Jasúé 7 - Ɓǎsɔ́ɔ̀ Báɓòɔ̀

Ékɛ̃̀ɛ̀ nàmàǔnɔ̀

¹ Ti ɓɛ́ Éézùɖùɛ̀-nyɔ̀ ɓěɔ̀ nì ma kà Jɛ́ɖèkóò-hwɔ̀ɖɔ̀ɔ̀ wáɖáuń wɛ̃ɛ, gàa ɖò kɔ̃̀ nyɛ́nɛ́ mɔ̀ Ékɛ̃̀ kɛɛ ɖú ma ɖɛ ɓě ɓɛ́ Bounɓoɔ̀ cɛ̃ ma kà Éézùɖùɛ̀-nyɔ̀ ɓěɔ̀ gbo, ɓɛ́ wa ké ma kà mú gbɔɔ̀ kɛɛ ɖò dyí. Ékɛ̃̀ se ma Bounɓoɔ̀ wuɖuɔ̀ nyu jèɛɛ, Bounɓoɔ̀ kpáìn ma Éézùɖùɛ̀-nyɔ̀ ɓěɔ̀ dyoɖoún mìɔ. Ékɛ̃̀ ɓǎ ɓěɛ̀ gbǒ-xwíníínɔ̀ kɛà kɛ̀. Zɛ́wàɖà ɓɛ́ ɔ sɔ̀ ma ɖé Júɖàà xwéɖé-dùɔ̀ múɛɛ wóɖóìn ma Záɖì, ké Záɖì wóɖóìn ma Kámì, ké Kámì wóɖóìn ma Ékɛ̃̀.

² Sɔ̀ìn ɓóɛ gboɛɛ, wé ɖòɛ̀ ɓaɖaa, Jasúé ɖoɓo ma gàa ɖíɛ́ ɓě sɔ̀ìn ɖé Jɛ́ɖèkóò Bɔɔ-kpàɔ̀ kɔ̃, ɓɛ́ wa ké ma ɖé Éà-hwɔ̀ɖɔ̀ ɓɛ́ ɔ xwɛ̃́ìn ma Bɛ̀-Ávɛ̃̀-hwɔ̀ɖɔ̀ɔ̀ bũ̌in nyɛɛ mú mu. Éà-hwɔ̀ɖɔ̀ɔ̀ hwɔ ma ɖé Bɛ́fèò-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀ dyí. Jasúé cɛ̃ɛ ma gàa ɓěɔ̀ gbo, ké ɔ ɖá, “Ɓě mu, ɓɛ́ ɓě ké Éà-hwɔ̀ɖɔ̀ɔ̀ dyéɖé gboi kpaìn.” Ɔ jèɛɛ, gàa ɓěɔ̀ mu ma, ké wa kpaìn ma hwɔɖɔɔ̀ dyéɖé gboi.

³ Ti ɓɛ́ gàa ɓěɔ̀ dyi ma ɖeɛɛ, wa cɛ̃ɛ ma Jasúé gbo, ké wa ɖá, “Éà se hwɔɖɔ vɛ̀nɛ̀ ɖò. Ɔ jèɛɛ, m̀ mɛ ɓɔ́ sójà séín ɓěɔ̀ ɖoɓoɛ ɓó Éà-hwɔ̀ɖɔ̀ɔ̀ gbo vɔ̃ jè. M̀ mɛ ɖoɓo gàa táázĩ̀ìn sɔ̃́ mɔɔ táázĩ̀ìn tã nyɛ̀nɛ̀ɛ̀ pū. M̀ dyi sójà séín ɓěɔ̀ ɖoɓoín, nìí, wa mu muùn pídyi.”

⁴ Ɔ jèɛɛ, Jasúé ɖoɓo ma gàa táázĩ̀ìn tã, ɓɛ́ wa ké ma Éà-hwɔ̀ɖɔ̀ɔ̀ gbo vɔ̃. Kɛɛ Éà-gàà ɓěɔ̀ vɔ̃ ma Éézùɖùɛ̀-gàà ɓěɔ̀ gbo, ké Éézùɖùɛ̀-gàà ɓěɔ̀ gbǔ ma wa dyúa.

⁵ Ké Éà-gàà ɓěɔ̀ kpá ma Éézùɖùɛ̀-gàà ɓěɔ̀ kíɖíí tee sɔ̀ìn ɓó hwɔɖɔɔ̀ gmɔ-wɔ̃̀ɔ̀ gbo, ké wa dèɖě ma toɖo ɖò, ké wa nyini ma ɖé dà ɖò mɔ̀ sɔ́ɔ́-wàìn-naín nyɛ. Ti Éà-gàà ɓěɔ̀ nì ma Éézùɖùɛ̀-gàà ɓěɔ̀ kíɖíí kpáuń ɖé toɖoɔ̀ ɓíɖíiɛɛ, wa ɖáɓá ma Éézùɖùɛ̀-gàà ɓěɔ̀ kpáɖá-nyɔ ɓaɖa-bùè sè mɛ̀nɛ̌ìn-ɖò. Púɛɛ, Éézùɖùɛ̀-gàà ɓěɔ̀ kpá ma fã̀àǔn, ké hwòɖǒ ɖò se ma wa xwíníín nì ɖe.

⁶ Ti ɓɛ́ bɔ̃̌ɔ̀ dyɛ̀ìn ma Jasúé kɛɛ, ɔ kè Éézùɖùɛ̀-nyɔ̀ vɛ̀nɛ̀ ɓěɔ̀ fáìn ma wa mìɔùn ɖɔún dyi, ké wa po ma ɓóɖó dúi, ɓɛ́ ɔ kéɛ nyɔǔn dyí tɛ̀mɛ̀ìn kà wa zi ma wìǐn kpáuń mìɔ kɛ. Ké wa ɓùɖùìn ma ɓó Bounɓoɔ̀ gbɔ̀ɖɔ̀ɔ̀ dyúa. Wa gã̀ ma ɓó ɓíɖíiɔ̀ dyi tee, ké dyóɖó zi ma.

⁷ Ti ɓɛ́ wa pɛ̃́à ɓó ɓíɖíiɔ̀ dyiɛɛ, Jasúé ɓaà ma, ké ɔ ɖá, “Akē, Bounɓo Ɖɛɓíɔ́, ɖɛ́ kɔ̃̀ jè m̀ dyàà à nɔ̄ Jɔ́nì-nìɔ̀ ɖeín, ɓɛ́ m̀ kéà à Ámɔ̀-nyɔ̀ ɓěɛ̀ xwaún dyi po, ɓɛ́ wa kéà à mú gbɔɔ̀ kɛ́? Ɔ muɔ́ má dyíin nɔ̀mɔ̀ùn ɓɛ́ à kéɔ́ má ɖé Jɔ́nì-nìɔ̀ ɖeín sè.

⁸ Ɖɛɓíɔ́, à sójà ɓěɔ̀ ɖǎ à mú-nyɛ́-nyɔ̀ ɓěɔ̀ dyúa gbǔ, ké ḿ se dyuò ɖɛ ḿ ké cɛ̃ɛ.

⁹ Ɔ jǔ ké nyɔ séín ɓě nìà Kénà-ɓòɖòɛ̀ kɔ̃ɛɛ dyi ɖɛ ɖǎà kpáa jè wɔ̃́ ní, nìí, wa mu à nììn ɖei bĩìn, ɓɛ́ wa ké à ɓóɖó-kpàà kɔ̃ dyi sámá. Ɔ dyi ná nìǐn, nìí, ɖɛ́ nì mu nyuùn ɓɛ́ ɔ kéɛ nyu ɓɛ́ nyɔǔn ké m̀ kpéín dyé keɛ́?”

¹⁰ Hwɛ̀ ké Bounɓoɔ̀ cɛ̃ɛ ma Jasúé gbo, ké ɔ ɖá, “Sɔ̀ dyí! Ɖɛ́ kɔ̃̀ jè m̀ jìɖǐà ɓó ɓíɖíi dyiɛ́?

¹¹ Éézùɖùɛ̀-dyù ɓěɔ̀ ɖǎ nàmàǔn nyu. Ḿ cɛ̃ɛ ma wa gbo ɓɛ́ wa ké ma ɖɛ séín nì ɖé Jɛ́ɖèkóò-hwɔ̀ɖɔ̀ɔ̀ múɛɛ mú gbɔɔ̀, kɛɛ wa se ní wuɖuɔ̀ nyu. Wa ɖǎ ɖɛ ɓěɔ̀ ɖò dyí ɖú. Wa dyíɖíɛ, ké wa ɖǎa waà kɔ̃̀ɔ̀-ɖɛ̀ ɓě hwìɛ̀ po, hwɛ̀ ké wa tɔ́mɔ́ se.

¹² Ɖɛ kɔ̃̀ jè ɓě gbǔà ɓěɛ̀ mú-nyɛ́-nyɔ̀ ɓěɔ̀ dyúa kɛɛ nìàǒ wɛ̀. Sepóɛɖé ḿ ɖǎa gbɔ po, ɓɛ́ ḿ ké ɓě mú gbɔɔ̀. Ḿ se ɓě gbo kpáa ɓɛ́ìn ɖe, ɔ sèìn ké ɓě gbɔɔ̀ dyɛ ɖɛ ɓě ɓɛ́ ḿ cɛ̃ ma kà ɓě gbo, ɓɛ́ ɓě ké ma kà mú gbɔɔ̀, ké ɓě seà mú gbɔɔ̀, ké wa nìà ɖé ɓě hwìɛ̀ kɛɛ mú hwɛ̀.

¹³ Mu, ɓɛ́ m̀ kéɛ nyɔ ɓěɔ̀ gbo cɛ̃, ɓɛ́ m̀ ké níiń, ‘Ɓě mɛ po ɓě mìɔùn wáká, ɓɛ́ ɓě ké mú hwɛ̀, ɓɛ́ ɓě ké ti dyé, ɓɛ́ ɓě ké ɓó Bounɓoɔ̀ dyúa dyi ɓó gàɖàà. Ɓě mɛ nyuɛ náa, sepóɛɖé Bounɓo mɔ̀à ɓěà Gèɖèpɔ́ɔ̀ kɛɛ ɖá ɓě ɓéɖé ɖɛ ɓě ɓɛ́ ɔ cɛ̃ ma kà ɓě gbo ɓɛ́ ɓě ké ma kà mú gbɔɔ̀ kɛɛ ɖíɛ́ ɓě ɖé ɓě hwìɛ̀, ké ɓě ɓéɖé ɓɛ́ ɓě ké ɖɛ ɓěɛ̀ mú gbɔɔ̀, hwɛ̀ ɓɛ́ ɓě ké ɓěɛ̀ mú-nyɛ́-nyɔ̀ ɓěɔ̀ dyúa dyi nyànàà ɓɛ́ìn.’

¹⁴ Ɔ jèɛɛ, m̀ mɛ cɛ̃ɛ wa gbo, ɓɛ́ m̀ ké níiń, ‘Ɓó gàɖàà gànà-kṹún ní, nìí, ɓěɛ̀ xwéɖé-dù ɖò-ɖò mɛ dyi ɓó Bounɓoɔ̀ dyúa. Ké xwéɖé-dùɔ̀ nyɔ Bounɓoɔ̀ mu kpɔ̃ùn wɛ̃ɛ, ɔ gbǒ-xwíníín ɖò-ɖò mɛ dyi ɓó ɔ dyúa. Ké gbǒ-xwíníínɔ̀ nyɔ ɓɛ́ ɔ mu kpɔ̃ùn wɛ̃ɛ, ɔ gàa ɖò-ɖò mɛ dyi ɓó ɔ dyúa.

¹⁵ Ké gàaɔ̀ nyɔ ɓɛ́ ɔ mu kpɔ̃ùn wɛ̃ɛ, ɔ mɔ̀ nyɔ ɖǎà ɖɛ ɓě ɓɛ́ Bounɓoɔ̀ cɛ̃ ma kà ɓě gbo ɓɛ́ ɓě ké ma kà mú gbɔɔ̀ kɛɛ ɖíɛ́ ɓě dyí ɖúɛ̀. Ɓě ɓéɖé ɓɛ́ ɓě ké gàaɔ̀ kè ɔ dyú ɓě ɔ kè ɔ nyúà-ɖɛ̀ ɓě ɖáɓá, ɓɛ́ ɓě ké waà xwɛ́ ɓěɔ̀ kè waà kɔ̃̀ɔ̀-ɖɛ̀ séín ɓěɔ̀ fɔ̃, sepóɛɖé ɔ ɖǎ Bounɓoɔ̀ dèè-wùɖùɔ̀ mú jaɖa, hwɛ̀ ké ɔ ɖǎà ɓě dɛ̃ kɔ̃ dyà kɛ̀.’ ”

¹⁶ Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Jasúé nyuɛ ké Éézùɖùɛ̀-nyɔ̀ ɓěɔ̀ xwéɖé-dù ɖò-ɖò dyi ma ɓó Bounɓoɔ̀ dyúa, ké Bounɓoɔ̀ kpɔ̃ ma Júɖàà xwéɖé-dùɔ̀.

¹⁷ Ké Júɖàà xwéɖé-dùɔ̀ gbǒ-xwíníín ɖò-ɖò ɓěɔ̀ dyi ma dyúa, ké Bounɓoɔ̀ kpɔ̃ ma Zɛ́wàɖàà gbǒ-xwíníínɔ̀. Ké Zɛ́wàɖàà dyú-gàà ɓěɔ̀ nììn gbǒ-xwíníín ɖò-ɖò ɓěɔ̀ dyi ma dyúa, ké Bounɓoɔ̀ kpɔ̃ ma Záɖì nììn gbǒ-xwíníínɔ̀.

¹⁸ Hwɛ̀ ké Záɖìɛ̀ gbǒ-xwíníín-gàà ɖò-ɖò ɓěɔ̀ dyi ma dyúa, ké Bounɓoɔ̀ kpɔ̃ ma Ékɛ̃̀ mɔ̀à Kámìɛ̀ dyú-gààɔ̀ kɛ.

¹⁹ Ké Jasúé cɛ̃ɛ ma Ékɛ̃̀ gbo, ké ɔ ɖá, “Ní dyú, cɛ̃ jǎà ɓó Bounɓo mɔ̀à à Gèɖèpɔ́ɔ̀ kɛɛ dyúa. Mɔ̀ǔn ɖá ɓɛ́ m̀ ké ḿ ɖɛ ɖò dyí vǐè. Zaìn ḿ ɖɛ m̀ nyuà kɛɛ gbo kɔ̃in.”

²⁰ Ké Ékɛ̃̀ jǔ ma ɔ gɔ̃̌, ké ɔ ɖá, “Ɔ mɔ̀ jǎà, ḿ ɖǎ Bounɓo mɔ̀à à Gèɖèpɔ́ɔ̀ kɛɛ nàmàǔn bũ̌ nyu. Ɖɛ ḿ nyuɛɛ kɛà kɛ̀.

²¹ Ɖé ɖɛ ɓě nì ma kà ɖé Jɛ́ɖèkóò-hwɔ̀ɖɔ̀ɔ̀ múɛɛ hwìɛ̀ kɛɛ, ḿ dyé ma ɖé gã́ùn nɔ̀mɔ̀ dyíin ɖò ɓɛ́ wa zà ma ɖé Báɓèɖɔ́ùn-ɓòɖòɔ̀ kɔ̃ɛ kè séɓàɖà-cɛ̀kò hɔ̃dɛ̀ɖɛ̀ sɔ̃́ kɔ̃̀ xwa-ku-ku mɔ̀ ma pṹá-dyèɖè hm̀m̌ wɛ̃ ɔ kè góò-kpò ɖò kɔ̃̀ xwa-ku-ku zi ma pṹá-dyèɖè dyúáɖò kɔ̃ɛ. Ḿ mɔ́ ma wa xwéé jèɛɛ, ḿ ɖú ma wa dyí. Ké ḿ po ma wa ɓóɖóún ɖé ní jàɖàìn-gbòɔ̀ mú, ké séɓàɖàɔ̀ nì ɖé gbɔ. Ɖéɛ̀ wa nì ɓó kàǔn.”

²² Hwɛ̀ ké Jasúé ɖoɓo ma gàa ɖíɛ́ ɓě ɖé Ékɛ̃̀ɛ̀ jàɖàìn-gbòɔ̀ mú. Gàa ɓěɔ̀ kpa ma peɖeɛ, ké wa dyé ma ɖɛ ɓě ɓɛ́ Ékɛ̃̀ vǐè ma kà ɖé ɔ jàɖàìn-gbòɔ̀ múɛ. Séɓàɖàɔ̀ nì ma ɖé gbɔ kà ɔ nyuɛ ma kà cɛ̃ɛ kɛ.

²³ Ké gàa ɓěɔ̀ zà ma ɖɛ ɓěɔ̀ ɖé jàɖàìn-gbòɔ̀ mú, ké wa dyàà ma Jasúé kè Éézùɖùɛ̀-nyɔ̀ séín ɓěɔ̀ gbo, ké wa pɛ̃́ìn ma wa dyi ɓó Bounɓoɔ̀ gbɔ̀ɖɔ̀ɔ̀ dyúa.

²⁴ Hwɛ̀ ké Jasúé kè Éézùɖùɛ̀-nyɔ̀ séín ɓěɔ̀ ɖú ma Ékɛ̃̀ kè séɓàɖàɔ̀ kè gã́ùnɔ̀ kè góò-kpòɔ̀ kè ɔ dyú-gàà ɓě kè ɔ dyú-màà ɓě kè ɔ ɓìɖǐ ɓě kè ɔ jǎkasì ɓě kè ɔ ɓáɖáá ɓě kè ɔ wiɖi ɓě kè ɔ jàɖàìn-gbòɔ̀ ɔ kè ɔ kɔ̃̀ɔ̀-ɖɛ̀ tɔ̀ɔ̀ séín ɓěɔ̀ dyí, ké wa kpa ma wa ɖé Ákɔ̀ Bɔɔ-kpàɔ̀ kɔ̃.

^25-26 Ti wa ɖǎ ma bɔɔ-kpàɔ̀ kɔ̃ nyiniɛɛ, Jasúé cɛ̃ɛ ma Ékɛ̃̀ gbo, ké ɔ ɖá, “Ɖɛ́ kɔ̃̀ jè m̀ nyùàìn à fũ̀à-fṹá kɛ́? Ɓó kàǔn wɛ̃ɛ, Bounɓoɔ̀ mu mɔ̀ùn fũ̀à-fṹá nyùìn ɖekè.” Ɔ jèɛɛ, Éézùɖùɛ̀-nyɔ̀ séín ɓěɔ̀ taɓaìn ma wa sɔ́ɔ́-kpò dyi, ké wa mɛ́ ma. Ké Éézùɖùɛ̀-nyɔ̀ ɓěɔ̀ fɔ̃ ma waà xwɛ́ ɓěɔ̀ kè waà kɔ̃̀ɔ̀-ɖɛ̀ séín ɓěɔ̀. Ké wa gbǒìn ma wa sɔ́ɔ́-kòò vɛ̀nɛ̀ ɖò kɔ̃. Sɔ́ɔ́-kòò vɛ̀nɛ̀ɔ̀ nì ɖé ke ɓó zɛ̃̌ɛ̀. Bounɓoɔ̀ nyùìn ma Ékɛ̃̀ fũ̀à-fṹá ɖé bɔɔ-kpàɔ̀ kɔ̃ jèɛɛ, wa jǔìn ma bɔɔ-kpàɔ̀ Ákɔ̀-nyɛ̀nɛ̀ kɔ̃̀ xwíníín mɔ̀à fũ̀à-fṹá kɛ. Ké ɔ mɔ̀ bɔɔ-kpàɔ̀ nyɛ́nɛ́ ke ɓó zɛ̃̌ɛ̀. Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Ékɛ̃̀ ɖáɓáa, Bounɓoɔ̀ dyoɖo-hwòɖòɔ̀ wáɖá ma ní.