛ. Ɔ ɖú ma sɔ́ɔ́-kpò ɓě ɓɛ́ nyɔ ɖò séè bũ̌in wa ɖòɛɛ dyí, ké ɔ po ma gbààɔ̀. Ké Éézùɖùɛ̀-nyɔ̀ ɓěɔ̀ dyà ma fɔ̃ɔ-sàǎ-zàìn-ɖɛ̀ ɓě kè gbo-kpɔ̃ìn-sàǎ-zàìn-ɖɛ̀ ɓě ɓó Bounɓoɔ̀ bìì, ké wa zàìn ma wa sáa ɓó gbààɔ̀ kɔ̃.

³² Ti ɓɛ́ wa ɖǎ ma sáa zàà hwɔɛɛ, Jasúé céè ma Mózèɛ̀ gma ɓěɔ̀ sɔ́ɔ́-kpò ɓě kɔ̃ ɓó Éézùɖùɛ̀-nyɔ̀ ɓěɔ̀ dyéɖé waí.

³³ Ké Éézùɖùɛ̀-nyɔ̀ séín ɓěɔ̀ kè waà nyɔ vɛ̀nɛ̀ ɓěɔ̀ kè waà nàìn-nyɔ̀ ɓěɔ̀ kè waà tɔ̀ɔ̀-ɓìɔ̀ ɓěɔ̀ ɔ kè ɖíà ɓě nì ma wa hwìɛ̀ kɛɛ ge ma mú dú sɔ̃́, ké wa nyanaìn ma Bounɓoɔ̀ gma-gbɔ̀ɖɔ̀ɔ̀ wáká sɔ̃́ɔ̀ kɔ̃ dyi. Wa gmɔ̀ìn ma ɖé Ɖíìváà-nyɔ̀ ɓě ɓɛ́ wa mɔ̀ ma sáa-zà-nyɔ̀ ɓě, ké wa ɓéɖé ma Bounɓoɔ̀ gbɔ̀ɖɔ̀ɔ̀ kɛɛ gbo. Nyɔ ɓěɔ̀ fáún-fáún pòìn ma Gèwíɖízĩ̀ìn-tòɖòɔ̀ kɔ̃ín, ké fáún-fáún tɔ̀ɔ̀ pòìn ma Éɓàò-tòɖòɔ̀ kɔ̃ín. Mózè ɖá wa mɛ nyuɛ náa, hwɛ̀ ɓɛ́ sáa-zà-nyɔ̀ ɓěɔ̀ ké ma wa mana kɔ̃ po.

³⁴ Sɔ̀ìn ɓóɛ gboɛɛ, Jasúé zà ma gma séín ɓɛ́ Mózè céè ma kà ɖé gma-cèè-ɖɛ̀ɔ̀ múɛɛ wuɖuún ɖé wuɖu zoo mú. Ɔ zà ma nyɔ-mana-kɔ̃-po-wùɖù ɓěɔ̀ kè gboò-wùɖù ɓěɔ̀ wuɖuún ɖekè.

³⁵ Ɔ se ma gma ɓě ɓɛ́ Mózè céè ma kà kɛɛ ɖò ɓíɖíi sè. Ɔ zà ma wa séín wuɖuún nyɛ̀nɛ̀ɛ̀ ɓó Éézùɖùɛ̀-gàà séín ɓěɔ̀ kè waà màa ɓěɔ̀ kè waà dyú ɓěɔ̀ ɔ kè ɖíà ɓě cĩ́ ma ɖé wa hwìɛ̀ kɛɛ dyúa.